د لاسرسۍ وړ لېنکونه

تازه خبر
چهارشنبه ۹ لیندۍ ۱۴۰۱ کابل ۰۲:۴۹

نړۍ

کوشیدا: اوکراین کې د روسیې له خوا د اټومي وسلو کارول د منلو نه دي

د جاپان صدراعظم فومیو کوشیدا

د جاپان صدراعظم وايي چې د اوکراین په جګړه کې د روسیې له خوا د اټومي وسلو کارول به له بشريت سره د دښمنۍ یو اقدام وګڼل شي.

فومیو کوشیدا نن استرالیا ته د سفر پرمهال وویل د مسکو دا ګواښ چې له اټومۍ وسلو به کار واخلي، نړیوالې سولې او امنیت ته جدي ګواښ دی او د منلو وړ نه دی.

تمه ده چې د راروان کال په مې میاشت کې به د جاپان هیروشیما ښار د نړۍ د اوو لویو صنعتي هېوادونو د سرمشریزې کوربه وي.

پر همدې ښار د ۱۹۴۵ کال د اګست په شپږمه د دوهمې نړیوالې جګړې په پای کې اټومي بم وغورځول شو چې ۱۴۰ زره کسان یې وژل.

د ورځې تازه خبرونه دلته ولولئ

کويټه کې ځان وژونکي بريد کې ۳ تنه وژل شوي او ۲۳ ژوبل دي

پاکستاني پوليس

په کويټه کې یوې ځان وژونکې چاودنې درې تنه وژلي او ۲۳ تنه نور یې ټپیان کړي دي.

د ازادي راډیو د مشال څانګې د راپور له‌مخې دا چاودنه نن سهار د پولیسو پر یوه موټر وشوه.

د پولیسو یوه چارواکي خبریالانو ته وویل چې، په مړو کسانو کې یو پولیس او یوه ښځه هم شامل دي.

د امنیتي چارواکو په وینا دا یوه ځان وژونکې حمله وه چې نژدې ۲۵ کیلوګرامه چاودېدونکې مواد په‌کې کارول شوي وو.

د دې برید مسوولیت د پاکستاني طالبانو تحریک یا TTP منلی دی.

نوموړې ډلې د دوشنبې په ورځ اعلان وکړ چې د پاکستان له حکومت سره د افغان طالبانو په منځګړتوب لاسلیک شوی اوربند پای ته رسوي او خپلو جنګیالیو ته یې امر وکړ چې د ټول هېواد په کچه حملې وکړي.

امريکا قطر ته د ميزايل ضد توغنديو د ورکولو احتمالي معامله تاييد کړې

د امريکا بيرغ

پنټاګون اعلان کړی چې د متحدو ایالتونو د بهرنیو چارو وزارت د یو میلیارد ډالرو په ارزښت قطر ته د میزایل ضد توغندیو د ورکولو احتمالي معامله تایید کړې.

پنټاګون په یوه بیان کې ویلي چې د دې معاملې د احتمال په اړه کانګرس ته خبر ورکړل شوی دی.

د امریکا ولسمشر جو بایډن د روان کال په جنوري میاشت کې د قطر له امیر شیخ تمیم بن حمد آل ثاني سره په کتنه کې دا هېواد له ناټو بهر د امریکا لوی متحد وباله او په دې ناآرامه سیمه کې یې قطر ته د ځانګړي ملګري موقف ورکړ.

د اټومي وسلو د کنټرول په اړه روسيې له امريکا سره مذاکرات ځنډولي

انځور - ارشيف

روسیې له متحدوایالتونو سره د اټومي وسلو د کنټرول په اړه مذاکرات د هغه څه په خاطر وځنډول چې د مقابل لوري په چلند کې جدي اختلاف او د اوکراین د جګړې پرسر کړکېچ بلل شوی.

د روسیې د بهرنیوچارو وزارت مرستیال سیرګي ریابکوف پرون ادعا وکړه چې امریکا غواړي یوازې د نوي سټارټ په نوم د تړون په رڼا کې د اټومي وسلو پر تفتیش تمرکز وکړي.

نوموړی وايي، امريکا د مسکو هغه غوښتنه یې، د ده په وینا له پامه غورځولې ده چې غواړي د همدې موافقې په اساس د وسلو د شمېرنې د اړوندو مشخصو مسایلو په اړه بحث وشي.

د امریکا د بهرنیوچارو وزارت د دوشنبې په ورځ وویل، مسکو پرېکړه کړې چې په قاهره کې دا خبرې په یو اړخیز ډول وځنډوي او د هغوی لپاره به نوې نېټه وټاکي.

د ناټو غړو هېوادونو د اوکراين د انرژۍ تاسيساتو د بيارغونې برخه کې د مرستې ژمنه کړې

د اوکراين اټومي تاسيسات

د ناټو غړو هېوادونو ژمنه کړې چې د اوکراین د انرژۍ د هغو تاسیساتو په بیا رغونه کې مرسته وکړي چې د روسیې په حملو کې سخت زیانمن شوي.

اوکراین له خپلو لوېدیځو متحدانو غوښتي چې د برښنا د لېږد د ځانګړو تجهیزاتو د چمتو کولو په برخه کې مرسته ورسره وکړي څو خپل د برښنا سیسټم بیا ورغوي.

د ناټو د غړو هېوادونو د بهرنیو چارو وزیرانو پرون د رومانیا په پلازمېنه بخارست کې په خپله غونډه کې وویل چې د اوکراین د انرژۍ د تاسیساتو د ترمیم په هدف د اړتیا وړ تجهیزاتو په ګډون له دې هېواد سره په خپلو مرستو کې زیاتوالی راولي.

د دې غونډې په اعلامیه کې پر اوکراین د روسیې د دوامدارو حملو غندنه هم شوې ده او ویل شوي چې دې حملو میلیونونه اوکراینیان له اساسي بشري خدماتو څخه بې برخې کړې دي.

روسیې له اکتوبر میاشتې راهیسې د اوکراین د انرژۍ پر تاسیساتو حملې پیل کړي.

کییف او متحدان یې وايي چې د دې حملو هدف ملکي وګړو ته په عمدي ډول زیان اړول دي.

د فوټبال نړيوال جام؛ نن هم څلور لوبې ترسره کېږي

د فوټبال نړيوال جام

په قطر کې د فوټبال د ۲۰۲۲م کال نړیوال جام سیالیو په ګروپي پړاو کې نن څلور مسابقې کېږي.

لومړی د کابل پر وخت د ماښام اووه نیمې بجې تونس له فرانسې او اسټرالیا له ډنمارک سره د مسابقې میدان ته وځي.

د کابل پر وخت د شپې یوولس نیمې بجې بیا د پولنډ او ارجنټاین دغه راز سعودي عربستان او مکسیکو ترمنځ مسابقه کېږي.

په پرونۍ مسابقه کې هالنډ دوه د صفر په وړاندې له قطر لوبه وګټله او سینیګال وتوانېد دوه د یو په وړاندې ایکوادور ته ماتې ورکړي.

انګلنډ وتوانېد درې د صفر په وړاندې له وېلز مسابقه وګټي.

په بله مسابقه کې امریکا متحدو ایالتونو یو د صفر په وړاندې ایران ته ماتې ورکړه.

د اسرائيلي پوليسو په ډزو يو فلسطينی سړی وژل شوی

انځور - ارشيف

د اسرائیل پولیسو یو فلسطینی سړی وروسته له هغې په ډزو وواژه چې لومړی هغه، خپل موټر پر یوې اسرائیلۍ ښځې وربرابر کړ او سخته یې ټپي کړه.

پېښه پرون سې شنبه په اشغال شوې لوېدیځه غاړه کې شوې او دا څلورم فلسطینی وګړی و، چې پرون د ورځې په جریان کې په څو پېښو کې ووژل شو.

وروسته له هغې چې تېره اوونۍ پر بیت المقدس بمباري وشوه او له کبله یې دوه اسرائیلیان ووژل شول او د اسرائیل او فلسطینیانو ترمنځ د تاوتریخوالي زیاتېدو تازه نښه ګڼل کېږي.

د برښنايي تجهيزاتو لپاره امريکا له اوکراين سره ۵۳مليارده ډالر مرسته اعلان کړې

انځور - ارشيف

د امریکا متحدو ایالتونو اوکراین ته د برښنا د تجهیزاتو رانیولو لپاره د ۵۳ ملیارد ډالرو مرستې اعلان وکړ.

د دې کار هدف له کییف سره مرسته کول دي، چي وکړای شي د روسیې د هغو حملو مقابله وکړي، چې د اوکراین د انرژۍ سکټور په نښه کوي.

په وروستیو کې د اوکراین د برښنا پر تاسیساتو د روسیې حملې د دې سبب شوې چې په ملیونونو کسان له برښنا او د کورونو له تودولو بې برخې شي.

د امریکا د متحدو ایالتونو د بهرنیو چارو وزارت پرون په یوه اعلامیه کې وویل: دغه تجهیزات به په بېړني ډول اوکراین ته ولېږدول شي، چې اوکرایینیان د ژمي پر مهال ورڅخه کار واخلي.

دا اعلان داسې مهال کېږي، چې د ناټو د بهرنیو چارو وزیران په بخارست کې سره پرون جرګه شوي او غونډه یې نن هم دوام کوي.

دغه وزیران له اوکراین سره د پوځي مرستې د زیاتوالي پر لارو چارو خبرې کوي.

جنرال سيد عاصم منير د پاکستان د پوځ د نوي مشر په توګه دنده پيل کړه

د پاکستان د پوځ نوی مشر جنرال سید عاصم منير

نن د پاکستان د پوځ نوي مشر جنرال سید عاصم منير په رسمي ډول په دنده پیل وکړ.

هغه په راولپنډۍ کې د پوځ په مرکزي دفتر کې د جنرال قمر جاوید باجوه څخه د پوځ مشري ترلاسه کړه.

د پاکستان حکومت د نومبر پر ۲۴مه د پوځ د نوي مشر په حیث د جنرال عاصم منیر اعلان کړی و.

جنرال عاصم د پاکستان د پوځ ۱۷م مشر دی.

د پاکستاني رسینو د راپورنو پر بنسټ جنرال عاصم د پوځ هغه لومړنی مشر دی چې له دې وړاندې يې د پاکستان د دوو پوځي استخباراتي ادارو اۍ اېس اۍ او اېم اۍ مشري کړې ده.

امریکا: د چین خلک په سوله ییزه توګه د لاریونونو د ترسره کولو حق لري

په چین کې د روانو لاریونونو یو انځور

د امریکا متحده ایالتونه وایي، د چین خلک حق لري چې په سوله ییز ډول لاریونونه وکړي.

د سپینې ماڼۍ د ملي امنیت شورا په یوه خبرپاڼه کې ویلي، دوی له ډېرې مودې راهیسې وایي چې هرڅوک د سوله ییز اعتراض حق لري او د چین خلک هم.

دا څرګندونې داسې مهال کېږي چې له تېرو څو ورځو راهیسې د شانګهای په ګډون د چین څو ښارونو کې خلکو د کرونا د نویو لګول شویو محدودیتونو پر وړاندې مظاهرې پيل کړي دي.

دغه مظاهرې په تېره یوه لسیزه کې بې ساري بلل شوي دي.

رویټرز خبري اژانس ویلي، د چین پولیسو په شانګهای بیجینګ او یو شمېر نورو ښارونو او لسګونه پوهنتونونو کې امنیتي تدابیر سخت کړي دي.

د فوټبال نړیوال جام سیالۍ؛ نن څلور لوبې ترسره کېږي

په قطر کې د فوټبال د نړیوال جام له سیالیو یو انځور

د ۲۰۲۲ کال د فوټبال د نړیوال جام د لوبو په لړ کې په پام کې ده چې نن څلور لوبې وشي.

نن د نړیوال جام له لسمې ورځې وروسته د لوبو په وخت کې بدلون راځي داسې چې په یو وخت کې دوه لوبې کېږي.

نن د کابل په وخت د ماښام په ۷۳۰ په یوه لوبه کې اکوادور او سنیګال او په بله لوبه کې هالنډ او قطر سره مخامخ کېږي.

دا لوبډلې په A ګروپ کې دي، هالنډ د ګروپ په سر کې دی، اکوادور په دوهم ځای، سنیګال په دریم او قطر یې په پای کې دی.

د شپې په ۱۱:۳۰ د B لوبډلې سیالۍ پیلېږي. په لومړۍ لوبه کې د ایران او امریکا او په دوهمه لوبه کې د ویلز او انګلنډ لوبډلې د سیالۍ ډګر ته راوځي.

انګلنډ د دې ګروپ په سر کې، ایران په دوهم ځای کې، امریکا په درېیم او ویلز په دریم ځای کې دي.

په پرونیو لوبو کې کمیرون او سربیا ۳-۳ مساوي شول، ګانا جنوبي کوریا ته ۳-۲ ماتې ورکړه، سویس د برازیل ته ۱-۰ بایلوده او پرتګال یوروګوای ته ۲-۰ ماتې ورکړه.

نور راوښيه

XS
SM
MD
LG