د لاسرسۍ وړ لېنکونه

تازه خبر
سه شنبه ۲۸ وری ۱۴۰۳ کابل ۰۵:۲۶

ښځې

رینا امیري یوځل بیا د افغان ښځو د مهمو حقونو پر تامین ټینګار وکړ

د افغانستان د بشري حقونو او ښځو لپاره د امریکا ځانګړې استازې رینا امیري
د افغانستان د بشري حقونو او ښځو لپاره د امریکا ځانګړې استازې رینا امیري

د افغانستان د بشري حقونو او ښځو لپاره د امریکا ځانګړې استازې رینا امیري وایي، طالبان چې ادعا کوي، افغانستان د اقتصادي خپلواکۍ لور ته روان دی، نه شي کولای د دې هېواد د نیمایي وګړو له زده کړې او کاري فرصتونو سترګې پټې کړي.

مېرمن امیري نن په څو ټوېټونو کې ویلي چې د ښځو او نجونو په ګډون د ټولو افغانانو ښوونه او روزنه له بېوزلۍ څخه د افغانستان د وتلو او د هیلو د راژوندي کولو لپاره یوه کلیدي مسئله ده.

رینا امیري ویلي، ۴۰۰ ورځې کېږي چې طالبانو نجونې ښوونځي ته له تلو منع کړي دي.

د دې په وینا دوی په زیاتېدونکي ډول د لوړو زده کړو له بهیر څخه نجونې بې برخې کوي، په تېره هزاره نجونې او ښځې په نښه کوي.

رینا امیري وایي، د کره راپورونو له مخې طالبانو د کابل پوهنتون له لیلیې هزاره ښځې ایستلي او د لوړې زده کړو راتلونکې یې له خطرسره مخ کړي او هم داسې راپورونه شته چې ښځې په ازموینه کې د لوړو زده کړو هغو رشتو ته له داخلېدو منع شوي چې هغه د دوی لپاره سختې بلل شوي دي.

د طالبانو د لوړو زده کړو وزارت څه موده مخکې د کابل پوهنتون له لیلیې څخه د یو شمېر نجونو ایستل د لیلیې له ټاکل شویو اصولو سرغړونه بللې ده.

د ورځې تازه خبرونه دلته ولولئ

فرانسې د افغان ښځو د سنګسار او جسمي سزا ورکولو د لړۍ پيلول وغندل

د فرانسې بیرغ
د فرانسې بیرغ

فرانسې د طالبانو حکومت هغه پرېکړه په کلکه غندلې چې د ښځو د سنګسار او هغوی ته یې د جسمي سزا د ورکولو د لړۍ د پیل په اړه کړې ده.

د فرانسې د بهرنیو چارو وزارت پرون ناوخته یوه اعلامیه کې دا عمل وحشتناک او د بنسټیزو حقونو او ازادیو سره ټکر کې بللی دی.

د فرانسې د بهرنیو چارو وزارت په اعلامیه کې زیاته شوې: "د ملګرو ملتونو امنیت شورا د فرانسې په ګډون دا روښانه کړې چې د ښځو حقونو ته درناوی د هر ډول خبرو اترو لپاره یو شرط دی."

په دې اعلامیه کې د طالبانو له حکومت غوښتل شوي چې د نجونو او ښځو سره د ظلم او حذف پالیسۍ له‌منځه یوسي.

دا په داسې حال کې ده چې وروستیو کې د طالبانو مشر ملاهبت‌الله ته یو منسوب غږ کې چې د دوی د حکومت تر کنټرول لاندې ملي تلوېزیون هم خپور کړ؛ په عام محضر کې نجونو او ښځو ته د سنګسار او سزاوو ورکولو په اړه خبرداری ورکول شوی و.

خو په دې اړه له ډېر شمېر نیوکو وروسته، د طالبانو حکومت تر کنټرول لاندې ملي تلوېزیون دا غږیز کلیپ له خپلو ټولنیزو پاڼو لېرې کړ.

امیري: طالبان دې د بندي او تري تم شویو کسانو کورنیو ته ځواب ورکوونکي ووسي

د افغانستان د بشري حقونو، ښځو او نجونو لپاره د امریکا ځانګړې استازې
د افغانستان د بشري حقونو، ښځو او نجونو لپاره د امریکا ځانګړې استازې

د افغانستان د بشري حقونو، ښځو او نجونو لپاره د امریکا ځانګړې استازې د طالبانو له حکومته غوښتي چې د توقیف شویو او تري تم شویو کسانو کورنیو ته ځواب ورکوونکي ووسي.

رینا امیري له حقیقته د خبرېدو د نړیوالې ورځې په مناسبت چې پرون د مارچ په ۲۴مه ونمانځل شوه، دغه څرګندونې کړې دي.

هغې که څه هم نه دي ویلي چې څه شمېر کسان په افغانستان کې د طالبانو له خوا توقیف او تري تم دي، خو زیاته کړې ده چې یوشمېر کورنۍ د خپلو غړو د تري تم کېدو او توقیف ځایونو د موندلو هڅه کوي.

د راپورونو له مخې له تېرې اکټوبر میاشتې راهیسې د افغانستان د خودجوشه ښځو د غورځنګ غړې منیژه صدیقي او د تعلیم دوه فعالان احمد فهیم عظیمي او صدیق الله افغان د طالبانو د استخباراتو په توقیف کې دي او برخه لیک یې معلوم نه دی.

د طالبانو استخبارات هم په اسانه د دوی له خوا د توقیف شویو کسانو د ځای ځایږي په اړه معلومات نه ورکوي.

بینېټ: د افغانستان په څېر په کوم بل هېواد کې د ښځو حقونه ډېر نه نقضېږي

د بشري حقونو په برخه کې د ملګرو ملتو ځانګړی راپور ورکوونکی ریچارډ بینېټ
د بشري حقونو په برخه کې د ملګرو ملتو ځانګړی راپور ورکوونکی ریچارډ بینېټ

د بشري حقونو په برخه کې د ملګرو ملتونو ځانګړی راپور ورکوونکی وایي چې دی فکر نه کوي چې د نړۍ په بل ځای کې دې د ښځو حقوق دومره تر پښو لاندې شي لکه په افغانستان کې چې کېږي.

ریچارډ بینېټ دا خبره ازادي راډيو ته د جمعې په ورځ په ځانګړې مرکه کې وکړه او زیاته یې کړه چې په ځینو نورو هېوادونو کې هم نجونو او ښځو ته حقوق نه ورکول کېږي، خو هیله شته چې په راتلونکې کې ښځې له خپلو حقه حقوقو برخمنې شي.

طالبان وایي چې دوی د شریعت په چوکاټ کې د ښځو او نجونو حقوقو ته ژمن دي.

وروسته تر دې چې طالبانو د ۲۰۲۱م کال په اګست کې کابل ونیوه، تر شپږم ټولګي ورپورته یې د نجونو ښوونځي بند کړل بیا یې نژدې کال وروسته د پوهنتون دروازې د دوی پرمخ وتړلې.

همداراز یې یو شمېر نور بندیزونه پر ښځو لګولي چې د بشري حقونو د ډلو له لوریو غندل شوې دي.

وېسټ: د افغان نجونو او ښځو له هڅو او زړورتیاوو درناوی کوم

د افغانستان لپاره د امریکا متحده‌ایالاتو ځانګړی استازی توماس وېسټ
د افغانستان لپاره د امریکا متحده‌ایالاتو ځانګړی استازی توماس وېسټ

د افغانستان لپاره د امریکا متحده‌ایالاتو ځانګړی استازی وايي، د افغان نجونو او ښځو له ټولو هغو هڅو او زړورتیاوو درناوی کوي چې غواړي په هر کچه د کار ترڅنګ، تعلیم وکړي څو خپل حقونه خوندي او د ژوند په ټولو چارو کې برخه واخلي.

توماس وېسټ نن سهار د مارچ اتمې د ښځو د نړیوالې ورځې په مناسبت په خپله ایکس‌پاڼه دا مسایل د افغانستان او سیمې د ثبات لپاره مهم بللي.

په ورته وخت کې د افغانستان لپاره د امریکا شارژدافېره کرن ډیکر وايي، افغانې ښځې د افغانستان د راتلونکي لپاره اړینې دي.

هغې په خپله ایکس‌پاڼه د مارچ اتمې یا د ښځو نړیوالې ورځې ته په اشارې لیکلي، هره ورځ باید د ښځو نړیواله ورځ وي، افغان ښځو ته باید فرصت برابر او خبرې یې واورېدل شي.

په افغانستان کې له نړیوالې ټولنې د بشري حقونو د خوندیتوب غوښتنه شوې

ارشیف: په کابل کې د معترضو مېرمنو د یوې اعتراضیه غونډې انځور
ارشیف: په کابل کې د معترضو مېرمنو د یوې اعتراضیه غونډې انځور

د بشري حقونو یو شمېر نړیوالو ملاتړو بنسټونو په یوه لیک کې له نړیوالې ټولنې غوښتي چې په افغانستان کې د بشري حقونو د خوندیتوب لپاره بېړنی اقدام وکړي.

دوی په ګډ لیک کې چې تېره شپه یې ناوخته د ښځو د نړیوالې ورځې په مناسبت خپور کړی لیکلي، په ۲۰۲۱ کال کې د واک له بیا تر لاسه کولو وروسته؛ طالبانو د نجونو او ښځو په حقونو د ظالمانه بریدونو په پایله کې یو جدي بحران رامنځته کړی چې د وضعیت د لا خرابېدو نښه او د جنسیتي اپارټایډ په توګه تشریح کېدای شي.

د بخښنې نړیوال سازمان، د بشري حقونو څار سازمان، فریډم هاوس او ځینو نورو په دې لیک کې په نړیوالې ټولنې غږ کړی چې په افغانستان کې د بشري حقونو د خوندیتوب په ګډون، د فعالانو د ځورونې مخه ونیسي او په طالبانو د زیات فشار راوستو له لارې افغان مېرمنې په ټولو خبرو اترو کې شاملې کړي.

ریچارډ بینېټ: طالبان دې د بشري حقونو مدافعانې له بنده خوشې کړي

د افغانستان لپاره د ملګرو ملتونو ځانکړی راپور ورکوونکی ریچارډ بینېټ
د افغانستان لپاره د ملګرو ملتونو ځانکړی راپور ورکوونکی ریچارډ بینېټ

د افغانستان لپاره د ملګرو ملتونو ځانکړي راپور ورکوونکي ریچارډ بینېټ نن د مارچ اتمه د ښځو د نړیوالې ورځې په مناسبت پر طالبانو غږ کړی چې د بشري حقونو مدافع ښځې دې له بنده راخوشې کړي.

هغه دا خبره په هغه بیان کې کړې چې ملګرو ملتونو پر خپلې ویبپاڼې خپور کړی دی.

بینېټ وړاندې ویلي: "د ښځو د نړیوالې ورځې په مناسبت زه د افغانستان د ښځو او نجونو هغوي چې په بېسارې ډول له سیستماتیک تبعیض سره مخ دي تر څنګ ولاړ یم."

په بیان کې بینېټ د افغانو ښځو د مېړانې ستاینه هم کړې چې د خپلو حقونو لپاره مبارزه کوي.

هغه له طالبانو غوښتي چې د ښځو او نجونو بشري حقونو له ډلې يې زده کړې، کار، سفر، د بیان ازادي او کلتوري حقونو ته درناوی وکړي.

نوموړي په دې بیان کې له طالبانو غوښتنه کړې چې سمدستي او پرته له کوم قید او شرطه دې ټول هغه کسان له زندانه راخوشې کړي چې د بشري حقونو په ځانګړې توګه د ښځو او نجونو د حقونو د دفاع په خاطر په خپل سر نیول شوي دي.

نرګس سادات، پریسا مبارز، ملالۍ هاشمي، فاطمه محمدي، ژولیا پارسي، پریسا ازاده، منيژه صدیقي او بهاره کریمي هغه معترضې ښځې دي چې په ۲۰۲۳ کال کې د طالبانو د بندیزونو په غبرګون د غږ پورته کولو له امله نيول شوي دي.

له دې ډلې منيژه صدیقي چې د ۲۰۲۳ کال د اکتوبر په نهمه د طالبانو له خوا نیول شوې، لا هم په زندان کې ده.

اروپايي ټولنه: په هغه څه چې ښځې يې ترسره کولی شي، هیڅ ډول بندیز نه شته

د اروپايي ټولنې بیرغ
د اروپايي ټولنې بیرغ

اروپايي ټولنې نن د مارچ اتمه د ښځو د نړیوالې ورځې په مناسبت پر خپلې ایکس پاڼې یا پخواني ټویټر کې په یو پیغام کې ویلي، په هغه څه چې ښځې يې ترسره کولی شي، هیڅ ډول بندیز نه شته.

دې ټولنې زیاته کړې: "زموږ همکاران په افغانستان او نړۍ کې د ښځو د حقونو، برابرۍ او د فرصتونو د برابرولو په ارزښت پوهېږي."

د ښځو نړیواله ورځ سږ کال په داسې حال کې نمانځل کېږي چې طالبانو په افغانستان کې نجونې او ښځې له کار او زده کړو محرومي کړي دي.

د طالبانو د حکومت ویاند تازه ویلي، دوی د ښځو د حقونو په برخه کې موثر اقدامات کړي او د ښځو حقونو ته ژمن دي.

کرزي یوځل بیا د نجونو پر مخ د ښوونیزو ادارو د پرانیستلو غوښتنه وکړه

د افغانستان پخوانی ولسمشر حامد کرزی
د افغانستان پخوانی ولسمشر حامد کرزی

د افغانستان پخواني ولسمشر حامد کرزي نن د مارچ اتمه د ښځو د نړیوالې ورځې په مناسبت پر خپلې فېسبوک پاڼې په یو پیغام کې یوځل بیا د طالبانو له حکومته غوښتي چې د نجونو پر مخ د ښوونځيو او پوهنتونونو دروازې خلاصې کړي.

د کرزي په خبره، د افغانستان پرمختګ د ښځو او نارینه‌وو په ماناداره ګډون پورې تړلی دی.

هغه وړاندې ویلي، له احتیاجۍ څخه د خلاصون یوازېنۍ لار د نجونو تعلیم او ښځو د کار د زمینې برابرول دي.

نن د مارچ اتمه د ښځو نړیواله ورځ ده.

عبدالله: افغانو مېرمنو په تېرو څلور لسیزو کې ډېرې قربانۍ زغملي دي

د افغانستان د تېرې جمهوري نظام د ملي مصالحې عالي شورا مشر داکترعبدالله عبدالله
د افغانستان د تېرې جمهوري نظام د ملي مصالحې عالي شورا مشر داکترعبدالله عبدالله

د افغانستان د تېرې جمهوري نظام د ملي مصالحې عالي شورا مشر ډاکترعبدالله عبدالله نن د ښځو د نړیوالې ورځې په مناسبت پر ایکس پاڼې یا پخواني ټویټر ویلي، افغانو مېرمنو په تېرو څلور لسیزو کې ډېرې قربانۍ زغملي دي.

د هغه په خبره، د افغانستان په پرمختګ کې ښځې او نارینه دواړه ونډه لري.

عبدالله زیاته کړې، ښځې د راتلونکې نسل د روزنې مسوولیت لري او ټولنه د خیر او بریا لور ته وړي.

نن د مارچ اتمه د ښځو نړیواله ورځ ده.

د ښځو نړیواله ورځ؛ ځینې افغان مېرمنې نړیوالې ټولنې ته: د طالبانو حکومت په رسمیت ونه پېژنئ

ارشیف: په کابل کې د معترضو مېرمنو د یوې اعتراضیه غونډې انځور
ارشیف: په کابل کې د معترضو مېرمنو د یوې اعتراضیه غونډې انځور

نن د مارچ اتمه د ښځو نړیواله ورځ ده.

ملګرو ملتونو په ۲۰۲۴م کال کې د ښځو د نړیوالې ورځې په مناسبت په دې شعار ټینګار کړی چې "پر ښځو پانګونه پرمختګ چټکوي."

همداراز په ټولنه کې د ښځو د مشارکت/ګډون مسئلې باندې هم ټینګار شوی دی.

په افغانستان کې بیا دا ورځ داسې وخت راغلې چې طالبانو له شپږم ټولګي پورته میلیونونه نجونې له زده کړو او لوړو تحصیلاتو منع کړي.

همداراز په نادولتي موسسو کې د ښځو پر کار بندیز لګېدلی دی.

یو شمېر افغان ښځینه فعالانو په خواله رسنیو کې د دې ورځې په مناسبت له نړیوالې ټولنې غوښتي چې پر طالبانو فشار زیات کړي او حکومت یې هیڅکله په رسمیت ونه پېژني.

ځینې افغان مېرمنې لکه منیژه صدیقي د راپورونو له مخې لا هم بندیانې دي.

نور راوښيه

XS
SM
MD
LG