د لاسرسۍ وړ لېنکونه

تازه خبر
دوشنبه ۱۴ لیندۍ ۱۴۰۱ کابل ۱۲:۳۷

افغانستان

طالبانو باميان کې يو هلک او نجلۍ د اړيکو په تور په متروکو وهلي دي

باميان ولايت - ارشيف

د بامیان ولایت ځینې اوسېدونکي وايي چې طالبانو پرون په دغه ولایت کې یو هلک او یوه نجلۍ د تار لرلو په تور په متروکو وهلي دي.

د بامیان ښار یوه اوسېدونکي، چې د امنیتي ستونزو په خاطر یې نه‌غوښتل نوم یې واخیستل شي، ازادي راډیو ته وویل چې نجلۍ او هلک د عامو خلکو په مخکې ووهل شول.

د افغانستان د ځینو ځايي رسنیو د راپور له‌مخې، هلک او نجلۍ له کابله بامیان ته تللي وو او د طالبانو له لوري په بندامیر کې په درو ووهل شول.

طالب چارواکو په دې اړه تر اوسه څه نه‌دي ویلي.

د ورځې تازه خبرونه دلته ولولئ

نابينا افغان لوبغاړي د لامبو وهلو يوه سيالۍ کې د سرو زرو مډال ګټلی

نابینا افغان لوبغاړي ولي محمد نوري

نابینا افغان لوبغاړي ولي محمد نوري د برېتانیې د لامبو وهلو په سيالۍ کې د سرو زرو مډال ګټلی.

دغه سيالۍ چې پرون(یکشنبه) په انګلستان کې ترسره شوې ولي محمد نوري د ۷۰ لوبغاړو له‌منځه لومړی مقام خپل کړ.

ښاغلي نوري ازادي راډيو ته په یوه راليږلي پيغام کې ویلي دي: "نن د لامبو وهنې په سيالۍ کې د اویا لوبغاړو ترمنځ مې د سرو زرو مډال وګاټه، البته دا پنځوس متره سيالي وه او لوبه مې ډېره سخته وه."

په دې سياليو کې له بېلابېلو اروپايي هېوادونو څخه ۷۰ تنو نابینا لوبغاړو برخه درلوده.

ولي محمد نوري پنځوس متره واټن په ۴۹ ثانيو کې طی کړ او د لوبو اتلولي يې خپله کړه.

نوري تر دې وړاندې هم د بینایانو او نابینایانو د ځغاستې او لامبو وهلو سیاليو کې اتلولۍ ګټلي دي.

د طالبانو حکومت د سالنګ لارې د بيا رغونې په چارو کې د ځنډ خبر ورکړی

د سالنګ لويه لار، انځور - ارشيف

د طالبانو د حکومت د ټولګټو چارو وزارت د سالنګ د لویې لارې د بیارغونې په چارو کې د ځنډ خبر ورکوي.

دې وزارت په یوه بیان کې چې پرون خپور شو ویلي چې، د ژمي له رارسېدو سره د دې لویې لارې د ۳۰ کیلومتره سړک د رغونې کار چې د روان کال په دوهمه نیمايي کې پیل شوی و، ځکه ځنډېږي چې د شیبر کوتل بدیله لاره خوندي نه‌ده.

د سالنګ د لویې لارې د بیارغونې پر مهال د هېواد شمال ته د تګ راتګ لپاره د شیبر کوتل له بدیلې لارې کار اخیستل کېده.

په بیان کې یادونه شوې چې د تونل په ګډون د دې لویې لارې بیارغونه به په راروانه وري میاشت کې بیا پیل شي.

د طالبانو حکومت: غواړو له ايران څخه ډېر توکي را وارد کړو

انځور - ارشيف

د طالبانو حکومت پلان لري چې افغانستان ته د ایران په وارداتو کې زیاتوالی راولي.

دا خبر د بهرنیو چارو وزارت مرستیال ویاند حافظ ضیااحمد په کابل کې د ایران له مرستیال سفیر سیدحسن مرتضوي سره د طالبانو د بهرنیو چارو د وزیر امیرخان متقي د کتنې په اړه پر ټویټر په یوه بیان کې ورکړی.

په بیان کې د ښاغلي متقي له قوله راغلي، هغه وخت رارسېدلی چې له ایران سره اقتصادي راکړه ورکړه زیاته شي.

د بیان له‌مخې ښاغلي متقي غوښتنه کړې چې د دواړو هېوادونو ترمنځ د تجارت او ترانزیت په برخو کې اسانتیاوې رامنځته شي.

بیان د متقي له قوله زیاتوي چې نوموړی واي، د ژمي له را رسېدو سره له ایران څخه د اړتیا وړ اړینو توکو په وارداتو کې زیاتوالی راغلی.

د طالبانو حکومت تر اوسه د نړۍ هېڅ هېواد په رسمیت نه‌دی پېژندلی خو له محدودو هېوادونو سره چې یو یې ایران او بل یې پاکستان دی، تودې اړیکي پالي.

د ملګرو ملتونو استازې له طالب چارواکو سره د نشه‌يي توکو د مخنيوي پر هڅو خبرې کړي

روزا اوتونبايووا له يو طالب چارواکي سره د ليدنې پر مهال، انځور - ارشيف

د افغانستان لپاره د ملګروملتو ځانګړې استازې د طالبانو د حکومت د مخدرو مواد پرضد د مبارزې له جګپوړي چارواکي سره په کتنه په افغانستان کې د مخدرو موادو د مخنیوي پر هڅو خبرې کړي.

په هغه بیان کې چې په کابل کې د ملګرو ملتونو مرستندوی دفتر یوناما بېګا خپور کړ ویل شوي دي چې، روزا اوتونبایووا د کورنیوچارو د وزارت د مخدرو موادو د مخنیوي له معین عبدالحق اخند سره کتلي او له هغه سره یې په افغانستان کې د مخدرو موادو د کارولو د مخنیوي، د روږدو کسانو د علاج لپاره د هڅو او د کوکنارو د کښتونو د له منځه وړلو په اړه خبرې وکړې.

د بیان له‌مخې په افغانستان کې د مخدره موادو تولید، قاچاق او تجارت یوه لویه ننګونه ده.

په بیان کې یادونه شوې چې افغانستان د نړۍ په سلو کې ۸۵ تریاک تولیدوي، په داسې حال کې چې د ملګروملتونو په مخکینیو بیانونو کې دا سلنه له نوي زیاته ښودل کېده.

داعش په کابل کې د پاکستان پر شارژدافېر د حملې مسوولیت په غاړه واخیست

په کابل کې د پاکستان سفارت

د اسلامي دولت یا داعش د خراسان څانګې په کابل کې د پاکستان پر شارژدافېر د حملې مسوولیت په غاړه واخیست.

د جمعې په ورځ د کابل په پروان مېنه کې د پاکستان پر شارژدافیر عبیدالرحمان نظاماني په ډزو کې د هغه یو ساتونکی ټپي شو خو نظاماني روغ ووت.

داعش په هغه بیان کې، چې تېره شپه دې ډلې ته یوې نږدې رسنۍ په ټیلګرام کې خپور کړی، ویلي دا برید د دوی یوه غړي کړی دی.

د طالبانو حکومت، پاکستان او امریکا دا برید غندلی او طالبانو ویلي چې په دې تړاو یې یو تن نیولی دی.

ملګري ملتونه اړمنو افغانانو سره د خوراکي او نقدي مرستو لړۍ پراخوي

ارشیف: ارزګان کې د خوړو نړیوال پروګرام د مرستو رسولو یو انځور

د ملګرو ملتونو د خوړو نړیوال پروګرام وايي، په پام کې لري د ژمي پر مهال اړو کسانو ته د خوراکي او نقدي مرستو لړۍ پراخه کړي.

په افغانستان کې د ملګرو ملتونو د خوړو نړیوال پروګرام د ارتباطاتو افسر فیلیپ کروف ازادۍ راډیو ته وویل: "د خوړو نړیوال پروګرام په پام کې لري چې د ژمي پر مهال په ټول هېواد کې له پنځلسو ملیون کسانو سره هره میاشت د خوړو او نقدو پیسو مرسته وکړي، چې دوی خپله خواړه پرې رانیسي. د دې کار لپاره موږ سم د لاسه اضافي مالي مرستې ته اړتیا لرو. د خوړو نړیوال پروګرام د راروانو شپږو میاشتو لپاره یو اعشاریه څلور میلیارد امریکايي ډالرو ته اړتیا لري."

د خوړو نړیوال پروګرام وايي، په افغانستان کې شا و خوا ۲۰ ملیونه وګړي، چې د دغه هېواد د نفوسو نیمايي برخه کې کېږي کافي خواړه نه لري.

د طالبانو د دفاع سرپرست وزیر د یو پلاوي په مشرۍ اماراتو ته لاړ

مولوي محمد یعقوب مجاهد

د طالبانو سرچینې وايي، د دوی د دفاع د سرپرست وزیر مولوي محمد یعقوب مجاهد په مشرۍ یې یو هیئت پرون شنبه متحده عرب اماراتو ته لاړ.

د طالبانو دفاع وزارت وايي، دغه هیئت به یې په اماراتو کې هلته له ځايي مشرانو، مېشتو افغانانو او نورو شخصیتونو سره وګوري.

په همدې حال کې د افغانستان پخوانی ولسمشر حامد کرزی هم پرون له افغانستان په بهرني سفر لاړ او ځینو سرچینو ویلي چې ممکن ښاغلی کرزی لومړی په متحده عرب اماراتو کې تم شي.

اماراتو ته د اوسنیو او پخوانیو چارواکو سفر ځکه مهم ګڼل کېږي، چې د افغانستان مخکېنی ولسمشر محمد اشرف غني هم هلته دېره دی.

دا لا څرګنده نه ده چې د طالبانو دفاع وزیر به له ښاغلي کرزي یا هم غني سره په کتنو کې برخه واخلي که نه؟

امریکا د افغان معلولینو د دوامداره ملاتړ ډاډ ورکړ

افغان معلولین

د افغانستان لپاره د امریکا د متحدو ایالتونو سفارت وايي، د معلولو کسانو ملاتړ ته به دوام ورکړي.

دغه سفارت پرون د معلولو کسانو نړیوالې ورځې په مناسبت په یوه ټویټ کې ویلي دوی عامه پوهاوی، د یو بل درک کول او منل تشویقوي.

په دوام کې راغلي، دوی په کارځایونو، ښوونځیو او ټولنو کې د معلولو کسانو د ونډې منندوی دي.

د ملګرو ملتونو د بشري مرستو د همغږۍ اداره وايي، د افغانستان د وګړو ۱۵ سلنه یې معلول دي، چې شمېر یې څه باندې ۴ میلیونو ته رسېږي.

معلول کسان شکایت کوي، چې په ټولنه کې تر ډېره په درنه سترګه نه ورته کتل کېږي، کار نه ورکول کېږي او د حکومت له خوا یې هم لاسنیوی نه کېږي.

په ننګرهار کې چاودنه شوې

د جلال اباد ښار یوه څنډه

جلال اباد ښار کې چاودنې ۶ ولسي وګړي ټپیان کړي دي.

پېښه نن مازدیګر ناوخته د جلال اباد ښار د لومړۍ ناحیې اړوند درمسال ته څېرمه شوې ده.

په ننګرهار کې د طالبانو د امنیې قومندانۍ ویاند ویاند قاري عبدالبصیر زابلي رسنیو ته په استولي غږیز پیغام کې ویلي چې پېښه د یو دوکان مخته د ځای پر ځای شوي ماین له امله رامنځته شوې ده.

ویل کېږي چې یاد دوکان د یو سېک افغان و چې یوناني درمل په کې پلورل کېدل.

د دغه چاودنې مسوولیت چا نه دی منلی، خو له دې وړاندې په دې ولایت کې د ځینو چاودونو مسوولیت داعش وسله والې ډلې منلی وو.

پخواني افغان ولسمشر حامدکرزي له افغانستانه بهر سفر وکړ

د کرزي د حکومت د مهال د مالیې وزیر ډاکتر عمر زاخېلوال پر خپله ټویټرپاڼه له کرزي سره خپل عکس، چې دواړه په الوتکه کې سپاره دي، خپور کړی

د افغانستان پخوانی ولسمشر حامدکرزی له افغانستانه ووت.

د افغانستان د نجات حرکت مشر ډاکتر عمر زاخېلوال پر خپله فېسبوک پاڼه له الوتکې د کرزي او خپل د عکس په خپرولو سره له افغانستانه بهر د ګډ سفر یادونه کړې ده.

زاخېلوال په دې اړه چې دوی کوم هېواد ته سفر کړی، جزئیات نه‌دي ورکړي، خو هیله‌یې ښودلې چې افغانستان بېرته ستانه شي.

پر افغانستان د طالبانو له بیا واکمنۍ وروسته د لومړی ځل دی چې حامدکرزی له افغانستانه بهر سفر کوي.

په ځلونو داسې راپورونو خپاره شوي و چې طالبانو پر پخواني ولسمشر حامدکرزي، د ملي مصالحې عالي شورا مخکېني مشر عبدالله عبدالله او مشرانو جرګې مخکېني مشر فضل‌الهادي مسلمیار د سفر بندیز لګولی دی.

خو عبدالله عبدالله او فضل‌الهادي مسلمیار له افغانستانه بهر سفر کړی و.

مخکې له دې، د روان کال په غويي/ثور میاشت کې هم داسې راپورونه خپاره شول چې طالبانو متحده عرب اماراتو ته د پخواني ولسمشر حامدکرزي د سفر مخه نیولې ده.

پخواني ولسمشر حامد کرزي ته نږدې سرچینو رسنیو ته دا خبره تایید کړې وه.

ټاکل شوې وه چې هغه مهال کرزی د متحده عربي اماراتو د دولت د پخواني رییس خلیفه بن زاید النهيان په فاتحه کې د ګډون په موخه اماراتو ته سفر وکړي.

پخواني ولسمشر خپله هم د مارچ په نهمه له العالم تلوېزیون سره په یوه مرکه کې بهر ته د سفرونو د بندیز په تړاو راپورونه تایید کړي او ویلي و چې هیله ده دا ستونزې ژر هوارې شي.

د طالبانو حکومت ویاند ذبیح‌الله مجاهد متحده عربي اماراتو ته د کرزي د سفر د مخنیوي یا له هوايي ډګره د هغه د راګرځولو د پېښې په اړه د ازادي راډیو ته ویلي و: "داسې خبره به سمه نه‌وي چې له هوايي ډګر نه راګرځول شوی. ځکه هلته ما پوښتنه وکړه. میدان هوايي کې مسولینو له داسې کومې موضوع خبر نه‌درلود. په هر صورت په دې اړه تحقیقات روان دي چې هر کله معلومات دقیق شي تاسو سره به‌یې شریک کړو."

خو طالبانو تر اوسه په دې اړه جزییات شریک نه‌کړل.

نور راوښيه

XS
SM
MD
LG