د لاسرسۍ وړ لېنکونه

تازه خبر
جمعه ۱۸ لیندۍ ۱۴۰۱ کابل ۱۱:۰۲

افغانستان

کندهار کې یو سوداګر تر تښتولو وروسته په مرموز ډول وژل شوی

د وژل شوي سوداګر انځور

په کندهار کې د محمدصادق اڅکزي په نوم سوداګر تر تښتول کېدو وروسته په مرموز ډول وژل شوی.

سیمه ایزو سرچینو ازادي راډیو ته وویل چې اڅکزی شل ورځې مخکې له دوبۍ څخه کندهار ته ستون شوی و، خو د ښار او سپین بولدک ولسوالۍ ترمنځ پر لاره تری تم شو.

د کندهار په میوند ولسوالۍ کې د طالبانو یو سیمه ییز چارواکې د خپل نوم نه ښودلو په شرط ازادي رادیو ته تایید کړه چې د نوموړي جسد پرون جمعه د دې ولسوالۍ په چشمو سیمه کې له یوې اندازې پیسو سره په یوه څاه کې موندل شوی دی.

تر اوسه د پېښې علت نه دی معلوم شوی او د طالبانو امنیتي چارواکو هم په دې اړه رسماً څه نه دي ویلي.

د طالبانو حکومت ټينګار کوي چې په ټول هېواد کې یې ډاډمن امنیت راوستی، خو لاهم د هېواد په بېلابېلو سیمو کې د ناامنیو د پېښو په اړه راپورونه ورکول کېږي.

د ورځې تازه خبرونه دلته ولولئ

ولکر ټرک: افغان مېرمنې په سیستماتیک ډول څنډې ته شوي

د طالبانو د کډوالو او بېرته راستنېدونکو چارو وزارت له لوري د ګوښه شویو ښځینه مامورینو انځور

د ملګرو ملتونو د بشري حقونو عالي کمېشنر ولکر ټرک وایي، د طالبانو تر واکمنۍ لاندې افغان ښځې او نجونې په سیستماتیک ډول څنډې ته شوي دي.

ټرک دغه څرګندونې نن په جینوا کې په یوه خبري کنفرانس کې خبریالانو ته وکړې او ویې ویل، د ژوند له ټولو اړخونو څخه په دوامداره توګه د ښځو او نجونو ګوښه کول په دې نړۍ کې بې ساري دي.

ټرک دغه راز د ښځو پر وړاندې د تاوتریخوالي د له منځه وړلو لپاره نړیوال ۱۶ ورځني کمپاین ته چې سبا د بشري حقونو له نړیوالې ورځې سره هممهاله پای ته رسېږي، په اشاره نن په یوه ټوېټ کې ویلي: "موږ باید د حقوقو ضد او د جنسیت ضد ویناوو پر وړاندې په ګډه ودرېږو."

نوموړی وایي، په ټولیزه توګه جنسیتي مساواتو ته باید پام وشي چې د ښځو حقونه بشري حقونه دي.

د بشري حقونو لپاره د ملګرو ملتونو عالي کمېشنر دغه څرګندونې داسې مهال کوي چې پر افغانستان د طالبانو له بیا واکمنېدو راهیسې، پر نجونو او ښځو د زده کړې او کار کولو په برخه کې ډېر محدودیتونه لګول شوي دي.

اندونیزیا کې د افغانستان په اړه نړیوال کنفرانس پای ته ورسېد

د جاکارتا یوه څنډه

په اندونیزیا کې د افغانستان په اړه په یوه نړیوال کنفرانس کې یوې تلپاتې سولې، ثبات او سوکالۍ ته د رسېدو لپاره له افغانانو سره د پیوستون او په دې برخه کې د ښځو د تعلیم پر اهمیت ټینګار وکړ.

د کنفرانس د پای په اعلامیه کې په شاوخوا لسو مواردو ټینګار شوی چې په سر کې یې د تلپاتې سولې لپاره د بین الافغاني خبرو یادونه شوې.

همدارنګه د افغانستان د پرمختګ،سولې او ثبات لپاره د ښځو رول حیاتي بلل شوی او ټينګار شوی که په ټولنه کې مساوي او معنی داره ونډه ورکړل شي له شک پرته به دا هدفونه ترلاسه شي.

طالبانو لا هم اجازه نه ده ورکړې، چې نجونې په افغانستان کې تر شپږم ټولګي پورته نور تعلیم وکړي او ښځو ته هم په اکثرو ادارو کې د کار کولو اجازه نه ده ورکړل شوې.

دا نړیوال کنفرانس د افغان مېرمنو د تعلیم په اړه د اندونیزیا او قطر په ګډ کوربه توب پرون ترسره شو چې په کې د امریکا، قطر، اندونیزیا، پاکستان په ګډون د شلو هېوادونو او سازمانونو استازیو برخه اخیستې وه.

په دغه کنفرانس کې د طالبانو کوم استازی نه تر سترګو کېږي، خو د نړۍ ځینو رهبرانو په کې ګډون کړی دی.

سېف د چلډرن: په خوارځواکۍ د اخته افغان ماشومانو شمېر ۵۰ سلنه ډېر شوی

ارشیف: په هرات کې په خوارځواکۍ اخته ماشوم

د ماشومانو د ملاتړ موسسه وايي، چې د تېر کال پرتله په افغانستان کې په خوارځواکۍ د اخته ماشومانو شمېر ۵۰ سلنه زیات شوی دی.

د سېف د چلډرن ویاند عاشق اله مندوزي پرون ماښام ازادي راډیو ته وویل چې د ماشومان وضعیت به په راروان ژمي کې د اندېښنې وړ وي.

هغه وویل: "د تازه څېړنې له مخې په خوارځواکۍ د اخته ماشومانو شمېر ۵۰ سلنه ډېر شوی دی. په وروستیو کې د خوارځواکۍ د درملنې د خدماتو غوښتنه په داسې حال کې ډېره شوې، چې کورنۍ به په افغانستان کې د لوږې له سخت بحران سره مقابله کوي."

د ماشومانو د ملاتړ موسسې د شمېرو له مخې دا مهال په افغانستان کې په خوارځواکۍ د اخته ماشومانو شمېر څلورو میلیونو ته رسېږي.

پاکستان د افغان نجونو د زده کړو پر اهمیت ټینګار وکړ

د پاکستان د بهرنیو چارو وزیر بلاول بوټو زرداري

د پاکستان د بهرنیو چارو وزیر بلاول بوټو زرداري په اندونیزیا کې د افغان مېرمنو د تعلیم په اړه په کنفرانس کې خبرې وکړې.

د پاکستان د بهرنیو چارو وزارت پرون په خپل ټوېټر کې خبر ورکړی چې پرون په دې کنفرانس کې زرداري افغانستان کې د ښځو او نجونو د تعلیم پر اهمیت ټینګار وکړ.

په دغه کنفرانس کې د طالبانو کوم استازی نه تر سترګو کېږي، خو د نړۍ ځینو رهبرانو په کې ګډون کړی دی.

طالبانو لا هم اجازه نه ده ورکړې چې نجونې په افغانستان کې تر شپږم ټولګي پورته نور تعلیم وکړي او ښځو ته هم په اکثرو ادارو کې د کار کولو اجازه نه ده ورکړل شوې.

ملګري ملتونه: مدني ټولنې د افغان نجونو پرمخ د ښوونځیو پرانیستل غواړي

په نیمروز کې د نجونو یو ښوونځی

د ملګرو ملتونو د ښځو څانګه وايي، مدني ټولنې غړي همدا غوښتنه لري چې په افغانستان کې د ټولو نجونو پرمخ د ښوونځیو دروازې پرانیستل شي.

د ملګرو ملتونو دغې څانګې د ښځو په وړاندې د تاوتریخوالي له منځه وړلو ۱۶ ورځني کمپاین په مناسبت چې سبا د ډسمبر لسمه یې وروستۍ ورځ ده له یوه ټوېټ سره پیغام خپور کړی.

د ملګرو ملتونو د ښځو څانګې ویلي، دوی د ۱۶ ورځني کمپاین پر مهال د مدني ټولنې له همکارانو پوښتلي وو چې نړۍ ته دا په ډګه کړي چې دا مهال له افغان مېرمنو او نجونو سره څه روان دي.

د ویډیويي پیغام په حواله، «د افغانستان تر ۵۰ سلنه زیات وګړي ښځې دي، د دوی پرمخ د ښوونځیو تړل د افغان ټولنې د ویجاړۍ په معنی دي.»

په ویډیويي پیغام کې له نړیوالې ټولنې غوښتنه شوې چې د افغان مېرمنو غږ له پامه ونه غورځوي.

د نومبر ۲۵مه د ښځو په وړاندې د تاوتریخوالي له منځه وړلو نړیواله ورځ وه چې له هغې ورځې د دې تاوتریخوالي له منځه وړلو ۱۶ ورځنی کمپاین روان دی او سبا د ډسمبر لسمه چې د بشري حقونو نړیواله ورځ ده پای ته رسېږي.

طالبانو په پروان کې ۲۷ کسان په درو وهلي

طالبانو نن د پروان په مرکز چاریکار کې ۲۷ کسان د اخلاقي فساد، غلا او له کوره د تېښتې په تور په عام محضر کې په درو وهلي دي.

طالبانو نن د پروان په مرکز چاریکار کې ۲۷ کسان د اخلاقي فساد، غلا او له کوره د تېښتې په تور په عام محضر کې په درو وهلي دي.

په پروان کې د طالبانو د محکمې ځینې چارواکي هم دغلته موجود وو.

له دې یوه ورځ وړاندې په فراه ولایت کې د طالبانو له خوا په عام محضر کې د یو تن قصاص پراخ نړیوال غبرګونونه راپورته کړي دي.

د طالبانو د حکومت ویاند ذبیح الله مجاهد پر ټوېټر یو ځل بیا دا 'اسلامي سزاګانې' بللي او په اړه یې انتقادونه 'د هېوادونو په کورنیو چارو کې مداخله' بللې او غندلي یې دي.

د طالبانو د حکومت له خوا د یو تن قصاصولو ته پر یو شمېر هېوادونو سربېره د بشري حقونو نړیوالو سازمانونو تند غبرګونونه ښودلي.

له دې ډلې د بخښنې نړیوال سازمان د دغو ډول سزاګانو تطبیقول د انساني کرامت سره په ټکر کې بللي وو.

امريکا: طالبان بېرته پخوانۍ 'تياره زمانې' ته ستانه شوي

د طالبانو موټر، انځور - ارشيف

د امریکا متحده ایالتونو په فرا ولایت کې د قصاص د حکم اجرا کېدو ته په غبرګون کې ویلي، دا کار د دې ښکارندویي کوي چې طالبان بېرته " پخوانۍ تیاره" زمانې ته ستانه شوي دي.

د امریکا د بهرنیو چارو وزارت ویاند نډ پرایس تېره شپه خبریالانو ته وویل: "په ټولنیزو رسنیو کې کرکجنې ویډیوګانې ښکته پورته کېږي چې ښېي طالبان د ۱۹۹۰ مو کلونو ناوړه کړنو ته ګرځېدلي دي.

پرایس ویلي، د طالبانو دغه اقدام د ټولو افغانانو پت او بشري حقونو ته سپکاوی او د طالبانو د کړو ژمنو ماتېدل په ډاګه کوي.

طالبانو بیا په فرا کې د قصاص د حکم ننګه کړې او ویلې يې دي، تر ډېر دقت او د مشر ملا هبت الله اخندزاده تر تایید وروسته یې عملي کړی دی.

خو یو شمېر دیني او حقوقي پوهانو ازادي راډیو ته وویل چې، دا مهال د دغه ډول حکمونو تطبیق ته شرایط نه‌دي برابر.

وېسټ: د طالبانو مشروعیت له ښځو سره د دوی په چلند پورې تړلی دی

توماس وېسټ

د افغانستان لپاره د امریکا ځانګړی استازی توماس وېسټ وایي، د طالبانو کورنی او نړیوال مشروعیت په دې پورې تړلی چې دوی له ښځو او نجونو سره څه ډول چلند کوي.

ښاغلي وېسټ پرون ناوخته په یو لړ ټویټونو کې ویلي چې، د افغانستان اقتصادي او ټولنیز ثبات هم له ښځو سره د طالبانو په چار چلند پورې اړه لري.

نوموړي ویلي، افغانستان کې یې د ده په ټکو د خرابېدونکي بشري وضعیت په تړاو د طالبانو د دفاع وزارت د سرپرست محمد یعقوب مجاهد په مشرۍ پلاوي سره په اماراتو کې خبرې کړي دي.

طالبانو د بشري وضعیت د اندېښنو په تړاو څه نه‌دي ویلي، خو دفاع وزارت یې وړمه ورځ ویلي و چې مشرتابه یې امریکایي استازي ته ډاډ ورکړی چې د افغانستان له خاورې به چاته ګواښ نه پېښیږي.

پر امریکا سربیره نورو هېوادونو هم د طالبانو رسمیت پېژندل د بشري حقونو په ځانګړې توګه د ښځو او نجونو د حقونو په ټینګښت پورې تړلي دي.

يوناما: هر ډول شرايطو کې د اعدام سزا مخالف يو

انځور - ارشيف

په افغانستان کې د ملګرو ملتونو مرستندوی ماموریت (یوناما) د طالبانو له‌خوا د قصاص د حکم په غبرګون کې وایي، ملګري ملتونه په هر ډول شرایطو کې په کلکه د اعدام د سزا مخالف دي.

یوناما پرون ناوخته پر خپله ټویټرپاڼه لیکلي چې فرا کې په عام محضر کې د یو کس له قصاصه خبر شوي او دغه بنسټ د طالبانو له چارواکو غوښتي چې د اعدام سزا د لغوې لپاره سملاسي لاس په کار شي.

د طالبانو له بیا واکمنۍ وروسته لومړنی قصاص پرون په فرا ولایت کې ترسره شو چې غبرګونونه یې وپارول.

طالبان وایي، د قصاص دغې پېښه کې محکوم شوی کس د یوه مقتول د پلار له‌خوا درې ډزه وویشتل شو.

د بښنې نړیوال سازمان ویلي، د اعدام هر ډول حکم د ژوندانه له حقه سرغړونه ده او په عام محضر کې یې پلي کول انساني کرامت ته سپکاوی دی.

د ايمرجنسي روغتون دفتر: څه باندې ۹ مليون افغانان له لومړنيو روغتيايي خدماتو برخمن شوي

انځور - ارشيف

د ایمرجنسي روغتونونو مرکزي دفتر وايي، په افغانستان کې څه باندې ۹ ملیون کسان د دوی له لومړنیو صحي خدماتو برخمن شوي دي.

دغې ادارې پرون په خپل رسمي ټویټر کې لیکلي دوی په افغانستان کې د لومړنیو روغتیايي خدماتو اولنی مرکز ۲۳ کاله مخکې پرانیست، خو اوس په افغانستان کې د لومړنیو خدماتو او اساسي خدماتو د هغو مرکزونو شمېر تر ۴۰ اوړي، چې ایمرجنسي یې چلوي.

په ایمرجنسي روغتونو او اړوندو روغتیايي مرکزونو کې یې تر ډېره د جګړې د قربانیانو د ټپیانو درملنه کېږي.

نور راوښيه

XS
SM
MD
LG