د لاسرسۍ وړ لېنکونه

تازه خبر
شنبه ۱۲ لیندۍ ۱۴۰۱ کابل ۱۱:۱۸

نړۍ

د پاکستان ټاکنو کمېسيون عمران خان د پنځه کلونو لپاره ټاکنو کې له نوماند کېدو منع کړ

د پاکستان پخوانی صدراعظم عمران خان

د پاکستان د ټاکنو کمېسیون نن (د اکټوبر ۲۱مه) دد ې هېواد پخوانی صدراعظم عمران خان د پنځو کلونو لپاره په انتخاباتو کې د ملکي څوکیو لپاره له نوماند کېدو منع کړ.

دې کمېسیون عمران خان تورن کړی چې د واکمنۍ پر مهال يې د دولتي مشرانو څخه ترلاسه کړي سوغاتونه په غیر قانوني ډول پلورلي دي.

د ياد کمېسیون چارواکو عمران خان په دې هم تورن کړی چې د دې سوغاتونو له پلورل څخه ترلاسه شویو پیسو په پټولو یې د منتخبو حکومتي چارواکو هغه ژمنه ماته کړې چې باید خپلې پانګې په ډاګه کړي.

د پاکستان حکومتي چارواکې اجازه لري څو له یو ټاکلي ارزښت کم سوغاتونه له ځان سره وساتي.

خو د عمران خان وکیل ګرهر خان ویلي، د انتخاباتو د کمېسيون دا پرېکړه به د پاکستان په ستره محکمه کې وننګوي.

د پاکستان د ټاکنو کمېسیون د خان په اړه د جنايي قضیې د پرانیستلو حکم هم کړی دی.

د عمران خان د تحریک انصاف ګوند له خپلو ملاتړو غوښتي چې د انتخاباتو د کمېسيون پر دې پرېکړه د اعتراض لپاره به سوله‌يیز لاریونونه وکړي.

د ورځې تازه خبرونه دلته ولولئ

سپینه ماڼۍ: په اوس وخت کې بایډن له پوتین سره د خبرو نیت نه لري

د امریکا ولسمشر جوبایډن

د امریکا ولسمشر جوبایډن نیت نه لري چې په اوس وخت کې د روسیې له ولسمشر ولادمیر پوتین سره خبرې وکړي.

دا خبره د سپینې ماڼۍ د ملي امنیت ویاند جان کربي پرون جمعه په یوه بیان کې وکړه او ویې ویل چې د دغو خبرو لپاره شرایط اوس سم برابر نه دي.

هغه وویل، پوتین تراوسه هېڅ نښه نده ښودلې چې هغه دې هر ډول خبرو ته د نوموړي لېوالتیا وښيي.

بایډن د پنجشنبې په ورځ له فرانسوي سیال ایمانویل مکرون سره په یوه ګډ خبري کنفرانس کې وویل چې دی لېواله دی چې د اوکراین د جګړې د پای ته رسېدو لپاره له پوتین سره خبرې وکړي، خو که هغه وغواړي چې دغه جګړه پای ته ورسوي.

د فوټبال نړیوال جام سیالۍ؛ نن د دې سیالیو دویم پړاو پیلېږي

د جنوبي کوریا لوبډله د خپلې بریا د نمانځلو پرمهال

نن د فوټبال د نړیوال جام دویم پړاو سیالۍ پیلېږي.

د دې جام له ۳۲ ټیمونو ۱۶ یې دې پړاو ته لاره موندلې او نن به د څلورو ټیمونو ترمنځ لوبې ترسره شي.

هالنډ او امریکا سره لوبه کوي او ارجنټاین به له استرالیا سره د سیالي ډګر ته وځي.

پرون د دې جام د لومړي پړاو وروستۍ لوبې ترسره شوې.

برازیل یو د صفر پر وړاندې کامرون ته ماتې ورکړه.

سویس درې د دوو په مقابل کې لوبه له سربیا وګټله او اوروګوای هم دوه د صفر په مقابل کې ګانا ماته کړه.

د دغه جام سیالۍ به د ډسمبر تر اتلسمې پورې دوام وکړي.

فوټبال؛ نن په وروستي ګروپي پړاو کې څلور لوبې کېږي

قطر کې د فوټبال نړيوال جام

په قطر کې د فوټبال نړیوال جام سیالیو په لړ کې نن په وروستي ګروپي پړاو کې څلور مسابقې کېږي.

د کابل پر وخت د ماښام اووه نیمې بجې جنوبي افریقا له پرتګال او ګانا له یوروګوای سره مسابقه کوي.

د شپې یوولس نیمې بجې بیا سربیا له سویس او کامرون له برازیل سره مسابقه کوي.

د جاپان او هسپانیا لوبډلې د تېرې شپې په سیالیو کې له بري وروسته د فوټبال د نړیوال جام منځلوبو ته ووتلې.

جاپان هسپانیا ته د یو په وړاندې په دوو ماتې ورکړه او له دې سره هممهاله جرمني له کوستاریکا څخه د دوو په وړاندې په ۴ ګولونو وګټله.

تر اوسه ۱۲ ټیمونه توانېدلي چې د حذف کېدو پړاو ته لار پیدا کړي او د نن شپې څلور ګټونکي ټیمونه به د ۱۶ ټیمونو بل پړاو ته لار ومومي.

د نړیوال جام د حذفي پړاو به سبا د هالنډ او د امریکا د متحدو ایالتونو د ټیمونو ترمنځ په مسابقې سره پیل شي.

اسپانيا کې د امريکا سفارت ته استول شوی بم شنډ کړی شوی دی

د اسپانيا پوليس

په اسپانیا کې د بمونو د شنډولو متخصصانو پرون هغه بم شند کړ چې په یوه لیک کې دننه، په مادرید کې د امریکا سفارت ته استول شوی و.

دا په تېرو څو ورځو کې په اسپانیا کې جګپوړو چارواکو ته د پوستې په وسیله د بمونو د استولو لسمه پېښه وه چې تېره اونۍ صدراعظم پیدرو سانچیز ته په پوسته کې د بم په استولو سره پیل شوه.

دې ته ورته لیکونه د دفاع وزارت، د هوايي ځواک قرارګاه، د وسلو جوړولو یوې فابریکې او د اوکراین سفارت ته هم استول شوي وو.

د اسپانیا دفاع وزیرې مارګریتا روبلیس پرون له خپل اوکرایني سیال الکسي ریزنیکوف سره په کتنه کې وویل چې، دا ګواښونه به د دې هېواد، د اوکراین د برحق داعیې له ملاتړ څخه په شا نه کړي.

روسيې د اوکراين پر خرسون ښار بيا بريدونه کړي

انځور - ارشيف

د اوکراین جنوبي خرسون ښار پرون پنجشنبې، یو ځل بیا د روسيې د پوځ په توغندويي حملو کې په نښه شو.

د دې ښار پوځي ادارې پرون وویل چې، په دې حملو کې لږ تر لږه یو تن وژل شوی او په ښار کې د برښنا جریان پرې شوی دی.

د اوکراین پوځ د اوکراین په ختیځه جبهه کې بخموت ښار ته نژدې هم پر ځینو ښارونو د توغندويي حملو خبر ورکړی.

پر خرسون ښار د روسي ځواکونو په راکټي حملو کې چې د نوامبر په شلمه پیل شوې، تر اوسه شل کسان وژل شوي او د ماشومانو په ګډون څلوېښت کسان ټپیان شوي.

د جاپان او هسپانيا لوبډلې د فوټبال نړيوال جام منځ‌لوبو ته ووتلې

د جاپان او هسپانيا فوټبال لوبه

د جاپان او هسپانیا لوبډلې د تېرې شپې په سیالیو کې له بري وروسته د فوټبال د نړیوال جام منځ‌لوبو ته ووتلې.

جاپان هسپانیا ته د یو په وړاندې په دوه ماتې ورکړه او له دې سره هم‌مهاله جرمني له کوستاریکا څخه د دوو په وړاندې په ۴ ګولونو وګټله.

سره له دې چې جاپان تېره شپه کوستاریکا ته ماتې ورکړه خو جاپان د شپږو امتیازونو خاوند شو او د اي ګروپ د لومړي ټیم په توګه یې بل پړاو ته لاره ومونده او هسپانیا، چې د جرمني په شان یې ۴ امتیازونه لرل، د ګولونو د امتیاز له کبله منځ‌لوبو ته ووت او کوستاریکا خو جرمني له نړیوال جامه رخصت شول.

د فوټبال نړيوال جام چې قطر کې روان دی د دسمبر تر ۱۹مې به دوام وکړي.

اوکرایني چارواکي: دونیڅک کې سختې نښتې شوي

اوکراین کې جګړه

اوکرایني ځواکونو په ختیځ کې د ډونیڅک په سیمه کې سختې جګړې کړي دي.

دا خبره د اوکراین د پوځ لوی درستیز نن کړې او زیاته کړې یې ده چې روسانو د اوکراین په سویل خرسون کې خپلې دفاعي کرښې قوي کړي او د دې ښار پر مرکز يې د توغندیو ورولو ته دوام ورکړی.

خرسون تېره میاشت اوکرایني ځواکونو له روسانو بېرته نیولی و.

بل خوا په اوکراین کې تخنیکي اینجنران هڅه کوي څو وکولی شي د روسیې د بمباریو په پایله کې پرچاو شوې برښنا بېرته فعاله کړي.

د روسیې پرلپسې بمباریو په اوکراین کې میلونونه اوکراینیان د ساړه ژمي په درشل کې بې برښنا کړي.

د اکراین لوی درستیز وویل؛ په دنباس کې چېرته چې روسان هڅه کوي په جګړه کې برلاسی ولري د روسي او اوکرایني ځواکونو ترمنځ سخته جګړه روانه ده.

هغه زیاته کړه، د روسیې توپچي د اوکرایني ځواکونو پوستې او څو ښارګوټي یې په نښه کړي دي.

لوی درستیز وايي روسي ځواکونو د لیمان ښار ته نژدې دفاعي کرښې جوړې کړي دي او تازه مهمات هلته ځای پر ځای کوي.

پاکستان کې د ډبرو سکرو په يوه کان کې د چاودنې له امله ۹ کسان وژل شوي دي

پاکستان کې د ډبرو سکرو يو کان، انځور - ارشيف

پاکستاني چارواکي د دې هېواد د ډبرو د سکرو په یوه کان کې په یوه چاودنه کې د لږ تر لږه نهه کان کېندونکو د وژل کېدو خبر ورکوي.

د کانونو او طبعي منرالونو په چارو کې د پاکستان د صدراعظم یوه سلاکار محد عارف ویلي چې دا پېښه د خیبر پښتونخوا ایالت د اورکزو سیمې په یوه کان کې د میتان ګازو د چاودنې له امله رامنځته شوې ده.

په دې پېښه کې څلور تنه نور ټپیان شوي هم دي.

د عارف په وینا په دې اړه څېړنه پیل شوې ده چې چاودنه څنګه او ولې رامنځته شوې ده.

قطر کې د فوټبال نړيوال جام؛ ټاکل شوې نن څلور لوبې ترسره شي

قطر کې د فوټبال نړيوال جام

کاناډا له مراکش، کرویشیا له بلجیم، جاپان له هسپانیا او کاستاریکا له جرمني سره لوبې کوي.

د دغو لوبو په نتیجه کې به د بل دور یو شمېر نور ټیمونه هم مشخص شي.

پرون د اتو ټیمونو ترمنځ د لوبو په نتیجه کې د دغه جام بل پړاو ته چې ۱۶ ټیمونه به سره لوبې کوي، اته ټیمونه ووتل.

ارجنټاین دوه د صفرپه مقابل کې پولنډ ته ماتې ورکړه، مکسیکو دوه د یوه په مقابل کې له سعودي عربستان لوبه وګټله.

اسټرالیا یو د صفر په مقابل کې ډنمارک مات کړ او تونس هم له فرانسې لوبه یو د صفر په مقابل کې وګټله.

د فوتبال د نړیوال جام بل پړاو لوبې به چې د نکوټ پړاو بلل کېږي، بل سبا د ۱۶ ټیمونو ترمنځ د شنبې په ورځ پیل شي.

د فوتبال د نړیوال جام سیالۍ به د ډسمبر تر اتلسمې پورې دوام وکړي.

اسلامي دولت ډلې د خپل مشر وژل کېدل تأييد کړل

انځور - ارشيف

د اسلامي دولت ډلې یا داعش ومنله چې مشر یې په دې وروستیو کې په جګړه کې وژل شوی دی.

د دغې سخت دریځې ډلې ویاند په یوه صوتي پیغام کې چې پرون چهارشنبې یې خپور کړ، یوازې د خپل مشر ابو الحسن الهاشمي القریشي مړینه تایید کړې خو د څرنګوالي په اړه یې نور جزیات نه‌دي ورکړي.

د اسوشیتید پرس اژانس د راپور له‌مخې د امریکا پوځ وویل، القریشي د اکتوبر میاشتې په نیمایي کې د سوریې په جنوبي ښار درعا کې د سوریې د یاغیانو په عملیاتو کې وژل شوی دی.

په برېتانیا کې مېشت د سوریې د بشري حقونو یوې څارونکې ډلې په اکتوبر میاشت کې ویلي و چې، د سوریې هغو یاغیانو چې مخکې یې له حکومت سره روغه جوړه کړې، د درعا ولایت په جاسیم کلي کې د داعش یو شمېر وسله‌وال وژلي دي.

دغې ډلې په راپور کې ویلي و چې، په وژل شویو کې د دې ډلې یو عراقي مشر هم شامل دی چې د نښتې پر مهال یې په ځان پورې تړلي چاودېدونکي موادو ته چادونه ورکړې وه.

دا د داعش سخت دریځې ډلې دوهم مشر دی چې په روان کال کې وژل کېږي.

تر هغه مخکې د دې ډلې پخوانی مشر ابو ابراهیم الهاشمي القریشي په فبروري میاشت کې د سوریې په شمال لوېدیځ کې د امریکا په یوه برید کې وژل شوی و.

نور راوښيه

XS
SM
MD
LG