د لاسرسۍ وړ لېنکونه

تازه خبر
شنبه ۱۵ سلواغه ۱۴۰۱ کابل ۰۴:۰۸

نړۍ

د ایران سپاه پاسداران د فردا راډیو د خبریال 'رضا حقیقت نژاد' جسد تښتولی

رضا حقیقت نژاد

د ازادي راډیو د راه فردا څانګې د راپور پر بنسټ د ایران د سپاه پاسداران مامورانو د فردا راډیو د خبریال رضا حقیقت نژاد جسد تهران ته له رسېدو وروسته تښتولی او نامعلوم ځای ته يې وړی دی.

د فردا راډیو راپور ورکړی چې د حقیقت نژاد په ټاټوبي کې د هغه د خښېدو اجازه ورکړل شوې وه.

رضا حقیقت نژاد تېره اونۍ په جرمني کې د سرطان ناروغۍ له کبله ومړ.

ایراني چارواکو په رسمي ډول تراوسه په دې اړه څه نه دي ویلي.

د ورځې تازه خبرونه دلته ولولئ

اوکراين د پيسو له نړيوال صندوق د پور ورکولو د يو پروګرام د تصويب غوښتنه کړې

د پيسو نړيوال صندوق ودانۍ

د کییف متحدان د پیسو له نړیوال صندوق یا (IMF) غواړي چې اوکراین ته د پور ورکولو یو پروګرام تصویب کړي.

فایننشل ټایمز ورځپاڼې په دې اړه نن په یوه راپور کې ویلي، ټاکل شوې په دې باب د پیسو نړیوال صندوق استازي له اوکرایني چارواکو سره شا و خوا دوې اوونۍ وروسته د پولنډ په پلازمېنه وارسا کې وګوري او دغه پروګرام تر پسرلي پورې نهايي شي.

د ورځپاڼې په راپور کې د ځینو چارواکو په حواله چې له دې موضوع خبر دي ویل شوي، د دې پور اندازه به د ۱۴ او ۱۶ ملیارد ډالرو ترمنځ وي.

اوکراین ویلي چې، روان میلادي کال د ۳۸ ملیارد ډالرو په ارزښت د بودجې له کسر سره مخامخ دی.

بل‌خوا نړیوال بانک اټکل کړی، چې د اوکراین د انرژۍ تر نیمايي زیات بنسټونه د روسیې په حملو کې ویجاړ شوي دي، چې د اوکراین پر اقتصاد یې فشار زیات کړی دی.

د فرانسې ولسمشر: د ايران د اټومي پروګرام دوام به جدي عواقب ولري

د فرانسې ولسمشر امانویل مکرون

د فرانسې ولسمشر امانویل مکرون د اسرائیل له صدراعظم بنیامین نتنیاهو سره تر خبرو وروسته د ایران د اټومي پروګرام چټک تشدید وغانده.

نتنیاهو په پاریس کې دی او د تهران په وړاندې د اروپا د دریځ د سختېدو هڅه کوي.

مکرون د تېر ماښام تر کتنې وروسته په یوه اعلامیه کې خبرداری ورکړ، د تهران د اټومي پروګرام دوام به جدي عواقب ولري.

اسرائیل له اودې مودې ایران د اټومي وسلو د جوړولو په هڅه تورنوي، خو تهران ټینګار کوي، چې اټومي پروګرام یې یوازې د انرژۍ د تولید لپاره دی.

شمالي وزيرستان کې د پاکستاني پوځيانو او ټي‌ټي‌پي ترمنځ نښته شوې

پاکستاني پوځيان

د پاکستان پوځ وايي، ډیورنډ کرښې ته څېرمه یې د پاکستاني طالبانو پر یوه مرکز چاپه اچولې چې وروسته ډزې تبادله شوي او په نتیجه کې یې دوه وسله‌وال وژل شوي دي.

پوځ یوه اعلامیه کې ویلي، پوځیانو نن جمعه په شمالي وزیرستان کې د افراطي وسله‌والو د وسلو یوه زېرمه هم کشف او ضبط کړې ده.

دا پېښه داسې وخت شوې، چې د پاکستان صدراعظم شهباز شریف د دغه هېواد د اپوزیسیون رهبر عمران خان او نور چارواکي د نا امنیو د زیاتېدو په وړاندې د اقدام پر لارو چارو د بحث لپاره وربللي.

د نا امنیو په دوام تېره دوشنبه د پېښور په یوه جومات کې بمي چاودنې ۱۰۱ کسان ووژل.

خېبر پښتونخوا کې د ترافيکي پېښې له امله ۱۷ کسان مړه شوي دي

د کوهاټ تونل ترافيکي پېښه

د خیبر پښتونخوا په کواټ کې په یوه ترافیکي پېښه کې د ښځو او ماشومانو په ګډون ۱۷ کسان مړه شوي دي.

د کواټ د پولیسو ویاند فضل نعیم تېر ماښام ازادي راډیو ته وویل، یو مساپر وړونکی (فلاینګ کوچ های اېس) ګاډی په تونل کې له بار وړونکې لارۍ سره لګېدلی.

په پېښه کې د نعیم په خبره اولس کسان مړه شوي او یو تن ټپي دی.

دی وايي، د مرستندویه ادارې کارکوونکي سمدستي د پېښې ځای ته ورسېدل او ژوبل کس او د وژل شویو جسدونه یې د کواټ لوی روغتون ته ولېږدول.

د پاکستان دولتي خبري اژانس وايي، مساپر وړونکی ګاډی له لکي مروته د پېښور پر لوري روان وو چې د پېښې ښکار شو.

تر اوسه په تونل کې د ټرافیکي پېښې لامل معلوم نه‌دی خو نعیم زیاتوي چې د پېښې پلټنې روانې دي.

کواټ سرنګ یا تونل د جاپان په مالي مرسته جوړ شوی وو او په ۲۰۰۳ز کال کې د ګاډو تګ راتګ لپاره پرانیستل شو.

د غره په لمن کې د هغه تونل یوه برخه په کواټ او بله یې له ادم‌خېل درې سره نږدې پرته ده.

په دغه شاوخوا دوه کېلومیټره اوږد تونل کې دوه طرفه سړک دی چې په‌کې د رفتار حد ټاکل شوی دی.

د جنورۍ پر ۲۹مه هم د کواټ په تانده بند کې د یوې کښتۍ اوښتو په پېښه کې د مدرسې د زده‌کوونکو ماشومانو په ګډون ۵۲ کسان وژل شوي وو.

هغه ماشومان په مدرسه کې د حفظ تر بشپړولو وروسته ښوونکو په چکر بند ته بیولي وو.

پر هماغه ورځ د بلوچستان په لسبېله کې له پله څخه د مساپر وړونکي ګاډي پرېوتو په پېښه کې ۴۱ کسان ووژل شول.

د سعودي عربستان د بهرنيو چارو وزير بغداد ته سفر کړی

د عراق د بهرنيو چارو وزير فواد حسين له خپل سعودي سيال سره

د عراق د بهرنیو چارو وزیر فواد حسین د خپل هېواد او سعودي عربستان ترمنځ د همکاریو د زیاتېدا غوښتنه وکړه.

ده دا غوښتنه پرون (پنجشنبه) په بغداد کې د سعودي له باندنیو چارو وزیر فیصل بن فرحان سره په یوه ګډه خبري غونډه کې وکړه.

د عراق د بهرنیو چارو وزیر بغداد ته د خپل سعودي ساري سفر مهم وباله او ویې ویل دا سفر په داسې وخت کې شوی چې په سیمه کې ګڼې ننګونې شته.

د سعودي د بهرنیو چارو وزیر په عراق کې د خپل هېواد د شرکتونو له لوري پانګونې ته چمتووالی وښود.

عراق له ډېرې مودې راهیسې له اقتصادي ستونزو سره مخامخ دی او په وروستیو اوونیو کې یې د پیسو ارزښت پر له‌پسې په کمېدو دی.

اتریش له خپلې خاورې د څلورو روسي ډپلوماټانو د ايستلو پرېکړه کړې ده

د اتريش بيرغ

د اتریش د بهرنیو چارو وزارت نن دا څلور روسي ډپلوماټان تورن کړي چې د خپلو ډپلوماټیکو دندو خلاف عمل یې کړی دی.

دغو څلورو ډپلوماټانو ته د فبروري تر اتمې وخت ورکړل شوی چې د اتریش له خاورې ووځي.

دوه ډپلوماټان د روسیې په سفارت او دوه نور هم په ویانا کې د ملګرو ملتونو په استازولۍ کې د روسیې لپاره کار کوي.

مسکو تر اوسه پورې د اتریش د دې پرېکړې په وړاندې غبرګون نه‌دی ښوولی.

د پاکستان پوليسو د دغه هېواد د کورنيو چارو پخوانی وزير شيخ رشيد نيولی دی

د پاکستان پولیسو د کورنیو چارو پخوانی وزیر شيخ رشید

د پاکستان پولیسو د کورنیو چارو پخوانی وزیر شيخ رشید نیولی دی.

په هغه باندې تور لګېدلی چې غوښتل یې د پخواني ولسمشر او پیپلز ګوند د شریک مشر اصف علي زرداري ژوند ته ګواښ پېښ کړي.

د اسلام اباد پولیسو په خپل ټوېټر د شیخ رشید د نیولو خبر تایید کړی دی او ویلي یې دي، چې هغه یې د محکمې د حکم پر اساس نیولی.

شېخ رشید د عوامي مسلم لیګ ګوند مشر او د عمران خان په مشرۍ د تحریک انصاف د ګوند د حکومت پر وخت د کورنیو چارو وزیر پاتې شوی.

عمران خان د شيخ رشید نیول غندلي او اوسنی حکومت په مُغرضانه او غچ اخیستونکو کړنو تورن کړی.

کرېکټ؛ سویلي افریقا له انګلنډ ماتې وخوړه؛ خو لوبلړۍ یې وګټله

د کوربه سویلي افریقا او انګلنډ ترمنځ د ۳ یو ورځنیو لوبو لړۍ ۲-۱ د سویلي افریقا په ګټه پای ته ورسېده.

د چهارشنبې ورځ (د فبرورۍ ۱ نېټه) په درېیمه سیالي کې انګلنډ د ۳۴۵ منډو هدف کېښود او سویلي افریقا د ۲۸۷ منډو په جوړولو ټول لوبغاړي له لاسه ورکړل.

د انګلنډ په توپ وهونکو کې ډېوېډ ملان ۱۱۸ او لوبډلمشر جاس بټلر ۱۳۱ منډې وکړې چې د لوبې غوره لوبغاړی هم ونومول شو.

د سویلي افریقا په توپ اچونکو کې اېنګېډي تر نورو ښه وځلېد او ۴ لوبغاړي یې وسوځول.

د دې لوبډلې د توپ وهونکو له ډلې نن ګلېسناو رضاهېنرېکس نیمه سلیزې ووهلې.

د انګلنډ لپاره په توپ اچونه کې جوفرا ارچر ۶ لوبغاړي وسوځول.

ارچر تر دوه کلن ځنډ وروسته په لومړي ځل کرېکټ د سویلي افریقا پهلیګ کې مای کېپ ټاون لوبډلې ته پیل کړ.

د یادونې ده چې دا د ۲۰۲۳ نړیوال جام د سوپر لیګ سیالۍ وې چې لومړنۍ دوه لوبې یې سویلي افریقا وګټلې او اوس د سوپرلیګسیالیو د نومرو په جدول کې نهم مقام لري.

د اسرائيل صدراعظم: اوکراين ته د پوځي مرستو لېږل نه ردوو

د اسرائیل صدراعظم بینیامین نتانیاهو

د اسرائیل صدراعظم بینیامین نتانیاهو وایي، اسرائیل اوکراین ته د پوځي مرستې لېږل نه ردوي.

نتانیاهو پرون چهارشنبې له امریکایي سي‌ان‌ان ټلوېزیون سره په مرکه کې وویل، ده یقیناً له کییف څخه د پوځي ملاتړ په اړه غور کړی و.

د اسرائیل صدراعظم په جلا توګه د دې یادونه وکړه چې اسرائیل چمتو دی چې اوکراین ته د اوسپنیز چتر په نوم د توغندیو ضد دفاعي سیسټم په ورکولو غور وکړي.

نتانیاهو همدارنګه وویل، چې دی چمتو دی چې د روسیې او اوکراین ترمنځ د خبرو منځګړیتوب وکړي که چېرې دواړه لوري او د امریکا متحده ایالات ورسره موافق وي.

پوليسو پېښور کې د اعتراض پر مهال دغلته د وروستي خونړي بريد د څېړنو غوښتنه کړې

پېښور کې د وروستي خونړي بريد انځور

پرون چهارشنبې په پېښور کې په لسګونو پولیسو په یوه اعتراضي لاریون کې له حکومت څخه وغوښتل چې د دې ښار پر یوه جومات د دوشنبې د ورځې د خونړي ځانمرګي برید په اړه بشپړه او شفافه څېړنه ترسره کړي.

په دغه برید کې چې د پولیسو د کلک امنیتي زون د ننه جومات باندې وشو، د وژل شویو کسانو شمېر۱۰۱ ته رسېدلی او د ټپیانو ۲۲۱ تنه ښودل شوی دی.

ویل شوي اکثره قربانیان د پولیسو افسران و.

معترض پولیسان په پېښور کې د ژورنالېستانو د مرکز مخې ته راټول شوي او یو شمېر مدني او سیاسي فعالان هم ورسره یو ځای شوي وو.

د ساجد علي په نوم یوه متعرض ازادي راډیو ته وویل چې پولیس افسران مجبور شول چې پر چارواکو د فشار راوستو لپاره لاریون وکړي ځکه دا د پولیسو افسران دي چې په دغه ترهګرۍ او نا امنۍ کې وژل کېږي.

د علي دراز په نوم د دغه اعتراضي لاریون یوه بل ګډونوال وویل، پولیس غواړي دا ځواب ترلاسه کړي چې څرنګه یو ځانمرګی برید دومره ویجاړي رامنځته کولای شي.

په لومړي سر کې د پاکستاني طالبانو د ډلې، ټي‌ټي‌پي یوه قومندان د دغه برید مسولیت اخیستی و، خو وروسته د دې ډلې ویاند محمد خراساني په دې حمله کې خپل لاس لرل رد کړل او ویې ویل دا د دوی پالیسي نه‌ده چې په بریدونو کې جوماتونه، مدرسې او نور مذهبي ځایونه په نښه کړي.

نور راوښيه

XS
SM
MD
LG