متحده عربي اماراتو پرون جمعه په افغانستان کې د وروستۍ زلزلې زیانمن شویو ته ۳۸ ټنه طبي او خوراکي مرسته واستوله.

دا خبره د متحده عربي اماراتو دولتي خبري اژانس وام اعلان کړه.

د افغانستان د تېرې اووني په زلزله کې، چې شدت یې د ریښتر په کچه ۶ اعشاریه ۵ درجې و، لږترلږه ۱۳ تنه مړه او تر ۹۰ ډېر نور ژوبل شول.

د طالبانو په کنټرول کې د کډوالو او او بېرته راستنېدونکو چارو وزارت وايي، تر اوسه د پاکستان له زندانونو تر زرو ډېر افغان پناه غوښتونکي خوشې شوي او افغانستان ته لېږدول شوي دي.

دې وزارت د مارچ په ۳۱مه په یو لړ ټویټونو کې ویلي، یوازې په همدې ورځ ۱۷ افغانان له خوشې کېدو وروسته د سپین بولدک له لارې افغانستان ته لېږدول شوي دي.

یاد وزارت وايي، په پاکستان کې د بندي افغانانو د خوشې کولو لپاره په اسلام اباد کې د افغانستان سفارت ډېرې هڅې کړې دي.

له دې مخکې ویل شوي وو چې تر ۱۵۰۰ افغانان د پاکستان په زندانونو کې شپې او ورځې تېروي چې ډېری برخه یې په کراچۍ کې بندیان دي.

د افغانستان لپاره د ملګرو ملتونو ځانګړې استازې روزا اوتانبایوا د طالبانو حکومت د رییس الوزرا له سیاسي مرستیال سره په لیدنه کې ټینګار کړی چې د افغانستان ستونزه باید د خبرو او تفاهم له لارې حل شي.

د رییس الوزرا د رسنیو د دفتر د خبرپاڼې پر اساس اوتنبایوا دغه راز وویل، ملګري ملتونه په دې برخه کې هڅه کوي چې افغانستان سره بشري مرستو ته دوام ورکړي.

په دې لیدنه کې مولوي عبدالکبیر ویلي، د دوی حکومت د رسمیت پېژندنې لپاره د نړیوالې ټولنې ټول شرطونه بشپړ کړي او باید په رسمیت وپېژندل شي.

د نږدې شلو میاشتو په تېرېدو لا هم هېڅ هېواد د طالبانو حکومت په رسمیت نه دی پېژندلی.

نړیوالې ټولنې په ځلونو ویلي، له طالبانو سره د تعامل لپاره اصلي شرط د بشري حقونو په ځانګړې توګه د ښځو او نجونو د حقونو رعایت دی ځکه په دې موده کې د افغان ښځو کار، زده کړې او ټولنیز فعالیتونه محدود شوي او طالبانو هم د دې محدودیتونو د لرې کولو لپاره هېڅ اقدام نه دی کړی.

د افغانستان تر ۱۹کلنو کم عمره کرکټ لوبډله نن له سریلانکا سره سیالي لري.

لوبه له ماسپښین وروسته د افغانستان پر وخت درې نیمې بجې په متحده عرب اماراتو کې پیلېږي.

په مخکینۍ لوبه کې چې د مارچ په ۲۸مه شوې وه افغان لوبډلې د سریلانکا لوبډلې ته په څلورو منډو ماتې ورکړې وه.

خو افغان لوبډلې تېره پنجشنبه د بنګله دېش لوبډلې پر وړاندې په لوی توپیر ماتې خوړلې وه.

افغان کرکټ لوبډله د روانې لوبلړۍ د جدول په سر کې دی چې درې لوبې یې ګټلي او دوه یې بایللي دي.

ورپسې بنګله دېشۍ لوبډله دویم او د سریلانکا لوبډله په درېیو ماتو سره درېیم ځای کې قرار لري.

دغې کمېټې نن جمعه په یوه بیان کې له طالبانو غوښتي، چې پرېږدي په بدخشان کې د 'صدای بانوان' راډيو خپل کار ته ادامه ورکړي.

د دې راډیو له مسولینو څخه يو تن چې د موضوع د حساسیت له کبله يې نه‌غوښتل نوم يې واخیستل شي ازادي راډیو ته ویلي، د تخنیکي همکارانو له‌خوا په سهوي ډول د موسیقۍ له خپرېدو وروسته د پنجشنبې په ورځ د دې راډیو نشرات بند شوي دي.

په بدخشان کې د طالبانو د حکومت د اطلاعاتو او فرهنګ رئیس معزالدین احمدي له ازادي راډیو سره په خبرو کې د «صدای بانوان » راډیو د تړل کېدو پخلی وکړ او ویې ویل چې، دا راډیو د طالبانو د حکومت د نشراتي قوانینو د پرله‌پسې سرغړونو له امله تړل شوې ده.

د خبريالانو د خونديتوب کمېټه وايي، د صدای بانوان راډيو په ٢٠١٤ کال کې جوړه شوې او شپږ کارکوونکي لري.

د نيمروز ولایت د اطلاعاتو او فرهنګ ریاست په یوه بیان کې ویلي، دغه بندیان طالب چارواکو ته په زرنج ښار کې سپارل شوي.

په بیان کې نه‌دي ویل شوي چې، څه وخت دا کسان سپارل شوي دي.

د دې ریاست په خبره، دا افغانان د زاهدان له زندان نه خوشې شوي دي.

په وروستیو څو اوونیو کې په لسګونه افغان بندیان د ایران له زندانونو خوشې شوي او افغانستان ته انتقال شوي دي.

طالبانو په هلمند کې خلګو ته خبرداری ورکړی؛ که تراویح ونه‌کړي له عکس العمل سره به مخامخ شي.

دا خبرداری د هلمند د طالبانو د امربالمعروف او نهي عن المنکر ریاست په یوې رسمي اعلامیې کې ورکړی دی.

دا اعلامیه، چې د هلمند ولایت د اطلاعاتو او کلتور ریاست له لوري هم خپره شوې، د دغه ولایت د ټولو جوماتونو امامانو ته خبر ورکوي چې د خپلې سیمې اوسېدونکي تراویح کولو ته اړ کړي.

د روغتیا نړیوال سازمان یا ډبلیو‌ایچ‌او وايي، د طالبانو له واک ته رسېدو وروسته روغتیايي سکتور تر بل هر سکتور زیات زیانمن شوی دی.

د دې سازمان د مالوماتو پر اساس، افغانان اوس د روغتیا په برخه کې پر بشري مرستو متکي دي.

د روغتیا نړیوال سازمان پرون (پنجشنبې) د افغانستان د روغتیايي وضعیت په اړه په خپل راپور کې وویل، ډبلیو‌ایچ‌او د افغانستان په لېرې پرتو سیمو کې د ډېرو محتاجو کسانو لپاره روغتیايي مرکزونه جوړ کړي او تر ۲ لکه ۲۰ زره ډېرو کسانو ته یې طبي خدمات وړاندې کړي دي.

د بدخشان ولایت د ۵ ولسوالیو مواصلاتي لارې د غرونو د ښوېدو له کبله بندې شوي دي.

د طالبانو تر کنترول لاندې باختر خبري اژانس پرون (پنجشنبې) راپور ورکړ چې، د مایمي ولسوالۍ په پلچک چوبي سیمه کې غر ښوېدلی دی.

په مایمي ولسوالۍ کې د طالبانو د حکومت ولسوال مخدوم عبدالله راشدي ویلي، د دې پېښې په نتیجه کې د خواهان، نسي، شکي، مایمي او کوف اب ولسوالیو ترمنځ د تګ راتګ لارې له درو ورځو راهیسې بندې دي.

دا خبر داسې مهال ورکول شوی دی چې، د افغانستان هوا پېژندنې ادارې په ډېری ولايتونو کې د سختو ورښتونو اټکل کړی دی.

جاپان او اروپايي اتحاديې زرګونه افغانانو ته حرفوي زده‌کړې ورکړي.

د افغانستان لپاره د ملګروملتو پراختیايي اداره وايي، د جاپان او اروپايي اتحادیې په مرسته یې په افغانستان کې ۵۶ زره ۵۰۰ تنو ته حرفوي زده‌کړې ورکړي دي.

د ملګروملتو دې ادارې پرون (پنجشنبې) پر خپله ټویټرپاڼه ولیکل چې، په دې پروګرام کې یې د ښځو او ماشومانو د ظرفیتونو لوړولو ته زیات پام کړی دی.