د لاسرسۍ وړ لېنکونه

تازه خبر
یکشنبه ۱۳ لیندۍ ۱۴۰۱ کابل ۰۰:۰۹

افغانستان

زابل کې د نري رنځ د درملنې يو مرکز پرانيستل شو

د افغانستان په عمومي نقشه کې د زابل ولايت موقعيت

د بې پولې ډاکترانو ټولنې له لوري پرون (پنجشنبه) په زابل ولایت کې د نري رنځ د درملنې یو مرکز پرانیستل شو.

د زابل د عامې روغتیا رئيس ډاکتر عبدالحکیم حکیمي ازادي راډیو ته وویل، د بې پولې ډاکترانو د ټولنې له لوري په کلات ښار کې د نري رنځ د درملنې او تشخیص دا مرکز د دې لپاره مهم دی چې په زابل کې دا ناروغي ډېره ده.

د دغه مرکز د پرانیستلو په مراسمو کې د بې پولې ډاکترانو د ټولنې غړي ډاکتر مجیب احمد وویل، دوی غواړي چې په زابل کې د خوارځواکو ماشومانو درملنه هم وکړي.

د اقتصادي ستونزو له کبله ډېر شمېر افغان ماشومان په خوارځواکۍ اخته شوي دي.

د ورځې تازه خبرونه دلته ولولئ

په ننګرهار کې چاودنه شوې

د جلال اباد ښار یوه څنډه

جلال اباد ښار کې چاودنې ۶ ولسي وګړي ټپیان کړي دي.

پېښه نن مازدیګر ناوخته د جلال اباد ښار د لومړۍ ناحیې اړوند درمسال ته څېرمه شوې ده.

په ننګرهار کې د طالبانو د امنیې قومندانۍ ویاند ویاند قاري عبدالبصیر زابلي رسنیو ته په استولي غږیز پیغام کې ویلي چې پېښه د یو دوکان مخته د ځای پر ځای شوي ماین له امله رامنځته شوې ده.

ویل کېږي چې یاد دوکان د یو سېک افغان و چې یوناني درمل په کې پلورل کېدل.

د دغه چاودنې مسوولیت چا نه دی منلی، خو له دې وړاندې په دې ولایت کې د ځینو چاودونو مسوولیت داعش وسله والې ډلې منلی وو.

پخواني افغان ولسمشر حامدکرزي له افغانستانه بهر سفر وکړ

د کرزي د حکومت د مهال د مالیې وزیر ډاکتر عمر زاخېلوال پر خپله ټویټرپاڼه له کرزي سره خپل عکس، چې دواړه په الوتکه کې سپاره دي، خپور کړی

د افغانستان پخوانی ولسمشر حامدکرزی له افغانستانه ووت.

د افغانستان د نجات حرکت مشر ډاکتر عمر زاخېلوال پر خپله فېسبوک پاڼه له الوتکې د کرزي او خپل د عکس په خپرولو سره له افغانستانه بهر د ګډ سفر یادونه کړې ده.

زاخېلوال په دې اړه چې دوی کوم هېواد ته سفر کړی، جزئیات نه‌دي ورکړي، خو هیله‌یې ښودلې چې افغانستان بېرته ستانه شي.

پر افغانستان د طالبانو له بیا واکمنۍ وروسته د لومړی ځل دی چې حامدکرزی له افغانستانه بهر سفر کوي.

په ځلونو داسې راپورونو خپاره شوي و چې طالبانو پر پخواني ولسمشر حامدکرزي، د ملي مصالحې عالي شورا مخکېني مشر عبدالله عبدالله او مشرانو جرګې مخکېني مشر فضل‌الهادي مسلمیار د سفر بندیز لګولی دی.

خو عبدالله عبدالله او فضل‌الهادي مسلمیار له افغانستانه بهر سفر کړی و.

مخکې له دې، د روان کال په غويي/ثور میاشت کې هم داسې راپورونه خپاره شول چې طالبانو متحده عرب اماراتو ته د پخواني ولسمشر حامدکرزي د سفر مخه نیولې ده.

پخواني ولسمشر حامد کرزي ته نږدې سرچینو رسنیو ته دا خبره تایید کړې وه.

ټاکل شوې وه چې هغه مهال کرزی د متحده عربي اماراتو د دولت د پخواني رییس خلیفه بن زاید النهيان په فاتحه کې د ګډون په موخه اماراتو ته سفر وکړي.

پخواني ولسمشر خپله هم د مارچ په نهمه له العالم تلوېزیون سره په یوه مرکه کې بهر ته د سفرونو د بندیز په تړاو راپورونه تایید کړي او ویلي و چې هیله ده دا ستونزې ژر هوارې شي.

د طالبانو حکومت ویاند ذبیح‌الله مجاهد متحده عربي اماراتو ته د کرزي د سفر د مخنیوي یا له هوايي ډګره د هغه د راګرځولو د پېښې په اړه د ازادي راډیو ته ویلي و: "داسې خبره به سمه نه‌وي چې له هوايي ډګر نه راګرځول شوی. ځکه هلته ما پوښتنه وکړه. میدان هوايي کې مسولینو له داسې کومې موضوع خبر نه‌درلود. په هر صورت په دې اړه تحقیقات روان دي چې هر کله معلومات دقیق شي تاسو سره به‌یې شریک کړو."

خو طالبانو تر اوسه په دې اړه جزییات شریک نه‌کړل.

امریکا: په کابل کې د پاکستان پر شارزدافیر شوی برید دې وڅېړل شي

په کابل کې د پاکستان سفارت

د افغانستان لپاره د امریکا د سفارت سرپرستې او شارزدافیرې کرن ډکر وایي، پر خپل ډیپلوماټیک همکار په کابل کې د پاکستان د سفارت پر شارزدافیر عبید نظاماني حملې په غوصه کړې ده.

ډکر نن په یوه ټویټ کې ویلي خوښه ده چې هغه روغ دی او ساتونکي ته یې په دې برید کې ټپي شوی، د عاجلې روغتیا هیله کوي.

مېرمن ډکر د دغې پېښې په اړه د بېړنۍ، بشپړې او رڼې څېړنې غوښتنه کړې ده.

د اروپایي ټولنې د بهرني سیاست او امنیتي پالیسو ویاندې نبیله مازارالي هم ویلي چې په کابل کې د پاکستان پر سفارت شوي برید وېرولې ده.

هغې په یوه ټویټ کې ویلي د دې خبر په اورېدو چې په دې برید کې څوک نه دي وژل شوي، ځان آرام احساسوي او ټپیانو ته د عاجلې روغتیا هیله کوي.

مازارالي ویلي، اروپایي ټولنه پر ډیپلوماټیکې ټولنې د بریدونو په ګډون ټول تروریستي بریدونه غندي.

د دغې حملې مسوولیت تراوسه چا یا کومې ډلې نه دی اخیستی.

امیري: طالبان د افغانانو منزوي کېدو او پرې د فضا تنګېدو ته دوام ورکوي

د افغانستان د ښځو او نجونو د بشري حقونو لپاره د امریکا ځانګړې استازې رینا امیري

د افغانستان د ښځو او نجونو د بشري حقونو لپاره د امریکا ځانګړې استازې رینا امیري وایي، عجیبه خبره دا ده چې طالبان له یوې خوا غوښتنه کوي چې نړۍ باید افغانستان منزوي نه کړي، خو په خپله معلوماتو او ازادو مطبوعاتو ته له لاسرسي څخه د منع کېدو په ګډون د افغانانو منزوي کېدو او پرې د فضا تنګېدو ته دوام ورکوي.

امیري پر خپله ټویټرپاڼه له دغو څرګندونو سره د امریکا د بهرنیو چارو د وزارت د ویاند نېډپرایس هغه ټویټ هم ضمیمه کړی چې د طالبانو له خوا د ازادي راډیو او د امریکا غږ آشنا راډیو پر نشراتو بندیز یې غندلی دی.

نېډپرایس ویلي چې متحده ایالات په پراخه کچه خپلواکو رسنیو ته د لاسرسي د حق ملاتړ کوي.

هغه ویلي، د طالبانو له خوا په افغانستان کې د امریکا غږ راډیو او ازادي راډیو د نشراتو بندول، د هغوی د ظالمانه اقداماتو په اوږده فهرست یو بل هم زیاتوي.

نېډپرایس زیاته کړې چې د افغانستان خلک د دې مستحق دي چې خپلواکو خبرونو ته لاسرسی ولري.

طالبانو د پنجشنبې په ورځ په افغانستان کې د ازادي راډیو او د امریکا غږ راډیو، د ایف ایم او اې ایم څپې بندې کړي چې دواړو راډیوګانو به ۲۴ ساعته پرې خپرونې کولې، خو د ازادي راډیو او د امریکا غږ راډیو خپرونې پر نورو ټولنیزو شبکو سربېره پر لنډو څپو دوام لري.

چارواکي: د زابل په شاجوی کې د نس ناستي ناروغي خپره شوې

ارشیف: د افغانستان په جنوب کې په نس ناستي ناروغۍ اخته کسان تر درملنې لاندې دي

د زابل په شاجوۍ ولسوالي کې د نس ناستي ناروغي خپره شوې ده.

د دغه ولایت د عامې روغتیا ريیس ډاکتر عبدالحکیم حکیمي ازادي راډیو ته وویل چې هغو سیمو ته چې دا ناروغي په کې خپره شوې، طبي ډلې استول شوي دي.

هغه وویل: "د برج په سیمه کې نژدې اتیا تنه په دې ناروغۍ اخته شوي وو چې سیمې ته د عامې روغتیا ځانګړي ټیمونه ورسېدل. هلته يې د ناروغانو درملنه کړې او د هغو مریضانو وضعیت چې ښه نه و روغتون ته انتقال شوي دي."

له بلې خوا نن سها ر په زابل ولایت کې په دوو ترافیکي پېښو کې ۹ تنه ټپیان شوي او یو مړ تن شوی دی.

د ځینو ټپیانو حال نازک ښودل شوی دی.

ټوماس وېسټ: افغانان خپلواکو رسنیو ته د لاسرسي اړتیا لري

د افغانستان لپاره د امریکا ځانګړی استازی ټوماس وېسټ

د افغانستان لپاره د امریکا ځانګړي استازي ټوماس وېسټ د طالبانو له خوا د ازادي راډیو او د امریکا غږ اشنا راډیو د نشراتو بندول وغندل.

نوموړي پرون په یوه ټوېټ کې وویل چې افغانان اړتیا لري چې خپلواکو رسنیو ته لاسرسی ولري.

د امریکا د بهرنیو چارو وزرات ویاند نېډپرایس هم په یوه ټوېټ کې ویلي چې متحده ایالات په پراخه کچه خپلواکو رسنیو ته د لاسرسي د حق ملاتړ کوي.

هغه ویلي، د طالبانو له خوا په افغانستان کې د امریکا غږ راډیو او ازادي راډیو د نشراتو بندول، د هغوی د ظالمانه اقداماتو په اوږده فهرست یو بل هم زیاتوي.

نېډپرایس زیاته کړې چې د افغانستان خلک د دې مستحق دي چې خپلواکو خبرونو ته لاسرسی ولري.

طالبانو د پنجشنبې په ورځ په افغانستان کې د ازادي راډیو او د امریکا غږ راډیو، د اېف اېم او اې اېم څپې بندې کړي چې دواړو راډیوګانو به ۲۴ ساعته پرې خپرونې کولي، خو زموږ او د امریکا غږ راډیو خپرونې پر نورو ټولنیزو شبکو سربېره پر لنډو څپو دوام لري.

تردې مخکې د طالبانو پر دې پرېکړې د رسنیو او خبریالانو د ملاتړ ادارو هم انتقاد کړی و او هغه یې خلکو ته د ازادو معلوماتو د رسېدو په لاره کې خنډ بللې.

یوناما او ترکیې په کابل کې د پاکستان پر سفارت پرونی برید وغانده

ارشیف

د افغانستان لپاره د ملګرو ملتونو مرستندویه ماموریت یا یوناما په کابل کې د پاکستان پر سفارت پرونی برید په کلکه وغانده.

یوناما په یوه ټوېټ کې د دغه برید ټپیانو ته د عاجلې روغتیا د هیلې ترڅنګ یوازې دومره ویلي چې ډیپلوماتیک ماموریتونه د نړیوالو قوانینو له مخې خوندي دي.

په افغانستان کې د ترکیې سفارت هم په یوه ټوېټ کې د پاکستان پر سفارت د برید په اړه ژوره خواشینې څرګنده کړې او هغه یې په کلکو ټکو غندلی دی.

په دغه برید کې چې مسوولیت یې تراوسه چا په غاړه نه دی اخیستی، د پاکستان د سفارت سرپرست او شارزدافیر ته زیان نه دی رسېدلی، خو د هغه یو پاکستانی ساتونکی سخت ټپي شوی دی.

د دایکندي پېښې په تړاو د بېړنۍ، بې پرې او رڼو څېړنو غوښتنه وشوه

د افغانستان د بشري حقونو لپاره د ملګرو ملتونو ځانګړی راپور ورکوونکی ریچارډ بینیټ

د افغانستان د بشري حقونو لپاره د ملګرو ملتونو ځانګړي راپور ورکوونکي ریچارډ بینیټ د هغو راپورونو په اړه چې وایي، طالبانو په دایکندي ولایت کې د دوو هزاره کورنیو یو شمېر غړي وژلي، د بېړنۍ، بې پرې او رڼو څېړنو غوښتنه وکړه.

ښاغلي بینیټ پرون په یوه ټوېټ کې وویل چې د نومبر په ۲۴ په دې پېښه کې په وژل شویو کې یوه ښځه او درې ماشومان هم شامل دي.

خو د طالبانو د کورنیو چارو وزارت ویاند عبدالنافع ټکور هغه مهال ویلي و چې وژل شوي کسان ټول وسله وال و چې له تسلیمېدو یې ډډه کوله.

هغه دا خبره رد کړه چې په دې پېښه کې دې ښځو او ماشومانو ته زیان رسېدلی وي.

طالبان: په خوست کې د یوې بې پیلوټه الوتکې د قاچاق په تور ۳ کسان نیول شوي

ارشیف

په افغانستان کې د طالبانو د حکومت د کورنیو چارو وزارت په خوست کې د یوې بې پیلوټه الوتکې د قاچاق په تور د درېیو کسانو د نیولو خبر ورکوي.

دې وزارت پرون په یوه ټوېټ کې ویلي چې د دې وزارت منسوبینو دغه درې تنه د دې ولایت په کونډیو سیمه کې د کشفي عملیاتو په ترڅ کې نیولي دي.

چارواکو ویلي دوی غوښتل چې یوه بې پیلوټه الوتکه چې د پخواني حکومت له یوه کانټینره یې ښکته کړې او له ځان سره ساتلې وه، یوه ګاونډي هېواد ته قاچاق کړي او پر دونیم لکه امریکایي ډالرو یې وپلوري.

د پخواني حکومت د وسله والو ځواکونو په لسګونو الوتکې د تېرکال په اګست کې پر افغانستان د طالبانو له واکمنېدو سره سم ګاونډیو هېوادونوته لېږدول شوي چې ډېرې یې تراوسه بېرته افغانستان ته نه دي ورګرځول شوي.

ملګري ملتونه: په دایکندي کې مو ۱۷۰۰ کسان پر کارونو ګومارلي

د افغانستان په عمومي نقشه کې د دایکندي ولایت موقعیت

د ملګرو ملتونو د کډوالو عالي کمېشنري وایي، په دایکندي ولایت کې یې ۱۷۰۰ کسان پر کارونو ګومارلي چې د کار په بدل کې به پیسې ورکوي.

دغې ادارې په یوه ټوېټ کې ویلي چې دغه کسان به د سړکونو د ترمیم او رغونې کارونه مخ ته وړي.

ملګرو ملتونو ویلي چې دایکندي ولایت چې سږکال سېلابونو ویجاړ کړی اوس دلته واوره شوې او د دغو کسانو ګومارنه به له دولس زره کورنیو سره مرسته وکړي چې له سخت او اوږده ژمي څخه روغ ووځي.

نور راوښيه

XS
SM
MD
LG