د لاسرسۍ وړ لېنکونه

تازه خبر
پنجشنبه ۲۴ غبرګولی ۱۴۰۳ کابل ۱۲:۵۰

ښځې

اروپايي ټولنه: افغانستان کې د نجونو ژوند خراب شوی

ارشيف
ارشيف

د اروپایي ټولنې د بهرنیو چارو وزیرانو ویلي، په افغانستان کې د طالبانو له بیا واکمنېدو وروسته د ښځو او نجونو ژوند ډېر خراب شوی دی.

دوی تېره شپه په بروکسل کې د بهرنیو اړیکو شورا له غونډې وروسته یوه ګډه خبرپاڼه کې وویل، د افغانستان ښځې په تدریجي ډول له عامه ځایونو، ښونځیو، پوهنتونونو او کارځایونو څخه حذفیږي او مجبوریږي چې کور کې کیني.

که څه هم طالبان تل ادعا کوي چې ښځو ته یې د اسلامي اصولو له‌مخې حقونه ورکړي دي، خو پر دوی د نړیوالو له‌خوا نیوکه کېږي چې د ښځو لومړني حقونه یې نقض کړي دي.

د طالبانو له واکمنۍ راهیسې د نجونو منځنۍ او لېسې ښونځي بند دي او تېره دسمبر میاشت کې د نجونو پوهنتونونه هم بند اعلان شول.

طالبانو په دې وروستیو کې ښځې په کورنیو او بهرنیو موسسو کې له کار کولو هم منعه کړې.

د ورځې تازه خبرونه دلته ولولئ

یونېسف: له ښوونځیو د افغان نجونو راګرځول سرغړونه ده او د دوی حقونه دې نه برمته کېږي

ارشیف: په بدخشان کې د یوه ښوونځي زده کوونکې او ښوونکې. طالبانو زر ورځې کېږي چې په ټول افغانستان کې له شپږم ټولګي پورته د نجونو پر مخ د ښوونځیو دروازې تړلې دي.
ارشیف: په بدخشان کې د یوه ښوونځي زده کوونکې او ښوونکې. طالبانو زر ورځې کېږي چې په ټول افغانستان کې له شپږم ټولګي پورته د نجونو پر مخ د ښوونځیو دروازې تړلې دي.

د ملګرو ملتونو د ماشومانو د ملاتړ صندوق یا یونېسف وایي، له ښوونځیو د افغان نجونو راګرځول نه یوازې د نجونو له حقونو څخه سرغړونه ده، بلکې دې کار د هغوی فرصتونه ځپلي او رواني ستونزو سره یې مخ کړي دي.

یونېسف دغه څرګندونې په یوه راپور کې نن پنجشنبه داسې مهال کړي چې تر شپږم ټولګي پورته ښوونځیو څخه د نجونو د راګرځولو زر ورځې پوره شوې.

یونېسف ویلي، د ماشومانو په ځانګړې توګه د نجونو حقونه نه باید د سیاستوالو له‌خوا برمته شي.

په راپور کې راغلي، له ښوونځیو د نجونو منع کول پر نجونو سربېره د افغانستان پر اقتصاد او پرمختیا هم ناوړه اغېز کوي.

بېلابېلو سازمانونو تل د طالبانو پر حکومت غږ کړی چې د نجونو ښوونځي پرانېزي، خو طالبانو تراوسه قانع کونکی ځواب نه دی ورکړی.

په ۱۶ ولایتونو کې یو وار بیا د نجونو له حضور پرته د کانکور ازموینې پیل شوې

ارشیف: په افغانستان کې د کانکور ازموینو له بهیره یو انځور
ارشیف: په افغانستان کې د کانکور ازموینو له بهیره یو انځور

د افغانستان په ۱۶ ولایتونو کې یو وار بیا هم د نجونو له حضور پرته د ۱۴۰۳لمریز کال د کانکور ازموینو د لړۍ د پیل خبر ورکړل شوی دی.

ملي راډیو تلوېزیون، چې د طالبانو په کنټرول کې دی، نن پنجشنبه په خپله ایکس­پاڼه یا پخواني ټویټر کې لیکلي چې د دغې لړۍ لومړی پړاو د دوی د ازموینو ملي ادارې د مشر عبدالباقي حقاني له‌خوا په هرات کې پیل شو.

طالبانو څه کم درې کاله کېږي پر افغانستان د ولکې له بیا ټینګولو وروسته نجونو ته تر شپږم ټولګي پورته د نور تعلیم اجازه نه ده ورکړې، دغه راز یې نجونې او ښځې د پوهنتون له زده کړو هم منع کړي دي.

رینا امیري: د ملګرو ملتونو د سرمنشي له مرستیالې سره مې ګټورې خبرې وکړې

د افغان ښځو، نجونو او بشري حقونو لپاره د امریکا ځانګړې استازې رینا امیري
د افغان ښځو، نجونو او بشري حقونو لپاره د امریکا ځانګړې استازې رینا امیري

د افغان ښځو، نجونو او بشري حقونو لپاره د امریکا ځانګړې استازې رینا امیري وايي، د دوحې غونډې په درشل کې یې د سولې او سیاست په چارو کې د ملګرو ملتونو د سرمنشي له مرستیالې روزمیري ډي کارلو سره ګټورې خبرې کړې دي.

مېرمن امیري دغه خبرې د پنجشنبې په ورځ د غبرګولي د میاشتې په ۱۷ مه نېټه پر ایکس شبکه یا پخواني ټویټر کړې دي.

هغه وویل، دا غونډه د بشري حقونو په ځانګړي ډول د ښځو او نجونو د وضعیت او د دوحې په درېیمه ناسته کې د مدني ټولنې د ګډون لپاره د دې د دفتر د هڅو یوه برخه ده.

ټاکل شوې د افغانستان په اړه په دوحه کې درېیمه غونډه د روانې جون میاشتې په پای کې جوړه شي.

د آغلې امیري په وینا، د طالبانو تر واکمنۍ لاندې د افغان ښځو او نجونو د ناوړه وضعیت له امله د افغان فکري مشرانو ملاتړ او همکاري اړینه ده.

د ۲۰۲۱م کال په اګست میاشت کې واک ته د طالبانو له راتګ سره په افغانستان کې پر ښځو او نجونو سخت بندیزونه ولګول شول چې د نړیوالې ټولنې انتقادونه یې راپارولي دي.

د معترضو مېرمنو ځينو ډلو د دوحې په غونډه کې د طالبانو له ګډون سره مخالفت وکړ

ارشیف: د معترضو مېرمنو د اعتراضیه غونډې انځور
ارشیف: د معترضو مېرمنو د اعتراضیه غونډې انځور

د افغان معترضو مېرمنو یو شمېر ډلو د ملګرو ملتونو په کوربتوب د دوحې په راروانه غونډه کې د طالبانو د استازیو له ګډون سره مخالفت څرګند کړی دی.

دغو ډلو پرون په جلا جلا اعلامیو کې ویلي چې طالبان په افغانستان کې په سیستماتیک ډول د ښځو او نجونو له حقونو څخه سرغړونو ته دوام ورکوي، نو د دوی مخه باید په نړیوالو غونډو کې ونیول شي.

ارغواني شنبې غورځنګ، د ښځو د هیلې د کړکۍ په نوم غورځنګ او یو شمېر نورو ښځینه فعالانو د دوحې په درېیمه غونډه کې د طالبانو د ګډون مخالفت کړی دی.

ملګرو ملتونو ویلي چې د روانې جون میاشتې په دېرشمه به د سرمنشي انټونیو ګوټېرېش په مشرۍ د افغانستان لپاره د قطر په پلازمېنه دوحه کې دوه ورځنۍ غونډه جوړه شي.

ملګرو ملتونو طالبانو ته په دې غونډه کې د ګډون بلنه ورکړې ده.

طالبانو ویلي چې ښایي د دې غونډې په اصلي بحثونو کې برخه واخلي.

افغان سېلاب ځپلو مېرمنو ته د بېړنیو روغتیایي خدمتونو د وړاندې کولو خبر ورکړل شو

د بغلان د وروستیو سېلابونو له کبله زیانمنې مېرمنې او ماشومان
د بغلان د وروستیو سېلابونو له کبله زیانمنې مېرمنې او ماشومان

د ملګرو ملتونو د نفوسو صندوق په افغانستان کې د سېلابونو زیانمنو ښځو او نجونو سره د بېړنیو روغتیایي خدمتونو د وړاندې کولو خبر ورکوي.

دې صندوق پرون چهارشنبې په یوه بیان کې ویلي چې د دې صندوق په ملاتړ په افغانستان کې ۲۱۶ ګرځنډه روغتیایي ټیمونه فعال دي او په کلیوالو سیمو او هغو سیمو کې چې لاسرسی ورته ګران دي، ښځو او نجونو ته د بېړني زېږون او رواني ملاتړ په برخو خدمات وړاندې کوي.

د ملګرو ملتونو د نفوسو صندوق ویلي، په بغلان ولایت کې چې هلته وروستیو سېلابونو ډېره وراني پېښه کړې، په اوس وخت کې یې څلور روغتیایي ټیمونه فعال چې په هر ټیم کې یو ډاکتر، یو نرس، یوه قابله، یو واکسیناتور او د درملو یو متخصص شامل دي.

په عین حال کې د افغانستان لپاره د سره صلیب نړیوالې کمېټې پرون چهارشنبې په خپله ایکس‌پاڼه له افغاني سرې میاشتې سره په ګډه په بغلان کې له سېلاب ځپلو سره د بېړنیو روغتیایي خدمتونو او موقتې سرپناه د برابرولو خبر ورکوي.

خو د دې کمېټې په وینا، په بغلان کې د سېلابونو زیانمنې زر کورنۍ سخت بشري مرستو ته اړې دي.

ایران د حجاب د نویو مقرراتو تطبیق لپاره نوی ځواک جوړ کړی

د ایران ځواکونه د حجاب په تړاو له یو شمېر مېرمنو سره په خبرو بوخت دي.
د ایران ځواکونه د حجاب په تړاو له یو شمېر مېرمنو سره په خبرو بوخت دي.

د ایران په پلازمېنه تهران کې د سپاه پاسداران انقلاب ځواک قوماندان حسن حسن زاده پرون د هغه نوي اضافي ځواک د جوړېدو اعلان وکړ چې دنده به یې د ښځو د حجاب په برخه کې د نويو محدودیتونو تطبیق وي.

حسن زاده وویل د دې ځواک غړي د دې لپاره روزل شوي چې په عامه ځایونو کې د حجاب نوي مقررات په جدي ډول عملي کړي.

دا اعلان وروسته له هغه کېږي چې ایراني چارواکو په وروستیو ورځو کې د امر باالمعروف او نهی عن المنکر اړوند فعالیتونه پراخ کړي او په دې ترڅ کې یې د یونیفورم لرونکو مامورینو تصویرونه خپاره کړي چې د "رڼا" تر سرلیک لاندې د ځانګړو عملیاتو په ترڅ کې ښځو ته سپارښتنې کوي.

د ۲۰۲۲م کال په سپټمبر میاشت کې وروسته له دې چې د مهساامیني په نوم یوه پېغله د چارواکو په معیار د حجاب د نه مراعاتولو په تور ونیول شوه او بیا یې د پولیسو په توقیف کې سا ورکړه په ایران کې داسې پراخ اعتراضونه پیل شول چې د اسلامي جمهوریت له واکمنېدو راهیسې یې ساری نه و، لیدل شوی.

بینېټ: د زده‌کړو د سیستم له منځه وړل او یا پرې محدودیت لګول د منلو وړ نه دي

د افغانستان د بشري حقونو لپاره د ملګرو ملتونو ځانګړی راپورتر ریچارډ بینېټ
د افغانستان د بشري حقونو لپاره د ملګرو ملتونو ځانګړی راپورتر ریچارډ بینېټ

د افغانستان د بشري حقونو لپاره د ملګرو ملتونو ځانګړی راپورتر وايي، تعلیم ته لاسرسی هغه اساسي حق دی چې باید په ټوله نړۍ کې یې ساتنه وشي.

ریچارډ بینېټ پر ایکس شبکې په یوه بیان کې له هغه آنلاین هشتګ سره چې (د تعلیم آزادي او تعلیم د ټولو لپاره) تر عنوان لاندې پیل شوی، د ګډون له کبله خوښي څرګنده کړې او ویلي یې دي چې د زده کړو د سیستم له منځه وړل او یا پر هغه محدودیت لګول د منلو وړ نه دي.

دا څرګندونې داسې مهال کېږي چې طالبانو پر افغانستان له واکمنېدو وروسته په تېرو څه باندې دوه نیمو کلونو کې د نجونو پرمخ د منځنیو ښوونځیو، لېسو او پوهنتونونو دروازې بندې کړي او پر ډېری ښځو یې د کار بندیز لګولی دی.

امیري د البانیا له ولسمشر او بهرنیو چارو وزیر سره د افغان ښځو پر ملاتړ خبرې کړي

د افغان ښځو، نجونو او بشري حقونو لپاره د امریکا د متحدو ایالتونو ځانګړې استازې رینا امیري
د افغان ښځو، نجونو او بشري حقونو لپاره د امریکا د متحدو ایالتونو ځانګړې استازې رینا امیري

د افغان ښځو، نجونو او بشري حقونو لپاره د امریکا د متحدو ایالتونو ځانګړې استازې رینا امیري وايي، د البانیا له ولسمشر او بهرنیو چارو وزیر سره یې د افغان ښځو او نجونو پر ملاتړ خبرې وکړې.

رینا میري نن سهار وختي په خپله ایکس شبکه کې لیکلي، د البانیا له ولسمشر بایرام بګای، دغه راز د اروپا او بهرنیو چارو وزیر ایګلي حسني سره په کتنه کې یې د افغان وګړو د ملاتړ له کبله د البانیا د حکومت د حیاتي همکارۍ مننه وکړه.

مېرمن امیري لیکلي، هغې په ځانګړې ډول د افغان ښځو او نجونو د ملاتړ له کبله د البانیا مننه کړې ده.

البانیا له هغو هېوادونو دی چې د ښځو او نجونو په ګډون په سلګونو افغان پناه غوښتونکي په کې نورو غربي هېوادونو ته د تلو په نیت په لنډمهاله توګه دېره دي او تر اوسه یې برخلیک معلوم نه دی.

فرانسې د افغان ښځو د سنګسار او جسمي سزا ورکولو د لړۍ پيلول وغندل

د فرانسې بیرغ
د فرانسې بیرغ

فرانسې د طالبانو حکومت هغه پرېکړه په کلکه غندلې چې د ښځو د سنګسار او هغوی ته یې د جسمي سزا د ورکولو د لړۍ د پیل په اړه کړې ده.

د فرانسې د بهرنیو چارو وزارت پرون ناوخته یوه اعلامیه کې دا عمل وحشتناک او د بنسټیزو حقونو او ازادیو سره ټکر کې بللی دی.

د فرانسې د بهرنیو چارو وزارت په اعلامیه کې زیاته شوې: "د ملګرو ملتونو امنیت شورا د فرانسې په ګډون دا روښانه کړې چې د ښځو حقونو ته درناوی د هر ډول خبرو اترو لپاره یو شرط دی."

په دې اعلامیه کې د طالبانو له حکومت غوښتل شوي چې د نجونو او ښځو سره د ظلم او حذف پالیسۍ له‌منځه یوسي.

دا په داسې حال کې ده چې وروستیو کې د طالبانو مشر ملاهبت‌الله ته یو منسوب غږ کې چې د دوی د حکومت تر کنټرول لاندې ملي تلوېزیون هم خپور کړ؛ په عام محضر کې نجونو او ښځو ته د سنګسار او سزاوو ورکولو په اړه خبرداری ورکول شوی و.

خو په دې اړه له ډېر شمېر نیوکو وروسته، د طالبانو حکومت تر کنټرول لاندې ملي تلوېزیون دا غږیز کلیپ له خپلو ټولنیزو پاڼو لېرې کړ.

امیري: طالبان دې د بندي او تري تم شویو کسانو کورنیو ته ځواب ورکوونکي ووسي

د افغانستان د بشري حقونو، ښځو او نجونو لپاره د امریکا ځانګړې استازې
د افغانستان د بشري حقونو، ښځو او نجونو لپاره د امریکا ځانګړې استازې

د افغانستان د بشري حقونو، ښځو او نجونو لپاره د امریکا ځانګړې استازې د طالبانو له حکومته غوښتي چې د توقیف شویو او تري تم شویو کسانو کورنیو ته ځواب ورکوونکي ووسي.

رینا امیري له حقیقته د خبرېدو د نړیوالې ورځې په مناسبت چې پرون د مارچ په ۲۴مه ونمانځل شوه، دغه څرګندونې کړې دي.

هغې که څه هم نه دي ویلي چې څه شمېر کسان په افغانستان کې د طالبانو له خوا توقیف او تري تم دي، خو زیاته کړې ده چې یوشمېر کورنۍ د خپلو غړو د تري تم کېدو او توقیف ځایونو د موندلو هڅه کوي.

د راپورونو له مخې له تېرې اکټوبر میاشتې راهیسې د افغانستان د خودجوشه ښځو د غورځنګ غړې منیژه صدیقي او د تعلیم دوه فعالان احمد فهیم عظیمي او صدیق الله افغان د طالبانو د استخباراتو په توقیف کې دي او برخه لیک یې معلوم نه دی.

د طالبانو استخبارات هم په اسانه د دوی له خوا د توقیف شویو کسانو د ځای ځایږي په اړه معلومات نه ورکوي.

نور راوښيه

XS
SM
MD
LG