د لاسرسۍ وړ لېنکونه

تازه خبر
جمعه ۱۰ لیندۍ ۱۴۰۲ کابل ۰۴:۰۵

افغانستان

امینه محمد: افغان ښځې د کسب او کار د مشرۍ وړتیا لري

د ملګرو ملتونو د سرمنشي مرستیاله امینه محمد
د ملګرو ملتونو د سرمنشي مرستیاله امینه محمد

د ملګرو ملتونو د سرمنشي مرستیاله امینه محمد وایي، افغان ښځې کولای شي کسب او کارونه رهبري او په خپلو وړتیاو او نوښتونو سره ټولنې ته خدمت وکړي.

مېرمن محمد تېره شپه د سلواغې لسمه په یوه ټویټ کې وویل، افغان ښځې حق لري چې کاري فضا کې ونډه ولري.

نوموړې دا څرګندونې وروسته له هغه کوي چې تېره اونۍ یې افغانستان ته په سفر کې په کابل او کندهار کې له طالب چارواکو سره ولیدل.

مېرمن محمد پر ښځو د طالبانو د کاري او تعلیمي بندیز د لرې کولو لپاره کابل ته سفر کړی و، خو تراوسه طالبانو په رسمي ډول خپلو پرېکړو کې کوم نرمښت نه دی ښودلی.

طالبانو د ملګرو ملتونو دغه او بل تللي پلاوي ته د بندیزونو د لرې کولو ژمنې ورکړي دي.

د ورځې تازه خبرونه دلته ولولئ

پولیسو ته د پاکستاني چارواکو نوی امر: له بلوچستانه په یوه ورځ ۱۰زره افغان کډوال وباسئ

له چمنه سپین بولدک ته ستنول کېدونکي افغان کډوال. November 2, 2023
له چمنه سپین بولدک ته ستنول کېدونکي افغان کډوال. November 2, 2023

د پاکستان د بلوچستان ایالت چارواکي وايي، پولیسو ته یې امر کړی چې له دې ایالت څخه په یوه ورځ کې ۱۰ زره افغان کډوال وباسي.

د بریتانیا د مېل ورځپاڼې د راپور له مخې، د بلوچستان د ایالتي حکومت ویندوی جان اڅکزي نن وویل، چارواکو پولیسو ته ویلي چې بې اسناده افغان کډوال ونیسي او افغانستان ته یې واستوي.

پاکستاني چارواکي وايي، ځینې بې اسناده افغان کډوال د پاکستان لېرې پرتو سیمو ته تللي چې ونه نیول شي.

اټکل کېږي چې په پاکستان کې د بې اسنادو افغان کډوالو شمېر یو میلیون او ۷۰۰ زرو ته رسېږي، خو په تورخم او سپین بولدک کې د دوو خواوو چارواکي وايي چې په وروستیو ورځو کې له پاکستان څخه افغانستان ته د ستنول کېدونکو کډوالو شمېر کم شوی دی.

د طالبانو د حکومت د کډوالو او بېرته رستنېدونکو چارو وزارت وايي، له کله چې پاکستان د افغان کډوالو د ایستلو لړۍ پیل کړې، تراوسه پورې ۴ لکه ۱۰ زره افغان کډوال افغانستان ته اړول شوي دي.

له افغان کډوالو سره د پاکستاني چارواکو زور زیاتی؛ جینیوا کې پرې فعالانو اعتراض کړی

په کراچۍ کې پولیس د افغان کډوالو څخه د پلټنو پر مهال لیدل کېږي.
په کراچۍ کې پولیس د افغان کډوالو څخه د پلټنو پر مهال لیدل کېږي.

په اروپا کې د پښتون ژغورنې غورځنګ یو شمېر فعالانو په جینیوا کې د ملګرو ملتونو د دفتر مخته له افغان کډوالو سره د پاکستاني چارواکو پر چلند اعتراض وکړ.

د دغه غورځنګ یوه فعال فضل الرحمان افریدي پرون چهارشنبې رسنیو ته وویل، د پاکستان له لوري د افغان کډوالو ایستل د نړیوالو قوانینو خلاف عمل دی او باید پاکستان د افغانانو د ایستلو بهیر سمدلاسه ودروي.

د بشري حقونو د څار سازمان هم په وروستي راپور کې پاکستاني پولیس د افغان کډوالو په ځورولو، بندیانولو او نورو زور زیایتو تورن کړي دي.

پاکستان د اکتوبر په لومړیو کې اعلان وکړ چې ټول بې اسناده افغان کډوال د نومبر تر لومړی باید له دغه هېواده ووځي.

د راپورونو له مخې، تراوسه پورې شاوخوا ۴ لکه افغان کډوال له پاکستان څخه افغانستان ته ستانه کړای شوي دي.

اماراتو کې د ملګرو ملتونو د اقلیمي بدلون کنفرانس؛ د طالبانو حکومت پرې اعتراض کړی

د اماراتو دوبۍ ښار
د اماراتو دوبۍ ښار

د طالبانو حکومت په متحده عربي اماراتو کې د ملګروملتو د اقلیمي بدلون په کنفرانس کې د دوی د استازو ته د بلنې نه ورکول، د افغانستان پر وړاندې لوی ظلم وباله.

د ملګرو ملتونو د اقلیمي بدلون کنفرانس نن په دوبۍ کې پیلېږي.

د طالبانو د حکومت د چاپېریال ساتنې ملي ادارې په دې اعتراض کړی چې د اقلیمي بدلون کنفرانس ته د دوی استازی نه دی بلل شوی.

دې ادارې ویلي چې د اقلیمي بدلون ستونزه نړیوال اقدام ته اړتیا لری.

پرون د خوړو نړیوال پروګرام د اقلیمي بدلون د کنفرانس په درشل کې اعلان وکړ چې په افغانستان کې په میلیونونو کورنۍ د اقلیمي بدلون له کبله له بحران سره مخامخ دي.

د خوړو نړیوال پروګرام په لړم میاشت کې ویلي وو چې وچکالي په افغانستان کې د هغو میلیونو بزګرانو لپاره یو ناورین رامنځه ته کړی چې د عاید بله سرچینه نه لري.

په پکتیا، کونړ او ارزګان کې د درېیو خبریالانو د خوشې کېدو هرکلی وشو

ارشیف
ارشیف

د افغانستان د خبریالانو مرکز په پکتیا، کونړ او ارزګان کې د درې خبریالانود خوشې کېدو هرکلی وکړ.

دغه مرکز نن ویلي چې دا درې خبریالان بې دلیله په اګست میاشت کې نیول شوي وو.

د افغانستان د خبریالانو مرکز پر طالبانو غږ کړی چې ټول خبریالان خوشي کړي او د هغوی تعقیب او ځورول ودروي.

په ۹ ولایتونو کې د ورښتونو او احتمالي سېلابونو د راوتلو وړاندوینه شوې

په لغمان کې سېلابونه. 26.08.2022
په لغمان کې سېلابونه. 26.08.2022

د ټرانسپورټ او ملکي هوايي چلند وزارت د هواپېژندنې ریاست د افغانستان په ۹ ولایتونو کې د ورښتونو او احتمالي سېلابونو د راوتلو وړاندوینه کړې ده.

د دې ادارې پر اساس، نن او سبا په لغمان، ننګرهار، لوګر، پکتیا، نورستان، کونړ، بدخشان، خوست او پکتیکا ولایتونو کې د ورښتونو او سېلابونو احتمال شته.

د هواپېژندنې ادارې د ورښت اندازه له ۱۵ تر ۳۰ میلي مترو پورې اټکل کړې ده.

د بشري حقونو څار سازمان: پاکستان دې له خطر سره مخ افغانانو ایستل ودروي

له پاکستانه ایستل شوي افغان کډوال په تورخم کې د ثبت او راجستر پر مهال. November 12, 2023
له پاکستانه ایستل شوي افغان کډوال په تورخم کې د ثبت او راجستر پر مهال. November 12, 2023

د بشري حقونو د څار نړیوال سازمان وایي، پاکستان دې د هغو افغانانو د ایستلو لړۍ ودروي چې د دوی په باور ژوند یې په افغانستان کې له خطر سره مخامخ دی.

دغه سازمان پرون چهارشنبې په دې اړه د خپلو ارزونو راپور هم خپور کړ او ویې ویل، د پاکستان چارواکو او پولیسو له افغان پناه غوښتونکو سره په پراخ ډول ناوړه چلند کړی دی.

د یاد سازمان د افغانستان د څانګې څیړونکې فرشتې عباسي ازادی راډیو ته وویل: "د بشري حقونو د څار سازمان د پاکستان له دولته غوښتي چې افغان پنا غوښتونکو ته د اخراج مهلت له منځه یوسي او اجازه ورکړي هغه افغانان چې افغانستان کې یې ژوند له خطر سره مخامخ دی، پاکستان کې امنیت ولري او هغه کسان چې تراوسه یې درېیمو هېوادونو کې د مېشتیدو کېسونه روان دي، هغوی وکولای شي خپلې قضیې مخته بوځي."

مېرمن عباسي دغه ډله افغانان د بشري حقونو فعالان، خبریالان، همجنس پالان او نور هغه کسان یاد کړل چې د طالبانو له بیا واکمنۍ وروسته پاکستان ته تښتېدلي دي.

راشدخان له جراحي عملیاتو وروسته یو وار بیا تمرینونه پیل کړي

د افغان کرکټ ملي لوبډلې لوبغاړي راشدخان او رحمت شاه
د افغان کرکټ ملي لوبډلې لوبغاړي راشدخان او رحمت شاه

د افغانستان او نړۍ د کرکټ نامتو لوبغاړي راشدخان له جراحي عملیاتو وروسته یو وار بیا تمرینونه پیل کړي دي.

د افغان ملي لوبډلې بل لوبغاړي رحمت شاه پر خپلو ټولنیزو پاڼو له راشد خان سره په جیم کې د ګډو تمرینونو تصویر خپور کړی دی.

رحمت شاه لیکلي، راشد خان تر عملیاتو وروسته د نومبر په ۲۹مه نېټه په لندن کې په لومړي ځل تمرینونه وکړل.

راشدخان د روانې میاشتې په ۲۳مه نېټه د لندن په یوه روغتون کې د ملا عملیات وکړل.

نوموړي تر عملیات وروسته ویلي و، ډاکترانو ورته ویلي چې له یوې نیمې تر دوو میاشتو پورې ارام وکړي.

هغه ویلي وو، له تېرو څو میاشتو راهیسې د ملا دردونو په عذاب کړی و او دې ته اړ شو چې جراحي عملیاتو ته غاړه کېږدي.

ایران: افغانستان ته د سوداګریزو مالونو ترانزیت زیات شوی

د ایران بیرغ
د ایران بیرغ

ایران وايي چې د دغه هېواد د جنوبي خراسان ولایت د ماهي رود ګمرک له لارې افغانستان ته سوداګري مالونو ترانزیت ۱۱۰ سلنه زیات شوی دی.

ایراني رسنیو د جنوبي خراسان ولایت د ګمرکونو د عمومي رييس محمد کوهګرد په قول ویلي چې په تېرو ۸ میاشتو کې له دې لارې د سوداګري مالونو صادرات په کمساري ډول ډېر شوي دي.

د پاکستان له لوري افغانستان ته په ترانزیت کې له بیا- بیا ستونزو وروسته افغان سوداګر اړ شوي چې متبادلو لارو ته مخه کړي.

کوهګرد وايي چې په اتو میاشتو کې افغانستان ته ۱۵۶ زره ۹۳۵ ټنه مال ترانزیت شوی چې د وزن له نظره، په ترانزیت کې ۸۸ سلنه زیاتوالی ښيي.

طالبانو په نوي ډیلي کې د افغان سفارت د ژر پرانیستلو خبر ورکړ

د طالبانو د بهرنیو چارو وزارت سیاسي مرستیال، عباس ستانکزی
د طالبانو د بهرنیو چارو وزارت سیاسي مرستیال، عباس ستانکزی

طالبان وايي، ژر به په نوي ډیلي کې د افغانستان سفارت پرانیزي.

دا سفارت چې د افغانستان د جمهوري حکومت دیپلوماتانو اداره کاوه، تېره اوونۍ بند شو.

د سفارت کارکوونکو د بندېدو دلیل د هند او طالبانو پر له پسې فشارونه بللي وو.

د طالبانو د حکومت د بهرنیو چارو وزارت مرستیال شېرمحمد عباس ستانکزي ملي تلویزیون ته چې د طالبانو تر کنټرول لاندې دی، ویلي چې په درېیو ورځو کې به په نوي ډیلي کې د افغانستان سفارت بېرته پرانیستل شي.

له بلې خوا هندي رسنیو ویلي چې د طالبانو حکومت په هند کې د افغانستان د سیاسي استازولیو کنټرول ترلاسه کړی دی.

هندوستان ټایمز د طالبانو د بهرنیو چارو وزارت د سیاسي مرستیال شیر محمد عباس ستانکزي په حواله ویلي، په حیدراباد او ممبي کې د افغانستان کونسلګرۍ له دوی سره په اړیکه کې دي.

د ګوانتینامو د وروستي افغان بندي کورنۍ د هغه د خوشې کیدو غوښتنه لري

له ارشیفه د ګواتینامو زندان یو تصویر
له ارشیفه د ګواتینامو زندان یو تصویر

د امریکا په ګوانتینامو زندان کې د وروستي افغان بندي کورنۍ د امریکا له حکومته وغوښتل چې خپل عزیز یې خوشې کړي.

د فرانسپرس خبري اژانس د راپورله مخې، د محمد رحیم کورنۍ دغه غوښتنه پرون چهارشنبې په کابل کې په یوه خبره کنفرانس کې وکړه.

د ښاغلي رحیم مور صفورا بي بي چې سترګې یې له اوښکې ډکې وې، له امریکایي چارواکو او مشرانو وغوښتل چې زوی یې ورخوشې کړي.

د رحیم کورنۍ ویلي چې هغه په ۲۰۰۷ کال کې په پاکستان کې نیول شوی دی.

رحیم د هغو په سلګونو مشکوکو سختدریځو څخه یو دی چې د امریکا له خوا د ترهګرۍ ضد جګړې په ترڅ کې نیول شوي او د کیوبا ګوانتیامو زندان ته لېږدول شوي دي.

د راپورله مخې، پرامریکایي چارواکو تورپورې شوی چې په دغه زندان کې اکثره بندیان له تورونو پرته یا داچې مدافع وکیل ته لاسرسۍ و لري ساتل شوي، شکنجه شوي او ورسره ناوړه چلند شوی دی.

په تېرو کلونو کې د طالبانو د یوشمېرمشرانو په ګډون ډیری بندیان له دې زندانه خوشې شوي دي.

نور راوښيه

XS
SM
MD
LG