د لاسرسۍ وړ لېنکونه

تازه خبر
سه شنبه ۸ لیندۍ ۱۴۰۱ کابل ۰۱:۴۵

ښځې

طالبان: د نجونو پر مخ د ښوونځیو په پرانېستلو کار روان دی

په فراه کې د نجونو تړل شوی ښوونځی

د طالبانو د حکومت ویاند په ترکیه کې د علماوو یوې غونډې ته ژمنه کړې چې د نجونو پر مخ د ښوونځیو په پرانېستلو کار روان دی.

د علماو او مدارسو د اتحادیې اوومه غونډه د ترکیې په دیاربکر کې نن جوړه شوې.

مجاهد دې غونډې ته ویلي چې د دوی حکومت نجونو ته د نصاب په سمونې،د تګ راتګ لپاره د ترانسپورټي وسایلو په چمتو کولو او د جلا ښوونیز سیستم په جوړولو بوخت دی.

د طالبانو حکومت له شپږم ټولګي پورته لکونه نجونې له زده کړو محرومې کړي.

د دوی ویاند مجاهد په وار وار د ښوونځیو د پرانیستلو ژمنې ورکړي، خو لا هم د یوه کال په تېرېدو دا ژمنې نه دي عملي شوي.

د ورځې تازه خبرونه دلته ولولئ

ریچارډ بینیټ: طالبانو د افغان ښځو حقوق تر پښو لاندې کړي

ریچارډ بینیټ

د افغانستان د بشري حقونو لپاره د ملګرو ملتونو ځانګړي راپور ورکوونکی له هغو افغان مېرمنو څخه ملاتړ څرګند کړی چې د ده په وینا طالبانو یې حقوق تر پښو لاندې کړي.

ریچارډ بینیټ پرون د ښځو پر وړاندې د تاوتریخوالي د مخنیوي د نړیوالې ورځې په مناست پر ټویټر په یوه بیان کې ویلي، دی د هغو افغان مېرمنو تر څنګ ولاړ دی چې په وروستیو څو میاشتو کې وهل شوي، نیول شوې دي او ډېری اساسي حقوق او د بیان، غونډو، تعلیم او ژوند لپاره آزادۍ یې ترپښو لاندې شوې دي.

پرون د نومبر په ۲۵ د ښځو پر وړاندې د تاوتریخوالي د مخنیوي په نړیواله ورځ په افغانستان کې د ملګرو ملتونو مرستندوی دفتر یوناما هم په یوه بیان کې د افغان ښځو پر وضعیت اندېښنه وښوده او افغانستان یې د نړۍ هغه هېواد وباله چې له ښځو سره په ډېره لوړه کچه تاوتریخوالی په کې کېږي.

په کابل کې یو شمېر ښځو بیا لاریون وکړ

په کابل کې د ښځینه معترضو یو انځور - May 26 2022

په کابل ښار کې یو شمېر ښځو نن د نجونو پر منځنیو ښوونځیو او لېسو د بندیز پر وړاندې د اعتراض لپاره لاریون وکړ.

په هغو ویډیوګانو او تصویرونو کې چې ازادي راډیو ته رسېدلي، یو شمېر ښځې ښکاري چې د یوه ښوونځي مخې ته د اعتراض په دود ولاړې دي او شعار ورکوي چې د نجونو پر زده کړو بندیزو په افغانستان کې د ښځو پر وړاندې د طالبانو تاوتریخوالی ښيي.

د مظاهرې یوې ګډونوالې ازادي راډیو ته وویل چې طالبانو د دوی د لاریون مخه ونیوله.

طالبانو له څه باندې ۴۰۰ ورځو راهیسې له ۶ د پورته ټولګیو د زده کوونکو نجونو پر تعلیم بندیز لګولی او په دې اړه یې کورنۍ او نړیوالې غوښتنې له پامه غورځولې دي.

رینا امیري یوځل بیا د افغان ښځو د مهمو حقونو پر تامین ټینګار وکړ

د افغانستان د بشري حقونو او ښځو لپاره د امریکا ځانګړې استازې رینا امیري

د افغانستان د بشري حقونو او ښځو لپاره د امریکا ځانګړې استازې رینا امیري وایي، طالبان چې ادعا کوي، افغانستان د اقتصادي خپلواکۍ لور ته روان دی، نه شي کولای د دې هېواد د نیمایي وګړو له زده کړې او کاري فرصتونو سترګې پټې کړي.

مېرمن امیري نن په څو ټوېټونو کې ویلي چې د ښځو او نجونو په ګډون د ټولو افغانانو ښوونه او روزنه له بېوزلۍ څخه د افغانستان د وتلو او د هیلو د راژوندي کولو لپاره یوه کلیدي مسئله ده.

رینا امیري ویلي، ۴۰۰ ورځې کېږي چې طالبانو نجونې ښوونځي ته له تلو منع کړي دي.

د دې په وینا دوی په زیاتېدونکي ډول د لوړو زده کړو له بهیر څخه نجونې بې برخې کوي، په تېره هزاره نجونې او ښځې په نښه کوي.

رینا امیري وایي، د کره راپورونو له مخې طالبانو د کابل پوهنتون له لیلیې هزاره ښځې ایستلي او د لوړې زده کړو راتلونکې یې له خطرسره مخ کړي او هم داسې راپورونه شته چې ښځې په ازموینه کې د لوړو زده کړو هغو رشتو ته له داخلېدو منع شوي چې هغه د دوی لپاره سختې بلل شوي دي.

د طالبانو د لوړو زده کړو وزارت څه موده مخکې د کابل پوهنتون له لیلیې څخه د یو شمېر نجونو ایستل د لیلیې له ټاکل شویو اصولو سرغړونه بللې ده.

ملګري ملتونه په افغانستان کې د ښځو سره د مرستې لپاره مرکزونه جوړوي

ارشیف: په هرات کې یو شمېر اړمنې ښځې

د ملګرو ملتونو د ښځو څانګه وایي، د ناورین ځپلو ښځو د مرستې لپاره په ټول افغانستان کې یو شمېر مرکزونه جوړوي.

دا خبره یادې ادارې دوشنبه په یوه ټوېټ کې کړې ده.

د ټوېټ له مخې له ملګرو ملتونو سره به په دې کار کې د جاپان هېواد، د ژغورنې نړیواله کمېټه او د ښځو ځينې سازمانونه برخه ولري.

تمه ده چې څه باندې پنځه زره ښځې د دې پروګرام له لارې مرستې ترلاسه کړي او تر څنګ یې د خپلو غونډو لپاره ځای ولري.

متحده عربي امارات: د افغان نجونو د ښوونځیو تړل د منلو نه دي

ارشیف: په نیمروز کې د نجونو یو ښوونځی

د متحده عربي اماراتو چارواکو ویلي د افغان نجونو پر وړاندې د ښوونځیو تړل دوی ته د منلو نه دي.

په ملګرو ملتونو کې د متحده عربي اماراتو دایمې استازې لانا زکي نسیبه د امنیت شورا په عمومي غونډه کې پرون وویل: "نږدې څلور سوه ورځې کېږي چې افغانستان کې نجونې متوسطه او لیسو ته نه پرېښودل کېږي. هېڅ اګر او مګر نشته. متحده عربي امارات دا اقدام او د طالبانو له بیا واکمنېدو راهیسې ګڼ نور محدودیتونه هېڅ د منلو وړ نه بولي."

سفیرې لانا زیاته کړه چې له ټولنیز ژونده د افغان مېرمنو او نجونو محرومول دا په ډاګه کوي چې تاوتریخوالی څرنګه بڼې خپلوي.

د متحده عربي اماراتو دې لوړپوړې ډیپلوماټې ټینګار وکړ چې نړیواله ټولنه باید د دې ستونزې د حل لپاره لاس په کار شي.

طالبان د نړیوالو له فشارونو سره سره د نجونو ښوونځي نه دي پرانیستي خو ژمنې یې کړي چې د پرانیستلو لپاره یې کار روان کړی.

د بشري حقونو څار سازمان: طالبان په ټولو امکاناتو د معترضو ښځو مخه نیسي

ارشیف: په کابل کې د معترضو ښځو د لاریون انځور - May 10 2022

د بشري حقونو د څار سازمان په طالبانو تور لګولی چې له خپلو ټولو امکاناتو کار اخلي څو د معترضو ښځو مخه ونیسي.

دغه سازمان نن په یوه اعلامیه کې د طالبانو له خوا د درېیو معترضو ښځو بندیانېدو ته اشاره کړې او ادعا یې کړې چې په زندان کې ورسره تاوتریخوالی شوی.

د بشري حقونو د څار سازمان د ښځو د برخې مرستیالې هیدربار په حواله په دې اعلامیه کې راغلي چې طالبان د دې په خبره له معترضو ښځو خطر احساسوي او تر وروستي حده هڅه کوي چې د هغوی غږ خاموشه کړي.

د بشري حقونو د څار سازمان په اعلامیه کې د تمنا پریاني په شمول د درېیو هغو ښځو یادونه شوې چې مخکې طالبانو نیولې وې او هرې یوې د سخت تاوتریخوالي یادونه کړې.

دوی تور پورې کړی چې طالبانو په زندان کې وهلي دي او ان یې په برقي ډنډو شاک ورکړی.

طالبانو د بشري حقونو د څار سازمان د نننۍ اعلامیې په تړاو څه نه دي ویلي، خو مخکې یې د ښځو پر وړاندې تاوتریخوالی رد کړی.

ملګري ملتونه په هلمند او نیمروز کې ۶۲ قابله ګانو ته روزنه ورکوي

د افغانستان په عمومي نقشه کې د هلمند ولایت موقعیت

د افغانستان لپاره د ملګروملتونو د وګړو صندوق په هلمند او نیمروز کې ۶۲ قابله ګانو د روزنې د پیلدو خبر ورکوي.

د ملګرو ملتونو د وګړو صندوق په یوه ټوېټ کې ویلي چې دغه قابله ګانې به د زده کړو له بشړېدو وروسته په خپلو ټولنو کې په هغو روغتیایي خونو کې د زېږون، میندواو نوي زېږېدلو ماشومانو او همدارنګه لویانو ته روغتیایي خدمتونه وړاندې کوي چې د دې صندوق پر مټ فعالې شوي دي.

د دا ډول روغتیایي خونو لپاره د قابله ګانو د روزنې د پروګرام په ترڅ کې تېره اونۍ له دېرشو زیاتې قابله ګانې په کندهار کې له یوه اته میاشتني کورس څخه فارغې شوې.

افغانستان چې د روغتیایي خدماتو په برخه کې له ډېرو ستونزو سره مخامخ دی، د لیرې پرتو سیمو خلک یې بیا تر ډېره دغه اوسني وضعیت اغېزمن کړي دي.

د بدخشان پوهنتون ښځینه محصلانو نندارتون جوړ کړ

په بدخشان کې د جوړ شوي نندارتون یو انځور

د بدخشان پوهنتون ښځينه محصلانو نندارتون جو کړ.

په بدخشان کې د طالبانو حکومت د اطلاعاتو او فرهنګ رییس معزالدین احمدي ازادي راډيو ته وویل، دا نندارتون چې د دوشنبې په ورځ د کار پنځونکو مېرمنو په نوم جوړ شو، د پرانیستې په مراسمو کې یې د بدخشان پوهنتون د استادانو او محصلانو ترڅنګ د اطلاعاتو او فرهنګ ریاست استازي هم ګډون کړی و.

د بدخشان پوهنتون رييس پوهنیار نقیب الدین قاضي زاده د نندارتون ستاینه وکړه او محصلانو ته یې ډاډ ورکړ چې د ورته پروګرامونو په جوړولو کې یې ملاتړی دی.

د بدخشان د اطلاعاتو او فرهنګ ریاست استازي صدیقي لعلزاد د نجونو محصلانو لخوا د نندارتون جوړول ارزښتمن کار وباله او د ورته نورو نندارتونونو د جوړېدو غوښتنه یې وکړه.

په دې نندارتون کې چې د بدخشان پوهنتون نجونو محصلانو خپل لاسي صنایع نندارې ته ايښي وو، د خپلو کارونو د ودې په خاطر یې د حکومت او موسسو د مرستو غوښتنه هم وکړه.

د یادونې ده چې دوه ورځې مخکې هم په بدخشان ولایت کې یو شمېر ښځو د لاسي صنایعو نندارتون جوړ کړی و.

د ارورا کلنۍ جایزه 'جمیلې افغاني' ته ورکړل شوه

جمیله افغاني

د بشریت د ویښتیا لپاره د ارورا اوومه کلنۍ جایزه جمیلې افغاني ته ورکړل شوه چې د بشري حقونو افغان مدافع، د تعلیم ملاتړې او د نور په نوم د تعلیمي او ظرفیت لوړونې سازمان مشره ده.

د نړیوالو اژانسونو په وینا جمیلې افغاني د خپل ژوند ۲۵ کاله تحصیل ته د ښځو لاسرسي ته وقف کړی دی.

د اکټوبر له څوارلسمې تر ‍۱۶مې د ایټالیا په وینیس ښار کې د ارورا بشردوستانه ابتکار په کوربه توب په لوړه کچه غونډې پر مهال د هغې د هڅو درناوی وشو.

ارورا بنسټ وايي د ۲۰۲۱م کال تر اګست میاشتې مخکې د جمیلې افغاني په بنسټ کې تر سل زره زیاتو ښځو د سواد د زده کړې په پروګرامونو کې نوم­لیکنه کړې وه او نور بنسټ تر لسو زرو زیاتو هغو ښځو ته قانوني مرسته او رواني ملاتړ برابر کړی، چې د کورني تاوتریخوالي ښکار شوې وې.

د ارورا جایزه له ۲۰۱۶م کال راهیسې هغو کسانو ته ورکول کېږي چې د بشردوستۍ په برخه کې یې کار کړی وي.

دغه جایزه د ارمنستان د نسل وژنې د خپل- خپلوانو په استازیتوب ورکول کېږي.

نور راوښيه

XS
SM
MD
LG