د لاسرسۍ وړ لېنکونه

تازه خبر
چهارشنبه ۲ غبرګولی ۱۴۰۳ کابل ۰۹:۳۸

ښځې

يونسکو د زده‌کړو نړيواله ورځ د افغان نجونو او ښځو په نوم ځانګړې کړې ده

انځور - ارشيف
انځور - ارشيف

یونسکو یا د ملګروملتو تعلیمي، علمي او کلتوري ادارې د جنورۍ ۲۴مه، د زده‌کړو نړیواله ورځ د افغان نجونو او ښځو نوم ته ځانګړې کړه.

واک ته د طالبانو له رسېدو وروسته افغان ښځې او نجونې له کار او تعلیمه محرومه شوي او له همدې کبله له افغان ښځو او نجونو سره د نړیواله خواخوږي مخ په زیاتېدو ده.

د یونسکو رئیس ادرې ازولي د پنجشنبې په ورځ افغان ښځو او نجونو ته د هغوی د دغو اساسي حقونو د بېرته ورکول کېدو غوښتنه وکړه.

ده وویل، یونسکو تعلیم د ټولو انسانانو حق بولي او په نړۍ کې بل هیڅ هېواد نه ویني چې ښځې یې له دې حقه منع کړي وي.

ټاکل شوې ده چې د جنورۍ په ۲۴مه یونسکو په نیویارک کې د ملګروملتو په مرکز د سرمنشي په ګډون یوه غونډه راوبولي.

افغانستان په نړۍ کې یوازینی هېواد دی چې ښځې او نجونې يې له خورا ابتدايي بشري حقونو بې برخې دي.

په دې غونډه کې به د افغان نجونو او ښځو د زده‌کړو او کار د حق په اړه ځانګړی بحث وشي.

د ورځې تازه خبرونه دلته ولولئ

ایران د حجاب د نویو مقرراتو تطبیق لپاره نوی ځواک جوړ کړی

د ایران ځواکونه د حجاب په تړاو له یو شمېر مېرمنو سره په خبرو بوخت دي.
د ایران ځواکونه د حجاب په تړاو له یو شمېر مېرمنو سره په خبرو بوخت دي.

د ایران په پلازمېنه تهران کې د سپاه پاسداران انقلاب ځواک قوماندان حسن حسن زاده پرون د هغه نوي اضافي ځواک د جوړېدو اعلان وکړ چې دنده به یې د ښځو د حجاب په برخه کې د نويو محدودیتونو تطبیق وي.

حسن زاده وویل د دې ځواک غړي د دې لپاره روزل شوي چې په عامه ځایونو کې د حجاب نوي مقررات په جدي ډول عملي کړي.

دا اعلان وروسته له هغه کېږي چې ایراني چارواکو په وروستیو ورځو کې د امر باالمعروف او نهی عن المنکر اړوند فعالیتونه پراخ کړي او په دې ترڅ کې یې د یونیفورم لرونکو مامورینو تصویرونه خپاره کړي چې د "رڼا" تر سرلیک لاندې د ځانګړو عملیاتو په ترڅ کې ښځو ته سپارښتنې کوي.

د ۲۰۲۲م کال په سپټمبر میاشت کې وروسته له دې چې د مهساامیني په نوم یوه پېغله د چارواکو په معیار د حجاب د نه مراعاتولو په تور ونیول شوه او بیا یې د پولیسو په توقیف کې سا ورکړه په ایران کې داسې پراخ اعتراضونه پیل شول چې د اسلامي جمهوریت له واکمنېدو راهیسې یې ساری نه و، لیدل شوی.

بینېټ: د زده‌کړو د سیستم له منځه وړل او یا پرې محدودیت لګول د منلو وړ نه دي

د افغانستان د بشري حقونو لپاره د ملګرو ملتونو ځانګړی راپورتر ریچارډ بینېټ
د افغانستان د بشري حقونو لپاره د ملګرو ملتونو ځانګړی راپورتر ریچارډ بینېټ

د افغانستان د بشري حقونو لپاره د ملګرو ملتونو ځانګړی راپورتر وايي، تعلیم ته لاسرسی هغه اساسي حق دی چې باید په ټوله نړۍ کې یې ساتنه وشي.

ریچارډ بینېټ پر ایکس شبکې په یوه بیان کې له هغه آنلاین هشتګ سره چې (د تعلیم آزادي او تعلیم د ټولو لپاره) تر عنوان لاندې پیل شوی، د ګډون له کبله خوښي څرګنده کړې او ویلي یې دي چې د زده کړو د سیستم له منځه وړل او یا پر هغه محدودیت لګول د منلو وړ نه دي.

دا څرګندونې داسې مهال کېږي چې طالبانو پر افغانستان له واکمنېدو وروسته په تېرو څه باندې دوه نیمو کلونو کې د نجونو پرمخ د منځنیو ښوونځیو، لېسو او پوهنتونونو دروازې بندې کړي او پر ډېری ښځو یې د کار بندیز لګولی دی.

امیري د البانیا له ولسمشر او بهرنیو چارو وزیر سره د افغان ښځو پر ملاتړ خبرې کړي

د افغان ښځو، نجونو او بشري حقونو لپاره د امریکا د متحدو ایالتونو ځانګړې استازې رینا امیري
د افغان ښځو، نجونو او بشري حقونو لپاره د امریکا د متحدو ایالتونو ځانګړې استازې رینا امیري

د افغان ښځو، نجونو او بشري حقونو لپاره د امریکا د متحدو ایالتونو ځانګړې استازې رینا امیري وايي، د البانیا له ولسمشر او بهرنیو چارو وزیر سره یې د افغان ښځو او نجونو پر ملاتړ خبرې وکړې.

رینا میري نن سهار وختي په خپله ایکس شبکه کې لیکلي، د البانیا له ولسمشر بایرام بګای، دغه راز د اروپا او بهرنیو چارو وزیر ایګلي حسني سره په کتنه کې یې د افغان وګړو د ملاتړ له کبله د البانیا د حکومت د حیاتي همکارۍ مننه وکړه.

مېرمن امیري لیکلي، هغې په ځانګړې ډول د افغان ښځو او نجونو د ملاتړ له کبله د البانیا مننه کړې ده.

البانیا له هغو هېوادونو دی چې د ښځو او نجونو په ګډون په سلګونو افغان پناه غوښتونکي په کې نورو غربي هېوادونو ته د تلو په نیت په لنډمهاله توګه دېره دي او تر اوسه یې برخلیک معلوم نه دی.

فرانسې د افغان ښځو د سنګسار او جسمي سزا ورکولو د لړۍ پيلول وغندل

د فرانسې بیرغ
د فرانسې بیرغ

فرانسې د طالبانو حکومت هغه پرېکړه په کلکه غندلې چې د ښځو د سنګسار او هغوی ته یې د جسمي سزا د ورکولو د لړۍ د پیل په اړه کړې ده.

د فرانسې د بهرنیو چارو وزارت پرون ناوخته یوه اعلامیه کې دا عمل وحشتناک او د بنسټیزو حقونو او ازادیو سره ټکر کې بللی دی.

د فرانسې د بهرنیو چارو وزارت په اعلامیه کې زیاته شوې: "د ملګرو ملتونو امنیت شورا د فرانسې په ګډون دا روښانه کړې چې د ښځو حقونو ته درناوی د هر ډول خبرو اترو لپاره یو شرط دی."

په دې اعلامیه کې د طالبانو له حکومت غوښتل شوي چې د نجونو او ښځو سره د ظلم او حذف پالیسۍ له‌منځه یوسي.

دا په داسې حال کې ده چې وروستیو کې د طالبانو مشر ملاهبت‌الله ته یو منسوب غږ کې چې د دوی د حکومت تر کنټرول لاندې ملي تلوېزیون هم خپور کړ؛ په عام محضر کې نجونو او ښځو ته د سنګسار او سزاوو ورکولو په اړه خبرداری ورکول شوی و.

خو په دې اړه له ډېر شمېر نیوکو وروسته، د طالبانو حکومت تر کنټرول لاندې ملي تلوېزیون دا غږیز کلیپ له خپلو ټولنیزو پاڼو لېرې کړ.

امیري: طالبان دې د بندي او تري تم شویو کسانو کورنیو ته ځواب ورکوونکي ووسي

د افغانستان د بشري حقونو، ښځو او نجونو لپاره د امریکا ځانګړې استازې
د افغانستان د بشري حقونو، ښځو او نجونو لپاره د امریکا ځانګړې استازې

د افغانستان د بشري حقونو، ښځو او نجونو لپاره د امریکا ځانګړې استازې د طالبانو له حکومته غوښتي چې د توقیف شویو او تري تم شویو کسانو کورنیو ته ځواب ورکوونکي ووسي.

رینا امیري له حقیقته د خبرېدو د نړیوالې ورځې په مناسبت چې پرون د مارچ په ۲۴مه ونمانځل شوه، دغه څرګندونې کړې دي.

هغې که څه هم نه دي ویلي چې څه شمېر کسان په افغانستان کې د طالبانو له خوا توقیف او تري تم دي، خو زیاته کړې ده چې یوشمېر کورنۍ د خپلو غړو د تري تم کېدو او توقیف ځایونو د موندلو هڅه کوي.

د راپورونو له مخې له تېرې اکټوبر میاشتې راهیسې د افغانستان د خودجوشه ښځو د غورځنګ غړې منیژه صدیقي او د تعلیم دوه فعالان احمد فهیم عظیمي او صدیق الله افغان د طالبانو د استخباراتو په توقیف کې دي او برخه لیک یې معلوم نه دی.

د طالبانو استخبارات هم په اسانه د دوی له خوا د توقیف شویو کسانو د ځای ځایږي په اړه معلومات نه ورکوي.

بینېټ: د افغانستان په څېر په کوم بل هېواد کې د ښځو حقونه ډېر نه نقضېږي

د بشري حقونو په برخه کې د ملګرو ملتو ځانګړی راپور ورکوونکی ریچارډ بینېټ
د بشري حقونو په برخه کې د ملګرو ملتو ځانګړی راپور ورکوونکی ریچارډ بینېټ

د بشري حقونو په برخه کې د ملګرو ملتونو ځانګړی راپور ورکوونکی وایي چې دی فکر نه کوي چې د نړۍ په بل ځای کې دې د ښځو حقوق دومره تر پښو لاندې شي لکه په افغانستان کې چې کېږي.

ریچارډ بینېټ دا خبره ازادي راډيو ته د جمعې په ورځ په ځانګړې مرکه کې وکړه او زیاته یې کړه چې په ځینو نورو هېوادونو کې هم نجونو او ښځو ته حقوق نه ورکول کېږي، خو هیله شته چې په راتلونکې کې ښځې له خپلو حقه حقوقو برخمنې شي.

طالبان وایي چې دوی د شریعت په چوکاټ کې د ښځو او نجونو حقوقو ته ژمن دي.

وروسته تر دې چې طالبانو د ۲۰۲۱م کال په اګست کې کابل ونیوه، تر شپږم ټولګي ورپورته یې د نجونو ښوونځي بند کړل بیا یې نژدې کال وروسته د پوهنتون دروازې د دوی پرمخ وتړلې.

همداراز یې یو شمېر نور بندیزونه پر ښځو لګولي چې د بشري حقونو د ډلو له لوریو غندل شوې دي.

وېسټ: د افغان نجونو او ښځو له هڅو او زړورتیاوو درناوی کوم

د افغانستان لپاره د امریکا متحده‌ایالاتو ځانګړی استازی توماس وېسټ
د افغانستان لپاره د امریکا متحده‌ایالاتو ځانګړی استازی توماس وېسټ

د افغانستان لپاره د امریکا متحده‌ایالاتو ځانګړی استازی وايي، د افغان نجونو او ښځو له ټولو هغو هڅو او زړورتیاوو درناوی کوي چې غواړي په هر کچه د کار ترڅنګ، تعلیم وکړي څو خپل حقونه خوندي او د ژوند په ټولو چارو کې برخه واخلي.

توماس وېسټ نن سهار د مارچ اتمې د ښځو د نړیوالې ورځې په مناسبت په خپله ایکس‌پاڼه دا مسایل د افغانستان او سیمې د ثبات لپاره مهم بللي.

په ورته وخت کې د افغانستان لپاره د امریکا شارژدافېره کرن ډیکر وايي، افغانې ښځې د افغانستان د راتلونکي لپاره اړینې دي.

هغې په خپله ایکس‌پاڼه د مارچ اتمې یا د ښځو نړیوالې ورځې ته په اشارې لیکلي، هره ورځ باید د ښځو نړیواله ورځ وي، افغان ښځو ته باید فرصت برابر او خبرې یې واورېدل شي.

په افغانستان کې له نړیوالې ټولنې د بشري حقونو د خوندیتوب غوښتنه شوې

ارشیف: په کابل کې د معترضو مېرمنو د یوې اعتراضیه غونډې انځور
ارشیف: په کابل کې د معترضو مېرمنو د یوې اعتراضیه غونډې انځور

د بشري حقونو یو شمېر نړیوالو ملاتړو بنسټونو په یوه لیک کې له نړیوالې ټولنې غوښتي چې په افغانستان کې د بشري حقونو د خوندیتوب لپاره بېړنی اقدام وکړي.

دوی په ګډ لیک کې چې تېره شپه یې ناوخته د ښځو د نړیوالې ورځې په مناسبت خپور کړی لیکلي، په ۲۰۲۱ کال کې د واک له بیا تر لاسه کولو وروسته؛ طالبانو د نجونو او ښځو په حقونو د ظالمانه بریدونو په پایله کې یو جدي بحران رامنځته کړی چې د وضعیت د لا خرابېدو نښه او د جنسیتي اپارټایډ په توګه تشریح کېدای شي.

د بخښنې نړیوال سازمان، د بشري حقونو څار سازمان، فریډم هاوس او ځینو نورو په دې لیک کې په نړیوالې ټولنې غږ کړی چې په افغانستان کې د بشري حقونو د خوندیتوب په ګډون، د فعالانو د ځورونې مخه ونیسي او په طالبانو د زیات فشار راوستو له لارې افغان مېرمنې په ټولو خبرو اترو کې شاملې کړي.

ریچارډ بینېټ: طالبان دې د بشري حقونو مدافعانې له بنده خوشې کړي

د افغانستان لپاره د ملګرو ملتونو ځانکړی راپور ورکوونکی ریچارډ بینېټ
د افغانستان لپاره د ملګرو ملتونو ځانکړی راپور ورکوونکی ریچارډ بینېټ

د افغانستان لپاره د ملګرو ملتونو ځانکړي راپور ورکوونکي ریچارډ بینېټ نن د مارچ اتمه د ښځو د نړیوالې ورځې په مناسبت پر طالبانو غږ کړی چې د بشري حقونو مدافع ښځې دې له بنده راخوشې کړي.

هغه دا خبره په هغه بیان کې کړې چې ملګرو ملتونو پر خپلې ویبپاڼې خپور کړی دی.

بینېټ وړاندې ویلي: "د ښځو د نړیوالې ورځې په مناسبت زه د افغانستان د ښځو او نجونو هغوي چې په بېسارې ډول له سیستماتیک تبعیض سره مخ دي تر څنګ ولاړ یم."

په بیان کې بینېټ د افغانو ښځو د مېړانې ستاینه هم کړې چې د خپلو حقونو لپاره مبارزه کوي.

هغه له طالبانو غوښتي چې د ښځو او نجونو بشري حقونو له ډلې يې زده کړې، کار، سفر، د بیان ازادي او کلتوري حقونو ته درناوی وکړي.

نوموړي په دې بیان کې له طالبانو غوښتنه کړې چې سمدستي او پرته له کوم قید او شرطه دې ټول هغه کسان له زندانه راخوشې کړي چې د بشري حقونو په ځانګړې توګه د ښځو او نجونو د حقونو د دفاع په خاطر په خپل سر نیول شوي دي.

نرګس سادات، پریسا مبارز، ملالۍ هاشمي، فاطمه محمدي، ژولیا پارسي، پریسا ازاده، منيژه صدیقي او بهاره کریمي هغه معترضې ښځې دي چې په ۲۰۲۳ کال کې د طالبانو د بندیزونو په غبرګون د غږ پورته کولو له امله نيول شوي دي.

له دې ډلې منيژه صدیقي چې د ۲۰۲۳ کال د اکتوبر په نهمه د طالبانو له خوا نیول شوې، لا هم په زندان کې ده.

اروپايي ټولنه: په هغه څه چې ښځې يې ترسره کولی شي، هیڅ ډول بندیز نه شته

د اروپايي ټولنې بیرغ
د اروپايي ټولنې بیرغ

اروپايي ټولنې نن د مارچ اتمه د ښځو د نړیوالې ورځې په مناسبت پر خپلې ایکس پاڼې یا پخواني ټویټر کې په یو پیغام کې ویلي، په هغه څه چې ښځې يې ترسره کولی شي، هیڅ ډول بندیز نه شته.

دې ټولنې زیاته کړې: "زموږ همکاران په افغانستان او نړۍ کې د ښځو د حقونو، برابرۍ او د فرصتونو د برابرولو په ارزښت پوهېږي."

د ښځو نړیواله ورځ سږ کال په داسې حال کې نمانځل کېږي چې طالبانو په افغانستان کې نجونې او ښځې له کار او زده کړو محرومي کړي دي.

د طالبانو د حکومت ویاند تازه ویلي، دوی د ښځو د حقونو په برخه کې موثر اقدامات کړي او د ښځو حقونو ته ژمن دي.

نور راوښيه

XS
SM
MD
LG