د لاسرسۍ وړ لېنکونه

تازه خبر
جمعه ۳۱ وری ۱۴۰۳ کابل ۰۷:۰۷

نړۍ

د ازادي راډيو عمومي مشر: بشکېک کې دې زموږ خبريالانو ته ګواښونه وڅېړل شي

قرغزستان -- د ۲۰۲۲ کال د اکتوبر په ۱۳ مه د ازادي راډیو دفتر ته څېرمه یوه مظاهره وشوه. شاوخوا ۳۰ مظاهره چیانو په قرغزستان کې د دریو خپلواکو خپرونو -- ازاتیک، کلوپ او کاکتس میډیا -- د کار د بندولو غوښتنه وکړه.
قرغزستان -- د ۲۰۲۲ کال د اکتوبر په ۱۳ مه د ازادي راډیو دفتر ته څېرمه یوه مظاهره وشوه. شاوخوا ۳۰ مظاهره چیانو په قرغزستان کې د دریو خپلواکو خپرونو -- ازاتیک، کلوپ او کاکتس میډیا -- د کار د بندولو غوښتنه وکړه.

د ازادې اروپا / ازادي راډیو مشر د قرغزستان له چارواکو غوښتي چې د دې ادارې د خبریالانو په وړاندې د شویو ګواښونو پلټنه وکړي.

پرون د قرغزستان په پلازمېنه بشکېک کې یوه ډله خلکو د یوه لاریون پر مهال د ازادې اروپا راډیو د قرغزي څانګې ازاتیک راډیو او ځینو نورو رسنیو له هغې ډلې کلوپ رسنۍ د دفترونو په تړلو ټینګار وکړ.

د علم بیک اسراییلوف په نوم د مظاهره چیانو یوه تنظیموونکي ګواښ وکړ چې د ازادي راډیو په خبریالانو به تېل واچوي او له زور به ورسره کار واخلي.

د ازادې اروپا / ازادي راډیو عمومي مشر جیمي فلای دغو ګواښونو ته په پام ویلي چې، د ازادي راډیو د قرغزي څانګې ازاتیک راډیو خبریالان به ونه وېریږي.

فلای له قرغزي چارواکو غوښتي د هغو کسانو پلټنه وکړي چې د ازادي راډیو کارکوونکو ته یې ګواښ کړی.

اسراییلوف پخوا د قرغزستان د ګمرک ادارې مرستیال وو.

د ازادي راډیو او کلوپ رسنۍ د یوې ګډې څېړنیزې پروژې له مخې معلومه شوه چې د قرغزستان د ګمرک ځینې چارواکي په فساد کې ښکېل دي او سلګونه میلیونه ډالره یې له دغه هېواده بهر انتقال کړي.

د ورځې تازه خبرونه دلته ولولئ

په پاکستان کې سختو ورښتونو او سېلابونو تر ۴۰ زیات کسان مړه کړي

په خيبرپښتونخوا کې وروستيو سېلابونو هم خلکو ته زيانونه اړولي.
په خيبرپښتونخوا کې وروستيو سېلابونو هم خلکو ته زيانونه اړولي.

د پاکستان په بېلابېلو سیمو کې سختو ورښتونو او د سېلابونو راوتلو تر ۴۰ زیات کسان مړه کړي دي.

ناورینونو پر وړاندې د مبارزې ادارې (پي ډي اېم اې) د اپرېل پر ۱۸مه پر ايکس پاڼه ویلي چې په بارانونو او سېلابونو کې د ۱۵ ماشومانو په ګډون ۳۳ تنه وژل شوي او ۴۶ ژوبل دي.

پي ډي اېم اې وايي چې په وروستیو ورښتونو او سېلابونو کې ۳۲۶ کورونه او ودانۍ بشپړې ړنګې شوي.

د بلوچستان حکومتي چارواکو هم ویلي دي چې په هغه صوبه کې د ورښتونو پر مهال په بېلابېلو پېښو او سېلابونو کې د وژل شویو شمېر اتو ته رسېدلی او نهه تنه ژوبل دي.

اخوا د پاکستان صدراعظم شهبازشریف په ورښتونو کې د پېښو او سېلابونو پر مهال د وژل شویو کورنیو ته ۲۰، ۲۰ لکه او ژوبلو کسانو ته د پنځه لکه روپیو ورکولو اعلان کړی دی.

ګوټېرېش: د غزې کړکېچ او پر اسراییل د ایران حمله ممکن د سیمې په یوه بشپړه جګړه بدله شي

د ملګرو ملتونو سرمنشي انټونیو ګوټېرېش
د ملګرو ملتونو سرمنشي انټونیو ګوټېرېش

د ملګرو ملتونو سرمنشي انټونیو ګوټېرېش پرون د منځني ختیځ په اړه اندېښنه وښوده او خبرداری یې ورکړ چې د غزې د جګړې پر سر کړکېچ او پر اسراییل د ایران حمله ممکن د سیمې په یوه بشپړه جګړه بدله شي.

ګوټېرېش د امنیت شورا په هغه غونډه کې چې د اردن او ایران په ګډون د ځینو هېوادونو د بهرنیو چارو وزیرانو په کې برخه درلوده وویل: "منځنی ختیځ د بحران پر پاڼ ولاړ دی او په وروستیو ورځو کې، هم په خبرو او هم عمل کې د خطرناکو کړکېچونو شاهدان یوو."

د ملګرو ملتونو سرمنشي یو وار بیا له ټولو ښکېلو لوریو غوښتنه وکړه چې له زغم کار واخلي.

انټونيو ګوټېرېش په دمشق کې د ایران پر قونسلګرۍ حمله او پر اسراییل د ایران د توغندیو او بې پیلوټه الوتکو حملې وغندلې.

هغه د بې پیلوټه الوتکو حمله د کړکېچونو نوی زیاتېدل وبلل او ویې ویل د دې وخت راغلی چې د غچ اخیستنې دا لړۍ بنده شي.

بورېل: د اروپايي ټولنې غړي هېوادونه دې اوکراین ته د هوايي مدافع نورې دستګاوې ورکړي

د اروپايي ټولنې د بهرني سیاست مشر جوزیپ بورېل
د اروپايي ټولنې د بهرني سیاست مشر جوزیپ بورېل

د اروپايي ټولنې د بهرني سیاست مشر جوزیپ بورېل د اروپايي ټولنې پر غړو هېوادونو غږ وکړ چې اوکراین ته د هوايي مدافع نورې دستګاوې ورکړي.

دا په داسې حال کې ده چې جګړه ځپلی اوکراین پر خپلو بنسټونو د روسیې له زیاتېدونکو هوايي حملو سره مخامخ دی او د وسلو زېرمې یې هم کمې شوې دي.

اوکراین ته د امریکا د متحدو ایالتونو د مرستو پروګرام هم په کانګرس کې له خنډ سره مخامخ دی.

د اروپايي ټولنې د بهرني سیاست مشر جوزیپ بورېل ویلي: "موږ د پیټرویت په نوم د هوايي مدافع امریکايي دستګاوې او د میزاییلو ضد دستګاوې لرو باید اوکراین ته یې ولېږو چې جګړه په کې سخته شوې ده."

تر دې مخکې د اوکراین ولسمشر ولودمیر زیلینسکي هم له غربي هېوادونو د وسلو او مهماتو د مرستې غوښتنه کړې وه.

د اوکراین هوایي ځواک: د روسیې ۱۳ بې پيلوټه الوتکې مو غورځولي

ارشیف
ارشیف

د اوکراین د هوایي مدافعې ځواکونه وایي، نن پنجشنبې یې د روسیې ټولې هغې دیارلس بې پيلوټه الوتکې را غورځولې چې پراوکراین د حملو لپاره کارول شوې وې.

اکثره دغو الوتکو د اوکراین پرلویدیځې ایوانا- فرانکیوسک Ivano-Frankivsk کې بنسټیز تاسیسات په نښه کړي وو.

د روسیې ریا نووستي خبري اژانس ادعاکړې چې ډرون الوتکو په سیمه کې د اوکراین پوځي تاسیسات ویشتي دي، خو د دې سیمې د مرکز ښاروال روسلان مارټینکیوف ازادي راډیو ته ویلي چې په دغو بریدونو کې یوازې ملکي تاسیسات په نښه شوي دي.

د هغه په خبره، د بې پلوټه الوتکو ټوټې د راپرېوتو په مهال د اور د لګېدو سبب شوې چې وروسته هغه مړ شو.

د فلسطینیانو لپاره د ملګرو ملتونو یوه اداره: مه پرېږدئ چې د اسراییل په غوښتنه منحل شوو

د UNRWA ادارې د مرستو یوه برخه
د UNRWA ادارې د مرستو یوه برخه

د ملګرو ملتونو د هغې ادارې چې له لسیزو راهیسې یې په غزه او لویدیځه غاړه کې میلیونونو فلسطینیانو ته مرستې رسولې، مشر پرون چهارشنبې د ملګرو ملتونو له امنیت شورا څخه وغوښتل چې د دې ادارې بقا تضمین کړي ځکه اسراییل یو ځل بیا د هغې د منحل کیدو غوښتنه کړې او هغه یې د حماس د ترهګرۍ د جګړې د ماشین برخه بللې ده.

د هغې ډلې چې امریکا او اروپایي ټولنه یې ترهګره ډله ګڼي.

فیلیپ لازاریني دې شورا ته وویل چې د UNRWA په نوم د دغې ادارې له منځه وړل به د غزې بشري بحران لا پراخ او د قحطۍ پیل به ګړندی کړي.

اسراییل دغه اداره تورنه کړې چې یو شمېر کارکونکو یې له حماس سره پراسراییل د تېرکال د اوکتوبرد اوومې په برید کې همکاري کړې ده، هغه ادعا چې ملګرو ملتونو رد کړې ده.

ایکس یا پخوانۍ ټویټر شبکه: د پاکستان حکومت سره غږیږو چې زموږ د فعالیت په اړه یې په اړه اندېښنو پوه شوو

د ایکس یا پخواني ټویټر شبکې نښان
د ایکس یا پخواني ټویټر شبکې نښان

ټولنیزې شبکې ایکس چې پخوا ټویټر نومیده ژمنه کړې چې د پاکستان له حکومت سره به کار وکړي چې پراندېښنو یې پوه شي.

دا وروسته له هغې چې پاکستاني چارواکو وویل، له دوو میاشتو راهیسې یې د دغې ټولنیزې شبکې فعالیت خپل ملي امنیت ته د ګواښ پراساس بند کړی دی.

د ایکس شبکې د نړیوالو چارو ډلې پرون چهارشنبې ناوخته په یوه پوست کې ولیکل چې دوی د پاکستان له دولت سره د هغوی د اندېښنو د درک کولو لپاره همکارۍ ته دوام ورکوي.

دا د فبرورۍ میاشتې له اولسمې وروسته چې د پاکستان پخواني صدراعظم عمران خان په دې هېواد کې د ترسره شویو عمومي انتخاباتو وروسته چې په هغو کې یې درغلۍ ادعاوې کړې، په ټول هېواد کې د عمومي مظاهرو غوښتنه وکړه او د دې ټولنیزې شبکې فعالیت مختل شو، د دې نړیوالې شبکې لومړنۍ رسمي څرګندونې دي.

اوکراین: د روسیې د پروني هوایي برید تلفات ۱۷ تنو ته لوړ شوي

د پېښې سیمه
د پېښې سیمه

د اوکراین پر چیرنیهیف ښار د روسیې د پروني هوایي برید د وژل شویو کسانو شمېر ۱۷ ته پورته شوی دی.

د ازادۍ راډیو د خبر مرکزي څانګې لیکلي چې دغه برید پرون سهار شاوخوا نهه بجې پر ملکي ودانیو شوی دی.

پرون په لومړیو کې د وژل شویو کسانو شمېر ۱۰ تنه ښودل شوی و.

د چیرنیهیف والي ویاچیسلاف چاوس ویلي، لږ تر لږه درې توغندي د ښار پر مرکز لګیدلي چې ورسره د هستوګنې ۱۶ اپارتمانونه، یو ښونځی او یو روغتون تخریب شوي دي.

برید کې لږ تر لږه ۱۶ ملکیان ټپیان شوي هم دي.

د اوکراین ولسمشر ویلي، د روسیې دغه برید ځکه نه دی شنډ شوی چې د متحدانو د ملاتړ د کمښت له کبله له دوی سره د هوایي مدافع تجهیزات کم شوي دي.

د ایران یو شمېر سیاسي بندیانو د اعدام د لوړې کچې پر ضد اعتصاب پيل کړی

د ایران یو زندان
د ایران یو زندان

په ایران کې د سیاسي زندانیانو یوې ډلې په دغه هېواد کې د اعدامونو د لوړې کچې په اعتراض کې د خوړو اعتصاب پیل کړی دی.

د ازادي راډیو ایراني څانګې راډیو فردا، د بشري حقونو د فعالانو په حواله دغه خبر خپور کړی او ویلې یې دي چې د ایوین او قزل حصار ډارونکو زندانونو بندیان هم په دغه کمپاین کې شامل دي.

دغه اعتصاب د لومړي ځل لپاره د قزل حصار زندانیانو د فبرورۍ په ۲۹مه پیل کړی و چې بیا نورو زندانونو ته هم وغځېد.

د دغو زندانونو سرچینو ویلي، د ایران حکومت په دې وروستیو کې د غیر سیاسي زندانیانو اعدام ډېر کړی دی.

د بښنې نړیوال سازمان وایي، ۲۰۲۳ کال کې ټولټال ۸۵۳ کسان اعدام شوي چې د وړم ۲۰۲۲ کال پرتله نژدې ۵۰ فیصده زیاتوالي ښيي.

ملګرو ملتونو د فلسطینیانو لپاره د ۲،۸ میلیارد ډالره مرستې غوښتنه وکړه

غزه
غزه

ملګرو ملتونو د شاوخوا درې میلیونه فلسطینیانو د لاسنیوي لپاره د ۲،۸ میلیارد ډالرو بسپنې غوښتنه کړې ده.

د ملګرو ملتونو چارواکو پرون چهارشنبې په غزه او لویدیځه غاړه کې خبریالانو ته وویل چې د خدمتونو د رغولو او خوراکي او روغتیایي مرستو لپاره ډېرو پراخو عملیاتو ته اړتیا ده.

دوی همدارنګه خبرداری ورکړ چې د جګړې او د پوځي عملیاتو په جریان کې دوی نه شي کولای چې په غزه کې د خلکو لپاره لازم خدمات برابر کړي.

د ملګرو ملتونو په وینا، په غزه کې ډېر روغتونونه، د اوبو رسولو شبکې، کورونه، سړکونه او ښوونځي ویجاړشوي او په اوس وخت کې یو پوهنتون هم هلته فعال نه دی.

د ایران ولسمشر: د اسراییل کوچني برید ته به هم په بېړه ځواب ووایو

د ایران ولسمشر ابرهیم رییسي
د ایران ولسمشر ابرهیم رییسي

د ایران ولسمشر ابرهیم رییسي پرون چهارشنبې یوځل بیا اسراییل ته خبرداری ورکړ چې یوه ډېر کوچني برید ته به یې هم په بېړه او سخت ځواب ووایي.

ښاغلي رییسي د پوځ د ملي ورځې په مناسبت د رسم ګذشت ځانګړو مراسمو ته په وینا کې د اپریل په ۱۴ سهار وختي پر اسراییل د توغندیو او ډرون الوتکو برید یو محدود اقدام وباله او ویې ویل چې د ایران پر خاوره د اسراییل برید به له پراخ او سخت ځواب سره مخ شي.

په عین حال کې د اسراییل صدراعظم بینامین نتنیاهو یوځل بیا ژمنه وکړه چې دا یواځې اسراییل دی چې پر ایران د برید د څرنګوالي په اړه به پرېکړه کوي.

ښاغلي نتنیاهو پرون چهارشنبې د کابیني غونډې ته وویل چې د اسراییل دولت به هرهغه څه ترسره کړي چې د ځان د دفاع لپاره ورته اړتیا ده.

ایران د تېرې شنبې په شپه پر اسراییل د ۳۰۰ توغندیو او بې پیلوټه الوتکو برید وکړ.

اسراییل وویل چې د توغندیو او ډرونونو ۹۹ سلنه یې په هوا کې له منځه وړي دي، خو ایران وایي چې په دغو بریدونو سره یې خپل هدفونه ترلاسه کړي دي.

نور راوښيه

XS
SM
MD
LG