د افغانستان د خبریالانو مرکز له افغانستان انټرنشنل راډیو ټلویزیون سره د کار او همکارۍ منع کول، د رسنیو د قانون خلاف کار بللی دی.

دغه بنسټ نن په یوه اعلامیه کې د طالبانو د اطلاعاتو او کلتور وزارت د رسنیو د شکایتونو او سرغړونو کمیسیون تازه پرېکړه چې له مخې یې له افغانستان انټرنشنل سره هر ډول همکاري منع شوې، د قانون خلاف عمل بللی دی.

د رسنیو د شکایتونو او سرغړونو کمیسیون پرون چهارشنبه د دې رسنۍ په اړه دا پرېکړه اعلان کړه.

دغه کمیسیون په یوه اعلاميه کې "افغانستان انټرنشنل" رسنۍ په شخصیت وژنې، د شخصي حريم په تېري، د معلوماتو په تحریف او قومي او ژبني تعصبونو ته په لمن وهلو تورنه شوې ده.

د افغانستان د خبریالانو مرکز وايي د کمیسیون دا اعلامیه د فشار او سیاسي انګېزو ښکارندويي کوي.

په تېرو څه کم درېیو کلونو کې پر افغانستان د طالبانو د ولکې له بیا ټینګولو وروسته پر رسنیو ډول- ډول محدودیتونه لګول شوي او ګڼې رسنۍ تړل شوې هم دي.

پر افغانستان د طالبانو له بیاواکمنېدو وروسته افغانستان انټرنشنل راډیو ټلویزیون په ۱۴۰۰ لمریز کال په برېتانیا کې خپلې خپرونې پیل کړې.

د طالبانو د ټرانسپورټ او هوايي چلن وزارت وايي پرون د کابل له نړیوال هوايي ډګره د افغان حاجیانو لومړۍ جوپه چې ۲۳۰ کسان کېدل، د سعودي عربستان مدینې ښار ته روانه شوه.

باختر خبري اژانس چې د طالبانو په کنټرول کې دی، نن هم د حج په نیت د مزار شریف له هوايي ډګره، سعودي عربستان ته د ۳۶۰ کسانو د روانېدو خبر ورکړی دی.

د طالبانو د حج او اوقافو وزارت د معلوماتو له مخې، سږکال د افغان حاجیانو ونډه شا و خوا ۳۰زره ده.

د افغانستان د هوا پېژندنې ادارې سبا او بل سبا د افغانستان په ۲۲ ولایتونو کې د تېز باران، تالندې برېښنا، نسبتاً تېزو بادونو او سېلابونو اټکل کړی دی.

دغې ادارې په یوه اطلاعیه کې لیکلي چې د سالنګونو په ګډون په بدخشان، تخار، کندوز، بلخ، جوزجان، سرپل، فاریاب، سمنګان، بغلان، پنجشېر، نورستان، کونړ، لغمان، ننګرهار، پروان، کاپیسا، کابل، میدان وردګ، لوګر، پکتیا، خوست او بامیان کې له ۱۵ څخه تر ۴۵ ملي مترو پورې د اورښتونو اټکل شوی دی.

په وروستیو اوونیو کې د افغانستان په ګڼو ولایتونو کې اورښتونو او سېلابونو خلکو ته د سر او مال زیانونه اړولي دي.

د طالبانو د حکومت د بهرنیو چارو وزارت په متحده عربي اماراتو کې د ۴۲ افغان بندیانو د خوشې کېدو خبر ورکوي.

د دې وزارت مرستیال ویاند حافظ ضیا احمد نن پنجشنبې په خپله ایکس پاڼه کې لیکلي چې په متحده عربي اماراتو کې د افغانستان د سفارت د پرله پسې هڅو په نتیجه کې د دې هېواد په بېلابېلو زندانونو کې د ۴۲ افغان بندیانو د خوشې کیدو پریکړه وشوه.

د هغه په خبره، دغه بندیان د اماراتو د حکومت د مشرتابه د عفوې له فرمان څخه برخمن شول چې یو تعداد یې آزاد او پاتې نور به یې په نېژدې راتلونکې کې آزاد شي.

هغه نه دي ویلي چې دغه افغانان د کومو جرمونو په خاطرپه هغه هېواد کې بندیان شوي او څه شمېریې تراوسه آزاد شوي دي، خو زیاتوي چې حکومت یې دې ته ژمن دی چې د نړۍ په هر ګوټ کې به د خپلو وګړو د ستونزو د هواري لپاره کوټلي ګامونه پورته کوي.

د کډوالو نړیوال سازمان، IOM وایي، افغانستان لا هم په نړۍ کې تر ټولو ناوړه بشري بحران ځپلی هېواد دی چې د اټکل له مخې له نیمایي زیات نفوس یعنې ۲۳،۷ ملیونه وګړي یې بشري مرستو ته اړتیا لري.

دغه سازمان " په ۲۰۲۴ کال کې د افغانستان بحران ته د ځواب ویلو پلان" کې چې وېب ریلییف وېبپاڼې نن خپورشوی، دغه راز ویلي چې افغانستان داسې مهال له ننګونو سره مخ دی چې د دې هیواد د نفوس چټک زیاتوالي، په لوړه کچه د خلکو بې ځایه کېدو، ښاري سیمو کې مېشتیدو او د سرچینو کموالي د خدمتونو اړتیاوې زیاتې کړې دي.

دا سازمان اټکل کوي چې په روان ۲۰۲۴ م کال کې به د افغانستان نفوس ۴۴،۵ ملیون تنو ته ورسیږي چې پنځه کاله مخکې ۳۶،۸ میلیونه و.

د IOM په وینا، د افغانستان د نفوس ۵۲ سلنه یې تر ۱۸ کلونو کم عمره تشکیلوي چې دا په نړۍ کې د ځوانانو له پلوه د یوه هېواد تر ټولو زیات نفوس دی.

د کډوالو نړیوال سازمان همدارنګه ویلي چې په افغانستان کې د ننه پر پخوانیو بې ځایه شویو سربیره، سږکال به له ۹۰۰ زره زیات کسان په دې هېواد کې له خپلو سیمو بې ځایه شي.

د اسلامي دولت ډلې (داعش) خراسان څانګې د بدخشان په مرکز فیض اباد کې د طالبانو د موټرو پر کاروان د پرونۍ چاودنې مسوولیت په غاړه اخیستی.

دغې ډلې تېره شپه په خپل ټیلیګرام چینل کې یوه علامیه خپره کړه او لیکلي یې دي چې د طالبانو د ځواکونو د هدف ګرځولو لپاره یې چاودیدونکي مواد په یوه موټرسایکل کې ځای پر ځای کړي وو.

تر دې مخکې په بدخشان کې د طالبانو امنيې قوماندانۍ ويلي وو چې د فيض اباد ښار د جوزګون په سيمه کې د چهارشنبې په ورځ غرمه مهال د ماين په چاودنه کې درې طالبان وژل شوي او پنځه نور ټپيان دي.

خو په بدخشان کې محلي سرچینو ازادي راډيو ته وویل چې په دې پېښه کې اووه کسان وژل شوي او څوارلس نور ټپیان دي.

دغه چاودنه د طالبانو د موټرو هغه کاروان په نښه کړ چې د کوکنارو د پاکولو لپاره روان وو.

وروسته له هغه چې طالبان د ۲۰۲۱ کال په اګست کې واک ته ورسېدل، داعش ډلې څو وژونکو بریدونو مسوولیت منلی دی.

د افغانستان د خبریالانو مرکز د طالبانو له بنده په هرات کې د صلح ټلویزیون د مسوول مدیر رامین امیري د خوشې کېدو خبر ورکوي.

هغه ۴۸ ورځې له طالبانو سره بندي و. دې مرکز چې له افغانستانه بهرفعالیت کوي، پرون چهارشنبې په یوه بیان کې وویل چې ښاغلی امیري په یوه مالي قضیه کې د طالبانو د استخباراتو د ادارې له خوا نیول شوی و او د ضمانت په بدل کې آزاد شو.

د طالبانو د استخباراتو د ریاست د رسنیو د برخې مسوول جواد امین پرون چهارشنبې په هرات کې د امیري آزادیدل تایید کړل خو پر هغه د لګول شوي تور د قضیې په اړه یې نورجزیات ورنکړل.

د افغانستان د خبریالانو مرکز د ښاغلي امیري د خوشې کیدو د هرکلي ترڅنګ، د هغه نیول او د اوږدې مودې لپاره یې په بند کې ساتل پرته له دې قانوني مراحلو ته پام وشي، د افغانستان د رسنیو د قانون خلاف وبلل.

په تېرو نژدې درېیو کلونو کې چې طالبان بیا پرافغانستان واکمنان شوي، د دوی له خوا یو شمېر خبریالان نیول شوي چې له څومیاشتو بند تېرولو وروسته په ضمانت خوشې شوي دي.

د حال وش په نوم یوه رسنۍ چې د ایران د سیستان او بلوچستان له وضعیت څخه راپورونه برابروي، د افغانستان د یوه تبعه د اعدامیدو خبر ورکوي.

دغې رسنۍ اعدام شوی کس خان محمد اسحق زی، د فراه ولایت د لاش جوین ولسوالۍ اوسیدونکی یاد کړی او ویلي یې دي چې هغه د مخدره موادو په تړاو پرون چهارشنبې د ورځې ناوخته د کرمان په زندان کې له مخکینۍ خبرتیا او له کورنۍ سره یې د وروستۍ لیدنې پرته اعدام شو.

حال وش د ځینو سرچینو له قوله ویلي چې ۴۰ کلن اسحق زی په ۲۰۲۰ کال کې د مخدره موادو په تړاو نیول شوی او د ایران د سمنان ښار د انقلابي محکمې له خوا په اعدام محکوم شوی و.

ویل کیږي هغه متاهل او د پنځو اولادونو پلار و.

د روانې ثور میاشتې په لومړیو کې د هه‌نگاو په نوم د ایران د بشري حقونو یو بنسټ وویل چې د روان ۲۰۲۴م کال له پیله د ایران په زندانونو کې د اعدام شویو افغان وګړو شمېر ۱۴ ته ورسېد.

ایران په نړۍ کې د اعدامونو د شمېرو له پلوه لوړځای لري چې تل پرې د بشري حقونو ډلو سخت انتقادونه کړي دي.

د طالبانو د حکومت د ټرانسپورټ او هوایي چلند وزارت د هواپېژندنې ریاست نن پنجشنبې د افغانستان په ۷ ولایتونو کې د ورښت، چټکو بادونو او سېلابونو اټکل کړی دی.

دې وزارت په یوه خبرپاڼه کې هرات، بادغیس، فاریاب، سرپل، غور، سمنګان او بغلان له خطرسره مخ ولایتونه یاد کړي او ویلي یې دي چې په ځینو سیمو کې به د ورښت کچه له ۱۵ تر ۲۵ ملي مترو پورې وي او په یو شمېر ولایتونو کې به د چټکو بادونو سرعت په ساعت کې د ۳۰ څخه تر ۷۵ کیلومترو پورې وي.

وروستیو ورښتونو او سېلابونو د افغانستان په یو شمېر سیمو کې خلکو ته ډېرځاني او مالي زیانونه اړولي دي.

د ملګرو ملتونو د بشري مرستو د همغږۍ ادارې اوچا پرون چهارشنبې په خپله ایکس پاڼه ولیکل چې د شریکانو په مرسته یې له سېلاب ځپلو سره د خوراکي موادو، خېمو، روغتیایي خدمتونو او نغدو پیسو مرستې کړې دي.

د ایران دولتي خبري اژانس ایرنا ویلي چې یو سپین ږیری افغان کارګر څا ته له لوېدلو وروسته ساه ورکړې ده.

د تهران ښاروالۍ د اطفایې او خوندیتوب ادارې ویاند سید جلال ملکي اژانس ته ویلي چې دغه پېښه پرون د مې په ۷مه شوې ده.

نوموړي ویلي، دغه ۷۰ کلن کارګر د یوې څا د پاکولو پر مهال هغه وخت لاندې ولوېد چې په ځان پورې تړلې رسۍ یې وشلېده.

ملکي ویلي، د ژغورنې ټیمونه څو ساعته وروسته توانېدلي چې د دغه کس مړی له څا راوباسي.

د ملګرو ملتونو د کډوالو عالي کمېشنرۍ په وینا شاوخوا درې میلیونه افغان کډوال دا مهال ایران کې ژوند کوي چې اکثره یې په درنو کارونو لګیا دي.