د لاسرسۍ وړ لېنکونه

تازه خبر
یکشنبه ۱۳ لیندۍ ۱۴۰۱ کابل ۱۰:۲۰

افغانستان

امريکايي پوليس: اروپا کې د خپلې مېرمنې په وژنه تورن افغان نيول شوی

د امريکا پوليس

د امریکا په پلازمېنه واشنګټن کې پولیسو ویلي، هغه افغان چې دغلته د خپلې مېرمنې په وژنه تورن دی، د اروپا دننه نیول شوی دی.

د واشنګټن د پولیسو یوه چارواکي مارک ګریګوري پرون خبریالانو ته وویل چې، له اروپا امریکا ته د دغه مشکوک افغان وحید کاشفي د استرداد هڅې روانې دي.

ګریګوري ویلي، دغه افغان ۲۰۱۹ کال کې د امریکا دننه خپله مېرمن وژلې وه او وروسته له دغه هېواده تښتېدلی و.

د پولیسو چارواکو ویلي، مشکوک قاتل د اکتوبر په نهه ویشتمه په اروپا کې د خپل هستوګن‌ځای دننه نیول شوی، خو دا نه‌دي ویل شوي چې د اروپا کوم ځای کې.

د ورځې تازه خبرونه دلته ولولئ

داعش په کابل کې د پاکستان پر شارژدافېر د حملې مسوولیت په غاړه واخیست

په کابل کې د پاکستان سفارت

د اسلامي دولت یا داعش د خراسان څانګې په کابل کې د پاکستان پر شارژدافېر د حملې مسوولیت په غاړه واخیست.

د جمعې په ورځ د کابل په پروان مېنه کې د پاکستان پر شارژدافیر عبیدالرحمان نظاماني په ډزو کې د هغه یو ساتونکی ټپي شو خو نظاماني روغ ووت.

داعش په هغه بیان کې، چې تېره شپه دې ډلې ته یوې نږدې رسنۍ په ټیلګرام کې خپور کړی، ویلي دا برید د دوی یوه غړي کړی دی.

د طالبانو حکومت، پاکستان او امریکا دا برید غندلی او طالبانو ویلي چې په دې تړاو یې یو تن نیولی دی.

ملګري ملتونه اړمنو افغانانو سره د خوراکي او نقدي مرستو لړۍ پراخوي

ارشیف: ارزګان کې د خوړو نړیوال پروګرام د مرستو رسولو یو انځور

د ملګرو ملتونو د خوړو نړیوال پروګرام وايي، په پام کې لري د ژمي پر مهال اړو کسانو ته د خوراکي او نقدي مرستو لړۍ پراخه کړي.

په افغانستان کې د ملګرو ملتونو د خوړو نړیوال پروګرام د ارتباطاتو افسر فیلیپ کروف ازادۍ راډیو ته وویل: "د خوړو نړیوال پروګرام په پام کې لري چې د ژمي پر مهال په ټول هېواد کې له پنځلسو ملیون کسانو سره هره میاشت د خوړو او نقدو پیسو مرسته وکړي، چې دوی خپله خواړه پرې رانیسي. د دې کار لپاره موږ سم د لاسه اضافي مالي مرستې ته اړتیا لرو. د خوړو نړیوال پروګرام د راروانو شپږو میاشتو لپاره یو اعشاریه څلور میلیارد امریکايي ډالرو ته اړتیا لري."

د خوړو نړیوال پروګرام وايي، په افغانستان کې شا و خوا ۲۰ ملیونه وګړي، چې د دغه هېواد د نفوسو نیمايي برخه کې کېږي کافي خواړه نه لري.

د طالبانو د دفاع سرپرست وزیر د یو پلاوي په مشرۍ اماراتو ته لاړ

مولوي محمد یعقوب مجاهد

د طالبانو سرچینې وايي، د دوی د دفاع د سرپرست وزیر مولوي محمد یعقوب مجاهد په مشرۍ یې یو هیئت پرون شنبه متحده عرب اماراتو ته لاړ.

د طالبانو دفاع وزارت وايي، دغه هیئت به یې په اماراتو کې هلته له ځايي مشرانو، مېشتو افغانانو او نورو شخصیتونو سره وګوري.

په همدې حال کې د افغانستان پخوانی ولسمشر حامد کرزی هم پرون له افغانستان په بهرني سفر لاړ او ځینو سرچینو ویلي چې ممکن ښاغلی کرزی لومړی په متحده عرب اماراتو کې تم شي.

اماراتو ته د اوسنیو او پخوانیو چارواکو سفر ځکه مهم ګڼل کېږي، چې د افغانستان مخکېنی ولسمشر محمد اشرف غني هم هلته دېره دی.

دا لا څرګنده نه ده چې د طالبانو دفاع وزیر به له ښاغلي کرزي یا هم غني سره په کتنو کې برخه واخلي که نه؟

امریکا د افغان معلولینو د دوامداره ملاتړ ډاډ ورکړ

افغان معلولین

د افغانستان لپاره د امریکا د متحدو ایالتونو سفارت وايي، د معلولو کسانو ملاتړ ته به دوام ورکړي.

دغه سفارت پرون د معلولو کسانو نړیوالې ورځې په مناسبت په یوه ټویټ کې ویلي دوی عامه پوهاوی، د یو بل درک کول او منل تشویقوي.

په دوام کې راغلي، دوی په کارځایونو، ښوونځیو او ټولنو کې د معلولو کسانو د ونډې منندوی دي.

د ملګرو ملتونو د بشري مرستو د همغږۍ اداره وايي، د افغانستان د وګړو ۱۵ سلنه یې معلول دي، چې شمېر یې څه باندې ۴ میلیونو ته رسېږي.

معلول کسان شکایت کوي، چې په ټولنه کې تر ډېره په درنه سترګه نه ورته کتل کېږي، کار نه ورکول کېږي او د حکومت له خوا یې هم لاسنیوی نه کېږي.

په ننګرهار کې چاودنه شوې

د جلال اباد ښار یوه څنډه

جلال اباد ښار کې چاودنې ۶ ولسي وګړي ټپیان کړي دي.

پېښه نن مازدیګر ناوخته د جلال اباد ښار د لومړۍ ناحیې اړوند درمسال ته څېرمه شوې ده.

په ننګرهار کې د طالبانو د امنیې قومندانۍ ویاند ویاند قاري عبدالبصیر زابلي رسنیو ته په استولي غږیز پیغام کې ویلي چې پېښه د یو دوکان مخته د ځای پر ځای شوي ماین له امله رامنځته شوې ده.

ویل کېږي چې یاد دوکان د یو سېک افغان و چې یوناني درمل په کې پلورل کېدل.

د دغه چاودنې مسوولیت چا نه دی منلی، خو له دې وړاندې په دې ولایت کې د ځینو چاودونو مسوولیت داعش وسله والې ډلې منلی وو.

پخواني افغان ولسمشر حامدکرزي له افغانستانه بهر سفر وکړ

د کرزي د حکومت د مهال د مالیې وزیر ډاکتر عمر زاخېلوال پر خپله ټویټرپاڼه له کرزي سره خپل عکس، چې دواړه په الوتکه کې سپاره دي، خپور کړی

د افغانستان پخوانی ولسمشر حامدکرزی له افغانستانه ووت.

د افغانستان د نجات حرکت مشر ډاکتر عمر زاخېلوال پر خپله فېسبوک پاڼه له الوتکې د کرزي او خپل د عکس په خپرولو سره له افغانستانه بهر د ګډ سفر یادونه کړې ده.

زاخېلوال په دې اړه چې دوی کوم هېواد ته سفر کړی، جزئیات نه‌دي ورکړي، خو هیله‌یې ښودلې چې افغانستان بېرته ستانه شي.

پر افغانستان د طالبانو له بیا واکمنۍ وروسته د لومړی ځل دی چې حامدکرزی له افغانستانه بهر سفر کوي.

په ځلونو داسې راپورونو خپاره شوي و چې طالبانو پر پخواني ولسمشر حامدکرزي، د ملي مصالحې عالي شورا مخکېني مشر عبدالله عبدالله او مشرانو جرګې مخکېني مشر فضل‌الهادي مسلمیار د سفر بندیز لګولی دی.

خو عبدالله عبدالله او فضل‌الهادي مسلمیار له افغانستانه بهر سفر کړی و.

مخکې له دې، د روان کال په غويي/ثور میاشت کې هم داسې راپورونه خپاره شول چې طالبانو متحده عرب اماراتو ته د پخواني ولسمشر حامدکرزي د سفر مخه نیولې ده.

پخواني ولسمشر حامد کرزي ته نږدې سرچینو رسنیو ته دا خبره تایید کړې وه.

ټاکل شوې وه چې هغه مهال کرزی د متحده عربي اماراتو د دولت د پخواني رییس خلیفه بن زاید النهيان په فاتحه کې د ګډون په موخه اماراتو ته سفر وکړي.

پخواني ولسمشر خپله هم د مارچ په نهمه له العالم تلوېزیون سره په یوه مرکه کې بهر ته د سفرونو د بندیز په تړاو راپورونه تایید کړي او ویلي و چې هیله ده دا ستونزې ژر هوارې شي.

د طالبانو حکومت ویاند ذبیح‌الله مجاهد متحده عربي اماراتو ته د کرزي د سفر د مخنیوي یا له هوايي ډګره د هغه د راګرځولو د پېښې په اړه د ازادي راډیو ته ویلي و: "داسې خبره به سمه نه‌وي چې له هوايي ډګر نه راګرځول شوی. ځکه هلته ما پوښتنه وکړه. میدان هوايي کې مسولینو له داسې کومې موضوع خبر نه‌درلود. په هر صورت په دې اړه تحقیقات روان دي چې هر کله معلومات دقیق شي تاسو سره به‌یې شریک کړو."

خو طالبانو تر اوسه په دې اړه جزییات شریک نه‌کړل.

امریکا: په کابل کې د پاکستان پر شارزدافیر شوی برید دې وڅېړل شي

په کابل کې د پاکستان سفارت

د افغانستان لپاره د امریکا د سفارت سرپرستې او شارزدافیرې کرن ډکر وایي، پر خپل ډیپلوماټیک همکار په کابل کې د پاکستان د سفارت پر شارزدافیر عبید نظاماني حملې په غوصه کړې ده.

ډکر نن په یوه ټویټ کې ویلي خوښه ده چې هغه روغ دی او ساتونکي ته یې په دې برید کې ټپي شوی، د عاجلې روغتیا هیله کوي.

مېرمن ډکر د دغې پېښې په اړه د بېړنۍ، بشپړې او رڼې څېړنې غوښتنه کړې ده.

د اروپایي ټولنې د بهرني سیاست او امنیتي پالیسو ویاندې نبیله مازارالي هم ویلي چې په کابل کې د پاکستان پر سفارت شوي برید وېرولې ده.

هغې په یوه ټویټ کې ویلي د دې خبر په اورېدو چې په دې برید کې څوک نه دي وژل شوي، ځان آرام احساسوي او ټپیانو ته د عاجلې روغتیا هیله کوي.

مازارالي ویلي، اروپایي ټولنه پر ډیپلوماټیکې ټولنې د بریدونو په ګډون ټول تروریستي بریدونه غندي.

د دغې حملې مسوولیت تراوسه چا یا کومې ډلې نه دی اخیستی.

امیري: طالبان د افغانانو منزوي کېدو او پرې د فضا تنګېدو ته دوام ورکوي

د افغانستان د ښځو او نجونو د بشري حقونو لپاره د امریکا ځانګړې استازې رینا امیري

د افغانستان د ښځو او نجونو د بشري حقونو لپاره د امریکا ځانګړې استازې رینا امیري وایي، عجیبه خبره دا ده چې طالبان له یوې خوا غوښتنه کوي چې نړۍ باید افغانستان منزوي نه کړي، خو په خپله معلوماتو او ازادو مطبوعاتو ته له لاسرسي څخه د منع کېدو په ګډون د افغانانو منزوي کېدو او پرې د فضا تنګېدو ته دوام ورکوي.

امیري پر خپله ټویټرپاڼه له دغو څرګندونو سره د امریکا د بهرنیو چارو د وزارت د ویاند نېډپرایس هغه ټویټ هم ضمیمه کړی چې د طالبانو له خوا د ازادي راډیو او د امریکا غږ آشنا راډیو پر نشراتو بندیز یې غندلی دی.

نېډپرایس ویلي چې متحده ایالات په پراخه کچه خپلواکو رسنیو ته د لاسرسي د حق ملاتړ کوي.

هغه ویلي، د طالبانو له خوا په افغانستان کې د امریکا غږ راډیو او ازادي راډیو د نشراتو بندول، د هغوی د ظالمانه اقداماتو په اوږده فهرست یو بل هم زیاتوي.

نېډپرایس زیاته کړې چې د افغانستان خلک د دې مستحق دي چې خپلواکو خبرونو ته لاسرسی ولري.

طالبانو د پنجشنبې په ورځ په افغانستان کې د ازادي راډیو او د امریکا غږ راډیو، د ایف ایم او اې ایم څپې بندې کړي چې دواړو راډیوګانو به ۲۴ ساعته پرې خپرونې کولې، خو د ازادي راډیو او د امریکا غږ راډیو خپرونې پر نورو ټولنیزو شبکو سربېره پر لنډو څپو دوام لري.

چارواکي: د زابل په شاجوی کې د نس ناستي ناروغي خپره شوې

ارشیف: د افغانستان په جنوب کې په نس ناستي ناروغۍ اخته کسان تر درملنې لاندې دي

د زابل په شاجوۍ ولسوالي کې د نس ناستي ناروغي خپره شوې ده.

د دغه ولایت د عامې روغتیا ريیس ډاکتر عبدالحکیم حکیمي ازادي راډیو ته وویل چې هغو سیمو ته چې دا ناروغي په کې خپره شوې، طبي ډلې استول شوي دي.

هغه وویل: "د برج په سیمه کې نژدې اتیا تنه په دې ناروغۍ اخته شوي وو چې سیمې ته د عامې روغتیا ځانګړي ټیمونه ورسېدل. هلته يې د ناروغانو درملنه کړې او د هغو مریضانو وضعیت چې ښه نه و روغتون ته انتقال شوي دي."

له بلې خوا نن سها ر په زابل ولایت کې په دوو ترافیکي پېښو کې ۹ تنه ټپیان شوي او یو مړ تن شوی دی.

د ځینو ټپیانو حال نازک ښودل شوی دی.

ټوماس وېسټ: افغانان خپلواکو رسنیو ته د لاسرسي اړتیا لري

د افغانستان لپاره د امریکا ځانګړی استازی ټوماس وېسټ

د افغانستان لپاره د امریکا ځانګړي استازي ټوماس وېسټ د طالبانو له خوا د ازادي راډیو او د امریکا غږ اشنا راډیو د نشراتو بندول وغندل.

نوموړي پرون په یوه ټوېټ کې وویل چې افغانان اړتیا لري چې خپلواکو رسنیو ته لاسرسی ولري.

د امریکا د بهرنیو چارو وزرات ویاند نېډپرایس هم په یوه ټوېټ کې ویلي چې متحده ایالات په پراخه کچه خپلواکو رسنیو ته د لاسرسي د حق ملاتړ کوي.

هغه ویلي، د طالبانو له خوا په افغانستان کې د امریکا غږ راډیو او ازادي راډیو د نشراتو بندول، د هغوی د ظالمانه اقداماتو په اوږده فهرست یو بل هم زیاتوي.

نېډپرایس زیاته کړې چې د افغانستان خلک د دې مستحق دي چې خپلواکو خبرونو ته لاسرسی ولري.

طالبانو د پنجشنبې په ورځ په افغانستان کې د ازادي راډیو او د امریکا غږ راډیو، د اېف اېم او اې اېم څپې بندې کړي چې دواړو راډیوګانو به ۲۴ ساعته پرې خپرونې کولي، خو زموږ او د امریکا غږ راډیو خپرونې پر نورو ټولنیزو شبکو سربېره پر لنډو څپو دوام لري.

تردې مخکې د طالبانو پر دې پرېکړې د رسنیو او خبریالانو د ملاتړ ادارو هم انتقاد کړی و او هغه یې خلکو ته د ازادو معلوماتو د رسېدو په لاره کې خنډ بللې.

نور راوښيه

XS
SM
MD
LG