د لاسرسۍ وړ لېنکونه

تازه خبر
جمعه ۲۹ چنګاښ ۱۴۰۳ کابل ۱۱:۱۲

خبرونه

يوناما پر افغان ښځو د وروستيو محدوديتونو په تړاو اندېښنه ښودلې

يو شمېر معترضې مېرمنې، انځور - ارشيف
يو شمېر معترضې مېرمنې، انځور - ارشيف

په افغانستان کې د ملګرو ملتونو سیاسي دفتر یا یوناما، تفریحي پارکونو، حمامونو او ورزشي سالونونو ته د ښځو پر تګ بندیز ته په اشارې، په دې باب ژوره اندېښنه وښوده.

پر ښځو د محدودیتونو په لړ کې د طالبانو سرپرست حکومت په تازه مورد کې نجونې او ښځې تفریحي پارکونو، حمامونو او ورزشي سالونونو ته له تګ رسماً منع کړې.

یوناما پرون ناوخته په خپل ټویټر کې لیکلي، چې د افغانانو ټولو حقونو په ځانګړي ډول د ژوند ټولو برخو ته د ښځو د لاسرسي او د نجونو د تعلیم حق ته دې درناوی وشي.

که څه هم د طالبانو حکومت ویلي چې د شریعت په چوکاټ کې د ښځو ټولو حقونو ته درناوی کوي، خو انتقاد کوونکي وايي طالبانو د ښځو او نجونو حقونه عملاً تر پښو لاندې کړي دي.

په تازه مورد کې اروپايي ټولنې هم پر ښځو د تازه محدودیتونو وضع کول د دوی له حقونو جدي سرغړونه بللې ده.

د اروپايي ټولنې د بهرنیو چارو د دفتر ویاند پیټر ستانو (Peter Stano) د دوشنبې ناوخته په ټویټر کې لیکلي، له طالبانو غواړي چې له نړیوالو قوانینو سره سم خپلو مکلفیتونو ته ژمن پاتې شي.

د ورځې تازه خبرونه دلته ولولئ

ټرمپ د امریکا ولسمشرۍ لپاره خپله کاندیداتوري ومنله

د عکاس منځ کې ډونالډ ټرمپ
د عکاس منځ کې ډونالډ ټرمپ

د جمهوري غوښتونکو د ملي مجمع په وروستۍ ورځ ډونالډ ټرمپ د ولسمشرۍ لپاره خپله کاندیداتوري ومنله.

ټرمپ پنځه ورځې مخکې د یوې کمپاینې غونډې پر مهال په برید کې په ښي غوږ ټپي شوی و.

ټرمپ په میلواکي کې د وینا پر مهال د برید شېبه یاده کړه چې څنګه په ښي غوږ په مرمۍ ولګېد او که یې خپل سر نه وای تاو کړی نو ښايي دلته به نه وای.

هغه د خپلو پلویانه مننه وکړه چې د برید پر مهال ونه خوځېدل او تر پایه د ده لپاره ولاړ وو.

ډونالډ ټرمپ د جمهوري غوښتونکي ګوند د ملي مجمع په وروستۍ ورځ د امریکا د ولسمشر جوبایډن پر سیاستونو کلکې نیوکې وکړې او ویې ویل چې په ګډه به د امنیت، هوساینې او ازادۍ نوی باب خپلو خلکو ته پرانېزي.

د "اې‌سي‌ایف" د ۱۵ میاشتو په مخه له ټولو سپورټي فعالیتونو منع شوی

عکس تزییني بڼه لري.
عکس تزییني بڼه لري.

د بایسکل ځغلونې نړیوالې ټولنې د افغانستان د بایسکل ځغلونې فدراسیون یا اې‌سي‌ایف (ACF) مشر فضل احمد فضلي د ۱۵ میاشتو په مخه له ټولو سپورتي فعالیتونو منع کړی دی.

د بایسکل ځغلونې نړیوالې ټولنې اخلاقي کمېسیون پرون د جولای ۱۸مه په یوه خبرپاڼه کې ویلي چې فضلي د ګواښونکو او سپکوونکو پیغامونو په استولو سره له خپلو صلاحیتونو ناوړه استفاده کړې ده.

دغه راز ویل شوي چې فضل احمد فضلي په ۲۰۲۱م کال کې د کابل له هوايي ډګر څخه د هغو افغانانو د لېږد په مهال چې ژوند یې په افغانستان کې له خطر سره مخامخ و، ځینو ورزشکارانو ته ګواښونکي پیغامونه لېږلي وو.

فضلي چې له ۲۰۱۹م کال راهیسې د افغانستان د بایسکل ځغلونې فدراسیون مشر دی، تر اوسه د دغو تورونو په اړه څه نه دي ویلي.

د افغانستان په ۱۷ ولایتونو کې د بارانونو د اورېدلو اټکل شوی

ارشیف: په پروان کې د باران اورېدلو یو انځور
ارشیف: په پروان کې د باران اورېدلو یو انځور

د طالبانو د ټرانسپورټ او هوايي چلند وزارت د هوا پېژندنې ادارې اټکل کړی چې نن جمعه به د افغانستان په ۱۷ ولایتونو او همداراز سالنګونو کې بارانونه واوري.

دې ادارې په خپله خبرپاڼه کې ویلي چې په سالنګونو او همداراز ننګرهار، کابل، لوګر، بدخشان، تخار، بغلان، پنجشېر، کونړ، نورستان، لغمان، کاپیسا، پروان، میدان وردګ، غزني، پکتیا، پکتیکا او خوست کې د باران ترڅنګ د بادونو، تالندې، دوړو او سېلابونو وړاندوینه کوي.

د دې ادارې پر اساس، په بېلابېلو سیمو کې د باران کچه له ۱۵تر ۴۰ ملي مترو پورې اټکل شوې ده.

په وروستیو ورځو کې د افغانستان په پنځو ولایتونو کې سېلابونو خلکو ته مرګ ژوبلې او تاوانونه واړول.

تر ټولو ډېره مرګ ژوبله یې په ننګرهار کې واړوله.

په پاکستان کې پر خواله رسنیو بندیز لا هم دوام لري

ارشیف
ارشیف

په پاکستان کې پر خواله رسنیو بندیز، چې ظاهراً د عاشورا د ورځې په خاطر لګول شوی و، لا هم دوام لري.

د انټرنېټ څارونکې ویبپاڼو، نېټ بلاکس او همداراز ډاون ډیټیکټر پرون وویل چې په پاکستان کې له ایکسپاڼې یا پخواني ټویټر وروسته پر فېسبوک او انسټاګرام هم بندیز لګول شوی دی.

د پاکستان حکومت په دې اړه رسماً څه نه دي ویلي، خو داسي ښکارېده چې دا بندیز به یوازې د محرم په لسمه او یوولسمه وي، خو د خواله رسنیو کاروونکي وايي چې بندیز لا هم دوام کړی او دوی یوازی د "وي پي این" له لارې خواله رسنۍ لیدلی شي.

بدخشان کې ترافیکي پېښه؛ ۵ تنه مړه او ۱۳ نور ژوبل شول

ارشیف
ارشیف

په بدخشان کې طالب چارواکي وايي چې په یوه ترافیکي پېښه کې ۵ تنه مړه او ۱۳ نور ژوبل شول.

د طالبانو د بدخشان امنیه قومندانۍ پرون پنجشنبې وویل چې دا پېښه د چهارشنبې په ورځ د دغه ولایت په کوهستان ولسوالي کې هغه مهال وشوه چې یو لنډکروزر موټر له سړکه واوښت او چپه شو.

د بدخشان د امنیه قومندانۍ د ویندوی احسان الله کامګار په وینا، د ځینو ټپیانو حال نازک دی.

تر دې یوه ورځ وړاندې د بغلان ولایت په خنجان ولسوالي کې په یوه ترافیکي پېښه کې ۱۷ تنه مړه او ۳۰ نور ټپیان شول.

د بغلان ولایت د امنیه قوماندانۍ د خبرپاڼې له مخې، پېښه د خنجان په تخته سنګ سیمه کې هغه مهال وشوه چې له کابل څخه فاریاب ته روان بس چپه شو.

د یکشنبې په ورځ هم د بغلان د مرکز پلخمري او د ډنډې غوري ولسوالۍ په خواجه الوان سیمه کې په جلاجلا ترافیکي پېښو کې ١٢ کسانو ته مرګ ژوبله واوښته.

آی‌اوایم: له اپرېله تر جونه افغانستان ته تر ۸۵۸زره ډېر کسان داخل شوي او ۵۳۲ نور وتلي

ارشیف: له پاکستانه د چمن سرحدي دروازې ته رسېدلي افغان کډوال چې افغانستان ته روان دي.
ارشیف: له پاکستانه د چمن سرحدي دروازې ته رسېدلي افغان کډوال چې افغانستان ته روان دي.

د کډوالۍ یا "آی‌اوایم" نړيوال سازمان وايي، د روان کال له اپرېل څخه تر جون مياشتي پورې افغانستان ته تر ۸۵۸زره ډېر کسان داخل شوي او ۵۳۲ نور وتلي دي.

دغه سازمان پرون د جولای ۱۸مه خپل نوی درې میاشتنی راپور په ایکسپاڼه یا پخواني ټویټر کې خپور کړ او ویې ویل چې اوس په افغانستان کې دننه او بهر د افغانانو د تګ راتګ د څارنې په مرکزونو کې پنځه نور زیات شوي دي.

په راپور کې دا نه دي ویل شوي چې دغه سازمان د افغان اتباعو د تګ راتګ د څار څومره مرکزونه لري.

د کډوالۍ نړیوال سازمان د دغو مرکزونو په وسیله پاکستان او ایران ته د افغانانو تګ راتګ څاري.

له دغو دوو هېوادونو څخه د خلکو د راتګ یو لامل دا دی چې پاکستان او ایران په تېرو لسو میاشتو کې د افغان کډوالو جبري ایستلو ته زور ورکړی دی.

پر غزې د اسراييلي ځواکونو بريد کې نهه فلسطينيان وژل شوي

پر غزې د اسراییلي ځواکونو د برید له کبله یوه ټپي شوې مېرمن روغتون ته د درملنې لپاره لېږدول کېږي.
پر غزې د اسراییلي ځواکونو د برید له کبله یوه ټپي شوې مېرمن روغتون ته د درملنې لپاره لېږدول کېږي.

اسراییلي ځواکونو پرون چهارشنبې د غزې تړانګې د مرکزي برخې پر یو شمېر سیمو بریدونه وکړل چې د سیمه‌ییزو روغتیایي چارواکو په خبره په نتیجه کې یې لږترلږه نهه فلسطینیان وژل شوي دي.

په عین حال کې اسراییلي ټانکونو د غزې په جنوب رفح کې محدود وړاندې تګ کړی دی.

د رویترز خبري اژانس د راپور له‌مخې په غزه کې د روغتیا وزارت ویلي چې په تېرو ۲۴ ساعتونو کې د اسراییل په بریدونو کې لږترلږه ۸۱ فلسطینیان وژل شوي او ۱۹۸ نور ټپیان شوي دي.

د راپور له‌مخې دا وزارت د تلفاتو په اړه د شمېرو په اعلانولو کې د وسله‌والو او ولسي خلکو ترمنځ توپیر نه‌کوي.

په رفح کې روغتیایي چارواکو د اسراییل په یوه هوایي برید کې د دوو تنو د وژل کېدو خبر ورکړی او همدارنګه یې ویلي چې اسراییلي ټانکونو د ښار په شمالي برخه کې عملیات ترسره کړي او بېرته خپلو اصلي ځایونو ته ستانه شوي دي.

د اسراییل پوځ وویل، ځواکونو یې د رفح ښار اړوند سیمو کې د استخباراتو معلوماتو پر اساس دقیقو عملیاتو ته دوام ورکړی او زیاته یې کړه چې دوی یوه تروریستي څانګه او پر اسراییلي ځواکونو د برید یو ځای يې له‌منځه وړي دي.

اسراییل وروسته له هغې د حماس ډلې چې امریکا او اروپایي ټولنه یې د یوې ترهګرې ډلې په توګه پېژني، د له‌منځه وړلو ژمنه وکړه چې دې ډلې د تېر کال د اکټوبر په اوومه د اسراییل پر قلمرو برید وکړ، شاوخوا ۱۲۰۰ کسان یې ووژل او له دوه نیم سوو زیات یې یرغمل کړل.

په غزه کې روغتیایي چارواکو ویلي چې د اسراییل له‌خوا په بریدونو کې لږترلږه ۳۸ زره فلسطینیان وژل شوي دي.

ټرمپ به د ولسمشرۍ لپاره راروانو ټاکنو کې د خپل ګوند رسمي نوماندي ومني

د عکس ښي لور ته وېنس چې ټرمپ له لوري د ولسمشرۍ ټاکنو لپاره د مرستیال په توګه ټاکل شوی او چپ لور ته په خپله ډونالډ ټرمپ.
د عکس ښي لور ته وېنس چې ټرمپ له لوري د ولسمشرۍ ټاکنو لپاره د مرستیال په توګه ټاکل شوی او چپ لور ته په خپله ډونالډ ټرمپ.

د امریکا له پخواني ولسمشر ډونالډ ټرمپ څخه به نن هغه مهال د جمهوریپالو په کنګره کې تود هرکلی وشي چې دی د امریکا د ولسمشرۍ لپاره راروانو ټاکنو کې د دې ګوند له‌خوا رسمي نوماندي ومني او ملت ته چې په پنسلوانیا کې پر نوموړي د څو ورځې مخکې برید سیوری غوړولی، وینا وکړي.

تمه کېږي چې له پخواني ولسمشر ډونالډ ټرمپ څخه به نن په میلواوکي کې د جمهوري غوښتونکو د ګوند د کنګرې په وروستۍ ورځ د یوه اتل په توګه هرکلی وشي.

په پنسلوانیا کې د انتخاباتي کمپاین په یوه غونډه کې د یوه وسله‌وال له‌خوا د شنبې د ورځې په برید کې چې یو کس ووژل شو، نوموړی په ښي غوږ ټپي شو.

د فرانس‌پرېس خبري آژآنس د راپور له مخې په داسې حال کې یو شمېر جمهوري غوښتونکو هڅه کړې چې پر ټرمپ د برید ملامتي پر هغو ډیموکراټانو واچوي چې د ټرمپ ضد ویناوې کوي، خو په خپله میلیاردر ټرمپ ویلي چې د تهاجمي وینا نسخه یې بدله کړې او په نوې نسخه کې هیله‌من دی چې هېواد یو موټی کړي.

ټاکل شوې چې په امریکا کې د ولسمشرۍ لپاره انتخابات د نومبر میاشتې په پنځمه نېټه ترسره شي.

د ټرمپ پر وړاندې به د ډیموکراټانو د ګوند له‌خوا اوسنی ولسمشر جوبایډن سیالي کوي.

په روسیه کې د امریکایي خبریال "ایوان ګیرشکوویچ" د محاکمې بهیر بیا پیل شوی

په روسیه کې زنداني امریکایي خبریال ایوان ګیرشکوویچ
په روسیه کې زنداني امریکایي خبریال ایوان ګیرشکوویچ

په روسیه کې د زنداني امریکایي خبریال ایوان ګیرشکوویچ د محاکمې بهیر بیا پیل شوی دی.

د امریکایي والسټریټ ژورنال ورځپاڼې دغه خبریال چې د ۲۰۲۳م کال د مارچ په ۲۵مه د روسیې په یکاترینبورګ ښار کې نیول شوی، په جاسوسۍ تورن شوی، هغه تور چې والسټریټ ژورنال او د امریکا حکومت رد کړی او هغه یې سیاسي انګېزه بللې ده.

د یکاترینبورګ سیمه‌ییزې محکمې پرون چهارشنبې د هغه د محاکمې د بیا پیلېدو خبر ورکړ.

که ۳۲ کلن ګیرشکوویچ چې موراو پلار د پخواني شوروي اتحاد پر مهال امریکا ته کډوال شوي او دې هلته زېږېدلی، مجرم وپېژندل شي، د شلو کالو بند له سزا سره مخامخ دی.

پر نوموړې سربېره د ازادي راډیو خبریاله او د روسیې او امریکا دوه ګوني تابعیت لرونکې السو کورماشیووا بله امریکایي خبریاله ده چې په اوس وخت کې په روسیه کې زنداني ده.

نوموړې چې د تېر کال په اکټوبر کې په کازان ښارکې نیول شوې، پرې تورپورې شوی چې د روسیې د قانون له مخې یې د یوه بهرني اجنټ په توګه نوم نه‌دی ثبت کړی.

الکوزی: افغانستان کې دننه بايد د تازه مېوو د ساتنې لپاره سړې خونې جوړې شي

ارشیف: په کندهار کې د انګورو د پروسس او بسته‌بندۍ یو انځور
ارشیف: په کندهار کې د انګورو د پروسس او بسته‌بندۍ یو انځور

د افغانستان د سوداګرۍ او پانګونې خونه وایي چې پاکستان ته د افغانستان د تازه مېوو او سبزیجاتو د صادراتو د ستونزې یوه کورنۍ دایمي حل‌لاره دا ده چې په هېواد کې دننه د مېوو او سبزیجاتو د ساتلو لپاره زیاتې سړې خونې جوړې شي.

د دې خونې د مدیره هییت غړي خان جان الکوزي ازادي راډیو ته دغه څرګندونې پرون چهارشنبې ناوخته داسې مهال وکړې چې افغانستان د پاکستان له‌خوا د تعرفې د زیاتوالي له امله هغه هېواد ته د تازه مېوو او سبزیجاتو صادارت درولي دي.

الکوزي وويل: "فیصله مو وکړه چې صادرات بند کړو او د دې لپاره په داخل کې تدابیر ونیول شي، باید کوښښ وشي چې په داخل کې سړې خونې جوړې شي او ظرفیتونه ایجاد شي او همدارنګه افغانان، دولتي خلک او په هوټلونو کې د خارجي مېوو پرځای له کورنیو مېوو څخه استفاده وشي."

د الکوزي په خبره پاکستان په‌دې وروستیو کې د افغانستان پر دولس قلمه مېوو او سبزیجاتو تعرفې ان تر پنځلس چنده لوړې کړې چې افغان سوداګر یې د پرېکولو توان نه‌لري ځکه ورسره نرخونه پورته ځي چې په نتیجه کې یې څوک د اخیستو وس نه‌لري.

دا لومړی ځل نه‌دی چې پاکستان د اوړي په موسم کې چې په افغانستان کې د مېوو د حاصلاتو موسم دی، د سبزیجاتو ترڅنګ د تازه مېوو د صادراتو په وړاندې سخت اقدامات کوي، بلکې له دې مخکې یې هم په کراتو، کراتو د مختلفو دلایلو له امله هغه هېواد ته د افغانستان د تازه مېوو د صادراتو مخه نیولې چې افغان بزګرو او سوداګرو ته یې ډېردزیانونه اړولي دي.

نور راوښيه

XS
SM
MD
LG