د لاسرسۍ وړ لېنکونه

تازه خبر
شنبه ۲۳ چنګاښ ۱۴۰۳ کابل ۰۲:۱۳

افغانستان

ټاکل شوې نن مسکو کې د افغانستان په اړه غونډه جوړه شي

روسيه کې تېر کال د افغانستان په تړاو غونډه چې طالبان هم وربلل شوي وو، انځور - ارشيف
روسيه کې تېر کال د افغانستان په تړاو غونډه چې طالبان هم وربلل شوي وو، انځور - ارشيف

تمه کېږي، د افغانستان په اړه د «مسکو فارمټ» په نوم غونډه د طالبانو د سرپرست حکومت د استازو په نه موجودیت کې نن جوړه شي.

د افغانستان لپاره د روسیې ځانګړي استازي ضمیر کابلوف د لړم/عقرب پر ۱۸مه د روسیې ټاس خبري اژانس ته ویلي وو، چې دغې غونډې ته د طالبانو استازي نه‌دي بلل شوي.

هغه یې دلیل ونه وایه.

د طالبانو حکومت ویلي، چې د طالبانو نه بلل له روسیې سره پر دوه اړخیز تعامل منفي اغېز کوي او دا غونډه به نامکمله وي.

تېر کال د مسکو فارمټ په غونډه کې چې د روسیې په کوربه‌توب وشوه، طالبانو وروسته له هغې ګډون وکړ، چې د ګډون بلنه ورکړل شوه.

په نننۍ غونډه کې د چین، تاجکستان، ازبکستان، ترکمنستان، ایران، پاکستان، هند، قرغزستان، قزاقستان او روسیې استازي برخه لري.

له دغو هېوادونو یوه هم، د طالبانو سرپرست حکومت په رسمیت نه‌دی پېژندلی.

د ورځې تازه خبرونه دلته ولولئ

له افغانستان سره د نړیوال پیوستون د نښې په توګه لسګونه زرګونه لاسلیکونه راټول شوي

ارشیف: په کابل کې د معترضو مېرمنو د لاریون یو انځور
ارشیف: په کابل کې د معترضو مېرمنو د لاریون یو انځور

د بخښنې نړیوال سازمان، له افغانستان سره د نړیوال پیوستون د نښې په توګه تر درې لکه ۵۴زره ۸۴۷زیات لاسلیکونه راټول کړي دي.

لاسلیکوونکو په ګډه د طالبانو له چارواکو غوښتنه کړې چې په افغانستان کې بشري حقونه رعایت کړي.

د بخښنې نړیوال سازمان د جنوبي اسیا څانګې پرون په خپله ایکس­شبکه کې لیکلي چې: "په افغانستان کې بشري وضعیت په خرابېدو دی، نو موږ باید په افغانستان کې د حساب ورکولو او عدالت لپاره خپلې ګډې غوښتنې ته دوام ورکړو.:

طالبانو په افغانستان کې د بشري حقونو د ناوړه وضعیت په باب مخکېني راپورونه رد کړي وو او په افغانستان کې یې دا وضعیت سم ښودلی دی.

طالبانو له پاکستاني چارواکو سره د صادراتي توکو پر بندېدو خبرې کړي

د چمن سرحدي سیمه
د چمن سرحدي سیمه

په اسلام اباد کې د طالبانو سفارت خبر ورکړی چې د دوی یوه پلاوي پرون د پاکستان د سوداګرۍ وزارت له چارواکو سره د افغانستان صادراتي توکو پر بندېدو خبرې وکړې.

باختر اژانس چې طالبان یې کنټرولوي پرون خبر ورکړی چې د طالبانو د سفارت پلاوي د پاکستان د سوداګرۍ وزارت د بهرنۍ سوداګرۍ له مشرې مېرمن ماریا کازي سره د افغانستان د تازه مېوو او سبزیجاتو پر صادراتو د اضافي مالیې لګولو اقدام، هم افغان بزګرانو او هم د پاکستان د کورني بازار په زیان بللی دی.

له اکټوبر میاشتې راهیسې پر چمن دروازه او خرلاڅي اعتراضونه روان دي او برخه‌وال یې افغانستان ته د تګ راتګ لپاره د ویزې او پاسپورټ د شرط لیرې کېدو غوښتنه لري.

دغو اعتراضونو د مالي او سوداګریزو توکو لېږد رالېږد هم ټکنی کړی او د دې تر څنګ پاکستان په وروستیو کې د افغانستان پر ځینو مالونو اضافي مالیه وضعه کړې ده.

د کانکور ازموینې وروستی پړاو په کابل کې بشپړ شو

ارشیف: په افغانستان کې د کانکور ازموینو له بهیره یو انځور
ارشیف: په افغانستان کې د کانکور ازموینو له بهیره یو انځور

د ۱۴۰۳لمریز کال د کانکور ازموینې وروستی پړاو پرون په کابل کې بشپړ شو.

د ازموینې په دغه پړاو کې ټول ګډونوال هلکان وو او هېڅ کومه نجلۍ یا ښځه په دوی کې نه ښکارېده.

د ازموینې ملي ادارې سرپرست عبدالباقي حقاني ویلي چې د سږ کال د کانکور ازموینو پایلې به په لسو ورځو کې اعلان شي.

د حقاني په وینا، دا چې د ګډونوالو شمېر زیات وو، دوی دغه ازموینه په پنځو پړاوونو کې واخیسته او تر سلو زرو ډېرو کسانو په کې ګډون وکړ.

په افغانستان کې لا هم نجونو ته تر شپږم ټولګي پورته د نور تعلیم اجازه نه ده ورکړل شوې.

طالبانو د ۲۰۲۲م کال په ډسمبر میاشت کې د هېواد په ټولو پوهنتونونو کې د ښځینه محصلانو تګ منع کړ، لا هم په پوهنتونو کې د نجونو د لوړو زده کړو د بیا پیل څرک نه تر سترګو کېږي.

په افغانستان کې د بریتانیا د ډیپلوماټیک حضور د بیا احیا غوښته وشوه

د بریتانیا بیرغ
د بریتانیا بیرغ

افغانستان کې د ښځو ملاتړ او پر مرستو د څارنې لپاره د بریتانیا د ډیپلوماټیک حضور د بیا احیا غوښته وشوه

د بریتانیا د حکومت د مرستو پر څارنې یو کمېشنر وایي، هېواد یې باید په افغانستان کې د ښځو د ملاتړ او د بریتانیا پر مرستو د څارنې لپاره خپل ډیپلوماټیک حضور بیرته احیا کړي.

هوګ بیلي چې په مې میاشت کې کابل ته تللی، ویلي چې د ده په باور افغان ښځې او غیردولتي موسسې د لوېدیځو هېوادونو د ډيپلوتانو د حضور هرکلی کوي او وایي٬ هغوی کولای شي چې د ښځو په اړه خپل نظریات له طالبانو سره شریک کړي.

د ګارډین ورځپاڼې د پنجشنبې د ورځې راپور له مخې بیلي له افغانستان سره د مرستو د ارزونې په اړه خپل راپور یوه خپلواکه کمېسیون ته سپارلی او همدارنګه یې د بریتانیا او افغانستان ترمنځ د ډیپلوماتیکو اړیکو د بیرته ټینګېدو سپارښتنه کړې ده.

د ۲۰۲۱م کال په اګسټ کې جې طالبان بیا پر افغانستان واکمن شول، بریتانیا خپل ټول ډیپلوماتان له کابله وایستل.

خو په تېرو نژدې درېیو کلونو کې د نژدې درېیو ملیاردو ډالرو مرستې چې له افغانستانه سره شوي، بریتانیا یې له امریکا وروسته دوهم مرستندویه برخه وال دی.

دغه مرستې طالبانو ته نه ورکول کېږي بلکې هغه د غیردولتي موسسو له خوا اړوکسانو ته ورکول کېږي.

برادر په شپږو ولایتونو کې د صادراتو د پروسس زونونو د جوړولو خبر ورکړ

د طالبانو د حکومت اقتصادي مرستیال ملاعبدالغني برادر
د طالبانو د حکومت اقتصادي مرستیال ملاعبدالغني برادر

د طالبانو د حکومت د ریاست ‌الوزرا اقتصادي مرستیال د کابل په ګډون د هېواد په شپږو ولایتونو کې د صادراتو د پروسس زونونو د جوړولو خبر ورکوي.

ملا عبدالغني برادر اخند پرون پنجشنبې د صادراتو د ملي ورځې په نمانځغونډه کې وویل چې دغه زونونه به د افغانستان پر صادراتو د پام وړ مثبتې اغېزې وکړي.

هغه ملي سوداګر وهڅول چې د خامو موادو د صادراتو پر ځای پاخه شوي تولیدي توکي صادر کړي ځکه په خبره یې، په کور دننه د خامو موادو په پروسس سره نویو کارخونو ته د فعالیت زمینه برابرېږي.

ملا عبدالغني برادر همدارنګه د شفافه او د باور وړصادراتو د مسلې د یقیني کولو لپاره له ټولو امنیتي ارګانونو وغوښتل چې د قاچاق مخه ونیسي او متخلفانو ته سختې سزاوې ورکړي.

نوموړي دغه راز له سوداګرو غوښتي چې د کرنیزو محصولاتو د خرابېدو د مخنیوي لپاره له نړیوالو معیارونو سره سم سړې خونې جوړې کړي.

د عربستان سفیر کابل ته له ستنېدو وروسته د طالبانو د بهرنیو چارو له سرپرست وزیر سره کتلي

د طالبانو د بهرنیو چارو سرپرست وزیر امیرخان متقي
د طالبانو د بهرنیو چارو سرپرست وزیر امیرخان متقي

د افغانستان لپاره د سعودي عربستان سفیر کابل ته له ستنېدو وروسته د طالبانو د بهرنیو چارو له سرپرست وزیر سره کتلي دي.

د طالبانو د بهرنیو چارو وزارت مرستیال ویاند حافظ ضیا احمد پرون پنجشنبې په خپله ایکسپاڼه یا پخواني ټویټر کې لیکلي چې په دې کتنه کې پر دوه اړخیزو اړیکو تمرکز وشو.

د راپورونو له مخې د سعودي عربستان ډیپلوماتان د ۲۰۲۳م کال په فبرورۍ کې د امنیتي دلایلو له امله له کابل څخه وتلي وو.

هغه مهال جاسم بن محمد الخالدي په کابل کې سفیر و چې اوس یې فیصل بن طلق البقمي ځایناستی ټاکل شوی دی.

د طالبانو د بیانونو له مخې د سعودي عربستان سفیر امیرخان متقي ته ویلي چې د دواړو هېوادونو ترمنځ اړیکي مخ په پراخېدو دي.

همدارنګه ویل شوي چې د سعودي سفیر له افغانستان سره د خپل هېواد د بشري مرستو پر دوام ټینګار کړی دی.

سعودي عربستان چې یو له درېیو هېوادونو و چې د طالبانو مخکینۍ واکمنۍ یې په رسمیت پېژندلې وه، د نړۍ د نورو هېوادونو په څیر د طالبانو د سرپرست حکومت له په رسمیت پېژندلو ډډه کړې ده.

په سالنګ کې د موټرو تګ راتګ ته نوبت ټاکل کېږي

تیرکال طالبانو اعلان وکړ چې تونل یې بیارغولی دی
تیرکال طالبانو اعلان وکړ چې تونل یې بیارغولی دی

د طالبانو د ټولګټو چارو وزارت وايي، د سالنګونو لويې لارې د بیارغونې د پاتې چارو د پیل په موخه يې، د باري او مسافروړنکو موټرو په تګ راتګ نوبت ایښی دی.

د دې وزارت ویاند محمد اشرف حق شناس نن د (جولای ۱۱ مه) پر خپلې ایکسپاڼې (پخواني ټویټر) په یو ویډیويي پیغام ویلي، د موټرو د تګ راتګ دا نوبت د اسد میاشتې له څلورمې نیټې په پام کې نیول شوی دی.

د حق شناس په خبره، د وړو موټر لپاره بدیل لار په نظر کې نیول شوې چې د سهار له شپږو د ماښام تر شپږو پرې تګ راتګ کولی شي.

د هغه په خبره، باروړونکې او غټ مسافروړونکې موټر بیا په نوبتي ډول د مازیګر له شپږو د سهار تر شپږو یو شپه له شمال څخه جنوب او بله شپه له جنوب څخه شمال ته د تګ اجازه لري.

حق شناس وړاندې وايي، واړه مسافروړنکې موټر به د شپې له خوا د تګ راتګ اجازه نه لري.

د سالنګونو د لویې لارې، چې د افغانستان نهه شمالي ولایتونه له پلازمېنې کابل او جنوبي ولایتونو سره وصلوي، د بیا رغونې چارې تیر کال پیل شوې وې.

د ګیله من وزیر جنازه په خپل پلرني کلي کې خاورو ته سپارل کېږي

د ګیله من وزیر جنازه وړل کېږي
د ګیله من وزیر جنازه وړل کېږي

د پښتون ژغورنې غورځنګ وايي، د دوی د مخکښ فعال او شاعر، ګیله من وزیر جنازه به سبا (د جولای ۱۱مه) په شمالي وزیرستان کې خاوره ته وسپارل شي.

ګیله من تېره شپه د اسلام اباد په یوه روغتون کې ساه ورکړه. نوموړی د مدني او بشري حقونو د فعالیت له کبله ډېر مشهوره و او له پښتنو سره د مینې او ملتپالنې په اړه یې شعرونه ویل.

پر ګیله من د جولای په اوومه په اسلام اباد کې حمله شوې وه.

د پښتون ژغورنې غورځنګ مشر منظور پښتین ویلي، د ګیله من د جنازې کاروان نن سهار له اسلام اباده را روان شوی چې له صوابۍ، پیښور او بنو څخه تر تیریدو وروسته به شمالي وزیرستان ته ورسیږي.

په هغوو ویډیوګانو کې چې پر خواله رسنیو خپرې شوي، ښکاري چې د ګیله من وزیر د جنازي موټر د افغانستان پر درې رنګه بیرغ پوښول شوی دی.

ګیله من وزیر په خپله شاعرۍ کې د لوی افغانستان یادونه کوله، او ډیر کله به يې د افغانستان بیرغ پر اوږد پروت و.

د منظور په خبره، ګیله من به سبا څلور بجې د هغه په پلرني ټاټوبي رزمک کې د اسد خیلو په کلي کې خاورو ته وسپارل شي.

د پښتون ژغورنې غورځنګ یا پي ټي ایم غړي وايي، ګیله من وزیر په اسلام اباد کې د ازادخان دواړ په نام یو تن او له هغه سره لس یا دولس نورو کسانو په لرکیو او چړو پر سر وهلی وو.

داوړ په شمالي وزیرستان کې يو ځايي سیاستوال او په اسلام اباد کې د جایداد کاروبار لري.

بل خوا د اسلام اباد پولیسو ویلي، د تورنو کسانو پر ضد يې قضیه درج کړې او پلټنې يې پیل کړي دي.

پر ګیله من وزیر برید په افغانستان او پښتونخوا کې په پراخه کچه غندلی شوی وو، او د هغه د مړینې د خبر له خپریدو وروسته د افغانستان د پخوانیو ولسمشرانو اشرف غني او حامد کرزي پشه شمول ډير شمیر پخوانیو افغان سیاستوالو د تسلیت پیغامونه شریک کړي دي.

پاکستان وايي، د بې اسناده کډوالو د نه ایستلو پرېکړه مو نه ده کړې

د م.م. د کډوالو لوی کمیشنر په پاکستان کې له افغان کډوالو سره ویني
د م.م. د کډوالو لوی کمیشنر په پاکستان کې له افغان کډوالو سره ویني

د پاکستان د بهرنیو چارو وزارت وايي، له دې هیواده د بې اسناده افغانانو د ایستلو د پلان د ځنډیدو په اړه راپورنه ناسم دي.

د دې وزارت ویاندې ممتاز زهرا بلوڅ پرون چهارشنبې (د جولای لسمه) د ازادي راډیو مشال څانګې ته، په یوه لیکلي پیغام کې ویلي،"د غیرقانوني کډوالو د ستنولو لړۍ د پخوا په څیر روانه ده".

اغلې بلوڅ وړاندې لیکلي، پاکستاني چارواکو د ملګرو ملتونو د کډوالو د لویې کمیشنرۍ (یو این اېچ سي ار) له مشر فیلیپو ګراندي سره په وروستیو کتنو کې دا ډول تفاهم نه دی کړی.

ګراندي پاکستان ته د درې ورځني سفر په ترڅ کې ویلي و، د اسلام اباد هغه اقدام ستايي چې "د غیرقانوني کډوالو د ستنولو پلان" يې ځنډولی دی.

یو این ایچ سی ار د جولای په نهمه په یوه خبرپاڼه کې ویلي و، ګراندي د غیرقانوني کډوالو د پلان د ځنډولو غوښتنه کړې وه.

بل پلو، د پاکستان مرکزي کابینې په دې هېواد کې د شاوخوا یو نیم میلیون هغو افغانانو د اوسېدو قانوني موده غځولې چې د یو اېن اېچ سي ار د کډوالۍ کارتونه يې راجستر وو.

د م.م. د بندیزونو د څار ډله: داعش او القاعده په افغانستان کې ځان خوندي احساسوي

د ملګرو ملتونو د بندیزونو د څار ډله وايي، داعش او القاعده ترهګرې ډلې په افغانستان کې د خپلو فعالیتونو لپاره خوندې پټنځایونه موندلي شي او دا هیواد د ترهګرۍ سرچینه ده.

دې ډلې پرون چهارشنبې د (جولای په لسمه) په یو راپور کې ویلي، "دا هیواد لا هم د ترهګرو ډلو لپاره د خوندې ځای په توګه پیژندل کیږي".

راپور وړاندې کاږي، "د افغانستان په ډیر شمیر ولایتونو کې د ترهګرو ډلو د فعالیتونو پر وړاندې د طالبانو زغم، ګاونډیو هیوادونو ته د ترهګرۍ د پراختیا لار هواروي."

په راپور کې ویل شوي، القاعده له طالبانو سره له خپلو زړو اړیکو څخه په استفادې پرمختګ ته دوام ورکوي.

د ملګروملتونو د څار ډلې په راپور کې دا هم راغلي چې القاعده ډلې تیر کال د افغانستان په پنځو ولایتونو کې ورزنیز کمپونه جوړ کړي او د خپلو شبکو د بیا تنظیم لپاره د کسانو په جلب و جذب بوخته ده.

طالبانو د ملګروملتونو د بندیزو د څار ډلې د دې راپور په اړه تراوسه څه نه دی ویلي، خو له دې وړاندې يې په ځلونو ویلي، داعش ډ‌له يې ځپلې او نه پریږدي چې د افغانستان خاوره د هیڅ ډلې له لوري د نورو هیوادونو پر ضد وکارول شي.

نور راوښيه

XS
SM
MD
LG