د لاسرسۍ وړ لېنکونه

تازه خبر
سه شنبه ۵ چنګاښ ۱۴۰۳ کابل ۰۷:۴۴

افغانستان

د طالبانو حکومت: د سړې هوا له امله د مړو شویو کسانو شمېر ۷۸ ته پورته شو

انځور - ارشيف
انځور - ارشيف

د طالبانو د حکومت له پېښو سره د مبارزې وزارت وايي، د وروستۍ سړې څپې له کبله د مړو شویو افغانانو شمېر ۷۸ تنو ته رسېدلی دی.

د دغه وزارت ویندوی تېره شپه ازادي راډیو ته په راستولي پیغام کې وویل: "۷۸ تنه شهیدان، یو ټپي او ۷۷ زره څاروي مړه شوي دي."

سږنی کال د افغانانو لپاره د طبیعي پېښو له پلوه خورا سخت کال ګڼل کېدای شي.

۱۴۰۱ لمریز کال په وچکالۍ پیل شو، ورپسې سختو زلزلو په پکتیکا او خوست کې تر زرو ډېر کسان مړه کړل.

د زلزلو ترڅنګ د افغانستان تر شلو د ډېرو ولایتونو اوسېدونکو ته کمسارو سېلونو د سر و مال ډېر تاوانونه واړول.

دا په داسې حال کې ده چې افغانستان د خپل تاریخ له یو ستر بشري ناورین سره مخامخ دی.

د ملګروملتو د بشري مرستو همغږي کوونکې ادارې، اوچا ویلي چې ۲۱ ملیونه افغانان بېړنیو بشري مرستو ته اړتیا لري.

نړیوالې بشري مرستې د طالبانو له لوري د ښځو د کار او تعلیم د مخنیوي په شان اقداماتو ټکنۍ کړي دي.

د ورځې تازه خبرونه دلته ولولئ

متقي افغان لوبډلمشر ته؛ طالبان غواړي څو سپورټ له سیاست څخه لیرې وي

افغان کرکټ ملي لوبډله
افغان کرکټ ملي لوبډله

د کرکټ د شل اووریز نړیوال جام نیم پایلوبې ته د افغان ملي لوبډلې له پرمختګ وروسته د طالبانو د حکومت د بهرنیو چارو وزیر ویلي چې دوی غواړي سپورټ له سیاست څخه لیرې وي.

په هغه ویډیو کې چې د بهرنیو چارو وزارت مرستیال ویاند حافظ ضیااحمد پر خپله ایکس پاڼه خپره کړې، متقي په داسې حال کې ښکاري چې له لوبډلمشر راشدخان سره خبرې کوي.

افغانستان د ۲۰۲۴ کال د ۲۰ اووریز نړیوال جام د اتو غوره لوبډلو په وروستۍ سیالي کې له بنګلدېش څخه لوبه وګټله او نیم پایلوبې ته ورسېد.

که څه هم افغانستان چې لومړی یې بېټینګ وکړ، نسبتاً ټیټ یعنې د ۱۱۶ منډو هدف ټاکلی و، خو بالرانو د بنګله‌دېش پر لوبغاړو فشار زیات کړ او پرې یې‌ نه‌ښودل چې ټاکلی هدف پوره کړي.

افغانستان به د پنجشنبې په ورځ د جون ۲۷مه د کابل د سهار په ۵ بجو په نیم پایلوبه کې له جنوبي افریقا سره مخامخ شي.

د نیم پایلوبې دوهمه لوبه به هم د پنجشنبې په ورځ د هند او انګلستان ترمنځ وي.

په ویانا کې نن د طالبانو د مخالفو سیاستوالو د غونډې دوهمه او وروستۍ ورځ ده

په ویانا کې د طالب ضد څېرو د غونډې انځور
په ویانا کې د طالب ضد څېرو د غونډې انځور

د اتریش په پلازمېنه ویانا کې نن د طالبانو د حکومت د مخالفو سیاستوالو د غونډې دوهمه او وروستۍ ورځ ده.

د یوه دیموکراتیک افغانستان لپاره د ویانا کنفرانس تر سرلیک لاندې د دې غونډې ګډونوال وايي، د دوی هدف په خپلو لیکو کې د اختلافونو له منځه وړل او د همغږۍ پیاوړي کول دي.

په دې غونډه کې د طالبانو پر مخالفو ډلو سربېره د ښځو استازې، مدنې فعالان او یو شمېر خپلواک سیاستوال هم شامل دي.

د دې غونډې یوه ډله ګډونوال د حل یوازينۍ لار د بین‌الافغاني مذاکراتو بیا پیلول بولي، خو بله ډله یې بیا د خبرو تر څنګ پر پوځي انتخاب ټینګار کوي.

د دې غونډې کوربه د اتریش د بهرنیو چارو وزارت د نړیوالو اړیکو انسټېټیوټ دی.

نړیوال جام؛ افغانستان بنګله‌دېش ته د ۱۱۶ منډو هدف ورکړ

د افغانستان لوبغاړی ګلبدین نایب د لوبې پر مهال
د افغانستان لوبغاړی ګلبدین نایب د لوبې پر مهال

د کرکټ شل اوریز نړیوال جام د ۸ غوره لوبډلو په پړاو کې د افغانستان او بنګله‌دېش ترمنځ د پیل شوې سیالۍ لومړۍ پاڼۍ بشپړه شوه.

یاده سیالي چې نن د کابل پر وخت سهار ۵:۰۰ بجې پیل شوې وه افغان لوبډلې یې تر پچې ګټلو وروسته توپوهنه غوره کړه او ۱۱۵ منډې یې وکړې.

افغان لوبډلې ته یو وار بیا رحمن‌الله ګربز تر نورو زیاتې ۴۳ منډې وکړې.

بنګله‌دېش ته بیا رشاد حسین ۳ لوبغاړي وسوځول.

د لومړۍ پاڼۍ تر پای ته رسېدو وروسته ورښت هم پیل شوی او لا معلومه نه ده چې دویمه پاڼۍ به کله پیل شي.

د دې سیالۍ ګټل افغان لوبډلې ته له دې امله اړین دي چې نیمه پایلوبې ته پرې رسېدای شي او د بایللو په صورت کې به یې په نړیوال جام کې سفر پای ته ورسېږي.

په کابل ښار یوه زوروه چاودنه شوې

د افغانستان په عمومي نقشه کې د کابل ولایت موقعیت
د افغانستان په عمومي نقشه کې د کابل ولایت موقعیت

کابل ښار د دوشنبې په شپه د یوې زوروې چاودنې شاهد و.

چاودنه د راپورونو له مخې د شپې شاوخوا اته نیمې بجې د کابل د شپږمې حوزې اړوند د علاوالدین په سیمه کې شوې ده.

د طالبانو مخالفې ډلې د ازادۍ جبهې په خپله ایکسپاڼه ادعا کړې چې دا چاودنه د دوی کسانو د طالبانو په پوسته باندې کړې ده.

دې جبهې ادعا کړې چې په برید سره یې پنځه طالبان وژلي او دوه نور یې ټپیان کړي.

طالبانو لا د ازادۍ جبهې د ادعا په اړه څه غبرګون نه دی ښودلی.

ازادي راډیو په چاودنه کې د مرګژوبلې ادعا نه شي تاییدولی.

طالبانو د ګرځنده مبایل ټيلیفونونو د ثبت پروسه پيل کړې

ارشیف: په کابل کې یو طالب وسله وال د مبایل ټیلیفون د استعمال پر مهال
ارشیف: په کابل کې یو طالب وسله وال د مبایل ټیلیفون د استعمال پر مهال

د طالبانو د کورنیو چارو وزارت اعلان کړی چې د ګرځنده مبایل ټيلیفونونو د ثبت پروسه یې پيل کړې ده.

د دغه وزارت ویاند عبدالمتین قانع په خپله ایکسپاڼه پرون په یوه بیان کې لیکلي چې د کورنیو چارو وزارت د خلکو د شخصي ټیلیفونو د خوندیتوب لپاره دا کار کړی دی.

هغه ویلي، دا پروسه په ډېره منظمه او پرمختللې الکترونیکي بڼه مخته ځي او فورمې یې هم توزیع شوي.

هغه ویلي، تر دې دمه د دې پروسې له لارې څه باندې ۷۰۰ غلا شوي ټیلیفونونه بېرته پيدا او خپلو اصلي مالکینو ته سپارل شوي دي.

د طالبانو امنیتي چارواکو داسې وخت د مبایلونو د ثبت لپاره خلک هڅولي چې پخوا ګڼو خلکو د مبایلونو له غلاوو ډېر شکایت درلود.

نړیوال جام؛ افغانستان د بنګله‌دېش پر وړاندې توپوهنه غوره کړه

د افغانستان د تېرو لوبو څخه یو انځور
د افغانستان د تېرو لوبو څخه یو انځور

د کرکټ شل اوریز نړیوال جام د ۸ غوره لوبډلو په پړاو کې وروستۍ سیالي د افغانستان او بنګله‌دېش ترمنځ ترسره کېږي.

دغه سیالي چې نن سه شنبه د کابل پر وخت سهار ۵:۰۰ بجې پیلېږي پچه یې افغانستان وګټله او توپوهنه یې غوره کړه.

افغان لوبډلمشر راشدخان وویل چې د دې سیالۍ په یولس کسیزه لوبډله کې یې کوم بدلون نه دی راوستی.

که افغان لوبډله دغه سیالي وګټي، نو نېغ په نېغه به نیمه پایلوبې ته لار پیدا کوي.

ملګري ملتونه: د دوحې د غونډې هدف له نړۍ سره خبرو ته د طالبانو هڅول دي

دا ځل به د دوحې په کنفرانس کې د ښځو استازې ګډون ونه لري
دا ځل به د دوحې په کنفرانس کې د ښځو استازې ګډون ونه لري

د ملګروملتونو ویاند وايي، د دوحې د غونډې هدف دا دی چې طالبان وهڅوي چې د افغانانو له ګټو سره سم په همغږي او منظم ډول له نړۍ سره خبرې وکړي.

سټیفن دوجاریک پرون یکشنبې خبریالانو ته وویل چې بشري حقونه، په ځانګړې توګه د ښځو حقونه به د دوحې په غونډه کې په ټولو بحثونو کې مهم وي.

دوجاریک زیاته کړه چې د دوحې غونډه د یوې پروسې برخه ده، نه یوه ناسته او افغان ښځې او مدني ټولنې به د دې پروسې برخه وي.

طالبان به د راتلونکې اوونۍ په پای کې د سرطان لسمه او یوولسمه قطر ته خپل استازي واستوي چې په دوحه کې په هغه دوه ورځنۍ غونډه کې ګډون وکړي چې د ملګرو ملتونو د لوړپوړو چارواکو ترڅنګ د افغانستان لپاره د ۲۵ هېوادونو ځانګړي استازي په‌کې برخه اخلي.

دا د ملګرو ملتونو په مشرۍ درېیمه ناسته ده خو له دې نظره لومړۍ ده طالب چارواکي پکې ګډون کوي.

په پکتیا کې غره ښویېدو د یوې کورنۍ ۷ غړي مړه کړي

د پکتیا د مرکز ګردېز یوه څنډه
د پکتیا د مرکز ګردېز یوه څنډه

په پکتیا ولایت کې د غره د ښویېدو له کبله اووه تنه مړه شوي دي.

د طالبانو تر کنټرول لاندې د افغانستان ملي راډيو تلوېزيون د پکتيا ولايت د سيمه‌ييزو چارواکو له خولې خبر ورکړ چې د دې ولايت په څمکنو ولسوالۍ کې د غره د ښويېدو له امله د يوې کورنۍ اووه غړي مړه شوي دي.

ویل کېږي چې په مړوشویو کې دوه ښځې او پنځه ماشومان دي.

په وروستیو میاشتو کې د افغانستان په یو شمېر ولایتونو کې د طبیعي پېښو د رامنځته کېدو له امله خلکو ته د سر او مال ډېر تاوانونه اوښتي دي.

ویانا کې د طالب ضد مخالفانو ناسته؛ د افغانستان د راتلونکې لار نقشې په اړه بحث کوي

ارشیف: په ویانا کې له دې مخکې هم د طالبانو د یوه عمده مخالف احمد مسعود او نورو څېرو په ګډون ناستې شوې دي.
ارشیف: په ویانا کې له دې مخکې هم د طالبانو د یوه عمده مخالف احمد مسعود او نورو څېرو په ګډون ناستې شوې دي.

د ویانا څلورمه ناسته نن پیلېږي.

په دې ناسته کې د طالبانو د حکومت ضد عمده مخالفان سره راټولېږي او په خبره یې چې د افغانستان د راتلونکې لار نقشې په اړه بحث کوي.

د ملي مقاومت جبهې په خپله ایکسپاڼه لیکلي چې د دوی مشر احمد مسعود په دې ناسته کې د ګډون لپاره د اتریش پلازمېنې ویانا ته رسېدلی دی.

د بیان له مخې تمه کېږي چې د طالبانو ضد "سیاسي او پوځي" ډلو شاوخوا اویا استازي د ویانا څلورمې ناسته کې برخه واخلي.

طالبانو بیا د ویانا پخوانۍ ناستې بې ګټې بللې وې او ویل یې چې ټولې د دوی په خبره ازمویل شوې څېرې په‌کې راټولیږي.

طالبانو د روسیې د بهرنیو چارو وزیر د وروستیو څرګندونو هرکلی کړ

 د روسیې د بهرنیو چارو وزیر سرګي لاوروف
د روسیې د بهرنیو چارو وزیر سرګي لاوروف

د طالبانو د بهرنیو چارو وزارت د روسیې د بهرنیو چارو وزیر له دریځ هرکلی کړی چې ویلي یې دي له طالبانو سره لا زیاتو با ثباتو، دوامداره او حقیقي خبرو ته اړتیا ده.

سرګي لاوروف د ټولیز امنیت د تړون سازمان د بهرنیو چارو وزیرانو د شورا په ناسته کې چې همدا اوونۍ په قزاقستان کې شوې د افغانستان اړوند خبرې کړي.

هغه ویلي، له افغانستان لا هم د ترهګرۍ ګواښ موجود دی، خو د ده په خبره د طالبانو حکومت له ترهګرو سره مبارزه کوي او دوی یې همکارۍ ته چمتو دي.

د طالبانو د بهرنیو چارو وزارت په خپل بیان کې د لاوروف له نظره د هرکلي تر څنګ ویلي چې د روسیې په شمول ټولو هېوادو ته د ښه امنیت ډاډ ورکوي.

لاوروف داسې وخت د طالبانو له حکومت سره د دوامداره او رغنده خبرو په دوام ټینګار کړی چې تمه ده د همدې جون میاشتې په پای کې د دوحې درېیمه ناسته وشي.

د دوحې په ناسته کې د ملګرو ملتونو په کوربه توب د افغانستان لپاره د نړۍ د ګڼو هېوادونو ځانګړي استازي غونډه نیسي.

نور راوښيه

XS
SM
MD
LG