د پاکستان پوځ ویلي، څلور پوځیان له ایران سره پولې ته څېرمه په برید کې وژل شوي دي.

د پاکستان د پوځ د عامه اړیکو ادارې ای اېس پي ار په یوه بیان کې تایید کړې چې د اپرېل په لومړۍ نېټه شنبه د ترهګرو یوې ډلې چې د ایران له لوري فعالیت کوي، پولې ته څېرمه د کیچ ضلعې سره د پاکستان په امنیتي ځواکونو برید کړی.

د پاکستان پوځ ویلي چې د ترهګرو پر ضد د اغېزمن اقدام او په راتلونکي کې د داسې پېښو د مخنیوي لپاره له ایراني لوري سره 'اړین تماسونه' نیول شوي دي.

ایران لا په دې اړه څه نه دي ویلي.

د یادونې وړ ده چې روان کال د جنورۍ په میاشت کې هم د بلوچستان په پنجګور ضلع کې د پاکستان - ایران پولې په اوږدو کې د ترهګرو په برید کې څلور امنیتي سرتېري وژل شوي وو.

هغه مهال د پاکستان لوړ پوړو چارواکو دغه پېښه په کلکه غندلې وه او د بهرنیو چارو وزارت له ایرانه غوښتي وو چې مجرمانو ته دې سزا ورکړي او بشپړې پلټنې دې وکړي.

پولنډ وايي، روسیې د دروژبا پایپ لاین له لارې يې دغه هېواد ته د تېلو رسول بند کړي دي.

د پولنډ د پي کې این اورلین چڼځای اجرایوي رییس ډینیل اوبیټیک د شنبې په ورځ په خپل ټویټر کې لیکلي چې شرکت به د دې تشې ډکولو لپاره بدیل سرچینې وکاروي.

د اوبېټیک په وینا، د پولنډ د اومه تېلو یوازې لس فیصده له روسیې څخه راځي.

د 'دروژبا' پایپ لاین له لارې د روسیې د تېلو صادرات یوه ورځ وروسته تر دې بند شول چې اوکراین ته د پولنډ لیوپارډ ټانکونه ولېږل شول.

د روسیې دفاع وزیر وایي مسکو د مهماتو تولید د پام وړ زیات کړی دی.

سرګي شویګو د جزییاتو له ورکړې پرته پرون دا هم زیاته کړه چې د مهماتو د تولید زیاتوالی به روسیه په دې برلاسې کړي چې خپلو جنګي هدفونو ته ورسېږي.

د جرمني ډي پي اژانس د خبر له مخې د مهماتو کمښت د روسیې او اوکراین لپاره په یوې لویې ستونزې بدله شوې او لوېدیځو متحدینو هم ډېر شمېر پوځي تدارکات د اوکراین په واک کې ورکړي.

په ناټو تړون کې د امریکا سفیرې جولین سمیت له هند سره د ناټو د تعامل او مشارکت د پراختیا خبر ورکړ، ویې ویل، دا ايتلاف هر وخت چې هند وغواړي په دې اړه خبرو ته تیار دی.

په ناټو کې د امریکا سفیرې پرون جمعه په یوه خبري غونډه کې وویل، که څه هم هند او امریکا په ځانګړي ډول د مځکنۍ بشپړتیا په اړه یو شان پالیسي نه لري، خو امریکا او ناټو د اوکراین له خلکو سره د هند د بشري مرستو ستاینه کوي.

اغلې سمیت وویل، ناټو د اوکراین د کړکېچ د حل کولو لپاره له هند سره پر له پسې په تماس کې ده او د اوکراین د جګړې د پای ته رسېدو لپاره د هند د ښکاره دریځونو ملاتړ کوي.

د ایټالیا د معلوماتو د ساتنې ادارې د جمعې په ورځ د مارچ۳۱مه وویل چې د چټ جې پي ټي له لوري د کاروونکو د شخصۍ حریم د سرغړونې په باب یې څېړنې پیل کړي دي او د دغو تحقیقاتو د پایلو تر څرګندېدو پورې دا پلټفارم په ایټالیا کې منع کوي.

دا پلټفارم د مایکروسافټ کمپنۍ په ملاتړ په نومبر میاشت کې راووت او ‌ډېر ژر یې میلیونونه کسان ځان ته جلب کړل.

د ایلن ماسک او سټیو وزنیاک په شمول د کمپیوټر د علم یو شمېر ساینسپوهان او نوښتګر دې نتیجې ته رسېدلي چې پر ډیجیټل ټکنالوژۍ ورځ تر بلې د مصنوعي ذهانت یا ارټیفیشل انټلجنس تسلط زیاتېږي نو د شپږو میاشتو لپاره د دې چټکې پرمختلونکې ټکنالوژۍ د تم کېدو غوښتنه کوي.

دوی ویلي چې په دې شپږ میاشتو کې دې د مصنوعي ذهانت د خطرونو په اړه څېړنې وشي.

دا په داسې حال کې ده چې سترې کمپنۍ بازار ته پر له پسې د مصنوعي ذهانت ټکنالوژي وړاندې کوي او ټاکل شوې ده چې ګوګل او مایکروسافټ ژر ورته ټکنالوژي بازار ته وړاندې کړي.

ایران د اسراییل د بهرنیو چارو وزیر د څرګندونو په غبرګون کې ویلي چې دا هېواد غواړي د اذربایجان له خاورې څخه د ایران د ملي امنیت د ګواښلو لپاره کار واخلي.

د ایران د باندنیو چارو وزارت ویندوی ناصر کنعاني ټینګار کړی چې تهران د هغه څه پر وړاندې لاس تر زنې نه شي پاتې کېدای چې ده د اذربایجان جمهوریت له خاورې د اسراییل دسیسه وبلله.

دا په یوه اوونۍ کې دویم ځل دی چې ایراني چارواکي پر اذربایجان له دې کبله نیوکې کوي چې له اسراییل سره یې اړیکې جوړې کړي دي.

تېره اوونۍ د اذربایجان د بهرنیو چارو وزیر تل ابیب ته لاړ او د خپل هېواد سفارت یې هلته پرانیست.

په پاکستان کې چې اقتصادي وضعیت خورا خراب شوی، د اوړو وېشلو په لړ کې لږترلږه ۱۴ کسان مړه شوي دي.

پرون جمعه د خیبرپښتونخوا د حکومت له لوري د وړیا اوړو د وېش په لړ کې ګډوډي رامنځته شوه او لږترلږه ۳ تنه تر پښو لاندې مړه او ۷ نور سخت ژوبل شول.

په څو نورو ځایونو کې د اوړو د وېش په ترڅ کې نښتې او ګډوډۍ پېښې شوې دي.

همداراز په کراچۍ ښار کې یوې خصوصي کمپنۍ زکات وېشه چې ګډوډي رامنځته شوه او لږترلږه ۱۱ کسان مړه شول.

اکثره مړه شوي کسان ښځې او ماشومان دي.

د سویډن صدراعظم هیله ښودلې چې هېواد به یې په ناټو کې د دې سازمان د ټولو غړیو هېوادونو موافقه ترلاسه کړي.

اولف کریسټیرسن تېره ورځ د مارچ په ۳۱مه دغه غوښتنه وروسته له هغې وکړه چې د ترکیې پارلمان د رایو په اکثریت سره په ناټو کې د فنلنډ غړیتوب تصویب کړ.

د ناټو د غړي په توګه ترکیې په دې سازمان کې تل د فنلنډ او سویډن له غړیتوب سره مخالفت کاوه، خو اوس فنلنډ دا غړیتوب ترلاسه کړ.

په ناټو کې د غړیتوب لپاره چې اوسمهال ۳۰ غړي هېوادونه لري یو نوی غړی باید د ناټو تړون د ټولو غړیو موافقه ولري او ان د یوه هېواد په مخالفت سره موانع جوړېدای شي.

د سویډن صدراعظم ویلي، تر اوسه د ترکیې ترڅنګ هنګري هم په ناټو سازمان کې د سویډن له غړیتوب سره موافقه نه ده ښودلې.

د ناټو سرمنشي ینس سټولټنبرګ ویلي، له ترکیې او هنګري یې غوښتي څو د سویډن غوښتنه ومني او په ناټو سازمان کې د دې هېواد د غړیتوب پر وړاندې موانع لرې کړي.

هندي رسنۍ وايي، د پاکستان د خیبرپښتونخوا په پېښور کې یو سېک سوداګر وژل شوی دی.

د راپورونو پر اساس دغه سوداګر ډایال سېنګ نومېږي او تېره ورځ د مارچ په ۳۱مه له ماسپښین وروسته درې نیمې بجې د نامعلومو وسله والو په ډزو سره وژل شوی دی.

له دې یوه ورځ مخکې هندي رسنیو په کراچۍ کې د بیرل ګیناني په نوم د یوه هندو ډاکتر له وژنې خبر ورکړی و.

د راپورونو پر اساس ګیناني د سترګو ډاکتر و او د پنجشنبې په ورځ په خپل موټر کې په ډزو سره وژل شوی و.

ټایمز اف انډیا ورځپاڼې په پاکستان کې د هندو او سېک مدافع فعالانو له قوله ویلي، په تېرو دوو کالو کې په دې هېواد کې لس سېکان وژل شوي دي.

تر اوسه کومې ډلې د تېرو دوو ورځو پېښو مسوولیت نه دی منلی.