د لاسرسۍ وړ لېنکونه

تازه خبر
شنبه ۱۹ لیندۍ ۱۴۰۱ کابل ۱۲:۲۲

افغانستان

ذبیح‌الله مجاهد: طالبانو په کابل کې ۶ داعشیان وژلي او ۲ نور یې نیولي

د کابل په لوېدیځ کې د طالبانو وسله وال غړي

طالب چارواکي وايي، په کابل کې پرون ورځ او تېره شپه د داعش پر ضد عملیاتو کې ۲ تنه داعشیان نیولي او ۶ نور یې وژلي دي.

د طالبانو ویاند ذبیح‌الله مجاهد شېبه وړاندې رسنیو ته استولې خبرپاڼه لیکلي، لومړی عملیات د کابل په ختیځ کې وشول چې دوه تنه داعشیان په کې ووژل شول.

مجاهد زیاتوي، وروسته د کابل ښار اتمې حوزې اړوند کې د داعش وسله‌‌والو يو پټنځای کشف او ماښام مهال عمليات پرې پيل شول چې په پایله کې یې د داعش شپږ تنه ووژل شول.

د مجاهد په خبره، له وژل شویو داعشیانو یو شمېر وسلې او مهمات هم په لاس ورغلي دي.

ذبیح‌الله مجاهد دا ادعا هم کوي چې وژل شوي داعش وسله‌وال هغه کسان وو چې په کاج ښوونیز مرکز، د وزیر اکبر جومات او ځینو نورو سیمو کې یې بریدونو لاس درلود.

طالب چارواکي، په دې عملیاتو کې د دوی د یوه وسله‌‌وال د وژل کېدل او یو بل ټپي کېدل هم تاییدوي.

د ورځې تازه خبرونه دلته ولولئ

افغان کرکټ بورډ د ځوانانو لوبډله جوړوي

ارشیف: د افغانستان د ۱۹ کلنو کرکټ ملي لوبډلې لوبغاړي - 1/17/2019

افغان کرکټ بورډ تر ۱۹ کلونو د کم عمره ځوانانو لوبډله جوړوي.

په ۲۰۱۸ زېږدیز کال د مالیزیا په کولالمپور ښار کې په لومړي ځل تر ۱۹ کلونو د کم عمره ځوانانو لوبډلې اتلولۍ خپله کړې وه او افغانستان د اسيا جام سیالیو په پایلوبه کې د پاکستان ته په ستر توپیر ماتې ورکړې وه.

د افغانستان کرکټ بورډ د نومبر میاشتې په ۲۴مه نېټه تر ۱۹ کلونو د کم عمره ځوانانو ملي لوبډلې د جوړښت په پار د ازموینو اخستلو نېټې اعلان کړې.

د دې ازموینو له مخې تر دې دمه د بند امیر، امو او بوست لوبډلو له لوبغاړو ازموينې اخستې دي او د پلان له مخې به د ډسمبر میاشتې په دولسمه او دیارلسمه نېټه له مس عینک او د همدې میاشتې په پینځلسمه او شپاړلسمه نېټه د سپین غر زون له لوبغاړو هم ازموينې واخلي.

کرکټ بورډ ویلي دي چې دا ځل یې د حقدارو لوبغاړو د غوره کولو او پروسې لا شفافیت په موخه څو کسیزه کمېټه ټاکلې ده چې په ترکیب کې یې د بېلابېلو څانګو د غړو او مسوولانو ترڅنګ د فساد ضد کمېټې استازی هم شامل کړی دی.

کرکټ بورډ ادارې د بند امیر زون ازموینې تر اخستلو وروسته د خپل کورني کرکټ پر فېسبوک پاڼه لیکلي: "د دغې ازموینې په لړ کې به په اعلان شوي معیار برابر لوبغاړي د ازموینې نورو پړاوونو لپاره غوره شي."

په کرکټ بورډ کې د کورني کرکټ څانګې مشر نظیم جار عبدالرحیمزی هم د لوبډلې د جوړولو د ټاکل شوې کمېټې غړی دی.

هغه د دې پروسې په تړاو ازادي راډيو ته په خپلو څرګندونو کې ویلي د پروسې د شفافیت لپاره ډېره پاملرنه کړې ده.

د نوموړي په خبره چې د عمر ښه معلومولو په پار د هر لوبغاړي تذکره کتل کېږي او د موظف ډاکتر له لوري په ظاهري بڼه هم د ځانګړو تکتیکونو پر اساس د لوبغاړو معاینه کېږي.

دغه راز د افغانستان کرکټ بورډ د غوراوي کمېټې مشر نورالحق ملکزی هم دغه بهیر څاري.

ولکر ټرک طالبانو ته: د اعدامونو د حکمونو تطبیق بند کړئ

د ملګروملتونو د بشري حقونو لوی کمېشنر ولکر ټرک

نن د ډسمبر لسمه د بشري حقونو نړیواله ورځ ده.

د ملګروملتونو د بشري حقونو لوی کمېشنر د دې ورځې په مناسبت د طالبانو پر حکومت غږ کړی چې د مجرمانو لپاره د اعدامونو حکمونه بند کړي.

ولکر ټرک پرون په یوه خبري غونډه کې وویل، د دې ډول حکمونو تطبیق د بشري حقونو له نړیوالې اعلامیې څخه چې افغانستان هم لاسلیک کړې ده، سرغړونه ده.

ټرک زیاتوي: "د طالبانو د سرپرست حکومت له مشرانو غواړم چې د راتلونکو اعدامونو په برخه کې قانوني مهلت په پام کې ونیسي او د اعدام حکم لغو کړي."

هغه په عام محضر کې د دُرو وهلو د بندېدو غوښتنه هم وکړه.

طالبانو د بشري حقونو د نړیوالې ورځې په درشل کې د تېرې چارشنبې په ورځ په فراه ولایت کې د خپلو مشرانو په حضور کې د اعدام لومړنی حکم تطبیق کړ.

دوی همداراز په پروان، لوګر، غور، تخار، کندهار او نورو ولایتونو کې لسګونه کسان هم په درو وهلي دي.

د طالبانو دا اقدام نړیوالې ټولنې، د بشري حقونو مدافع ډلو او بېلابېلو هېوادونو غندلی دی.

اوچا په ۲۰۲۲ کال کې شاوخوا ۲۵ میلیون افغانانو ته بشري مرستې رسولي

ارشیف

د ملګرو ملتونو د بشري مرستو د همغږۍ اداره یا اوچا وايي چې په ۲۰۲۲ کال کې یې شاوخوا ۲۵ میلیون افغانانو ته بشري مرستې رسولي دي.

اوچا پرون پر ټوېټر په یوه بیان کې وویل چې د سږني کال په ترڅ کې یې د بشري مرستو د رسولو عملیات د افغانستان په ټولو ولسوالیو کې ترسره کړي دي.

دې ادارې همداراز ویلي چې خیریه ټولنې له مرستندویو هېوادونو غواړي چې د افغانستان خلکو ته بشري مرستې وخت ته پام سره برابرې کړي.

د ملګرو ملتونو ځینو اړوندو ادارو او د ماشومانو د ملاتړ ټولنې اټکل کړی چې په راروان ۲۰۲۳ کال کې به په افغانستان کې خوراکي موادو ته د اړو افغانانو شمېر ۲۸ میلیون ته لوړ شي.

د افغانستان مشهوره سندرغاړې قمرګل مړه شوه

د افغانستان نامتو سندرغاړې قمرګل

د افغانستان نامتو سندرغاړې قمرګل د ډسمبر په نهمه د جمعې په ورځ د کاناډا په ټورنټو کې مړه شوه.

د هغې کورنۍ وايي، مېرمن قمرګل ناروغۍ له امله د ټورنټو په یوه روغتون کې ساه ورکړې، خو دا یې نه دي ویلي چې ناروغي یې څه وه.

مېرمن قمرګل د افغانستان پېژندل شوې سندرغاړې وه چې په پښتو او دري ژبو یې ډېرې سندرې ویلي دي.

قمرګله په کال ١٣٣٦ لمریز د ننګرهار ولایت د کوز کونړ ښېوې ولسوالۍ اوسېدونکې وه چې په ۷ کلنۍ کې یې په کلیوالي کچه سندرو ویلو ته مخه کړه.

د هغې لومړۍ سندره "په ما مینه سترګې دې سرې دي، نن دې ډېر ژړلي دي دینه" د راډیو افغانستان د څپو له لارې تر خلکو ورسېده او ګڼ مینه وال یې پیدا کړل.

هغې لا دېرش کاله پخوا په راډیو افغانستان کې له ٣٠٠٠ زیاتې سندرې ثبت کړې وې.

نوموړې د خپل هنري ژوند په دې اوږد سفر کې د محمد ظاهرشاه، سردار داود خان، ببرک کارمل او ډاکتر نجیب الله د حکومتونو پر مهال د سندرو ویلو له امله بېلابېل مډالونه ترلاسه کړي دي.

دغه شان یې وروستۍ لاسته راوړنه د افغانستان د بلبلې لقب د پخواني افغان ولسمشر ولسمشر حامد کرزي له خوا ورته ورکړل شوى دى.

هغې د افغانستان د کال د سندرغاړې لقب هم خپل کړی.

مېرمن قمرګل په افغانستان کې د کورنیو جګړو له امله لومړی پاکستان او وروسته له هغه ځایه کاناډا ته کډواله شوې وه.

قمرګل له استاد محمدین زاخېل سره واده کړی چې د ګډ ژوند ثمره یې درې لوڼې او درې زامن دي.

زاخېل هم د افغانستان له نامتو سندرغاړو و چې څو کاله مخکې مړ شوی دی.

د قمرګل زوی ایمل زاخېل هم یو ځوان سندرغاړی دی چې په کاناډا کې فعالیتونه لري او د خپل مور او پلار لاره تعقیبوي.

افغان لوبغاړي 'حمید خوشدل' د بدني ښکلا په نړیوالو لوبو کې مډال وګاټه

افغان لوبغاړي حمید خوشدل د فیټنس یا بدني ښکلا د نړیوالې اتلولۍ په لوبو کې د ژېړو مډال وګاټه.

افغان لوبغاړي حمید خوشدل د فیټنس یا بدني ښکلا د نړیوالې اتلولۍ په لوبو کې د ژېړو مډال وګاټه.

د افغانستان د بدني ښکلا فدراسیون پر خپل فېسبوک لیکلي چې خوشدل د جمعې په ورځ په ټایلند کې د ۴۴ هېوادونو د لوبغاړو په منځ کې درېیم مقام او د ژېړو مډال خپل کړ.

تمه ده چې د شنبې په ورځ به څلور نور افغان لوبغاړي هم د فیټنس او اندام د ښکلا په دغو لوبو کې برخه واخلي.

ټولټال پنځه افغان لوبغاړي د ټایلند په کوربه توب د اندام د ښکلا یا روزنې او فیټنس نړیوالو اتلولیزو لوبو ته ورغلي دي.

ولکر ټرک: افغان مېرمنې په سیستماتیک ډول څنډې ته شوي

د طالبانو د کډوالو او بېرته راستنېدونکو چارو وزارت له لوري د ګوښه شویو ښځینه مامورینو انځور

د ملګرو ملتونو د بشري حقونو عالي کمېشنر ولکر ټرک وایي، د طالبانو تر واکمنۍ لاندې افغان ښځې او نجونې په سیستماتیک ډول څنډې ته شوي دي.

ټرک دغه څرګندونې نن په جینوا کې په یوه خبري کنفرانس کې خبریالانو ته وکړې او ویې ویل، د ژوند له ټولو اړخونو څخه په دوامداره توګه د ښځو او نجونو ګوښه کول په دې نړۍ کې بې ساري دي.

ټرک دغه راز د ښځو پر وړاندې د تاوتریخوالي د له منځه وړلو لپاره نړیوال ۱۶ ورځني کمپاین ته چې سبا د بشري حقونو له نړیوالې ورځې سره هممهاله پای ته رسېږي، په اشاره نن په یوه ټوېټ کې ویلي: "موږ باید د حقوقو ضد او د جنسیت ضد ویناوو پر وړاندې په ګډه ودرېږو."

نوموړی وایي، په ټولیزه توګه جنسیتي مساواتو ته باید پام وشي چې د ښځو حقونه بشري حقونه دي.

د بشري حقونو لپاره د ملګرو ملتونو عالي کمېشنر دغه څرګندونې داسې مهال کوي چې پر افغانستان د طالبانو له بیا واکمنېدو راهیسې، پر نجونو او ښځو د زده کړې او کار کولو په برخه کې ډېر محدودیتونه لګول شوي دي.

اندونیزیا کې د افغانستان په اړه نړیوال کنفرانس پای ته ورسېد

د جاکارتا یوه څنډه

په اندونیزیا کې د افغانستان په اړه په یوه نړیوال کنفرانس کې یوې تلپاتې سولې، ثبات او سوکالۍ ته د رسېدو لپاره له افغانانو سره د پیوستون او په دې برخه کې د ښځو د تعلیم پر اهمیت ټینګار وکړ.

د کنفرانس د پای په اعلامیه کې په شاوخوا لسو مواردو ټینګار شوی چې په سر کې یې د تلپاتې سولې لپاره د بین الافغاني خبرو یادونه شوې.

همدارنګه د افغانستان د پرمختګ،سولې او ثبات لپاره د ښځو رول حیاتي بلل شوی او ټينګار شوی که په ټولنه کې مساوي او معنی داره ونډه ورکړل شي له شک پرته به دا هدفونه ترلاسه شي.

طالبانو لا هم اجازه نه ده ورکړې، چې نجونې په افغانستان کې تر شپږم ټولګي پورته نور تعلیم وکړي او ښځو ته هم په اکثرو ادارو کې د کار کولو اجازه نه ده ورکړل شوې.

دا نړیوال کنفرانس د افغان مېرمنو د تعلیم په اړه د اندونیزیا او قطر په ګډ کوربه توب پرون ترسره شو چې په کې د امریکا، قطر، اندونیزیا، پاکستان په ګډون د شلو هېوادونو او سازمانونو استازیو برخه اخیستې وه.

په دغه کنفرانس کې د طالبانو کوم استازی نه تر سترګو کېږي، خو د نړۍ ځینو رهبرانو په کې ګډون کړی دی.

سېف د چلډرن: په خوارځواکۍ د اخته افغان ماشومانو شمېر ۵۰ سلنه ډېر شوی

ارشیف: په هرات کې په خوارځواکۍ اخته ماشوم

د ماشومانو د ملاتړ موسسه وايي، چې د تېر کال پرتله په افغانستان کې په خوارځواکۍ د اخته ماشومانو شمېر ۵۰ سلنه زیات شوی دی.

د سېف د چلډرن ویاند عاشق اله مندوزي پرون ماښام ازادي راډیو ته وویل چې د ماشومان وضعیت به په راروان ژمي کې د اندېښنې وړ وي.

هغه وویل: "د تازه څېړنې له مخې په خوارځواکۍ د اخته ماشومانو شمېر ۵۰ سلنه ډېر شوی دی. په وروستیو کې د خوارځواکۍ د درملنې د خدماتو غوښتنه په داسې حال کې ډېره شوې، چې کورنۍ به په افغانستان کې د لوږې له سخت بحران سره مقابله کوي."

د ماشومانو د ملاتړ موسسې د شمېرو له مخې دا مهال په افغانستان کې په خوارځواکۍ د اخته ماشومانو شمېر څلورو میلیونو ته رسېږي.

پاکستان د افغان نجونو د زده کړو پر اهمیت ټینګار وکړ

د پاکستان د بهرنیو چارو وزیر بلاول بوټو زرداري

د پاکستان د بهرنیو چارو وزیر بلاول بوټو زرداري په اندونیزیا کې د افغان مېرمنو د تعلیم په اړه په کنفرانس کې خبرې وکړې.

د پاکستان د بهرنیو چارو وزارت پرون په خپل ټوېټر کې خبر ورکړی چې پرون په دې کنفرانس کې زرداري افغانستان کې د ښځو او نجونو د تعلیم پر اهمیت ټینګار وکړ.

په دغه کنفرانس کې د طالبانو کوم استازی نه تر سترګو کېږي، خو د نړۍ ځینو رهبرانو په کې ګډون کړی دی.

طالبانو لا هم اجازه نه ده ورکړې چې نجونې په افغانستان کې تر شپږم ټولګي پورته نور تعلیم وکړي او ښځو ته هم په اکثرو ادارو کې د کار کولو اجازه نه ده ورکړل شوې.

ملګري ملتونه: مدني ټولنې د افغان نجونو پرمخ د ښوونځیو پرانیستل غواړي

په نیمروز کې د نجونو یو ښوونځی

د ملګرو ملتونو د ښځو څانګه وايي، مدني ټولنې غړي همدا غوښتنه لري چې په افغانستان کې د ټولو نجونو پرمخ د ښوونځیو دروازې پرانیستل شي.

د ملګرو ملتونو دغې څانګې د ښځو په وړاندې د تاوتریخوالي له منځه وړلو ۱۶ ورځني کمپاین په مناسبت چې سبا د ډسمبر لسمه یې وروستۍ ورځ ده له یوه ټوېټ سره پیغام خپور کړی.

د ملګرو ملتونو د ښځو څانګې ویلي، دوی د ۱۶ ورځني کمپاین پر مهال د مدني ټولنې له همکارانو پوښتلي وو چې نړۍ ته دا په ډګه کړي چې دا مهال له افغان مېرمنو او نجونو سره څه روان دي.

د ویډیويي پیغام په حواله، «د افغانستان تر ۵۰ سلنه زیات وګړي ښځې دي، د دوی پرمخ د ښوونځیو تړل د افغان ټولنې د ویجاړۍ په معنی دي.»

په ویډیويي پیغام کې له نړیوالې ټولنې غوښتنه شوې چې د افغان مېرمنو غږ له پامه ونه غورځوي.

د نومبر ۲۵مه د ښځو په وړاندې د تاوتریخوالي له منځه وړلو نړیواله ورځ وه چې له هغې ورځې د دې تاوتریخوالي له منځه وړلو ۱۶ ورځنی کمپاین روان دی او سبا د ډسمبر لسمه چې د بشري حقونو نړیواله ورځ ده پای ته رسېږي.

نور راوښيه

XS
SM
MD
LG