د لاسرسۍ وړ لېنکونه

تازه خبر
پنجشنبه ۲۴ غبرګولی ۱۴۰۳ کابل ۰۸:۴۶

نړۍ

د خبریالانو د خونديتوب کمېټه: تېر کال نړۍ کې د خبریالانو د مړینې کچه ۵۰سلنه ډېره شوې وه

د خبریالانو د خوندیتوب کمېټې لوګو
د خبریالانو د خوندیتوب کمېټې لوګو

د یوه نوي راپور له مخې په نړۍ کې د خبریالانو د مړینې په کچه کې په ۲۰۲۲ کال کې د یوه مخکیني کال په پرتله پنځوس سلنه زیاتوالی راغلی دی.

په نیویارک کې دېره د خبریالانو د خوندیتوب کمېټې CPJ په یو راپور کې چې پرون خپور شو ویلي، چې دا خبریالان تر ډېره په اوکراین، مکسیکو او هایتي کې وژل شوي دي.

په راپور کې راغلي چې په ۲۰۲۲ کال کې په ټوله نړۍ کې د رسنیو ۶۷ کارکوونکي وژل شوي چې دا له ۲۰۱۸ کال راهیسې د خبریالانو د مړینې تر ټولو لوړه شمېره ده.

راپور زیاتوي چې له دې ډلې ۳۵ تنه د اوکراین، مکسیکو او هایتي خبریالان دي.

د CPJ د راپور له مخې تېرکال په اوکراین کې د رسنیو ۱۵ کارکوونکي وژل شوي دي.

د ورځې تازه خبرونه دلته ولولئ

په سور سمندرګي کې حدیدې بندر ته نژدې د یونان پر یوې باري بېړۍ برید شوی

د حدیدې بندر یوه څنډه
د حدیدې بندر یوه څنډه

پر سوداګري کښتیو د یمن د حوثي یاغیانو د بریدونو په دوام کې، پرون چهارشنبې په سور سمندرګي کې حدیدې بندر ته نژدې یوې کوچنۍ کښتۍ د یونان پر یوې باري بېړۍ برید وکړ او د هغې انجن یې زیانمن کړ.

د بریتانیا امنیتي شرکت، امبري اعلان وکړ چې پر "توتور" نومي کښتۍ د یمن د حدیدې بندر له جنوب لوېدیځ څخه شاوخوا ۶۸ میایله لېرې برید شوی او په دې برید کې د یمن د حوثي یاغیانو د بریدونو نښې لیدل کېږي.

د بریتانیا د سمندري سوداګرۍ عملیاتو هم اعلان وکړ چې یوې کوچنۍ سپینې کښتۍ، چې له ۵ تر ۷ مترو اوږده وه، د دې بار وړونکې بېړۍ له لاندینۍ برخې سره ټکر وکړ.

د یونان د بېړۍ چلونې دوو سرچینو د نوم د نه ښودلو په شرط وویل چې کښتۍ، چې د لایبریا بیرغ پرې رپېده، په قصدي برید کې زیانمنه شوې ده.

د یونان د بېړۍ چلونې وزارت یوې سرچینې هم پیښه تایید کړې او ویلي یې دي: "بیړۍ د هند پر لور روانه وه."

د کرکټ نړیوال جام؛ نن درې سیالۍ کېږي

د بنګله‌دېش لوبډلې لوبغاړي د یوې تېرې لوبې پر مهال
د بنګله‌دېش لوبډلې لوبغاړي د یوې تېرې لوبې پر مهال

د کرکټ د نړیوال شل اوره جام سیالیو په دوام کې به نن درې سیالۍ وشي.

په سي ګروپ کې د ویسټ اینډیز او نیوزیلنډ سیالي ده.

د نن ورځې دوهمه سیالي به د افغانستان په وخت د ماښام په ۷ بجې په ډي ګروپ کې د بنګله‌دېش او نیدرلنډ (هالنډ) ترمنځ وي.

همداراز د انګلستان او عمان سیالي د افغانستان د شپې په یوولس نیمې بجې پیلېږي.

سبا به د افغانستان لوبډله له پاپونیوګینې سره مخامخ شي.

دا به د افغانستان درېیمه سیالي وي.

افغانستان تر دې وړاندې یوګنډا او نیوزیلنډ په لوی توپیر مات کړي او تر دې دمه نه یوازې د خپل ګروپ د جدول په سر کې دی بلکې د نومرو له نظره تر ټولو لوړ ځای لري.

پرون هند په نیویارک کې امریکا ته په ۷ ویکټونو او ۱۰ توپونو ماته ورکړه.

هند اوس په خپل اې ګروپ کې لومړی ځای لري.

امریکا د القاعده د لوړپوړي غړي "حمزه الغامدي" پر سر پنځه میلیونه ډالره جایزه اعلان کړې

د امریکا د بهرنیو چارو وزارت
د امریکا د بهرنیو چارو وزارت

د امریکا د بهرنیو چارو وزارت د القاعده شبکې د یوه لوړپوړي غړي حمزه الغامدي پر سر پنځه میلیونه ډالره جایزه اعلان کړې ده.

دغه وزارت پرون سه شنبه په یوه بیان کې د القاعده د دغه مشر بشپړ نوم حمزه صالح بن سعید الغامدي یاد کړی او عمر یې هم شاوخوا ۶۰ کاله ښودل شوی دی.

د دغه وزارت د عدالت لپاره د جایزو څانګې د القاعده د دغه سعودي تبعه احتمالي موقعیتونه د افغانستان پلازمېنه کابل، د ننګرهار توره بوره او سعودي عربستان یاد کړي دي.

دوی ویلي چې الغامدي د القاعده شبکې د بنسټ ایښودونکي اسامه بن لادن یو تر ټولو باوري ملګری و او هغه له بن لادن سره یوځای افغانستان کې د پخواني شوروي اتحاد له سرو لښکرو سره هم جګړه کړې ده.

د ملګرو ملتونو امنیت شورا څلور میاشتې وړاندې ویلي وو چې القاعده شبکې په افغانستان کې اته روزنیز مرکزونه جوړ کړي او د دې شبکې لوړپوړي چارواکي لا هم په دغه هېواد کې حضور لري.

طالبانو تر دې وړاندې دغه ډول راپورونه په کلکه رد کړي او ویلې یې دي، د القاعده هیڅ غړی په افغانستان کې نه‌شته.

د امریکا لانګ وار ژورنال ورځپاڼې تازه د القاعده شبکې د اوسني مشر سیف العدل په حواله ویلي چې خپل ملګري یې هڅولي چې د پوځي زده کړو لپاره افغانستان ته ولاړ شي.

اسراییلي ځواکونو د حزب‌الله یو لوړپوړی قومندان او درې نور وسله‌وال وژلي

په لبنان کې د حزب الله پر غړیو د اسراییلي ځواکونو د برید یو انځور
په لبنان کې د حزب الله پر غړیو د اسراییلي ځواکونو د برید یو انځور

د اسراییل هوایي ځواکونو د لبنان د حزب‌الله ډلې یو لوړپوړی قومندان او درې نور وسله‌وال وژلي دي.

رویټرز خبري اژانس د دریو سرچینو په حواله چې نومونه یې نه دي یاد شوي لیکلي چې دغه بریدونه د سه شنبې په ورځ ناوخته شوي دي.

د رویټرز په وینا حزب‌الله د خپل وژل شوي‌ قومندان وژنه تایید کړې او هغه یې طالب عبدالله چې په ابو طالب مشهور و، یاد کړی دی.

خبر کې د اسراییلي لوري په حواله راغلي چې حزب‌الله د دغو هوایي بریدونو په غچ کې د جولان په لوړو چې د اسراییل له‌خوا اشغال شوي ، پنځوس توغندي ویشتلي دي.

د لبنان حزب‌الله ډله چې د ایران له ملاتړه برخمنه ده، د تېر کال د اکټوبر له ۷ مې چې د غزې جګړه پیل شوې، له اسراییلي ځواکونو سره بریدونه تبادله کوي.

اسراییل او څو فلسطیني وسله‌والې ډلې په "جنګي جنایتونو" تورنې شوې

په غزه کې اسراییلي ځواکونه د جګړې پر مهال
په غزه کې اسراییلي ځواکونه د جګړې پر مهال

د ملګرو ملتونو خپلواکو څېړونکو نن اسراییل او څو فلسطیني وسله‌والې ډلې په "جنګي جنایتونو" تورنې کړې.

د ملګرو ملتونو د دغه څېړونکي کمېسیون مشرې ناوي پیلې ویلي، دا مهمه ده چې له ټولو هغو کسانو سره چې دغو جنایتونو کې ښکېل دي، حساب کتاب وشي.

د اسوشېټېډپرېس خبري اژانس په وینا، یاد کمېسیون د ۲۰۲۳م کال د اکټوبر له ۷مې وروسته موده کې چې د اسراییل او حماس جګړه پيل شوې، د جنګي جنایتونو یادونه کړې ده.

حماس چې د امریکا او اروپایي ټولنې له‌خوا د ترهګرو په توګه پېژندل کېږي، د تېر کال په اکټوبر کې پر اسراییلو غلچکي او پراخ برید سره ۱۲۰۰ کسان ووژل او ۲۵۰ نور یې برمته کړل.

له همغې نېټې اسراییلو پر غزې غچ اخیستونکي بریدونه پيل کړي چې تراوسه په کې د غزې د روغتیا وزارت په وینا، څه باندې ۳۷ زره فلسطینیان وژل شوي دي.

د عربستان چارواکي: تر اوسه شاوخوا یونیم میلیون مسلمانان مکې ته رسېدلي

د بیت الله شریف یوه څنډه
د بیت الله شریف یوه څنډه

د سعودي عربستان چارواکي وايي، تر نننۍ ورځې پورې شاوخوا یونیم میلیون مسلمانان د نړۍ له بېلابېلو هېوادونو څخه مکې ښار ته رسېدلي او په پام کې ده چې راروانه اوونۍ به د حج په کلنیو مراسمو کې برخه واخلي.

د سعودي عربستان د حج مسوولو چارواکو نن وویل چې سلګونه زره نور کسان به هم د جمعې تر ورځې پورې چې د حج مراسم پیلېږي دې هېواد ته ورسېږي.

په دوی کې به له سعودي عربستان څخه هم یو شمېر خلک شامل وي.

تمه ده سږ کال د حچ په مراسمو کې د ګډونوالو شمېر د تېر کال پرتله زیات وي.

په ۲۰۲۳م کال کې ۱،۸ میلیون مسلمانانو په دې مراسمو کې ګډون کړی وو.

په امریکا کې د تاجکستان ۸ وګړي له داعش سره د اړیکو په شک نیول شوي

ارشیف
ارشیف

باخبره سرچینې وايي، د تاجکستان ۸ وګړي له اسلامي دولت ډلې یا داعش سره د اړیکو په شک په وروستیو ورځو کې په امریکا کې نیول شوي دي.

دې سرچینو چې نه غواړي نومونه یې خپاره شي ویلي چې دا کسان په نیویارک، فیلادیلفیا او لاس انجلس کې نیول شوي دي.

د سرچینو په وینا، دا کسان چې له جنوبي سرحدونو څخه امریکا ته ننوتي وو، د مهاجرت له قوانینو د سرغړونې په تور په توقیف کې دي.

له داعش ډلې سره د دې مشکوکو کسانو د اړیکو د څرنګوالي په اړه سمدستي څه نه دي ویل شوي، خو سرچینو ویلي چې د دې کسانو پته د امریکا د تحقیقاتو د فدرال ادارې یا "ایف بي آی" FBI د تروریزم ضد څانګې لګولې ده.

کربي: پر اوکراین د یرغل له کبله به د روسیې پر ضد نوي اقدامات اعلان شي

د سپینې ماڼۍ د ملي امنیت شورا ویاند جان کربي
د سپینې ماڼۍ د ملي امنیت شورا ویاند جان کربي

امریکا وايي، د اوو لویو صنعتي هېوادونو په راروانه سرمشریزه کې به پر اوکراین د یرغل له کبله د روسیې پر ضد نوي اقدامات اعلان شي.

د سپینې ماڼۍ د ملي امنیت شورا ویاند جان کربي پرون سه شنبې خبریالانو ته وویل، په دې اقداماتو کې له کییف سره د مرستې لپاره د روسیې له کنګل شویو شتمنیو کار اخیستل هم شامل دي.

کربي زیاته کړه چې واشنګټن به د جي اوه په غونډه کې چې د پنجشنبې او جمعې په ورځو په ایټالیا کې جوړېږي پر روسیې نوي بندیزونه او همداراز د دې هېواد پر صادراتو کنټرول اعلان کړي.

لوېدیځ هغه لارې چارې لټوي چې د روسیې له کنګل شویو شتمنیو څخه ترلاسه شوي عواید له اوکراین سره د مالي مرستې په توګه وکاروي.

کربي زیاته کړه چې لوېدیځ هېوادونه به د روسیې د جنګي ماشین د لګښتونو د لوړولو هڅو ته دوام ورکړي.

د امریکا د ولسمشر زوی په درېیو تورونو کې ملامته بلل شوی

د امریکا د ولسمشر زوی هنټر بایډن
د امریکا د ولسمشر زوی هنټر بایډن

د امریکا د ولسمشر جو بایډن زوی هنټر بایډن پرون د جون ۱۱مه په دلاور کې د یوې محکمې له‌خوا په درېیو تورونو کې ملامته بلل شوی دی.

د محکمې منصفه پلاوي هنټر بایډن د فدرال جواز لرونکي د وسلو یوه پلورونکي ته په دروغ ویلو، د مخدره په اړه ناسمې ادعا او په غیرقانوني ډول د ۱۱ ورځو لپاره د ټوپک د ساتلو په تور ګناهکار بللی دی.

که هغه مجرم وپېژندل شي، تر ۲۵ کاله په بند محکومېږي.

قاضي مرلین نوریکا د سزا اورولو نېټه نه ده ټاکلې.

بلېنکن: اسرایيل د اوربند لپاره د امريکا د وړاندې شوي پلان ملاتړ کوي

د امريکا د بهرنيو چارو وزير انټوني بلېنکن
د امريکا د بهرنيو چارو وزير انټوني بلېنکن

د امريکا د بهرنيو چارو وزير انټوني بلېنکن وايي، د اسرایيلو صدراعظم بنيامين نتنياهو د غزې په جګړه کې د اوربند لپاره د امريکا له‌خوا د وړاندې شوي پلان ملاتړ کوي.

پرون سه شنبه د جون ۱۱مه، بلېنکن په تل‌ابیب کې خبریالانو ته وویل چې تېره شپه یې له صدراعظم نتنیاهو سره ولیدل او هغه د اوربند وړاندیز ته خپله ژمنه بیا تکرار کړه.

په دې خبري غونډه کې د امریکا د بهرنیو چارو له وزیره وپوښتل شول چې ایا د اسراییلو صدراعظم له سخت دریځې ډلې حماس سره د اوربند له پلان سره موافقه کړې هغه د هو ځواب ورکړ.

حماس سخت دریځه ډله د امریکا او اروپايي ټولنې له‌خوا د یوه تروریستي سازمان په توګه پېژندل کېږي.

د مې میاشتې په پای کې د امریکا ولسمشر جوبایډن د غزې په جګړه کې د اوربند لپاره درې پړاویز پلان وړاندې کړ.

د غزې په تړانګه کې جګړه د ۲۰۲۳م کال د اکټوبر په اوومه هغه مهال پیل شوه چې د حماس جنګیالیو د اسراییلو پر ځینو برخو بریدونه وکړل، ۱۲۰۰ کسان یې ووژل او شاوخوا ۲۵۰ نور یې یرغمل کړل.

له هغه وروسته د اسراییلو پوځ د غزې په تړانګه کې جګړه پیل کړه چې تر اوسه دوام لري او څه باندې ۳۷زره فلسطینیان په‌کې وژل شوي.

نور راوښيه

XS
SM
MD
LG