د لاسرسۍ وړ لېنکونه

تازه خبر
یکشنبه ۲۷ غبرګولی ۱۴۰۳ کابل ۰۸:۱۵

ښځې

ملګري ملتونه: زده‌کړه او تحصيل د افغان نجونو بشري حق دی

ارشيف
ارشيف

د ملګرو ملتونو یوه اداره وايي، تعلیم او تحصیل یو بشري حق دی، چې سترګې نه‌شي ورڅخه پټېدلای.

د کډوالو په چارو کې د ملګرو ملتونو د لویې کمشنرۍ د اسیاپسفیک څانګې پرون په خپل رسمي ټویټر کې لیکلي، زده‌کړې که لومړنۍ، منځنۍ او لوړې وي، په هر پړاو کې یو بشري حق دی.

د ټویټ له‌مخې په افغانستان کې ښځې او نجونې د یوه چانس مستحقې دي، چې خپل ټول ظرفیتونه وښيي او د خپل هېواد په پرمختیا کې ونډه واخلي.

طالبانو لا هم نجونو ته په افغانستان کې تر شپږم ټولګي پورته د نور تعلیم اجازه نه‌ده ورکړې او په تېره ډسمبر میاشت کې یې د نجونو او ښځو د پوهنتونو زده‌کړې هم منع اعلان کړې.

د ورځې تازه خبرونه دلته ولولئ

د بخښنې نړیوال سازمان: طالبان دې تر شپږم ټولګي پورته د نجونو نور تعلیم اجازه ورکړي

په افغانستان کې د یوه ښوونځي زده کوونکې. طالبانو په ټول افغانستان کې تر شپږم ټولګي پورته د نجونو پر زده کړو بندیز لګولی دی.
په افغانستان کې د یوه ښوونځي زده کوونکې. طالبانو په ټول افغانستان کې تر شپږم ټولګي پورته د نجونو پر زده کړو بندیز لګولی دی.

د بخښنې نړیوال سازمان یا امنسټي انټرنېشنل د طالبانو له حکومت غوښتنه کړې چې نجونو ته تر شپږم ټولګي پورته د نور تعلیم اجازه ورکړي.

دغه بنسټ پرون ناوخته په خپله ایکس­پاڼه یا پخواني ټویټر کې د طالبانو تر واکمنۍ لاندې افغانستان کې تر شپږم ټولګي پورته د نجونو پر نور تعلیم د بندیز د زرو ورځو پوره کېدو په مناسبت دا څرګندونې کړې دي.

د بخښنې نړیوال سازمان دغه بندیز له نړیوالو قوانینو سرغړونه بللې ده.

تېره پنجشنبه د غبرګولي یا جوزا ۲۴مه په افغانستان کې تر شپږم ټولګي پورته د نجونو پر نور تعلیم د طالبانو د لګول شوي بندیز ۱۰۰۰ ورځې پوره شوې.

طالبانو د نجونو د تعلیم لپاره د ناسمو شرایطو یادونه کړې، خو نه یې دي ویلي چې دغه ښوونځي به دقیقاً کله بیا پرانیستل شي.

د ماشومانو د ملاتړ لپاره د ملګرو ملتونو مرستندوی صندوق یا یونېسف ویلي چې د نجونو پر تعلیم د زرو ورځو بندیز د درې ملیارده درسي ساعتونو له ضایع کېدو سره برابر دی.

طالبانو په افغانستان کې د نجونو او ښځو د پوهنتون زده کړې هم منع اعلان کړې دي.

بینېټ: پر افغان نجونو د زده‌کړو بندیز د منلو نه دی، دوی باید ښوونځيو ته ولاړې شي

د افغانستان د بشري حقونو په برخه کې د ملګرو ملتونو ځانګړی راپور ورکوونکی ریچارډ بینېټ
د افغانستان د بشري حقونو په برخه کې د ملګرو ملتونو ځانګړی راپور ورکوونکی ریچارډ بینېټ

د افغانستان د بشري حقونو په برخه کې د ملګرو ملتونو ځانګړي راپور ورکوونکي ریچارډ بینېټ یوځل بیا ټینګار کړی چې افغان نجونې باید ښوونځيو ته ولاړې شي.

بینېټ دا څرګندونې په افغانستان کې تر شپږم ټولګي ورپورته د نجونو د ښوونځیو د بندېدو د زر ورځو د تېرېدو په تړاو کړې دي.

ده نن په ایکسپاڼه یا پخواني ټویټر کې لیکلي چې دا بندیز نه ده منلو دی نه د تصور وړ دی او لا هم د زرو ورځو له تېرېدو وروسته په میلیونونو افغان نجونو خپلې هیلې له لاسه نه دي ورکړي.

پرون پنجشنبه د جون ۱۳مه په افغانستان کې تر شپږم ټولګي ورپورته د نجونو د ښوونځیو د بندیدو ۱۰۰۰ ورځې پوره شوې.

طالبانو د نجونو د منځنیو ښوونځيو او لېسو تر بندېدو وروسته د ۲۰۲۲م کال په ډسمبر کې نجونې له پوهنتونونو هم راوګرځولې.

بریتانیا: افغان نجونو او ښځو د زده‌کړو ۱۰۰۰ ورځې له لاسه ورکړې

ارشیف: په فراه کې د نجونو یو ښوونځی. طالبانو په ټول افغانستان کې له شپږم ټولګي پورته د نجونو پر زده کړو بندیز لګولی دی.
ارشیف: په فراه کې د نجونو یو ښوونځی. طالبانو په ټول افغانستان کې له شپږم ټولګي پورته د نجونو پر زده کړو بندیز لګولی دی.

په افغانستان کې تر شپږم ټولګي ورپورته د نجونو د ښوونځیو پر بندېدو د اعتراضونو په ترڅ کې د بریتانیا سفارت ویلي چې افغان نجونو او ښځو د زده‌کړو ۱۰۰۰ ورځې له لاسه ورکړې.

د افغانستان لپاره د بریتانیا سفارت پر خپل ایکسپاڼه یا پخواني ټویټر د پنجشنبې په ورځ لیکلي چې د افغانستان د سولې، ثبات او پرمختګ لپاره د ښځو زده‌کړې حیاتي دي.

وړاندې په دې پيغام کې راغلي چې بریتانیا د افغان نجونو او ښځو ملاتړ ته ژمنه ده.

پرون پنجشنبه د جون ۱۳مه په افغانستان کې تر شپږم ټولګي ورپورته د نجونو د ښوونځیو د بندېدو زر ورځې پوره شوې.

طالبانو د نجونو د منځنیو ښوونځیو او لېسو تر بندېدو وروسته د ۲۰۲۲م کال په ډسمبر کې نجونې له پوهنتونونو هم راوګرځولې.

امیري: د ۱۰۰۰ ورځو خوبونه له خاورو سره خاورې شول او د افغانستان راتلونکی له منځه ولاړه

د افغانستان د ښځو، نجونو او بشري حقونو لپاره د امریکا ځانګړې استازې رینا امیري
د افغانستان د ښځو، نجونو او بشري حقونو لپاره د امریکا ځانګړې استازې رینا امیري

د افغانستان د ښځو، نجونو او بشري حقونو لپاره د امریکا ځانګړې استازې رینا امیري په افغانستان کې له شپږم ټولګي پورته له زده‌کړو د نجونو د محرومیت ۱۰۰۰ ورځو ته په اشارې وايي چې د ځوانانو د زرو ورځو خوبونه له خاورو سره خاورې شول او د افغانستان راتلونکی له منځه ولاړه.

اغلې امیري بېګا په ایکسپاڼه یا پخواني ټویټر همداراز لیکلي، افغانستان په نړۍ کې یوازېنی هېواد دی چې داسې افراطي سیاستونه په‌کې تعقیبېږي او له همدې امله په انزوا کې دی.

وروسته له هغه چې طالبانو د ۲۰۲۱م کال په اګست میاشت کې پر افغانستان واک تر لاسه کړ، دوی د افغان نجونو پر مخ د منځنیو ښوونځیو او لېسو دروازې وتړلې او له هغې راهیسې څه باندې ۱۰۰۰ ورځې ووتې.

طلبان وايي، د نجونو زده‌کړو پیلولو لپاره ترتیب برابروي، خو نیوکه دا ده چې دوی په پلمې جوړوي او نه غواړي څو نجونې زده‌کړې وکړي.

یونېسف: له ښوونځیو د افغان نجونو راګرځول سرغړونه ده او د دوی حقونه دې نه برمته کېږي

ارشیف: په بدخشان کې د یوه ښوونځي زده کوونکې او ښوونکې. طالبانو زر ورځې کېږي چې په ټول افغانستان کې له شپږم ټولګي پورته د نجونو پر مخ د ښوونځیو دروازې تړلې دي.
ارشیف: په بدخشان کې د یوه ښوونځي زده کوونکې او ښوونکې. طالبانو زر ورځې کېږي چې په ټول افغانستان کې له شپږم ټولګي پورته د نجونو پر مخ د ښوونځیو دروازې تړلې دي.

د ملګرو ملتونو د ماشومانو د ملاتړ صندوق یا یونېسف وایي، له ښوونځیو د افغان نجونو راګرځول نه یوازې د نجونو له حقونو څخه سرغړونه ده، بلکې دې کار د هغوی فرصتونه ځپلي او رواني ستونزو سره یې مخ کړي دي.

یونېسف دغه څرګندونې په یوه راپور کې نن پنجشنبه داسې مهال کړي چې تر شپږم ټولګي پورته ښوونځیو څخه د نجونو د راګرځولو زر ورځې پوره شوې.

یونېسف ویلي، د ماشومانو په ځانګړې توګه د نجونو حقونه نه باید د سیاستوالو له‌خوا برمته شي.

په راپور کې راغلي، له ښوونځیو د نجونو منع کول پر نجونو سربېره د افغانستان پر اقتصاد او پرمختیا هم ناوړه اغېز کوي.

بېلابېلو سازمانونو تل د طالبانو پر حکومت غږ کړی چې د نجونو ښوونځي پرانېزي، خو طالبانو تراوسه قانع کونکی ځواب نه دی ورکړی.

په ۱۶ ولایتونو کې یو وار بیا د نجونو له حضور پرته د کانکور ازموینې پیل شوې

ارشیف: په افغانستان کې د کانکور ازموینو له بهیره یو انځور
ارشیف: په افغانستان کې د کانکور ازموینو له بهیره یو انځور

د افغانستان په ۱۶ ولایتونو کې یو وار بیا هم د نجونو له حضور پرته د ۱۴۰۳لمریز کال د کانکور ازموینو د لړۍ د پیل خبر ورکړل شوی دی.

ملي راډیو تلوېزیون، چې د طالبانو په کنټرول کې دی، نن پنجشنبه په خپله ایکس­پاڼه یا پخواني ټویټر کې لیکلي چې د دغې لړۍ لومړی پړاو د دوی د ازموینو ملي ادارې د مشر عبدالباقي حقاني له‌خوا په هرات کې پیل شو.

طالبانو څه کم درې کاله کېږي پر افغانستان د ولکې له بیا ټینګولو وروسته نجونو ته تر شپږم ټولګي پورته د نور تعلیم اجازه نه ده ورکړې، دغه راز یې نجونې او ښځې د پوهنتون له زده کړو هم منع کړي دي.

رینا امیري: د ملګرو ملتونو د سرمنشي له مرستیالې سره مې ګټورې خبرې وکړې

د افغان ښځو، نجونو او بشري حقونو لپاره د امریکا ځانګړې استازې رینا امیري
د افغان ښځو، نجونو او بشري حقونو لپاره د امریکا ځانګړې استازې رینا امیري

د افغان ښځو، نجونو او بشري حقونو لپاره د امریکا ځانګړې استازې رینا امیري وايي، د دوحې غونډې په درشل کې یې د سولې او سیاست په چارو کې د ملګرو ملتونو د سرمنشي له مرستیالې روزمیري ډي کارلو سره ګټورې خبرې کړې دي.

مېرمن امیري دغه خبرې د پنجشنبې په ورځ د غبرګولي د میاشتې په ۱۷ مه نېټه پر ایکس شبکه یا پخواني ټویټر کړې دي.

هغه وویل، دا غونډه د بشري حقونو په ځانګړي ډول د ښځو او نجونو د وضعیت او د دوحې په درېیمه ناسته کې د مدني ټولنې د ګډون لپاره د دې د دفتر د هڅو یوه برخه ده.

ټاکل شوې د افغانستان په اړه په دوحه کې درېیمه غونډه د روانې جون میاشتې په پای کې جوړه شي.

د آغلې امیري په وینا، د طالبانو تر واکمنۍ لاندې د افغان ښځو او نجونو د ناوړه وضعیت له امله د افغان فکري مشرانو ملاتړ او همکاري اړینه ده.

د ۲۰۲۱م کال په اګست میاشت کې واک ته د طالبانو له راتګ سره په افغانستان کې پر ښځو او نجونو سخت بندیزونه ولګول شول چې د نړیوالې ټولنې انتقادونه یې راپارولي دي.

د معترضو مېرمنو ځينو ډلو د دوحې په غونډه کې د طالبانو له ګډون سره مخالفت وکړ

ارشیف: د معترضو مېرمنو د اعتراضیه غونډې انځور
ارشیف: د معترضو مېرمنو د اعتراضیه غونډې انځور

د افغان معترضو مېرمنو یو شمېر ډلو د ملګرو ملتونو په کوربتوب د دوحې په راروانه غونډه کې د طالبانو د استازیو له ګډون سره مخالفت څرګند کړی دی.

دغو ډلو پرون په جلا جلا اعلامیو کې ویلي چې طالبان په افغانستان کې په سیستماتیک ډول د ښځو او نجونو له حقونو څخه سرغړونو ته دوام ورکوي، نو د دوی مخه باید په نړیوالو غونډو کې ونیول شي.

ارغواني شنبې غورځنګ، د ښځو د هیلې د کړکۍ په نوم غورځنګ او یو شمېر نورو ښځینه فعالانو د دوحې په درېیمه غونډه کې د طالبانو د ګډون مخالفت کړی دی.

ملګرو ملتونو ویلي چې د روانې جون میاشتې په دېرشمه به د سرمنشي انټونیو ګوټېرېش په مشرۍ د افغانستان لپاره د قطر په پلازمېنه دوحه کې دوه ورځنۍ غونډه جوړه شي.

ملګرو ملتونو طالبانو ته په دې غونډه کې د ګډون بلنه ورکړې ده.

طالبانو ویلي چې ښایي د دې غونډې په اصلي بحثونو کې برخه واخلي.

افغان سېلاب ځپلو مېرمنو ته د بېړنیو روغتیایي خدمتونو د وړاندې کولو خبر ورکړل شو

د بغلان د وروستیو سېلابونو له کبله زیانمنې مېرمنې او ماشومان
د بغلان د وروستیو سېلابونو له کبله زیانمنې مېرمنې او ماشومان

د ملګرو ملتونو د نفوسو صندوق په افغانستان کې د سېلابونو زیانمنو ښځو او نجونو سره د بېړنیو روغتیایي خدمتونو د وړاندې کولو خبر ورکوي.

دې صندوق پرون چهارشنبې په یوه بیان کې ویلي چې د دې صندوق په ملاتړ په افغانستان کې ۲۱۶ ګرځنډه روغتیایي ټیمونه فعال دي او په کلیوالو سیمو او هغو سیمو کې چې لاسرسی ورته ګران دي، ښځو او نجونو ته د بېړني زېږون او رواني ملاتړ په برخو خدمات وړاندې کوي.

د ملګرو ملتونو د نفوسو صندوق ویلي، په بغلان ولایت کې چې هلته وروستیو سېلابونو ډېره وراني پېښه کړې، په اوس وخت کې یې څلور روغتیایي ټیمونه فعال چې په هر ټیم کې یو ډاکتر، یو نرس، یوه قابله، یو واکسیناتور او د درملو یو متخصص شامل دي.

په عین حال کې د افغانستان لپاره د سره صلیب نړیوالې کمېټې پرون چهارشنبې په خپله ایکس‌پاڼه له افغاني سرې میاشتې سره په ګډه په بغلان کې له سېلاب ځپلو سره د بېړنیو روغتیایي خدمتونو او موقتې سرپناه د برابرولو خبر ورکوي.

خو د دې کمېټې په وینا، په بغلان کې د سېلابونو زیانمنې زر کورنۍ سخت بشري مرستو ته اړې دي.

ایران د حجاب د نویو مقرراتو تطبیق لپاره نوی ځواک جوړ کړی

د ایران ځواکونه د حجاب په تړاو له یو شمېر مېرمنو سره په خبرو بوخت دي.
د ایران ځواکونه د حجاب په تړاو له یو شمېر مېرمنو سره په خبرو بوخت دي.

د ایران په پلازمېنه تهران کې د سپاه پاسداران انقلاب ځواک قوماندان حسن حسن زاده پرون د هغه نوي اضافي ځواک د جوړېدو اعلان وکړ چې دنده به یې د ښځو د حجاب په برخه کې د نويو محدودیتونو تطبیق وي.

حسن زاده وویل د دې ځواک غړي د دې لپاره روزل شوي چې په عامه ځایونو کې د حجاب نوي مقررات په جدي ډول عملي کړي.

دا اعلان وروسته له هغه کېږي چې ایراني چارواکو په وروستیو ورځو کې د امر باالمعروف او نهی عن المنکر اړوند فعالیتونه پراخ کړي او په دې ترڅ کې یې د یونیفورم لرونکو مامورینو تصویرونه خپاره کړي چې د "رڼا" تر سرلیک لاندې د ځانګړو عملیاتو په ترڅ کې ښځو ته سپارښتنې کوي.

د ۲۰۲۲م کال په سپټمبر میاشت کې وروسته له دې چې د مهساامیني په نوم یوه پېغله د چارواکو په معیار د حجاب د نه مراعاتولو په تور ونیول شوه او بیا یې د پولیسو په توقیف کې سا ورکړه په ایران کې داسې پراخ اعتراضونه پیل شول چې د اسلامي جمهوریت له واکمنېدو راهیسې یې ساری نه و، لیدل شوی.

نور راوښيه

XS
SM
MD
LG