افغانستان
روسیې د افغانستان شمال کې د داعش پر فعالیتونو اندېښنه وښوده
![د افغانستان لپاره د روسیې ځانګړی استازی ضمیر کابلوف](https://gdb.rferl.org/5BF35728-5440-4D62-80B3-5844F09B9534_w250_r1_s.jpg)
د افغانستان لپاره د روسیې ځانګړی استازی ضمیر کابلوف وايي، هېواد يې د افغانستان په شمال کې د داعش ډلې له فعالیتونو اندېښمن دی.
د ټاس خبري اژانس د راپور پر بنسټ، ضمیر کابلوف دا خبرې نن د مسکو فارمټ په ناسته کې د افغانستان په اړه کړي دي.
د کابلوف په خبره روسیه د افغانستان په شمال کې په هغو سیمو کې د داعش د وسله والو د موجودیت په اړه اندېښنه لري چې د مرکزي اسیا د هېوادونو سره پر پولو پرتې دي.
نن مسکو د افغانستان په اړه د یوې ناستې کوربه دی.
دې غونډې ته طالبان نه دي وربلل شوي.
تر د مخکې په افغانستان کې د طالبانو د حکومت چارواکو ویلي وو، داسې ناستو ته د افعانستان نه بلل به له روسیې سره د دوی پر اړیکو منفي اغېزه وکړي.
د مسکو فارمټ د تېر کال په ناسته کې طالبانو ته بلنه ورکړی شوی وه.
په نننې ناسته کې د چین، تاجکستان، ازبکستان، ترکمنستان، ایران، پاکستان، هند، قرغیزستان، قزاقستان او روسیې استازو ګډون کړی دی.
له دې هېوادونو څخه هېڅ هېواد په افغانستان کې د طالبانو حکومت په رسمیت نه دی پېژندلی.
د ورځې تازه خبرونه دلته ولولئ
د افغانستان په ګڼو ولایتونو کې د واورې، باران، تالندې، برښنا او سېلابونو اټکل شوی
![وروستیو بارانونو او سېلابونو په ننګرهار کې زیانونه اړولي. دغه کس د خپل ویجاړ شوي کور په پاتې شونو ګرځي.](https://gdb.rferl.org/01000000-0aff-0242-2bdd-08dc5de7e371_cx0_cy6_cw0_w250_r1_s.jpg)
د افغانستان په ګڼو ولایتونو کې د واورې، باران، تالندې، برښنا او سېلابونو وړاندوینه شوې ده.
د طالبانو د حکومت د ترانسپورت او هوايي چلن وزارت د هواپېژندنې ریاست وايي، د یکشنبې تر ورځې به د افغانستان په ۲۹ ولایتونو او همداراز سالنګونو کې ورښت دوام وکړي.
دې ادارې پرون (پنجشنبې) پر خپله ایکسپاڼه ولیکل چې په بدخشان، تخار، بغلان، نورستان، کونړ، ننګرهار، لغمان، پنجشیر، لوګر، غزني، کاپیسا، کابل، پروان، سمنګان، بلخ، سرپل، فاریاب، بامیان، میدان وردک، ډایکنډي، پکتیا، پکتیکا، خوست، بادغیس، غور، هلمند، اروزګان، کندهار او زابل ولایتونو کې د ورښت وړاندوینه کوي.
د هواپېژندنې د ریاست له اټکل سره سم به د باران اندازه له ۱۵ تر ۶۰ میلي مترو پوري او د واورې له ۱۵ تر ۳۹ سانتي مترو پورې وي.
له پېښو سره د مبارزې وزارت د معلوماتو له مخې، د وروستیو ورځو د سیلونو او ورښتونو له کبله ۷۰ تنه مړه شوي او ۵۶ نور ټپیان شوي دي.
طالبان: د ترکیې د ډاکترانو یوه ډله افغانستان ته راغلې
![د ترکیې د ډاکترانو ډله چې افغانستان ته رسېدلې ده.](https://gdb.rferl.org/01000000-0a00-0242-193e-08dc5fd1e15d_cx24_cy10_cw73_w250_r1_s.jpeg)
د طالبانو د عامې روغتیا وزارت وايي چې د ترکیې د ډاکترانو یوه ډله افغانستان ته ورغلې ده.
دغه وزارت پرون پنجشنبې پر خپله ایکسپاڼه خبر ورکړ چې د ترکیې د ډاکترانو ډله به د افغان ډاکترانو په همکارۍ د کابل په اتاترک روغتون کې د ماشومانو د یورولوژۍ پېچلي او اختلاطي جراحي عملیات په وړیا توګه ترسره کړي.
دا ډله به همداراز له افغان ډاکترانو سره د یورولوژۍ په برخه کې خپلې تجربې شریکې کړي.
د روغتیا نړیوال سازمان د فبرورۍ په میاشت کې په یوه راپور کې ویلي وو چې ۲۰۲۴م کال به د افغانستان لپاره په روغتیايي سکتور کې له ستونزو ډک کال وي.
د اسیا فوټسال سیالۍ؛ افغانستان له کویټ سره سیالي لري
![د افغانستان د فوټسال ملي لوبډله](https://gdb.rferl.org/01000000-0aff-0242-c915-08dc4bf9c00d_w250_r1_s.jpg)
د اسیا د فوټسال د سیالیو په دوام کې د افغانستان لوبډله سبا شنبې له کویټ سره مخامخ کېږي.
دا سیالي به د افغانستان په وخت د ماسپښین په یوه نیمه بجه په تایلنډ کې پیل شي.
پرون افغانستان خپله لومړۍ لوبه پر ایران درې پر یو وبایلله.
د افغانستان درېیمه سیالي به د دوشنبې په ورځ له بحرین سره وي.
دا سیالۍ د اپرېل په ۲۸مه پای ته رسېږي.
د ترکیې ځواکونو د ایوالیک په ساحل کې ۴۰ افغان کډوال نیولي
![ارشیف: د ترکیې پولیسو د بېلابېلو هېوادونو کډوال نیولي](https://gdb.rferl.org/30206914-fbcd-44ae-836a-914e67527134_w250_r1_s.jpeg)
د ترکیې ساحلي ساتونکي وايي چې ۴۰ افغان کډوال یې د ایوالیک ښار په ساحل کې نیولي دي.
د ترکیې رسنیو پرون پنجشنبه راپور ورکړ چې دا کډوال، چې په یوه بېړۍ کې سپاره وو، له نیول کېدو وروسته په ایوالیک ښار کې د کډوالو د بیرته ستنېدو مرکز ته وسپارل شول.
اکثره افغانان له ترکیې څخه یونان او نورو اروپايي هېوادونو ته ځي.
په وروستیو کې د ترکیې پولیسو د غیرقانوني کډوالو نیونې ډېرې کړي دي.
دغه هېواد زرګونه افغانان بېرته افغانستان ته بېرته ستانه کړي دي.
طالبان: پاکستان د افغان ملي بانک د غصب شویو جایدادونو په ورستنولو کې همکاري نه کوي
![د پاکستان د بهرنیو چارو وزارت](https://gdb.rferl.org/3efc839f-25dc-4f16-a7ac-e39e4ec9853b_w250_r1_s.jpg)
د پاکستان په کراچۍ ښار کې د طالبانو د حکومت کونسل عبدالجبار تخاري وايي، د پاکستان حکومت د افغان ملي بانک د غصب شویو جایدادونو په ورستنولو کې مرسته نه کوي.
ده پر خپله ایکسپاڼه لیکلي چې له هلوځلو سره سره د پاکستان د بهرنیو چارو وزارت او پولیس د افغان ملي بانک د شتمنیو په بېرته ورسپارلو کې همکاري نه ده کړې.
تخاري زیاته کړې، لا هم د پاکستان له بهرنیو چارو وزارت سره خبرو ته دوام ورکوي چې د افغان ملي بانک غصب شوي جایدادونه خلاص کړي.
د پاکستان حکومت په دې اړه څه نه دي ویلي.
د بریتانیا سنا رونډا ته د یو شمېر افغان پناه غوښتونکو د لېږلو پلان رد کړ
![د بریتانیا پارلمان او د دې هېواد بیرغ](https://gdb.rferl.org/809306CE-343F-4F51-975B-7FDB5DDEE7E7_w250_r1_s.jpg)
د بریتانیا مشرانو جرګې رونډا ته د یو شمېر افغان پناه غوښتونکو د لېږلو پلان رد کړ.
د بریتانیا حکومت په پام کې لرل چې یو شمېر افغان کډوال، چې پخوا یې په افغانستان کې له برتانوي پوځیانو یا حکومتي موسسو سره همکاري کړې وه، رونډا ته واستوي.
خو پرون پنجشنبې سنا جرګې د حکومت دا طرحه د ۱۹۵ مخالفو رایو په وړاندې په ۲۴۷ موافقو رایو رد کړه.
د یوناما مشرې له افغانانو سره د هند د بشري ملاتړ او حیاتي مرستو مننه کړې
![په افغانستان کې د ملګرو ملتونو سیاسي استازولي یا یوناما مشره روزا اوتنبایووا](https://gdb.rferl.org/01000000-0aff-0242-77d3-08dbbfcea329_cx48_cy22_cw51_w250_r1_s.jpeg)
په افغانستان کې د ملګرو ملتونو سیاسي استازولي یا یوناما وايي، د دې ادارې مشرې روزا اوتنبایووا په نوي ډیلي کې د هند د بهرنیو چارو له وزیر ایس جی شنکر سره په کتنه کې له افغانانو سره د هند د بشري ملاتړ او حیاتي مرستو مننه وکړه.
د یوناما د اعلامیې له مخې اوتنبایووا په دې کتنه کې په افغانستان کې د موجوده چلنجونو ختمېدو لپاره د هند د سیمه ییز او نړیوال ملاتړ پر ارزښت هم بحث وکړ.
شنکر پر خپله ایکس شبکه لیکلي چې په دې کتنه کې یې د افغانستان پر اوسني وضعیت نظرونه تبادله کړل او دا موضوع یې هم یاده کړه چې هند افغانستان ته د غنمو، درملو، قرطاسیې او نورو توکو په برخه کې مرسته کړې ده.
هند ویلي چې له ستونزو او محدودیتونو سره سره په افغانستان کې خپلو بشري مرستو ته دوام ورکړي.
فوټسال؛ ایران افغانستان ته ماتې ورکړه
![د افغانستان د فوټسال ملي لوبډله](https://gdb.rferl.org/01000000-0aff-0242-c915-08dc4bf9c00d_w250_r1_s.jpg)
د افغانستان د فوټسال ملي لوبډلې نن د آسیا ملتونو جام کې خپله لومړنۍ لوبه ایران ته درې د یوه پر وړاندې بایلو ده.
په دغه لوبه کې چې د ټایلنډ په پلازمېنه بنکاک چې د دغه جام کوربه دی، ترسره شوه، ایران د لوبې په لومړي دور کې یو ګول وواهه او په دوهم دور کې یې دوه نور ګولونه ووهل.
د افغانستان لوبډله وتوانېده چې په دوهم دور کې یوازې یو ګول ووهي.
ایران تر دې مخکې د دې جام دولس ځلي اتلولي خپله کړې ده.
افغانستان په ډيD ګروپ کې له ایران، کوېټ او بحرین سره یوځای دی.
د افغانستان دوهمه لوبه د راتلونکې شنبې په ورځ له کویټ سره ده.
که افغانستان وکولای شي دوه لوبې وګټي د دې جام بل پړاو ته لار نه موندلی شي.
د دې جام لوبې چې نن پیل شوې، د اپرېل تر ۲۸مې نېټې به دوام وکړي.
ورښتونه او سېلابونه؛ د کندهار- ارزګان لویه لاره یې تړلې
![د کندهار-ارزګان لویه لاره - ارشیف](https://gdb.rferl.org/7F524F54-200C-4D42-91E2-BA1F59627ABF_w250_r1_s.jpg)
د ارزګان چارواکي د ورښتونو او سېلابونو له امله د ارزګان ـ کندهار د لویې لارې د تړل کېدو خبر ورکوي.
د ارزګان ولایت د امنیې قوماندانۍ لپاره د طالبانو ویاند بلال ارزګاني ازادي راډيوته وویل چې نن سهار دغه لویه لاره د سېلابونو له امله د ټرافیکو پرمخ وتړل شوه او موټر چلوونکي دې تربلې خبرتیا پورې پر دې لارې له تګ راتګ څخه ډډه وکړي.
هغه همدارنګه وویل چې د ارزګان د مرکز ترینکوټ او د هراوود ولسوالۍ لویه لاره هم د ټرافیکو پرمخ تړل شوې چې د خلاصون لپاره یې هڅې پیل شوي دي.
د ارزګان ولایت په مرکز او ولسوالیو کې له تېرو څو ورځو راهیسې ورښتونه او سېلابونه ادامه لري چې له امله یې ۱۲ کسان مړه شوي، ۳۶ تنه نور ټپیان دي اوپه سلګونو کورونه اوپه زرګونو جریبه کرنیزه ځمکه ویجاړه شوې ده.
سیف ده چلډرن: له پاکستانه ستانه شوي دوه نیم لکه افغان ماشومان هر اړخیز ملاتړ ته اړتیا لري
![ارشیف](https://gdb.rferl.org/01000000-0aff-0242-6dae-08dbfef1c179_w250_r1_s.jpg)
د ملګرو ملتونو د ماشومانو د ساتنې اداره، سیف ده چلډرن وایي، په تېرو ۷ میاشتو کې له پاکستانه د بېرته راستنو شویو افغانانو نژدې دوه نیم لکه ماشومان، مناسبو کورونو، خوړو او د زده کړو لاسرسي ته اړتیا لري.
سیف ده چلډرن نن پنجشنبې په خپله وېب پاڼه کې لیکلي، د هغو له ۵۲۰ زره زیاتو افغانانو له ډلې چې د تېرکال د سپټمبرله میاشتې راهیسې له پاکستانه ایستل شوي یا په خپله خوښه افغانستان ته ستانه شوي، نژدې نیمایي یې ماشومان دي.
د هغې سروې له مخې چې دې ادارې د بېرته راستنو شویو کورنیو او د کوربنو ټولنو په اړه کړې، موندنې یې ښیي چې نژدې ټولو یعنې ۹۹ سلنه یې ویلي چې د راتلونکې یوې یا دوو میاشتو لپاره کافي خواړه نه لري.
د دغې سروې له مخې، په کوربه ټولنو کې د راستنو شویو درې پرڅلورمه برخه یې ویلي چې د لویانو د خوړو مصرف یې محدود کړی ترڅو کوچني ماشومان وکولای شي چې لږ تر لږه دوه ورځې په اوونۍ کې ډوډۍ وخوري.
دغه راز ویل شوې چې د راستنو شویو او کوربنو کورنیو ۴۰ سلنه یې خواړه پوروي یا لږترلږه په اوونۍ کې درې ورځې په خپلو خپلوانو تکیه کوي.
سیف دي چلډرن ویلي په افغانستان کې اته میلیونه ماشومان یا په درېیو کې یو یې د لوږې له بحراني کچې سره مخ دي.
د سروې له مخې، له پاکستانه د راستنو شویو هرو شپږو کورنیو له ډلې نژدې یوه یې په خېمو کې اوسي او د راستنو شویو ماشومانو دوه پردرېیمه برخه یې هم ښوونځي ته لاسرسی نه لري.