د لاسرسۍ وړ لېنکونه

تازه خبر
دوشنبه ۱۰ سلواغه ۱۴۰۱ کابل ۰۹:۰۶

نړۍ

د روسيې ولسمشر د دغه هېواد د پوليسو د شمېر ډېرېدو فرمان لاسليک کړ

د روسيې ولسمشر ولادمیرپوتین

د روسيې ولسمشر ولادمیرپوتین داسې یو فرمان لاسلیک کړی چې پر بنسټ به يې تر ۲۰۲۵ میلادي کاله پورې د دې هېواد د پولیسو شمېر ۹۳۸ زرو ته ورسیږي.

دغه فرمان چې د ډیسمبر په ۵مه لاسلیک شوی دی په‌کې راغلي چې، د روسیې د پولیسو شمېر به را روان کال ۹۲۲ زره تنو ته ورسیږي او په ۲۰۲۴ م کال کې به دا شمېر ۹۳۴ زره شي.

وروسته له هغه چې مسکو په ۲۰۱۴ کال کې د اوکراین کریمیا په ناقانونه توګه د خپل هېواد یوه برخه کړه او د روس پلوه بېلتون غوښتونکو ملاتړ یې وکړ، په دغه هېواد کې د پولیسو تر ټولو زیات شمېر په قانوني توګه ۸۹۴ زره تنه وو.

له کله نه چې روسيې پر اوکراین یرغل پیل کړ په زرګونه روسان پوځي دندې ته راغوښتل شوي دي.

د ورځې تازه خبرونه دلته ولولئ

سوريې د دغه هېواد په اړه د کيمياوي وسلو د سازمان راپور رد کړ

د سوريې بيرغ - ارشيف

سوریې د یکشنبې په ورځ د کیمیاوي وسلو د مخنیوي سازمان هغه راپور رد کړ، چې په‌کې ویل شوي وو، دمشق په ۲۰۱۸م کال کې له کیمیاوي وسلو په استفاده په یوه حمله کې ۴۳ کسان مړه کړي وو.

سوریې هغه راپور ناسم وباله.

سانا دولتي اژانس د بهرنیو چارو وزارت اعلامیه خپره کړې چې په‌کې راغلي: "سوریه د کیمیاوي وسلو د مخنیوي سازمان د جمعې ورځې راپور په بشپړ ډول ردوي."

اعلامیه وايي، دغه راپور پر واقعیت ولاړ نه‌دی او غلطه نتیجه په‌کې اخیستل شوې ده.

د کیمیاوي وسلو د مخنیوي سازمان په خپل راپور کې ویلي، کره شواهد شته چې ښېي د سوریې د هوايي ځواک لږ تر لږه یوې څرخي الوتکې د یاغیانو تر ولکې لاندې ښارګوټي دوما کې د زهرجنو ګازو دوه سلنډرونه غورځولي وو.

د اوکراين د ټانکونو عمله د روزنې لپاره برېتانيا ته ورسېده

اوکرايني پوځيان، انځور - ارشيف

د اوکراین د ټانکونو عمله برېتانیا ته ورسېده، چې د روسیې په وړاندې د روانې جګړې لپاره و روزل شي.

د برېتانیا دفاع وزارت پرون یکشنبه دا خبر داسې وخت ورکړی چې برېتانیا او د ناټو نورو غړو هېوادونو څو ورځې مخکې اوکراین ته د څه باندې ۱۳۰ ټانکونو د ورکولو ژمنه وکړه.

د برېتانیا دفاع وزارت په خپل ټویټر کې لیکلي، چې دغه هېواد به له نورو همکارو هېوادونو سره یو ځای د روزنې تر څنګ اوکراین ته د چلنجرـ۲ په نوم ټانکونه هم ورکړي.

جرمني د هاکي نړیوال جام اتلولي وګټله

جرمني د هاکي نړیوال جام اتلولي وګټله

د هاکي لوبو د نړیوال جام په پایلوبه کې جرمني د بلجیم لوبډلې ته ماتې ورکړه او د درېیم ځل لپاره یې د اتلولۍ جام وګاټه.

دغه سیالۍ چې د هاکي نړیوال فدراسیون له لوري په هندوستان کې پیل شوې وې، د یکشنبې (د جنورۍ ۲۹مه) په ماښام د جرمني په اتلولۍ پای ته ورسېدې.

د پايلوبې په ټاکلي وخت کې دواړو لوبډلو ۳-۳ ګولونو ترسره کړل او لوبه یې برابره کړه، جرمنان د پنالټي په شوټونو کې ۵-۳ له بلجیم مخکې شول.

یادې سیالۍ د جنورۍ میاشتې په ۱۱مه نېټه د هند په کوربه‌توب د ۱۶ هېوادونو ترمنځ پیل شوې وې چې د ۱۷ ورځو په جریان کې ۴۴لوبې ترسره شوې.

هند په دې سیالیو کې نهم مقام وګاټه.

د یادونې ده چې د هاکي په نړیوال جام کې پر جرمني او بلجیم سربېره هندوستان، انګلستان، اسټرالیا، نیدرلینډ، وېلز، ارجنټینا،نیوزیلنډ، هسپانیا، مالیزیا، فرانسې، جنوبي کوریا، جنوبي افریقا، جاپان او چیلي هېوادونو ګډون درلود.

ايران کې د دفاعي وسايلو يوه فابريکه باندې بريد شوی

د ایران دفاع وزارت وایي، د دې هېواد په اصفهان ولایت کې د دفاعي وسایلو د تولید یوه فابریکه بې‌پیلوټه الوتکو چې پر چاودېدونکو موادو سمبالې وي، په نښه کړې ده.

په هغه خبرپاڼه کې چې، پرون یکشنبې دې وزارت خپره کړې ویل شوي چې د دې فابریکې ځینې برخې ویجاړې شوي دي.

په دې اړه چې دغه بې‌پیلوټه الوتکې د کوم هېواد وې، نور جزیات نه‌دي ورکړل شوي او نه هم تر اوسه چا د دغه برید مسولیت اخیستي خو له‌دې مخکې د دا ډول بریدونو پړه پر اسرایل اچول شوې ده.

هند له نیوزیلنډ سره د شل اوریزو لوبو لوبلړۍ ۱ـ۱ برابره کړه

د هند او نیوزیلنډ له لوبې یو انځور

کوربه هندوستان په لکنو ښار کې د ۶ وېکټو په توپیر دویمه شل اوریزه سیالي له نیوزیلنډ وګټله او په دې سره یې روانه لوبلړۍ برابره کړه.

نیوزیلنډ لومړۍ توپ وهنه وکړه او د ۸ لوبغاړو په سوځېدو یې د ۱۰۰ منډو هدف وټاکه.

هند هم ورکړل شوی هدف د ۲۰م اور په پنځم توپ ترلاسه کړ او یوازې ۴ لوبغاړي یې وسوځېدل.

د دې لوبې لپاره ویشتنځای سخت جوړ شوی و او یوازینی مخکښ توپ وهونکی سوریا کومار یادو چې تر شلو زیاتې، ۲۶ ناسوځېدلې منډې یې وکړې او د لوبې غوره لوبغاړی ونومول شو.

د دواړو لوبډلو توپ اچونکي ښه وځلېدل، خو هندی ارشدیپ سینګ یوازینی توپ اچونکی و چې ۲ لوبغاړي یې وسوځول.

د دې لوبلړۍ لومړۍ لوبه نیوزیلنډ ګټلې وه او په پلان کې ده چې د لوبلړۍ درېیمه لوبه د فبرورۍ میاشتې په لومړې نېټه ترسره شي.

د یادونې ده چې په دې لوبلړۍ کې د دواړو هېوادونو ځيني نوموتي لوبغاړي نه لوبېږي.

د سویلي افریقا لوبډلې له انګلستان لوبلړۍ وګټله

د انګلستان او سویلي افریقا د نننۍ لوبې یو انځور

د سویلي افریقا او انګلستان ترمنځ د کرکټ نړیوالې شورا د سوپر لیګ سیالیو دویمه یو ورځنۍ لوبه هم کوربه هېواد په ۵ وېکټو وګټله.

سویلي افریقا د انګلستان د ۳۴۳ منډو هدف د ۵ وېکټو په سوځېدو سره په ۴۹،۱ اور کې ترلاسه کړ او په دې سره یې د ۳ یو ورځنیو لوبو لومړنۍ دوه لوبې وګټلې.

په دې سیالۍ کې د انګلستان لپاره لوبډلمشر جاس بټلر، هیري بروک او معین علي نیمې سلیزې ووهلې او هدف ته د رسېدو په پار د کوربه هېواد لوبډلمشر ټیمبا بهوما سلیزه ووهله، هغه ۱۰۹ منډې وکړې، خو د ډیوېډ میلر ۵۸ او د مارکو یانسین ۳۸ ناسوځېدلو منډو سویلي افریقا بریا ته ورسوله.

بهوما د دې لوبې غوره لوبغاړی ونومول شو.

سویلي افریقا د دې دواړو لوبو په ګټلو سره ۲۰ نومرې ترلاسه کړې چې ټولټال نومرې یې ۷۹ ته ورسېدې او په دې سره یې د کرکټ نړیوالې شورا د سوپرلیګ په سیالیو کې نهم مقام ترلاسه کړ.

د ۲۰۲۳ زېږدیزکال د کرکټ نړیوال جام سیالیو ته چې په هند کې به ترسره شي تر دې دمه د افغانستان په ګډون ۷ لوبډلو نېغ په نېغه لار موندلې ده او یوه بله لوبډله هم چانس لري چې نېغ په نېغه لار پیدا کړي.

د یادونې ده چې د اتم مقام ترلاسه کولو لپاره اوس مهال سویلي افریقا، ویسټ اینډیز او سریلانکا مقابله کوي، خو که سویلي افریقا د فبرورۍ په لومړۍ نېټه له انګلستان درېيمه یو ورځنۍ سیالي هم وګټي، نو دې مقام ته به ورسېږي.

کرکټ؛ د هندوستان کم عمره نجونو نړیوال جام وګاټه

د هندوستان تر ۱۹ کلنو کم عمره نجونو لوبډله

د هندوستان تر ۱۹ کلنو کم عمره نجونو په سویلي افریقا کې د ۷ وېکټو په توپیر سره انګلستان ته ماتې ورکړه او په دې سره یې د شل اوریزو سیالیو نړیوال جام وګاټه.

انګلنډ چې لومړۍ پاڼې یې کړې وه د ټولو لوبغاړو په سوځېدو سره یې د ۶۹ منډو هدف ټاکلی و.

هند د ۳ لوبغاړو په سوځېدو سره په ۱۴م اور کې هدف ترلاسه کړ او اتلولي یې وګټله.

دغه سیالۍ چې د کرکټ نړیوالې شورا له لوري په لومړي ځل په سویلي افریقا کې ترسره شوې ۱۶ هېوادونو په کې برخه درلوده.

په دې سیالیو کې هندۍ لوبغاړې شوېتا سیهراوت تر ټولو توپ وهونکو مخکښه وه او په ۷ لوبو کې یې ۲۹۷ منډې کړې وې.

دغه راز په توپ اچونکو کې بیا اسټرلیایۍ ایلن کلارک تر نورو زیاتې ۱۲ وېکټې اخستې وې.

د یادونې وړ ده چې د کرېکټ له نړیوالې شورا سره افغانستان یوازینی بشپړ غړیتوب لرونکی هېواد و چې په دې سیالیو کې لوبډله نه درلوده.

په پاکستان کې د ټرافیکي پېښې له کبله لږترلږه ۴۰ کسان مړه شوي

ژغورونکې ډله د مړو او ټپیانو د لېږدولو پرمهال

د پاکستان په بلوچستان ایالت کې نن سهار له یوه پله څخه د بس موټر د لوېدو له کبله لږ تر لږه ۴۰ کسان مړه شول.

یوه چارواکي نن یکشنبه ویلي چې بس وروسته اور واخیست.

د بلوچستان د لسبیکو ولسوالۍ یوه لوړ رتبه چارواکي حمزه انجم د پېښې په ځای کې رسنیو ته ویلي، درې کسان ژغورل شوي او په بس کې ۴۸ کسان سپاره وو.

د ده په وینا بس د یوه پله له ستون سره ولګېد چې وروسته له خپل مسیر څخه ووت.

په پاکستان کې د زیاتو ټرافیکي پېښو علت د ټرافیکي قوانینو نه رعایت، د خوندیتوب کمزوري تدابیر او د چلوونکو بې احتیاطي ښوول شوې ده.

ایراني چارواکي: بې پېلوټه الوتکو په اصفهان کې یوه دفاعي فابریکه ویشتلې

بمب لېږدوونکو بې پېلوټه الوتکو برید کې په اصفهان کې د ایران ویشتل شوې یوه دفاعي فابریکه

ایراني چارواکو نن سهار ویلي، بمب لېږدوونکو بې پېلوټه الوتکو تېره شپه په اصفهان کې د ایران یوه دفاعي فابریکه ویشتلې ده او څه ناڅه یې زیانمنه کړې ده.

دا پېښه داسې وخت کېږي، چې د ایران حکومت له سیمه ییز او نړیوال کړکېچ سره لاس و ګرېوان دی.

د ایران دفاع وزارت په دې باب معلومات نه دي ورکړي چې په دې حمله کې د چا د لاس لرلو شک کېږي، خو وايي دا د بې پېلوټه الوتکو ناکامه حمله وه، چې مرګ ژوبله یې نه ده اړولې.

حمله داسې وخت شوې چې پرون شنبه د ایران په اذربایجان غربي ولایت کې د تېلو په یوه چاڼځای کې اورلګېد.

په دې اورلګېدنه کې د مرګ ژوبلې راپور نه دی ورکړل شوی.

په همدې اذربایجان غربي ولایت کې پرون شنبه ناوخته یوې زلزلې لږ تر لږه درې کسان مړه تر ۶۶۰ زیات کسان ټپیان او ځینې کورونه زیانمن کړل.

د اسراییل پولیسو په بیت المقدس کې د فلسطیني بریدګر کور مهر و لاک کړ

په بیت المقدس کې اسراییلي ځواکونه

د اسراییل پولیسو نن په بیت المقدس کې د هغه فلسطیني کور مهر و لاک کړ چې د یهودانو له یوه عبادتځای دباندې یې د جمعې په ورځ اووه کسان په ډزو سره ووژل.

دا اقدام وروسته له هغې وشو چې د اسراییل صدراعظم بنیامین نتنیاهو د وژنو تر هغې پېښې وروسته د چټک اقدام ژمنه وکړه.

په اوو وژل شویو کسانو کې یو ۱۴ کلن ماشوم هم شامل دی.

د وژنو دا پېښه د یهودانو د ډله ییزې وژنې یا هالوکاست د یاد په ورځ وشوه، چې په نړیواله سطحه وغندل شوه.

له دې سره په سیمه کې د کړکېچ د لا زیاتېدو وېره اوج ته ورسېده.

بلخوا په پام کې ده، د امریکا د متحدو ایالتونو د بهرنیو چارو وزیر انټوني بلېنکن راتلونکې اوونۍ مصر، اسراییل او لوېدیځې غاړې ته سفر وکړي.

نور راوښيه

XS
SM
MD
LG