په تاجکستان کې دوه زلزلو سلګونه کورونه ویجاړ کړي او تر سلو زیات پسونه او څاروي يې وژلي دي.

د تاجکستان د بېړنیو حالاتو کمېټې ویاندې امید یوسفي نن "د مارچ۲۳مه" په یوه بیان کې ویلي، د لومړۍ زلزلې مرکز د هېواد په شمال سغد کې مستچوه غرنۍ سیمه کې د پالدورک کلی و.

یوسفي په بیان کې زیاته کړې، لومړی زلزله د ریښتر په کچه ۵ یا ۶ درجې وه خو تر دې څو ساعته وروسته دویمه زلزله بیا د لومړی پرتله کمزورې وه.

د یوسفي په وینا زلزله کې چاته مرګ‌ژوبله نه‌ده اوښتې.

د پالدورک کلی چارواکو ویلي، د زلزلې له کبله درې سوه کورونه ویجاړ شوي او له سلو زیات څاروي له‌منځه تللي دي.

یوسفي ازادي راډیو سره په خبرو کې وویل، حکومت زلزله ځپلو ته د رسېدو په برخه کې ځانکړی کمېسون جوړ کړی دی.

د زلزلې دا ټکانونه په تاجکستان کې په داسې حال کې محسویږي چې وړمه ورځ د ریښتر په کچه ۶،۵ درجې یوې زلزلې د افغانستان په شمول د سیمې هېوادونه ولړزول چې مرګ‌ژوبله يې هم درلوده.

د اروپايي ټولنې مشرانو د پنجشنبې په ورځ په راتلونکي دولسو میاشتو کې اوکراین ته د یو ملیون توپچي مهماتو د استولو پلان ته چمتوالی وښوده، څو د روسیې د یرغل پر وړاندې جګړه کې د کییف مرسته وکړي.

نن د بلجیم په بروکسل کې د اروپايي هېوادونو مشرانو په سرمشریزه کې په دې اړه خبرې شوي دي.

دغې ناستې ته د اوکراین ولسمشر ولودمیر زلنسکي د ویډیو کنفراس له لارې وصل و.

له دې یوه اوونۍ وړاندې د اروپا د دفاع او بهرنیو چارو وزیرانو اوکراین ته د وسلو د اخیستلو د چټکېدو پلان تصویب کړی و.

د اروپایي ټولنې مشران به نن د ملګروملتونو له سرمنشي انتونیو ګوتېرش سره د اوکراین د جګړې په اړه خبرې وکړي.

دغه راز به د اروپايي ټولنې مشران هغه پلان تصویب کړي چې کییف ته د توپچي مهماتو لېږد زیاتوي.

ګوتېرش به نن په بروکسل کې د دې ټولنې د دوه ورځنۍ سرمشریزې مېلمه وي.

ګوتېرش داسې مهال په دې سرمشریزه کې چې د بحث یوه مهمه موضوع به یې پر اوکراین څرخي ګډون کوي چې، څو ورځې مخکې د ملګروملتونو او ترکیې په منځ‌ګړیتوب د تور سمندرګي له لارې د اوکراین د غلو صادراتو موافقه لږ تر لږه شپېته ورځې تمدید شوه.

د اوکراین ولسمشر ولودمیر زلنسکي به هم د ویډیو کنفرانس له لارې له دې سرمشریزې سره یو ځای شي.

بل پلو د اروپایي ډیپلوماټان هیله‌من دي چې په همدې سرمشریزه کې به مشران له دې ډډه وکړي چې، په دې ټولنه کې د کاربن ډای اکسایډ خپرېدونکو ماشینونو پر تولید د بندیز پر لانجمنې موضوع خبرې وکړي.

جرمني په وروستۍ شېبه کې د اروپایي ټولنې د هغه پلان مخه ډب کړه چې تر۲۰۳۵ کال پورې د ټولو هغو نویو موټرو پر تولید بندیز لګوي چې کاربن ډای اکساید خپروي.

په دې سره د اروپایي ټولنې د ستراتېژۍ هغه برخه چې غواړي تر۲۰۵۰ کال پورې پر کاربن ولاړ اقتصاد صفر ته ورسوي، په ټپه درول کېږي.

د بروکسل په سرمشریزه کې به اوکراین ته د مهماتو د ورکولو او د کډوالو په شمول پر مختلفو موضوعاتو خبرې وشي.

اوکرایني چارواکي وایي، تېره شپه د دغه هېواد په بېلابېلو ښارونو کې نهه تنه د روسي ځواکونو په بریدونو کې وژل شوي دي.

رویټرز خبري اژانس د اوکراین د ولسمشر ولودمیر زلنسکي په حواله ویلي، دا بریدونه ښيي چې روسیه سولې ته لېوالتیا نه‌لري.

بل لورته د برېتانیا پوځي استخباراتو اعلان کړی چې، په بخموت ښار کې د روسیې د ماتېدو احتمال شته.

پر دغه ښار له تېرو څو میاشتو راهیسې د روسي او اوکرایني ځواکونو جګړه روانه ده او روسیه یې د لاندې کولو هڅه کوي.

د ایران او سعودي عربستان د بهرنیو چارو وزیرانو ژمنه وکړه چې ژر به ملاقات سره وکړي.

د فرانس پریس خبري اژانس د راپور له‌مخې دغه ژمنه نن سهار د سعودي د بهرنیو چارو وزیر فیصل بن فرحان او ایراني سیال یې حسین امیر عبدالهیان په ټیلفوني خبرو کې وکړه.

د سعودي عربستان رسمي خبري اژانس (SPA) هم راپور ورکړی چې، دواړو وزیرانو یو بل ته د روژې مبارکي ورکړې او تهران او ریاض کې یې د دغو هېوادونو د سفارتونو د بیا پرانيستې په اړه خبرې کړي دي.

د سیمې دوو سیالانو سعودي او ایران تېره میاشت د چین په منځ‌ګړیتوب هوکړه وکړه چې ډيپلوماتیکې اړیکې به له سره جوړوي.

دغه دواړه هېوادونو له ۲۰۱۶ کال راهیسې مستقیمې ډيپلوماتیکې اړیکې نه‌لري.

په لندن کې د لومړي ځل لپاره تېر ماښام د روژې مبارکې میاشتې د رارسېدو له کبله په واټونو کې دېرش زره څراغونه بل شول.

د برېتانوۍ ورځپاڼې ګارډین د راپور له‌مخې، دا لومړی ځل دی چې یوه اروپایي ښار کې د روژې په مناسبت داسې ننداره ترسره کېږي.

د لندن ښاروال صادق خان چې خپله هم مسلمان دی، تېر ماښام د دغو څراغونو بټن کېکاږله.

دا نوښت د یوه غیر انتفاعي سازمان (Ramadan Lights UK) له‌خوا رهبري شوی دی او لګښت یې له خلکو اخیستل شوی.

نن د مارچ ۲۳مه په اسلامي نړۍ کې د روژې لومړۍ ورځ ده.

د چین ولسمشر د روسیې درې ورځنی سفر د څو توافقنامو له لاس‌لیکولو سره پای ته ورساوه.

د روسیې ولسمشر ولادمیر پوتین د شي جین پنګ سفر بریالی او ګټور وباله او ویې ویل چې، د ماسکو او پیکنګ تر منځ د همکاریو نوی فصل پيل شو.

په ورته وخت کې د امریکا د متحده‌ایالتونو د بهرنیو چارو وزیر انتوني بلېنکن ویلي دي چې، له روسیې څخه د چین سیاسي او ډیپلوماتیک ملاتړ د واشنګټن له ګټو سره په ټکر کې دی.

بلېنکن پرون د امریکا د استازیو جرګې د بهرنیو اړیکو کمېټې ته وویل چې، د ده په اند له روسیې څخه د چین ملاتړ د اوکراین د جګړې د اوږدېدو سبب کېږي.

دا روسیې ته په تېرو څلورو کلونو کې د شي جین پینګ لومړی سفر و چې تېر ماښام بېرته خپل هېواد ته ستون شو.

د یو شمېر سترو نړیوالو بنسټونو موندنې ښیي چې، پر اوکراین د روسیې د څه باندې یو کلن برید له امله د اوکراین بیارغونه څلور سوه یولس ملیارډه ډالرو ته ضرورت لري.

نړیوال بانک، ملګرو ملتو، اروپایي کمېسیون او اوکراین د خپلو ارزونو نتیجه پرون خپره کړه.

نړیوال بانک وایي چې، د روسیې د تیري له امله د اوکراین زیربناوې، ودانۍ او د خلکو ټول ژوند ته سخت زیان اوښتی دی.

روسیې پروسږکال د فبرورۍ په څلرویشتمه پر اوکراین خپل غیر موجه برید پيل کړ چې لاهم روان دی.

د هندوستان په چینای ښار کې د یو ورځنیو سیالیو د لوبلړۍ ورستۍ لوبه د ۲۱ منډو به توپیر د اسټرالیا په ګټه پای ته ورسېده.

دغه لوبه چې د چهارشنبې په ورځ د مارچ په ۲۲مه نېټه ترسره شوه، اسټرالیا لومړی توپوهنه ترسره کړه او د ۲۷۰ منډو هدف یې وټاکه.

د دوی لپاره په توپوهنه کې میچل مارش ۴۷، او الیکس کیري ۳۸ منډې وکړې.

د هند په توپ اچونکو کې بیا هارډیک پانډیا او کولديپ یادو ۳ـ۳ او محمد سراج او اکشرپټیل ۲ـ۲ لوبغاړي وسوځول.

هندوستان د هدف په تعقیب د ټولو لوبغاړو په سوځېدو سره په ۴۹.۱ اور کې ۲۴۸ منډې وکړې او دا لوبلړۍ یې ۱ـ۲ وبایلله.

د اسټرالیا لپاره په توپ اچونه کې ادم زمپا ۴ او اشټن اګر۲ هندي لوبغاړي وسوځول.

د دې لوبې د غوره لوبغاړي جایزه ادم زمپا ته ورکړل شوه، میچل مارش بیا د لوبلړۍ د غوره لوبغاړي په توګه ونومول شو، هغه په ۳ لوبو کې ۱۹۴ منډې کړې وې.

د اوکراین ولسمشر ولادیمیر زیلنسکي نن په باخموت کې د جګړې د لومړۍ کرښې لیدنې ته ورغلی و.

دا ښار چې په وروستیو څو میاشتو کې د سختو جګړو شاهد وو دواړو خواو ته په کې درانه تلفات اوښتي دي.

دا سفر په داسې حال کې ترسره کېږي چې نن د اوکراین بېلابېلې سیمې د روسیې د هوايي بریدونو د یوې بلې څپې شاهدې وې چې د راپورونو پر بنسټ په کې ګڼ شمېر ملکي وګړي وژل شوي دي.

زیلنسکي مسکو تورن کړی چې د ولسي خلکو پر وړاندې وحشیانه ظلم ترسره کوي.

پر اوکراین د روسیې تېری د ۲۰۲۲م کال د فبرورۍ په ۲۲مه پیل شوی او تر اوسه دوام لري.