د لاسرسۍ وړ لېنکونه

تازه خبر
چهارشنبه ۱۹ سلواغه ۱۴۰۱ کابل ۰۲:۵۰

نړۍ

ترکیې له سويډن او فنلنډ سره جوړېدونکې غونډه لغوه کړې

د ترکیې بیرغ

ترکیې له سویډن او فنلنډ سره هغه درې اړخیزه غونډه لغوه کړې چې ټاکل شوې وه په فبرورۍ میاشت کې جوړه شي.

انقرې دغه اقدام وروسته له هغې وکړ چې په ستاکهولم کې د تېرې اوونۍ په پای کې د ترکیې سفارت ته نژدې یوه اعتراضیه غونډه وشوه چې د قرانکریم یوه نسخه هم په کې وسوځول شوه.

د ترکیې د دولتي ټلوېزیون ټي آر ټي د ډیپلوماتیکو سرچینو په حواله ویلي چې دا غونډه د انقرې په غوښتنه ځنډول شوې ده.

د ترکیې د ولسمشر رجب طیب اردوغان ویاند د روانې میاشتې په پیل کې ویلي و چې، ټاکل شوې د ناټو سرمنشي ینس ستولتنبرګ هم په دې غونډه کې ګډون وکړي.

د ترکیې ولسمشر رجب طیب اردوغان پرون وویل، ستاکهولم دې په ناټو کې د غړیتوب لپاره د ترکیې د ملاتړ تمه نه کوي.

د ورځې تازه خبرونه دلته ولولئ

د سوېډن صدراعظم ترکيې سره د خبرو د بيا پيل چمتووالی ښودلی

د سویډن صدراعظم اولف کریسټرسن

د سویډن صدراعظم اولف کریسټرسن نن سې‌شنبې وویل، هرڅومره ژر چې ترکیه خبرو ته حاضره شي، دی چمتو دی چې له ناټو سره د سویډن د غړیتوب د غوښتنلیک په اړه په ټپه درېدلې خبرې پیل کړي.

فنلنډ او سویډن په ناتو تړون کې د غړیتوب غوښتنه وروسته له هغې وکړه چې روسیې پر اوکراین نوی یرغل پیل کړی و.

د ناتو اکثره غړیو هېوادونو د شمالي اروپا د دغو دواړو هېوادونو غوښتنلیکونه منلي خو ترکیې تر اوسه هغه نه‌دي تایید کړي.

تېر کال سویډن، فنلنډ او ترکیې د دغې پروسې د پر مخ وړلو لپاره موافقه وکړه خو انقرې تېره میاشت په دې اړه خبرې وروسته له‌هغې وځنډولې چې په ستاکهولم کې په یوه اعتراضي لاریون کې یوه ښي اړخي سیاستوال د قرانکریم یوه نسخه وسوځوله.

په ترکیه او سوریه کې د پرونۍ زلزلې د مړو شمېر ۵۰۰۰ کسانو ته ورسېد

د اسوشېټېډپرېس خبري اژانس د راپور له مخې یوازې په ترکیه کې له ۶۰۰۰ زیاتې ودانۍ نړېدلي چې لا یې هم تر لاندې د پاتې کسانو د ژغورنې عملیات روان دي.

په ترکیه او سوریه کې د پرونۍ زلزلې د مړو شمېر ۵۰۰۰ او د ټپیانو زرګونو ته ورسېد.

د رویټرز خبري اژانس د راپور له مخې په ترکیه کې د دې خونړۍ زلزلې د مړیو شمېر ۳۴۰۰ او د ټپیانو شمېر ۲۰ زرو ته رسېدلی.

په سوریه کې د مړو شمېر له ۱۶۰۰ اوښتی او زرګونه نور ټپیان شوي دي.

د اسوشېټېډپرېس خبري اژانس د راپور له مخې یوازې په ترکیه کې له ۶۰۰۰ زیاتې ودانۍ نړېدلي چې لا یې هم تر لاندې د پاتې کسانو د ژغورنې عملیات روان دي.

اژانس د ملګروملتونو په حواله ویلي چې په سوریې کې هم ۲۲۴ ودانۍ نړېدلي او ۳۲۵ نورې زیانمنې شوي دي.

پرونۍ زلزله د ۱۹۹۹ کال له زلزلې وروسته چې له ۱۷ زره زیات کسان یې ووژل، د ترکیې تر ټولو خونړۍ زلزله ده.

په ترکیه او سوریه کې د زلزلې د قربانیانو شمېر نږدې څلور نیم زرو ته ورسېد

اسوشېټېډپرېس خبري اژانس لیکلي، یوازې ترکیه کې له ۵۶۰۰ ډېرې ودانۍ ویجاړې شوي چې لا یې هم تر لاندې د بند پاتې شویو کسانو د ژغورنې عملیات روان دي.

په ترکیه او سوریه کې د خونړۍ زلزلې د قربانیانو شمېر نږدې څلور نیم زرو ته ورسېد.

رویټرز اژانس لیکلي چې نږدې ۳۰۰۰ کسان په ترکیه او لږ تر لږه ۱۴۴۴په سوریه کې مړه شوي دي.

اسوشېټېډپرېس خبري اژانس لیکلي، یوازې ترکیه کې له ۵۶۰۰ ډېرې ودانۍ ویجاړې شوي چې لا یې هم تر لاندې د بند پاتې شویو کسانو د ژغورنې عملیات روان دي.

دغه اژانس د ملګرو ملتونو په حواله ویلي چې د سوریې دننه هم ۲۲۴ ودانۍ نړېدلي او ۳۲۵ نورې تخریب شوي دي.

په ترکیه او سوریه کې د ټپيانو شمېر هم له ۱۶ زرو ډېر ښودل شوی دی.

د ترکیې ولسمشر رجب طیب اردوغان چې په مې میاشت کې سخت انتخابات په مخکې لري، دا زلزله تاریخي وبلله خو ویې ویل چې چارواکي به له مصیبت ځپلو سره تر وسې وسې مرستو ته اوږه ورکړي.

د اسټرالیا د شل اوریزو لوبډلمشر له نړیوال کرکټ تقاعد اعلان کړ

ایرون فينچ

د اسټرالیا کرکټ ملي لوبډلې د شلو اورونو لوبډلمشر ایرون فينچ له نړیوال کرکټ لاس په سر شو.

فينچ د کرکټ په ټولو فارمټونو کې د اسټرالیا لپاره ۲۵۴ نړیوالې سیالۍ ترسره کړې.

هغه په ۵ ټېسټ، ۱۴۶ یو ورځنیو او ۱۰۳ نړیوالو شل اوریزو سیالیو کې ولوبېده.

اسټرالیا په ۲۰۲۱ کال کې د ایرون فینچ په لوبډلمشرۍ د شل اوریزو سیالیو لومړنی نړیوال جام ګټلی و.

نوموړی په نړیواله کچه یوازینی لوبغاړی و چې د یوه هېواد لپاره په ۷۶ نړیوالو سیالیو کې لوبډلمشري کوي.

هغه د اسټرالیا په میلبرن کرکټ لوبغالي کې رسنیو ته ویلي دي: "په دې وپوهېدم چې د شل اوریزو سیالیو په راروان نړیوال جام کې چې په ۲۰۲۴ کال کې به ترسره شي، ونه لوبېږم، نو په همدې خاطر غواړم نړیوال کرکټ پرېږدم څو لوبډله راروان جام ته خپل پلان چمتو کړي."

ایرون فینچ په ۲۰۱۱ کال د انګلنډ پر وړاندې لومړنۍ نړیواله شل اوریزه سیالي ترسره کړه چې ټولټال یې په یو ورځنیو او شل اوریزو لوبو کې ۸۸۰۴ منډې وکړې.

هغه په یو ورځنیو لوبو کې ۱۷ او په شل اوریزو سیالیو کې دوه سلیزې وهلي دي.

فینچ د شل اوریزو سیالیو په یوه پاڼۍ کې ۱۷۲ منډې کړې وې چې دا نړیوال ریکارډ یوازې د هغه په نوم ثبت دی.

د یادونې ده چې ۳۶ کلن فینچ ۱۲ کاله په نړیوال کرکټ کې ولوبېده.

سپینه ماڼۍ: د راغورځول شوي بالون ټوټې چین ته نه سپارل کېږي

متحدوایالتونو دا بالون د فبروري په ۴مه د جټ الوتکې په ډزو راوغورځاوه.

سپینه ماڼۍ وايي، د امریکا په فضا کې د راغورځول شوي چینايي بالون ټوټې یې د څېړنو لپاره راټولې کړي او پلان نه لري چې دا ټوټې بېرته چین ته وسپاري.

د امریکا د ملي امنیت شورا ویاند جان کربي پرون د فبروري په ۶مه وویل، د دې بالون چې امریکايي چارواکو له لوړې فاصلې د جاسوسۍ پرمختللې وسیله بللې، ځینې برخې د سمندر پر سر راپرېوتې وې چې موندلې شوي، خو هغه زیاته کړه چې د سختې هوا له کبله د سمندر په تل کې د دې بالون د نورې برخو د موندلو لپاره کشفي عملیات ممکن نه وو.

متحدوایالتونو دا بالون د فبروري په ۴مه د جټ الوتکې په ډزو راوغورځاوه.

چینايي چارواکي وايي، دا بالون د هوا د حالاتو د څېړنې لپاره هوايي وسیله وه.

په ترکیه او سوریه کې د زلزلې له کبله د مړو شمېر ۱۸۰۰ کسانو ته رسېدلی

وېره یې شته چې د مرګژوبلو شمېر تر دې هم لوړ شي ځکه لا هم د زلزلې له امله تر ویجاړو شویو ودانیو لاندې خلک ایسار دي.

په ترکیه او سوریه کې د نن سهار وختي زلزلې د مړو شمېر اتلس سوو کسانو ته پورته شو.

دا تازه شمېر د فرانسې خبري اژانس شېبه مخکې خپور کړی دی.

د ترکیې ولسمشر رجب طیب اردغان ویلي په ترکیه کې د مړینو شمېر ۱۰۱۴ کسانو ته پورته شوی دی.

اردوغان له نړۍ د مرستو غوښتنه وکړه.

په سوریه کې دولتي روغتیايي ادارو او روغتیاپالانو د لږ تر لږه ۷۸۳ کسانو د وژل کېدو راپور ورکړی دی.

وېره یې شته چې د مرګژوبلو شمېر تر دې هم لوړ شي ځکه لا هم د زلزلې له امله تر ویجاړو شویو ودانیو لاندې خلک ایسار دي.

ګڼو هېوادونو له ترکیې سره د بېړنیو مرستو ډاډ ورکړی او ویلي یې دي چې خپل ژغورونکي ټیمونه سیمې ته لېږي.

له دې ډلې بریتانیا ویلي د ژغورنې د عملیاتو ۷۶ کارپوهان ترکیې ته استوي.

د ریښتر په کچه ۷ اعشاریه اته درجې زلزلې د دوشنبې په سهار وختي د ترکیې جنوب ختیځه او د سوریې شمال ختیځه سیمه وځپله.

د ملګرو ملتونو د اټومي انرژۍ مشر رافایل ګروسي روانه اوونۍ مسکو ته ځي

د ملګرو ملتونو د اټومي انرژۍ مشر رافایل ګروسي

د روسیې د بهرنیو چارو مرستیال وزیر سیرګي ریابکوف د دوشنبې په ورځ ویلي، ګروسي به د اوکراین د زاپوریژیا اټومي بټۍ شاوخوا د یوه خوندي زون د رامنځته کېدو په تړاو خبرې وکړي.

ریابکوف ویلي، مسکو په دې تړاو ژورو او مسلکي خبرو باندې باور لري.

پر اوکراین د روسیې د یرغل له پيله څو ځله پر زاپوریژیا اټومي بټۍ توغندي ویشتل شوي دي چې د ملګرو ملتونو د اټومي انرژۍ اندېښنې یې پارولي دي.

اسرائيلي ځواکونو د کډوالو په يوه کمپ کې ۵ فلسطيني وسله‌وال وژلي

اسرائيلي ځواکونه

اسرائیلي ځواکونو د لوېدیځې غاړې د کډوالو په یوه کمپ کې پنځه فلسطیني وسله‌وال وژلي دي.

اسوشیتید پریس خبري اژانس د اسرائیل د امنیتي چارواکو په حواله ویلي چې دغه برید نن دوشنبه (د سلواغې په ۱۷مه) شوی دی.

اسرائیلي چارواکو ویلي، برید د هغو مشکوکو کسانو د نیولو پر مهال شوی پر اسرائیلو وروستۍ ناکامه حمله کې په لاس لرلو تورن دي.

اسرائیل د وژل شویو دوه تنه د حماس ډلې غړي یاد کړي دي.

د فلسطین روغتیایي چارواکو برید کې یوازې د دریو تنو د ټپي کېدو پخلی کړی دی.

دا برید داسې مهال کېږي چې په اسرائیل کې د نوي حکومت د واک لومړنۍ څو اوونۍ له شخړو سره ملې وې.

ترکيه کې د زلزلې له امله ۷۶ کسان مړه شوي

ترکيه کې د زلزلې انځور

په ترکیه او سوریه کې د نن سهار په زلزله کې د مړو شمېر په زیاتېدو دی.

د رویترز اژانس په وینا، د ترکیې د طبیعي افتونو په وړاندې د مبارزې ادارې تر اوسه د څه باندې ۷۶ کسانو مړینه او د ۴۴۰ نورو ټپي کېدل تایید کړي دي.

اسوشېټېډ پریس اژانس بیا راپور ورکړی، چې څه باندې ۹۹ کسان په سوریه کې مړه شوي او ۳۳۴ تنه نور ټپیان شوي دي.

اټکل کېږي، چې د مړو شمېر به تر دې خورا زیات وي، ځکه په ترکیه او سوریه کې لا هم ګڼ کسان تر نړېدلو ودانیو لاندې راګیر پاتې دي.

د امریکا د جیولوژیکي سروې اداره وايي، دا زلزله د ریښتر په مقیاس اووه اعشاریه اته درجې وه.

د امریکا د جیولوژیکي سروې ادارې په وینا، د زلزلې مرکز د سوریې د پولې په ۹۰ کیلومترۍ کې د ترکیې په غازي عینتاب کې و.

د زلزلې ټکانونه، په لبنان او قبرس کې هم احساس شوي دي.

يونان کې د کښتۍ ډوبېدو پېښه کې څلور پناه غوښتونکي مړه شوي

د یونان ساحلي ساتونکي وايي، چې د درېیو ماشومانو په ګډون څلور پناه غوښتونکي وروسته له هغې مړه شول چې کښتۍ یې پرون د اژه سمندرګي په جنوب شرق کې له لیروس ټاپو دباندې ډوبه شوه.

چارواکو ویلي، چې ماشومانو په روغتون کې تر بستر کېدو وروسته ساه ورکړه.

د یونان یوه چارواکي ویلي، چې دغه کښتۍ له ترکیې روانه شوې وه.

د دغو پناه غوښتونکو هویت نه‌دی مشخص شوی.

د هسپانیا او ایټالیا تر څنګ یونان له منځني ختیځ، افریقا او اسیا څخه اروپا ته د داخلېدو لپاره د پناه غوښتونکو عمده لار ده.

نور راوښيه

XS
SM
MD
LG