د روسیې ولسمشر ولادمیر پوتين نن هغه لایحه توشېح کړه چې د روسیې له خوا پر اوکراین د یرغل په ترڅ کې د مسکو له خوا د اوکراین په لاندې کړيو سیمو کې د روان کال په پای کې په قانوني توګه د ټاکنو تنظیمولو ته اجازه ورکوي.

پوتین د اوکراین په څلورو سیمو کې چې روسیه پرې کنټرول لري، نظامي حالت اعلان کړی دی.

خو د روسیې پخواني قانون په دغسې حالت کې د انتخاباتو ترسره کولو ته اجازه نه ورکوله.

دغه نوی قانون په اعلان شوي نظامي حالت کې هم د ټاکنو ترسره کېدو ته په دې شرط اجازه ورکوي، چې دفاعي او امنیتي ارګانونه یې منظور کړي.

ټاکل شوې چې د هندوستان غوره لیګ یا آی پي ایل ځنډېدلې پایلوبه نن د ګجرات ټایټانز او چینای سوپرکینګز لوبډلو ترمنځ ترسره شي.

دغه سیالي تېره ورځ په لوبغالي کې د شدید ورښت له امله وځنډول شوه.

د آی پي ایل سیالیو د اصولو پر بنسټ، که پایلوبه له هر طبيعي موانع سره مخ کېږي، نو یوه بله اضافي ورځ هم ورکول کېږي.

دغه پایلوبه به نن د کابل پر وخت ماښام ۶:۳۰ پیل شي.

د ګجرات لوبډلې په احتمالي نوملړ کې دوه افغان لوبغاړي راشدخان او نوراحمد هم اخستل شوي دي.

د هندي رسنیو د رپوټونو پر اساس چې تېره ورځ پایلوبې ته د لیدو په پار شاوخوا سل زره کسان لوبغالي ته ورغلي وو او نن هم د همدغومره خلکو د ورتلو اټکل شوی.

د احمد اباد 'نریندر مودي' کرکټ لوبغالی د نړۍ په کچه د زیاتو خلکو د ناستې ظرفیت لري چې شاوخوا سل زره کسان په کې ځایېږي.

د اوکراین هوایي ځواکونو ویلي چې روسیې نن پر پلازمېنه کییف بالسټیک توغندي توغولي دي.

د رویټرز خبري اژانس د راپور له مخې دا خبره د هوایي ځواکونو ویاند یوري ایحنات د اوکراین تلوېزیون سره په خبرو کې کړې ده.

نوموړي ویلي، داسې ښکاري چې له ایس ۳۰۰ او ایس ۴۰۰ توغندیو څخه هم کار اخیستل شوی دی.

سملاسي د دغو بریدونو د مرګ ژوبلې او زیان په اړه څه نه‌دي ویل شوي، خو کییف کې د خطر زنګ وهل شوی دی.

د روسیې د کورنیو چارو وزارت امریکایي سناتور لیندسي ګراهام د تعقیب لاندې کسانو په لېست کې شامل کړی دی.

د ازادي راډیو د خبر مرکزي څانګې لیکلي، دا ګام وروسته تر دې اخیستل کېږي چې ګراهام د می په ۲۶مه د اوکراین له ولسمشر ولودمیر زلنسکي سره په ملاقات کې وویل: 'روسان مړه کېږي' او هغه لګښتونه تر ټولو غوره پیسې دي چې امریکا د اوکراین په ملاتړ لګولي دي.

کله چې روسیې پر دغو خبرو نیوکه وکړه، اوکراین د زیلینسکي او ګراهام د ملاقات بشپړه ویډیو خپره کړه او معلومه شوه چې د ګراهام دغه دوه خبرې تړاو نه سره لري.

ګراهام پر ده د روسیې نیوکې رد کړي او ویلې یې دي، ده یوازې د روسیې په وړاندې جګړه کې د اوکراینیانو روحیه ستایلې ده.

د امریکا او روسیې د ولسمشرانو جو بایډن او ولادمیر پوتین په ګډون د نړۍ یو شمېر مشرانو د ترکیې ولسمشر رجب طیب اردوغان ته په ټاکنو کې د بریا مبارکي ورکړې ده.

د فرانس پرېس خبري اژانس د راپور له مخې، بایډن هیله څرګنده کړې چې له اردوغان سره په ګډه به د نړیوالو ننګونو د حل لپاره کار کوي.

ولادمیر پوتین هم د اردوغان بریا د هغه د صادقانه هڅو او کار پایله بللې ده.

د طالبانو د حکومت رییس الوزرا ملا محمد حسن اخوند هم اردوغان ته مبارکي ورکړې او د ترکیې او افغانستان د خلکو د اړیکو په لا ښه والي یې ټینګار کړی دی.

د ترکیې د ټاکنو ادارې د ولسمشرۍ د دویم ځلي ټاکنو د څه باندې ۹۹ فیصده رایو له شمېرلو وروسته اعلان وکړ، چې رجب طیب اردوغان د دغو ټاکنو ګټونکی دی.

د دې بنسټ مشر احمد ینیر پرون ماښام د ۹۹.۴۳ فیصده رایو له شمېرل کېدو وروسته وویل، چې اردوغان ۵۳ اعشاریه ۴۱ فیصده رایې ګټلي او د هغه سیال کمال قلیچدار اوغلو ۴۶ اعشاریه ۵۹ فیصده رایې خپلې کړې دي.

اردوغان پرون په استانبول کې د خپلو پلویانو یوې ډلې ته په وینا کې په ټاکنو کې د ګډون له کبله د ترکیې د خلکو مننه وکړه.

قلیچدار اوغلو دغه دویم ځلي ټاکنې په وروستیو کلونو کې تر ټولو غیرعادلانه بللې دي.

د ترکیې د ټاکنو ادارې د ولسمشرۍ د دویم ځلي ټاکنو د څه باندې ۹۹ فیصده رایو له شمېرلو وروسته اعلان وکړ، چې رجب طیب اردوغان د دغو ټاکنو ګټونکی دی.

د دې بنسټ مشر احمد ینیر پرون ماښام د ۹۹.۴۳ فیصده رایو له شمېرل کېدو وروسته وویل، چې اردوغان ۵۳ اعشاریه ۴۱ فیصده رایې ګټلي او د هغه سیال کمال قلیچدار اوغلو ۴۶ اعشاریه ۵۹ فیصده رایې خپلې کړې دي.

اردوغان پرون په استانبول کې د خپلو پلویانو یوې ډلې ته په وینا کې په ټاکنو کې د ګډون له کبله د ترکیې د خلکو مننه وکړه.

قلیچدار اوغولو دغه دویم ځلي ټاکنې په وروستیو کلونو کې تر ټولو غیرعادلانه بللې دي.

د سوریې دولتي خبري اژانس خبر ورکوي، چې د اسراییلو هوايي حملو پرون ناوخته د سوریې په پلازمېنه دمشق کې ځینې اهداف ویشتلي دي.

دا په نږدې یوه میاشت کې د خپل ډول له مخې لومړۍ هوايي حملې ګڼل کېږي.

د اسراییل چارواکو پر دمشق د پرونیو حملو په باب سم د لاسه کومه تبصره نه ده کړې.

د سوریې سانا خبري اژانس راپور ورکړی چې د سوریې د هوايي مدافع دستګاوو د دمشق په مربوطاتو کې دغو هوايي حملو ته ځواب ویلی او ځینې حملې یې شنډې کړې دي.

د اژانس په وینا، په دغو حملو کې یوازې مالي زیانونه اوښتي دي.

تر دې مخکې پر سوریې بله هوايي حمله کې چې شک کېږي اسراییل به کړې وي، د مې میاشتې پر دویمه شوې وه، چې د سوریې په شمالي ښار حلب کې یې نړیوال هوايي ډګر په نښه کړی و.

دولتي اژانس هغه وخت خبر ورکړی و، چې په هغه حمله کې د سوریې یو سرتېری وژلی او د هوايي ډګر ارتباطات یې پرې کړي وو.

د اوکراین ولسمشر ولودمیر زیلینسکي پارلمان ته یوه لایحه وړاندې کړې چې هدف یې د روسیې پر متحد ایران د پنځوسو کلونو لپاره د بندیزونو لګول دي.

د زیلینسکي د دفتر رییس اندري یرماک پرون یکشنبه دا خبر ورکړی دی.

دا د هغه څه ځواب ګڼل کېږي چې کییف یې مسکو ته د تهران له خوا د وسلو برابرول ګڼي.

کییف او متحدان یې وايي، پر اوکراین د روسیې له یرغل راوروسته ایران روسیې ته د سلګونو بې پېلوټه الوتکو په ګډون وسلې ورکړې دي، خو تهران دغه تورونه ردوي.

که دغه لایحه د اوکراین د پارلمان له خوا تصویب شي، د اوکراین له طریق او د اوکراین له هوايي قلمرو به د ایراني مالونو مخه نیول کېږي.

د ایران او ایراني وګړو په وړاندې تجارتي، مالي او د ټکنالوژۍ په برخه کې بندیزونه هم لګوي.

ټاکل شوې چې د اسراییل ولسمشر اسحاق هیرزوګ له خپل سیال د اذربایجان له ولسمشر الهام علییف سره د خبرو لپاره سبا سې‌شنبې باکو ته سفر وکړي.

په تلبیب کې د هیرزوګ دفتر پرون یکشنبې اعلان وکړ چې د دواړو هېوادونو مشران به د دوه اړخیزو ستراتېژیکو اړیکو د پراختیا پر لارو چارو خبرې وکړي.

هیرزوګ به د اسراییل دولت د جوړېدو د ۷۵ کالیزې په مراسمو کې هم ګډون وکړي.

په پام کې ده چې د روغتیا د سکتور په برخه کې د همکارۍ یوه موافقه هم لاسلیک شي.

اذربایجان چې یو اسلامي هېواد دی، د روان کال په مارچ میاشت کې په تلبیب کې خپل سفارت پرانیست، حال دا چې اسراییل له ۱۹۹۳ کال راهیسې په باکو کې سفارت لري.

ټاکل شوې چې د هندوستان غوره لیګ یا آی‌پي‌ایل سیالیو پایلوبه نن یکشنبه ترسره شي.

دغه سیالي د کابل پر وخت ماښام ۶:۳۰ بجې د هند په احمداباد ښار کې پیلېږي.

پایلوبې ته د تېر کال اتله لوبډله ګجرات ټایټانز له چینای سوپرکینګز لوبډلې سره لار موندلې ده.

د ګجرات لوبډلې په احتمالي نوملړ کې راشدخان او نوراحمد هم شته او په پایلوبه کې به ولوبېږي.

د ویلو ده چې د روانو سیالیو په لومړي 'کوالیفایر' یا نیمه پای لوبه کې چینای د ۱۵ منډو په توپير ګجرات ته ماتې ورکړې وه.