د لاسرسۍ وړ لېنکونه

تازه خبر
جمعه ۱۱ لیندۍ ۱۴۰۱ کابل ۱۰:۲۱

افغانستان

توماس وېسټ او شهرزاد اکبر د ښځو او نجونو پر حقونو خبرې کړي

ارشيف

د افغانستان لپاره د امریکا ځانګړي استازي توماس وېست ویلي چې د بشري حقونو د خپلواک کمېسیون له مخکینۍ مشرې شهرزاد اکبر سره یې د ښځو، نجونو او لږکیو د حقونو د نقض او په ملي کچه د خبرو په اړتیا بحث کړی.

توماس وېسټ نن په خپل ټوېټر دا څرګندونې کړي.

هغه په افغانستان کې د بشري حقونو د سرغړونو د مستندولو او څار په خاطر د شهرزاد اکبر هڅې ستایلې دي.

شهرزاد اکبر د بشري حقونو د خپلواک کمېسیون مشره وه چې د طالبانو په بیا واکمنېدو یې کمېسیون منحل شو.

د ورځې تازه خبرونه دلته ولولئ

کابل پريس کلب: طالبان د رسنيو ازادۍ ته ژمنتيا نه‌لري

د ازادي راډيو لوګو

کابل پریس کلب وايي چې طالبانو د ازادي راډیو پر خپرونو په بندیز لګولو سره یو ځل بیا خپله کمزوري وښودله او ښکاره یې کړه چې دوی په هېڅ ډول د بیان او رسنیو ازادۍ ته ژمنتیا نه‌لري او په دې برخه کې له استبداد څخه کار اخلي.

د رسنیو د ملاتړ دې ادارې په یوه بیان کې چې بېګا ناوخته یې خپور کړ د طالبانو دا اقدام د بیان د ازادۍ او بشري قوانینو خلاف کار بللی او ویلي یې دي چې له ولس څخه د بیان د ازادۍ او اطلاعاتو ته د لاسرسي د حق اخیستل جرم دی.

کابل پریس کلب له طالبانو غوښتي چې ژر تر ژره تړل شویو رسنیو ته د خپرونو اجازه ورکړي.

له پرون راهيسې طالبانو افغانستان کې د ازادي راډيو او امريکا غږ اشنا راډيو اف ام نشرات بند کړل.

يونېسف: سږ کال په لومړيو شپږو مياشتو کې ۲۸۸ افغان ماشومانو ته مرګ‌ژوبله اوښتې

ننګرهار کې په يوه چاودنه کې د يو ژوبل شوي ماشوم انځور - ارشيف

په افغانستان کې د ملګروملتو د ماشومانو د ملاتړ اداره، یونېسف وايي، سږ کال په لومړیو شپږ میاشتو کې لږ تر لږه ۲۸۸ افغان ماشومان یا وژل شوي یا هم ټپیان شوي دي.

په افغانستان کې د یونېسف څانګې پر خپله ټویټرپاڼه کښلي، باور کېږي چې د وژل شویو افغان ماشومانو حقیقي شمېر تر دې خورا زیات دی.

دې ادارې پرون همدا راز وویل چې څه باندې ۸۷۵ افغان ماشومان د لوږې له کبله د مرګ له خطر سره مخامخ دي.

دې ادارې ویلي چې په افغانستان کې د شدیدې خوارځواکۍ د مخنیوي لپاره د نړیوالې ټولنې فوري مرستې ته اړتیا لري.

تر دې یوه اوونۍ وړاندې د سره صلیب نړیوالې کمېټې ویلي و چې سږ کال په افغانستان کې په خوارځواکۍ د اخته شویو ماشومانو شمېر د تېر کال په پرتله په سلو کې ۹۰ زیات شوی دی.

د طالبانو له لوري د ازادي راډيو اف ام څپو نشرات بندول له غبرګونونو سره مخ شوي

د ازادي راډيو لوګو

د طالبانو له لوري د ازادي راډیو او امریکا غږ د اف ام څپې د خپرونو بندول د خبري ټولنو له غبرګون سره مخامخ شوي دي.

د افغانستان د خبریالانو د ملاتړ سازمان او د افغانستان د خبریالانو مرکز په جلا جلا اعلامیو کې په افغانستان کې د ازادي راډیو او امریکا غږ د اف ام نشراتو د بندولو په اړه د طالبانو پر پرېکړې اندېښنه ښوولې او هغه یې د نړیوالو رسنیو د خپرونو مخنیوی، په ازاد ډول د معلوماتو د رسېدو خنډ او د بیان د ازادۍ تربتول بللي دي.

د افغانستان د خبریالانو مرکز ویلي، د طالبانو دا پرېکړه د ډله‌ییزو رسنیو د قانون خلاف او د ازادو رسنیو د محدودولو نښه ده.

دغه مرکز له طالبانو غوښتي چې پر خپله پرېکړه بیا کتنه وکړي.

د طالبانو حکومت سر له پرونه د اف ام له لارې په افغانستان کې د ازادي راډیو او امریکا غږ خپرونې بندې کړي دي خو ازادي راډیو له نورو لارو خپلو خپرونو ته دوام ورکوي.

د تېر کال په اګست کې د واک له ترلاسه کولو وروسته طالبانو د نورو مدني ازادیو ترڅنګ د بیان او خلکو ته د ازادو معلوماتو د رسېدو د محدودولو لپاره پر له‌پسې ګامونه اخیستي دي.

د بې پولې خبریالانو د راپور له‌مخې، د طالبانو له واک ته رسېدو وروسته لږ تر لږه ۲۱۹ رسنۍ بندې شوي او ډېرو نورو خپلې خپرونې محدودې کړي دي.

لوړو زده‌کړو وزارت د سړو سيمو پوهنتونونه د حوت تر ۱۵مې رخصت کړل

د لوړو زده‌کړو وزارت

د طالبانو د حکومت د لوړو زده‌کړو وزارت د سړو سیمو پوهنتونونه د حوت تر ‍۱۵ پورې رخصت اعلان کړل.

دغه وزارت پرون په خپله خبرتیا کې ویلي چې، خصوصي او دولتي پوهنتونونه په سړو سیمو کې د هوا د سړېدو او د ګرموونکو وسایلو د نشتوالي له کبله رخصتوي.

ټاکل شوې وه چې د سړو سیمو پوهنتونه د روانې میاشتې په پای کې رخصت شي.

د طالبانو د لوړو زده‌کړو وزارت د خبرتیا له‌مخې، په تودو سیمو کې به پوهنتونونه پرانیستي وي.

له بلې خوا په داسې حال کې چې له شپږم ټولګي پورته نجونې له زده‌کړو منع دي، د طالبانو د پوهنې وزارت پرون د دوولسم ټولګیو له نجونو زده‌کوونکو وغوښتل چې د روان قوس په ۱۶ مه خپلو ښوونځیو ته د ازموینې لپاره ورشي.

د دغه وزارت د مالوماتو پر اساس، ازموینه به د سهار له لسو د ماسپښین تر یوې بجې دوام وکړي.

رينا اميري د يو شمېر هېوادونو له سفيرانو سره د افغان نجونو په اړه خبرې کړي

رينا اميري

د افغان ښځو لپاره دامریکا جګپوړې استازې وايي، د ازبکستان، متحده عربي اماراتو او پاکستان له چارواکو او د تونس، اندونیزیا او د اسلامي همکارۍ له سفیرانو سره یې لیدلي او هغوی ټول له‌دې سره موافق وو چې د افغان نجونو زده‌کړې ضروري دي.

د افغانستان د بشري حقونو، ښځو او نجونو لپاره دامریکا ځانګړې استازې رینا امیري تېر ماښام په یوه ټویټ کې کښلي چې دا لیدنې کتنې یې په روانه اوونۍ کې له هغو هېوادونو سره چې د وګړو اکثریت یې مسلمانان دي، د دوامدارو تماسونو یوه برخه ده.

څه باندې ۱۵ میاشتې کېږي چې افغان نجونې له شپږم ټولګي پورته له زده‌کړو بې برخې دي.

که څه هم د نجونو د ښوونځيو پرانيستلو بيا بيا غوښتنې کېږي، خو طالبانو په دې اړه تر اوسه د ښوونځيو د پرانيستلو په اړه کومه پرېکړه نه‌کړې.

برښنا شرکت: نن به د کابل او ۱۲ ولايتونو برښنا پارچاو وي

د برښنا شرکت کارکوونکي د مزو د ترميم پر مهال، انځور - ارشيف

د افغانستان برښنا شرکت وايي، نن به د پلازمېنې کابل او ۱۲ نورو ولایتونو برښنا پارچاو وي.

دغه شرکت پرون په دې اړه په خپله خبرپاڼه کې ویلي، د دې لپاره چې له ازبکستان څخه د ۲۲۰ کیلو ولټه وارداتي برښنا مزو د ترمیم چارې بشپړې شي، د نن ورځې لپاره به په کابل او ۱۲ نورو ولایتونو کې برښنا نه وي.

د افغانستان برښنا شرکت د مالوماتو پر اساس، په کابل، پروان، کاپیسا، ننګرهار، لوګر، غزني، او د بغلان ولایت په یو شمېر سیمو کې د نن سهار له ۷ تر ماښامه پورې برېښنا نه وي.

په خبرپاڼه کې د ۵ نورو ولایتونو نومونو ته اشاره نه ده شوې.

د افغانستان تر اویا سلنې ډېره برښنا له څلور ګاونډیو هېوادونو لکه تاجکستان، ازبکستان، ترکمنستان او ایران څخه واردیږي خو په دې منځ کې تر ټولو ډېره برښنا له ازبکستان څخه راځي.

طالبان: په کابل کې ۱۵ نارینه او ۶ ښځې په درو وهل شوي

د طالبانو بيرغ

په کابل کې د طالبانو د حکومت قضايي چارواکي وايي، په ۲۱ کسامو باندې يې تعزیري سزاګانې تطبیق کړي.

د طالبانو د حکومت د کابل ښاري ابتدايي محکمې نن ویلي چې ۱۵ نارینه او ۶ ښځینه يې په درو وهلي دي.

دې محکمې له خوا په خپرې شوې خبرپاڼه کې دا کسان چې په درو وهل شوی په غلا، نامشروع اړیکو، له کوره تېښتې، شراب څښلو او نورو جرمونو تورن شوي دي.

له دې وړاندې د طالبانو حکومت په لوګر، تخار او ځینو نورو ولایتونو کې په ورته توګه په یو شمېر کسانو شرعي سزاګانې عملي کړي دي.

رانا ثناالله: د ټي ټي پي فعاليت باید افغان طالبانو ته د اندېښنې وړ وي

د ټي ټي پي غړي

د پاکستان د کورنیو چارو وزیر رانا ثناالله وايي؛ په پاکستان کې د تحریک طالبان پاکستان یا ټي ټي پي فعالیتونه باید افغان طالبانو ته د اندېښې وړ مسله وي.

هغه دا خبره نن پنجشنبې په یوه ناسته کې چې د امنیتي وضعیت د ارزونې په موخه جوړه شوې وه، د بلوچستان ایالت په مرکز کویټه کې د چادونې وروسته کړې ده.

هغه همدارانګه دغه ډول ترهګریز فعالیتونه د سيمې لپاره خطرناک بللي دي.

هغه زیاته کړې ده؛ دا ډول ترهګریز فعالیتونه د خطر زنګ دی خو وضعیت تر اوسه په کنټرول کې دی.

طالبانو د 'ازادي راډيو' او د 'امريکا غږ اشنا راډيو' اف ام نشرات بند کړل

د ازادي راډيو لوګو

د طالبانو د حکومت چارواکو ویلي چې، د دغو راډیو ګانو د پروګرامونو د محتوا په اړه یې د ترلاسه شویو شکایتونو پر اساس دغه پرېکړه کړې خو په دې اړه یې نور جزیات نه‌دي ورکړي.

د طالبانو د حکومت د اطلاعاتو او فرهنګ وزارت د نشراتو رئیس عبدالحق حماد نن پنجشنبې په یوه ټویټ کې لیکلي، چې د افغانستان په دیارلسو ښارونو کې پر اف ام د ازادي راډیو نشرات بند شول.

ازادي راډیو او د امریکا غږ اشنا راډیو په افغانستان کې په لنډو او منځیو څپو سربېره له څو کلونو راهیسې په یو شمېر لویو ښارونو کې پر اف ام هم ۲۴ ساعته خپرونې کولې چې په ملیونونو اورېدونکو اورېدلې.

تر دې مخکې طالبانو په مارچ میاشت کې د امریکا غږ اشنا ټلوېزیون پر هغو خبرونو بندیز لګولی و، چې د افغانستان د ملي ټلوېزیون او طلوع ټلوېزیون له لارې خپرېدل.

د ازادو رسنیو د مدافعو ټولنو په وینا د تېر کال د اګست له میاشتې راهیسې چې طالبان بیا پر افغانستان واکمن شوي، پر ازادو رسنیو یې ډېر فشارونه راويستي، ډېری خبریالان ځورول شوي یا بندیان شوي او د رسنیو ښځینه کارکونکې له کاره منع کړای شوي دي.

د دغو فشارونو او نورو اقتصادي ستونزو له امله په دې موده کې په لسګونو خصوصي ټلوېزیونو، راډیو ګانو او چاپي رسنیو خپل فعالیتونه درولي چې په نتیجه کې يې په سلګونو خبریالانو او د رسنیو کارکونکو خپلې دندې له لاسه ورکړي دي.

د ازادي راډیو خپرونې په ټول افغانستان کې په دغو لنډو څپو اوریدلی شئ: په ۱۶،۷ په ۱۹،۸ په ۲۴،۸ او په ۳۱،۶ څپو.

پر دغو څپو سربېره د ازادي راډیو د ویبپاڼې او نورو ټولنیزو اکونټونو له لارې هم اورېدلی شئ.

د سهار له ۰۷:۰۰ د ماښام تر ۰۷:۰۰ بجو د ازادي راډیو تازه خبرونه او راپورونه او بېلابېلې خپرونې ستاسو په غږ او ستاسو لپاره په ژوندۍ بڼه دلته واورئ:

وب‌سایټ

https://pa.azadiradio.com/live/audio/62

ټویټر

فېس‌بوک

سمنګان کې چاودنې ته د توماس وېسټ غبرګون: هر افغان ماشوم د زده‌کړې حق لري

د افغانستان لپاره د امریکا د متحد ایالتونو ځانګړی استازی ټوماس وېسټ

د افغانستان لپاره د امریکا د متحد ایالتونو ځانګړي استازي ټوماس وېسټ په سمنګان کې د مدرسې دننه پرونۍ چاونه وغندله او ویې ویل چې، هر ماشوم افغان دا حق لري چې له ویرې او ترهې پرته زده‌کړه وکړي.

ښاغلي وېسټ زیاته کړه چې هېواد یې په دې چاودنه کې د یو شمېر ماشومانو وژنه محکوموي.

ده تېره شپه په ټویټر کې ولیکل چې پر ملکیانو برید په عقل نه جوړیږي.

د ملګرو ملتو د ماشومانو صندوق( یونېسف) هم په ټویټر کې لیکلي دي چې پر ماشومانو دې چاودنې حیرانه کړی دی.

د سمنګان په مرکز ایبک کې پرون د مدرسې دننه چاودنه وشوه چې د ځینو لوېدیځو رسنیو په وینا د تلفاتو شمیر یې نژدې شلو ته رسیږي.

نور راوښيه

XS
SM
MD
LG