د لاسرسۍ وړ لېنکونه

تازه خبر
چهارشنبه ۱۶ لیندۍ ۱۴۰۱ کابل ۰۵:۲۸

نړۍ

په ایران کې یو بل اعتراض کوونکی هم د مرګ په سزا محکوم شوی

ایران کې د روانو لاریونونو یو انځور

د ایران د قضایه قوې د رسنیو مرکز خبر ورکړی چې یوې محکمې یو اعتراض کوونکی چې د تېر سپټمبر راهیسې د مهسا امیني د وژلو وروسته اعتراضونو پر مهال نیول شوی و د مرګ په سزا محکوم کړی دی.

مهسا امیني د نامناسب حجاب اغوستلو په تور د ایران د ګشت ارشاد پولیسو له خوا نیول شوی وه چې وروسته یې روغتون کې ساه ورکړه.

د هغې مړینې په ایران او له ایران څخه بهر پراخ اعتراضونه راوپارول.

دا په درېیو وروستیو ورځو کې دویم اعتراض کوونکی دی چې په اعدام محکومېږي.

د قضایه قوې د رسینو مرکز د راپور پر بنسټ یوه بل اعتراض کوونکی هم چې په عامه ځایونو کې د خلکو په ترور تورن و په مرګ محکوم شوی دی.

د دې دوو تنو د محکومیت خبر په داسې حال کې خپرېږي چې نړیوالو سازمانو او لوېدیځو هېوادونو د ایران له حکومته غوښتي وو چې پر اعتراض کوونکو دې د اعدام د حکم له صادرولو ډډه وکړي.

د ورځې تازه خبرونه دلته ولولئ

د روسيې پر يوې هوايي اډه باندې بې پيلوټه الوتکې بريد کړی

انځور - ارشيف

اوکراین ته څېرمه د روسیې د کورسک سیمې یوه هوايي اډه نن د یوې بې پیلوټه الوتکې په وسیله په نښه شوه چې په نتیجه کې یې د تېلو یوه ټانک اور واخیست.

د دې سیمې والي رومان ستارو وویت نن پر خپله ټلګرام پاڼه د پېښې خبر ورکړ خو ویې ویل چې تلفات نه‌لري او اور هم وژل شوی دی.

نوموړي ونه ویل چې د پېښې مسوول څوک دی، خو روسي چارواکو د روسیې په خاوره کې د بې پیلوټه الوتکو په مخکینیو حملو اوکراین ګرم بللی دی.

فوټبال؛ د حذفي لوبو پړاو کې مراکش له اسپانيا او پرتګال له سويس سره لوبه کوي

قطر کې د فوټبال نړيوال جام

ټاکل شوې چې د فوټبال د نړیوال جام د حذفي لوبو د پړاو په دوو وروستیو لوبو کې د کابل په وخت د ماښام په اوه نیمو بجو مراکش او اسپانیا او د شپې په یوولس نیمو بجو پرتګال او سویس سره مخامخ شي.

پرون د دې پړاو په دوو لوبو کې د جاپان او کرویشیا ترمنځ سیالي مساوي شوه چې وروسته کرویشیا په پنالټي شوټونو کې وګټله او د برازیل او جنوبي کوريا لوبه څلور- یو د برازیل په ګټه پای ته ورسېده.

د نړیوال جام کوارټر فاینل لوبو ته د اتو بریالیو لوبډلو د سیالۍ پړاو د جمعې په ورځ د لیندۍ په اتلسمه پیلېږي.

روسیې د کوریل په ټاپوګانو کې د میزایل دفاعي سیسټم ځای پرځای کړی

د روسیې دفاع وزارت نن وویل چې دا سیسټم یې د هغو ټاپوګانو د مجموعې چې د جاپان او د روسیې د کمچتکا ټاپووزمې ترمنځ پراته دي د شمال په یوه ستراتیژیک ټاپو کې ځای پرځای کړی دی.

روسیې جاپان ته نږدې د کوریل په لانجمنو ټاپوګانو کې د میزایل دفاعي سیسټم ځای پرځای کړی دی.

د روسیې دفاع وزارت نن وویل چې دا سیسټم یې د هغو ټاپوګانو د مجموعې چې د جاپان او د روسیې د کمچتکا ټاپووزمې ترمنځ پراته دي د شمال په یوه ستراتیژیک ټاپو کې ځای پرځای کړی دی.

جاپان د روسیې تر واک لاندې د جنوبي کوریل پر ټاپوګانو د مالکیت ادعا لري او خپل شمالي قلمرو یې بولي.

د دې ټاپوګانو پرسر لانجه د دوهمې نړیوالې جګړې په پای کې هغه مهال رامنځته شوه چې پخواني شوروي اتحاد له جاپان څخه ونیول.

د روسیې دفاع وزارت وايي، د توغندويي دفاع سیسټم یې چې د پنځه سوه کیلومترو په ارتفاع میزایلونه لري، په پارا موشیر ټاپو کې ځای پرځای کړي دي.

نظرپوښتنه: د روسیې ۲۵ سلنه وګړي د جګړې پلوي دي

د روسي ځواکونو له لوري د اوکراین د یوې ویشتل شوې ودانې انځور

په یوه نظرپوښتنه کې څرګنده شوې چې د روسیې یوازې په سلو کې ۲۵ وګړي د جګړې پلوي دي.

د اسوشېټېدپرېس خبري اژانس د راپور له مخې، دا نظرپوښتنه پر اوکراین د روسیې د یرغل په لسمه میاشت شوې او پایلې یې تېره اوونۍ د روسیې په یوه خپلواکه رسنۍ مدوزا کې خپرې شوې.

مدوزا په خپله ویبپاڼه کې لیکلي چې دا نظرپوښتنه د کریمیلین په پټه غوښتنه شوې او دوی یې پایلې ترلاسه کړي دي.

په نظرپوښتنه کې ۵۵ سلنه پوښتل شویو روسانو ویلي چې له اوکراین سره د خبرواترو غوښتونکي دي.

تر دې څو ورځې وړاندې د روسیې لیوادا مرکز، چې ځان مستقل بولي، د خپلې نظرپوښتنې پایلې خپرې کړې وې چې پر اساس یې ۵۳ سلنه پوښتل شویو روسانو د جګړې د پای ته رسېدو او له اوکراین سره د سولې د خبرو د پیلېدو ننګه کړې وه.

د روسیې حکومت د دغو نظرپوښتنو په اړه تراوسه څه نه دي ویلي.

سوډان کې د واک پر لېږد او انتخاباتو موافقه وشوه

د سوډان بیرغ

د سوډان د پوځ قوماندانانو او د ځینو سیاسي ګوندونو مشرانو پرون دوشنبه یوه موافقه لاسلیک کړه چې د دوی په وینا په دوو کلونو کې واک لېږد او انتخاباتو ته لار هواروي.

د دې موافقې پر اساس به هغه پراخ سیاسي تاوتریخوالی پای ته ورسېږي چې د ۲۰۲۱ د اکټوبر پوځي کودتا رامنځته کړی دی.

دا موافقه، چې ممکن د سوډان د کړکېچ لپاره حللار وي، د ځینو سیاسي ډلو له مخالفت سره مخامخ شوې ده.

د دې موافقې څو زره مخالفان پرون د خبرو ځای ته نږدې راټول شوي وو، خو امنیتي ځواکونو د هغو د تیتولو لپاره له اوښکي بهوونکي ګازه کار واخیست.

نن د فوټبال نړیوال جام د منځ لوبو وروستۍ ورځ ده

د پرتګان او یوروګوای ترمنځ د یوې مخکېنۍ لوبې انځور

نن د فوټبال نړیوال جام د منځ لوبو وروستۍ ورځ ده.

په قطر کې د فوټبال نړیوال جام د شپاړلس غوره لوبډلو د پړاو په وروستۍ ورځ به نن د کابل په وخت د ماښام په اوه نیمو بجو مراکش له هسپانیا او د شپې په یولس نیمو بجو پرتګال له سویس سره لوبې وکړي.

د دې ورځې ګټونکې لوبډلې به د ډسمبر میاشتې په لسمه نېټه په کوارټر فاینل کې سره مخ شي.

د یادونې ده چې پرون برازیل او کرووېشا د خپلو سيالانو په ماتولو سره کوارټرفاینل ته ووتل.

د فوټبال نړیوال جام سیالۍ؛ جاپان او سويلي کوریا له نړيوال جام بهر شوې

د جاپان او کرووېشیا د لوبې یو انځور

په قطر کې د فوټبال نړیوال جام سياليو په منځ لوبو کې کرووېشیا د پنالټي شوټونو په ترڅ کې جاپان مات کړ او برازیل بیا په یوه اړخیزه لوبه کې ۴-۱ سویلي کوریا له نړیوال جام بهر کړه.

پرون په لومړۍ لوبه کې کرووېشيا او جاپان سره مخ شول، دواړو لوبډلو د لوبې تر پایه ۱ـ۱ ګول وواهه، خو د لوبې پایله بلاخره د پنالټي شوټونو په وهلو سره معلومه شوه چې د کرووېشیا ګول کيپر د جاپانیانو د ۳ شوټونو دفاع وکړه او خپله لوبډله یې کوارټر فاینل ته ورسوله.

د ورځې په دویمه لوبه کې برازیل بیا په ډيرې اسانۍ سره سویلي کوریا ته ۴ـ۱ ماتې ورکړه.

دې لوبې ته د برازیلۍ لوبډلې پياوړی لوبغاړی نیمار هم د ټپونو تر رغېدو وروسته راستون شوی و.

د دې ورځې ګټونکوې لوبډلې برازیل او کرووېشیا به د ډسمبر میاشتې په ۹ نېټه په کوارټر فاینل کې سره مخ شي.

د یادونې ده نن د شپاړلس غوره لوبډلو وروستی پړاو دی چې په لومړۍ لوبه کې به مراکش او هسپانیا او په دویمه لوبه کې به پرتګال او سویس سره مخ شي.

د قطر او اماراتو مشرانو له څلور کلن ځنډ وروسته لیده کاته کړي

د دوحې یوه څنډه

د متحده عربي اماراتو ولسمشر پرون په دوحه کې د قطر له امیر سره وکتل.

د متحده عربي اماراتو دولتي خبري اژانس وام راپور ورکړی چې د اماراتو د ولسمشر شیخ محمد بن زاید آل نهیان او د قطر د امیر شیخ تمیم بن حمد آل ثاني ترمنځ په دې کتنه کې د دوه اړخیزو اړیکو او د وروستیو پرمختګونو په اړه خبرې وشوې.

دا لومړی ځل دی چې د عربي متحده اماراتو ولسمشر د دواړو خلیجي هېوادونو تر منځ د اړیکو له څلور کلن ځنډ وروسته دوحې ته سفر کوي.

د قطر او اماراتو اړیکې د ۲۰۱۷ کال له جون د ۲۰۲۱ کال تر جنوري پورې د ډپلوماټیکې لانجې په خاطر پرې وې.

قطر ته تر سفر یوه ورځ مخکې د اماراتو ولسمشر شیخ محمد بن زاید آل نهیان په ابوظبۍ کې د طالبانو د حکومت د دفاع له سرپرست وزیر ملا محمد یعقوب مجاهد سره وکتل.

که څه هم د نړۍ کوم هېواد تر اوسه د طالبانو حکومت په رسمیت نه دی پېژندلی، خو د عرب نړۍ ځینې هېوادونه له هغې ډلې قطر له طالبانو سره نږدې اړیکې پالي او له کلونو راهیسې په دوحه کې د طالبانو د سیاسي دفتر کوربه دی.

په شمالي وزيرستان کې ۵ طالبان او يو پوځي وژل شوی

ارشیف: پاکستانی سرتېری

د پاکستان امنيتي ځواکونو په شمالي وزيرستان کې د پاکستاني طالبانو پر پټنځايونو چاپه وهلې او د ډزو په تبادله کې پنځه وسله وال طالبان او يو پوځي وژل شوي دي.

د پاکستان پوځ د دوشنبې په ورځ دا خبر ورکړی.

اسوشېټېډپرېس د پاکستاني طالبانو د سرچینو له قوله خبر ورکوي چې د دوی جنګیالیو په دغه برید کې یو پاکستانی سرتېری وژلی دی.

پاکستاني طالبانو د ور اوښتې مرګژوبلې په اړه څه نه دي ویلي.

پاکستاني طالبانو په دې وروستیو کې اوربند پای ته ورساوه او خپلو جنګیالیو ته یې امر وکړ چې په ټول هېواد کې حکومتي ځواکونه په نښه کړي.

د نايجريا په يوه مسجد کې پر لمونځ کوونکو حمله شوې

د نايجريا پوليس او خلک

د نایجریا پولیس وايي، وسله‌والو کسانو د دغه هېواد په شمال لوېدیځ کې پر یوه جومات حمله وکړه او ۱۹ لمونځ کوونکي یې ورڅخه وتښتول.

د پولیسو یوه ویاند ګامبو عیسي پرون (یکشنبه) وویل، دا پېښه د کاتسینا ولایت په مایګامجي کلي کې د مازدیګر د لمانځه پر مهال وشوه.

د عیسي په وینا، د حمله کوونکو په ډزو د جومات امام او یو بل تن ژوبل شوي او اوس په روغتون کې دي.

د نایجریا په شمال لوېدیځ کې جنایتکارې ډلې ډېرې فعالې دي.

نور راوښيه

XS
SM
MD
LG