ځينې سرچينې وايي چې، طالبانو نن سه‌شنبه (د عقرب په لومړۍ نېټه) د کابل په ځينو برخو کې کور په کور تالاشي پيل کړه.

د خيرخانې سيمې يوه اوسېدونکي چې د امنيتي دلايلو له امله يې نه‌غوښتل نوم يې خپور شي ازادي راډيو ته وويل، د خيرخانې او ۳۱۵ په سيمو کې د طالبانو له لوري کورونه پلټل شوي دي.

ځینو کورنیو رسنیو هم په‌دې اړه خبر ورکړی دی؛ خو طالبانو تر اوسه څه نه‌دي ویلي.

طالبانو تر دې وړاندې هم په کابل ښار او یوشمېر ولایتونو کې کور په کور تالاشي کړې وه.

دا ځل کابل کې کور په کور تالاشي، وروسته له هغې کېږي، چې لږ تر لږه د شنبې په شپه دوه راکټونه د کابل هوايي ډګر پر لور وتوغول شول.

د افغانستان د ازادۍ جبهې په نوم د طالبانو مخالفې ډلې، د دغه برید مسوولیت منلی او ادعا کوي، چې طالبانو ته یې درانه ځاني او مالي زیانونه اړولي دي.

دغې جبهې ادعا کړې، چې لومړی د کابل هوايي ډګر پر پوځي برخې برید د څو راکټونو په ویشتلو سره پیل شو او بیا د دغې جبهې د ښاري ډلې نفوذي برخې برید وکړ.

د طالبانو یوې سرچینې ازادي راډيو ته د کابل پر هوايي ډګر د راکټي برید پخلی کړی، خو طالبانو د افغانستان د ازادۍ جبهې د ادعا په اړه څه نه‌دي ویلي.

د افغانستان د ازادۍ جبهې نن ماښام په ايکس‌پاڼه (پخواني ټویټر) کې ليکلي، کور په کور تالاشي، د دې جبهې له‌خوا دوه شپې وړاندې بريد پورې اړوند ده او دا ادعا يې هم کړې چې د کابل په قلاچې سيمه کې د طالبانو د استخباراتو پر موټر يې بريد کې د هغوی دوه غړي وژلي او دوه نور ټپيان شوي دي.

ازادي راډیو په خپلواکه توګه دا ادعاوې نه‌شي تاییدولی.

د افغانستان کرکټ بورډ اداې نن په یوه خبر کې د بنګله‌دېش پر وړاندې درې یو ورځنیو سیالیو ته افغان لوبډله اعلان کړه.

کرکټ بورډ ویلي دي چې، دغه درې یو ورځنۍ سیالۍ به د راتلونکې نومبر میاشتې په ۶مه نېټه پیل او تر ۱۱مې نیټې به دوام لري.

یادې ادارې دا هم ویلي دي چې، ابراهیم ځدراڼ او مجیب‌الرحمن د خپلو ټپونو له امله لا هم د لوبې جوګه نه‌‌دي، نو ځکه یې نه‌دي غوره کړي.

دوه نور افغان لوبغاړي صدیق اتل او نوراحمد چې د سویلي افریقا پر وړاندې لوبلړۍ کې نه و، دې سیالیو ته رابلل شوي دي.

په اعلان شوې لوبډله کې حشمت‌الله شهیدي لوبډلمشر، رحمت‌شاه زرمتی مرستیال لوبډلمشر، رحمن‌الله ګربز او اکرام علي‌خېل وېکټ ساتونکي، عبدالمالک، ریاض حسن، صدیق‌الله اتل، دروېش رسولي، عظمت‌الله عمرزی، محمد‌نبي، ګلبدین نایب، راشد خان، ننګیال خروټی، الله محمد غضنفر، نور احمد، بلال سمیع، فضل‌الحق فاروقي، نوید ځدراڼ او فرید احمد ملک شامل دي.

د ویلو ده چې د بنګله‌‌دېش پر وړاندې لومړۍ لوبه به د نومبر په ۶مه، دویمه د نومبر په ۹مه او وروستۍ د همدې میاشتې په ۱۱مه نېټه د عربي متحده اماراتو د شارجې په لوبغالي کې وي.

د اسیا ایمرجینګ جام په ګروپي پړاو کې افغان ابدالیانو خپله وروستۍ لوبه د ۵ وېکټو په توپیر د هانګ کانګ ملي لوبډلې ته وبایلله.

دغه سیالي چې د عمان په کوربه‌توب د کابل پر وخت ماسپښین ۱:۳۰بجه پیل شوې وه افغان لوبډلمشر د پچې تر ګټلو وروسته توپوهنه غوره کړه.

افغان لوبډلې د ټولو لوبغاړو تر سوځېدو وروسته په ۱۹.۵ اورونو کې ۱۳۱ منډې وکړې.

په‌دې سیالۍ کې هم د افغان توپوهونکو له ډلې صدیق‌الله اتل مخکښ و، هغه ۵۲ منډې وکړې.

دغه راز کریم جنت ۲۱ او نعمان شاه ۲۰ منډې جوړې کړې.

د هانګ کانګ په توپ اچونکو کې بیا انس خان ښه وځلېد چې ۶ افغان لوبغاړي یې وسوځول او د دې لوبې د غوره لوبغاړي جایزه یې هم وګټله.

یادې لوبډلې ورکړل شوی هدف د وروستي اور په درېیم توپ د ۵ لوبغاړو تر سوځېدو وروسته پوره کړ او په‌‌دې سره یې د ایمرجینګ په روان جام کې خپله لومړۍ بریا ثبت کړه.

د هانګ کانګ لوبډلمشر نزاکت خان ۶۱ او بابر حیات بیا ۳۹ منډې وکړې.

په افغان توپ اچونکو کې عبدالرحمن رحماني ۳ او قیس احمد دوه لوبغاړي وسوځول.

د افغانستان الف لوبډلې په ګروپي پړاو کې د سریلانکا او بنګله‌‌دېش الف لوبډلې ماتې کړې دي او له وړاندې نیمه پایلوبې ته رسېدلي دي.

د روان جام د ګروپي پړاو وروستۍ سیالۍ به سبا چهارشنبه د اکټوبر په ۲۳مه نېټه پای ته ورسېږي او له هغې وروسته به څرګنده شي چې د اکټوبر په ۲۵مه نېټه افغان لوبډله له هندوستان او یا هم پاکستان سره نیمه پایلوبه لوبوي.

د ویلو ده چې د اسیا ایمریجنګ جام پایلوبه به د اکټوبر په ۲۷مه نېټه وي.

د افغانستان د والیبال ملي لوبډلې له خپل سیالې تاجکستانۍ لوبډلې نه درې پر دوه ماتې وخوړه.

د منځنۍ اسیا د والیبال د سیالیو په دوام کې چې د ازبکستان په پلازمېنه تاشکند کې ترسره کېږي، د افغانستان د والیبال ملي لوبډله په خپله څلورمه سیالۍ کې نن سه‌شنبه د عقرب په لومړۍ نېټه د تاجکستان د والیبال له ملي لوبډلې سره په میدان کې لوبه وکړه.

تاجکستان دغه لوبه د درې پر دوه په توپیر سره وګټله.

دغه سيالۍ د ازبکستان د تاشکند په ښار کې د منځنۍ اسيا د شپږو ټيمونو په ګډون د زمري د مياشتې په ٢٧مه پيل شوې دي او د پنج‌شنبې په ورځ د سلواغې په درېيمه به پاى ته ورسېږي.

د طالبانو د حکومت د احصایې او اطلاعاتو اداره وايي، سږ کال په افغانستان کې د غنمو حاصلات زیات شوي دي.

دې اداري په یوې خبرپاڼې کې چې نن یې خپره کړې ویلي، د غنمو په حاصلاتو کې یې د زیاتوالي په اړه دا معلومات د ریموټ سینسینګ یا له لرې د معلوماتو د راټولولو د ټیکنالوژۍ او سټلایت د عکسونو په وسيله راټول کړي.

په خبرپاڼه کې همداراز ویل شوي، سږ کال په ټول هېواد کې ۴.۸۳ میلیونه مټریک ټنه غنم تولید شوي او دا اندازه د تېر کال پرتله د غنمو په حاصلاتو کې لس سلنه زیاتوالی ښيي.

پر وخت ورښتونه او په ځینو ځایونو کې د کوکنارو پر ځای د غنمو کر، د غنمو په حاصل کې د دې زیاتوالی سبب ښودل شوی.

د همدې ادارې په وینا د غنمو په حاصلاتو کې د دې زیاتوالي سربېره سږ کال لا هم افغانستان شاوخوا د دوه میليونه میټریک ټنه غنمو واردولو ته اړتیا لري.

په همدې حال کې WFP یا د خوړو نړیوال پروګرام وايي، په ۲۰۲۴ کال کې په افغانستان کې څه کم ۲۴ میلیونه وګړي عاجلو بشري مرستو ته اړتیا لري.

د دغه سازمان د معلوماتو له‌مخې دا مهال د درې میليونو څخه د زیاتو ماشومانو په ګډون ۴ میلیونه افغانان له خوارځواکۍ سره مخ دي.

د اسیا ایمرجینګ جام په ګروپي پړاو کې نن سه‌شنبه د اکټوبر په ۲۲مه نېټه د افغانستان الف لوبډلې د هانګ کانګ له ملي لوبډلې سره سیالي پیل کړې ده.

دغه سیالي چې د عمان په کوربه‌توب د افغانستان په وخت ماسپښین ۱:۳۰بجه پیل شوې ده، افغان لوبډلې د پچې تر ګټلو وروسته توپوهنه غوره کړه.

افغان لوبډلې ونه کړای شول چې پوره شل اورونه ولوبوي، ټوله لوبډلې یې په ۱۹.۵ اورونو کې وسوځېده او ۱۳۱ منډې یې وکړې.

په نننۍ سیالۍ کې د افغان توپوهونکو له ډلې یو وار بیا صدیق اتل نیمه سلیزه ووهله او ۵۲ منډې یې وکړې.

په نورو توپوهونکو کې کریم جنت ۲۱ او نعمان شاه ۲۰ منډې وکړې.

د هانګ کانګ لپاره په توپ اچونه کې کیڼ لاسي ورو توپ اچونکي انس خان ښه وځلېد، چې په ۳.۵ اورونو کې یې ۱۲ منډې ورکړې او ۶ لوبغاړي یې وسوځول.

افغان لوبډله له وړاندې نیمه پایلوبې ته رسېدلې ده، خو تر دې لوبې وروسته به څرګنده شي چې په اول یا هم دویم مقام کې پاتې کېږي.

د سمنګان-بغلان پر لویه لاره په یوه ترافیکي پېښه کې د يو تن د مړينې او شپږ نورو د ټپي کېدو خبر ورکړل شوی دی.

د سمنګان د امنیې قوماندانۍ ویاند حشمت الله رحماني کورنیو رسنیو ته ویلي، د دوشنبې ماسپښین د سمنګان په رباطک سیمه کې یو فورتینر ډوله موټر چپه شو چې په کې يو ماشوم ساه ورکړې او د ښځو او ماشومانو په شمول شپږ کسان نور په کې ټپيان شوي دي.

نوموړي زیاته کړه چې ټپیان د سمنګان ولایتي روغتون ته لېږدول شوي دي.

د سړکونو خرابوالی، د ترافیکي اصولو نه رعایت او د چلوونکو بې‌احتیاطي په افغانستان کې د زیاتو ترافیکي پېښو لوی لاملونه ګڼل کېږي.

په هرات کې د طالبانو چارواکي په طبعیت کې د ۳۰ بېلابېلو وحشي مرغانو د خوشې کولو خبر ورکوي.

د طالبانو تر کنټرول لاندې باختر دولتي خبري اژانس د چاپېريال ساتنې د رياست د مسوولانو په حواله خبر ورکړی چې دغه مرغان د چاپېريال ساتنې د سرغړوونکو له‌خوا د سپين ادې او د مرغانو پلورونکو له بازار څخه راټول شوي وو.

په خبر کې د دغو طالب چارواکو په حواله راغلي چې دوی په جدي توګه د وحشي ژوو د ښکار، انتقال، قاچاق، پېر او پلور مخه نیسي.

د باختر اژانس د خبر له مخې، د کشک رباط سنګي ولسوالۍ امنيه قوماندانۍ هم په دغې ولسوالۍ کې د وحشي حيواناتو د ښکار په تور درې کسان نيولي او عدلي او قضايي ارګانونو ته يې سپارلي دي.

د افغانستان د خپلو وحشي مرغانو سربېره، دا هېواد د نایابه مرغانو د موسمي مهاجرت په مسیر کې هم دی چې هر کال د هند بحر څخه سایبریا ته او برعکس عکس یې مهاجرت کوي.

نن سه شنبه، سبا او بل سبا د افغانستان په ۱۴ ولایتونو کې د شدیدو ورښتونو او سېلابونو اټکل شوی دی.

د طالبانو د حکومت تر کنټرول لاندې باختر خبري اژانس د افغانستان د هوا پېژندې ادارې او نړیوالو بنسټونو په حواله راپور ورکړی چې د بدخشان، تخار، بغلان، بامیان، سمنګان، بلخ، سرپل، پنجشېر، غوربند، کونړ، لغمان، ننګرهار، کابل، لوګر او یو شمېر اړوندو سیمو کې د بارانونو او د واورو د ورښت له امله د سیندونو د اوبو د کچې د لوړېدو او د سېلابونو د راوتلو او اټکل شوی دی.

دا په داسې حال کې ده چې په دې وروستیو کې په یو شمېر ولایتونو کې له دې ډلې ننګرهار او کونړ کې شدیدو ورښتونو او سېلابونو خلکو ته مالي او ځاني زیانونه وراړولي دي.

د ۱۷ کلنو ځوانانو د فوټبال اسیايي سیالیو د لارموندنې په پړاو کې افغانستان د فیلیپین لوبډلې ته ۸ د صفر پر وړاندې ماتې ورکړه.

دغه سیالي د دوشنبې په ورځ د اکټوبر په ۲۱مه نېټه د کمبودیا په کوربتوب ترسره شوه.

د فوټبال اسیايي سیالیو د لارموندنې په پړاو کې افغانستان په سربېره، له کمبودیا، بنګله دېش او ماکایو سره هم سیالۍ لري.

د فیلیپين پر وړاندې لوبه کې د افغانستان ۱۷ کلنو ځوانانو لپاره وارث شېرزي او ارش احمدي دوه ـ دوه او نوید محبوبي، یاسر ساپي، جواد ابراهیمي او ساحل سروري یو ـ یو ګول وواهه.

د افغانستان دوهمه سیالي به د راتلونکې چهارشنبې په ورځ د اکټوبر په ۲۳مه نېټه د ماکایو پر وړاندې وي.

د ویلو ده چې د فوټبال اسيايي سیالیو د لارموندنې پړاو د ۴۳ هېوادونو ترمنځ پيل شوي جې په لسو بېلابېلو ګروپونو کې سره سیالۍ کوي.