د لاسرسۍ وړ لېنکونه

تازه خبر
شنبه ۱۹ لیندۍ ۱۴۰۱ کابل ۱۰:۴۱

نړۍ

د اوکراين په اړه د ناټو د غړو هېوادونو دفاع وزيرانو غونډه نن هم دوام لري

د اوکراين په اړه د ناټو د غړو هېوادونو دفاع وزيرانو غونډه

د اوکراین په اړه د ناټو د غړیو هېوادونو د دفاع وزیرانو غونډه نن پنجشنبه هم دوام کوي.

د راپورونو له مخې، په دې غونډه کې د ۳۰ هېوادونو دفاع وزیران د روسیې د راکټي بریدونو په وړاندې د اوکراین د دفاعي ځواکونو د ملاتړ په اړه خبرې کوي.

روسیې په وروستیو ورځو کې د پلازمېنې کییف په شمول د اوکراین پر بېلابېلو ښارونو توغندويي بریدونو ته زور ورکړی دی.

د ورځې تازه خبرونه دلته ولولئ

له بندیزونو سره مخ هېوادونو ته د بشري مرستو رسولو اجازه ورکړل شوه

د ملګرو ملتونو امنیت شورا

د ملګرو ملتونو امنیت شورا تېر ماښام هغه پرېکړه لیک تصویب کړ چې د ملګرو ملتونو تر بندیزونو لاندې هېوادونو ته له خنډ پرته بشري مرستو ته اجازه ورکوي.

د پرېکړه لیک په متن کې ویل شوي چې د بسپنې وېشلو، اقتصادي سرچینو یا د اړتیاوړ توکو او خدمتونو ته اجازه ورکول کېږي څو دا مسئله یقیني شي چې بشري مرستې په خپل وخت ورسېږي او دا له هغو شتمنیو څخه سرغړونه نه ده چې دې شورا کنګل کړي دي.

دغه پرېکړه لیک د ملګرو ملتونو د ادارو او همدارنګه د بشرپالنې په چاره کې ښکېلو د ملګرو ملتونو د بشري مرستو سازمانونو ته د اعتبار وړ دی.

د سره صلیب نړیوالې کمېټې د دغه پرېکړه لیک هرکلی وکړ او هغه یې د بشرپالنې د اقداماتو په تاریخ کې یوه مهمه ورځ وبلله.

سره صلیب هیله وښوده چې دغه اقدام به دې ته لاره هواره کړي چې ټولنې له ښو خدمتونو لکه روغتیایي پاملرنې او د څښاک د پاکو اوبو لپاره د څاګانو له کیندلو برخمنې شي او هم د هغو کسانو لیدو ته ښه زمینه برابره کړي چې په جګړو کې نیول شوي یا نیول کېږي.

د فوټبال نړیوال جام؛ ارجنټاین او کرویشیا نیمه پایلوبې ته لار پيدا کړه

د هالنډ او ارجنټاین د لوبې یو انځور

په قطر کې د فوټبال نړیوال جام سیاليو د کوارټرفاینل په دوو لوبو کې کرویشیا برازیل ته ماتې ورکړه او ارجنټاین بیا هالنډ له نړیوال جام رخصت کړ.

د کرویشیا او برازیل لوبه تر پایه ۱ـ۱ مساوي مخ ته لاړه، چې په پینالټي شوټونو کې کرویشیا یو ځل بیا برلاسې شوه او دا ځل یې د ټورنمنټ تر ټولو مخکښه لوبډله برازیل ته ماتې ورکړه.

کرویشیا په پینالټي شوټونو کې څلور ګلونه ووهل او د برازیلي لوبغاړو یو مهم شوټ خطا لاړ او د کروشیا ګول کيپر یې یو شوټ له ګول څخه را وګرځاوه.

کرویشیا لومړۍ لوبډله شوه چې په قطر کې د ۲۰۲۲ نړیوال جام نیمه پای لوبې ته لار پيدا کوي.

د ورځې دویمه لوبه تېره شپه د شپې په یولس نیمو بجو د ارجنټاین او هالنډ ترمنځ وه، د مینوالو او فوټبال څارونکو د اټکل پر اساس ارجنټاین د لوبې په لومړۍ نیمايي کې ګول وواهه.

بیا د لوبې په ۷۳ یمه دقیقه کې د هالنډ لوبغاړو له لوري خطا ترسره شوه او ارجنټاین ته د پینالټي شوټ موقع وه چې لېونل میسي په ډېر مهارت سره دا ګول وواهه.

د لوبې دیارلس دقیقې پاتې وې، چې هالنډ په ۸۳ یمه دقیقه کې لومړی او په نویمه دقیقه کې دویم ګول ترسره کړ چې لوبه یې ۲-۲ مساوي کړه.

د دې لوبې د پایلې په پار هم پینالټي شوټونه ووهل شول چې د ارجنټاین ګول کيپر د هالنډیانو د لومړنیو دواړو شوټونو دفاع وکړه او په پنالټي شوټونو کې ارجنټاین ۴ او هالنډ درې ګولونه ترسره کړل.

په دې سره ارجنټاین د دویمې لوبډلې په توګه نیمه پایلوبې ته لار پيدا کړه.

کرویشیا او ارجنټاین به د ډسمبر میاشتې په دیارلسمه نېټه نیمه پایلوبه کې سره مخ کېږي.

  1. د یادونې ده چې د کوارټرفاینل درېيمه لوبه به نن د کابل پر وخت د ماښام اوه نیمې بجې د مراکش او پرتګال ترمنځ او وروستۍ لوبه د شپې یولس نیمې بجې د انګلستان او فرانسې ترمنځ ترسره شي.

پاکستان د افغانستان له لارې د ترکمنستان مایع ګاز واردوي

ارشیف

د پاکستان حکومت اعلان کړی چې د انرژۍ د سرچینو د کمښت له کبله به د ژمي په موسم کې له ترکمنستان څخه مایع ګاز د افغانستان له لارې وارد کړي.

د روسیې انټرفکس خبري آژانس پرون د ډسمبر په ۹مه نېټه راپور ورکړ چې د افغانستان د لاریو چلوونکي به د چمن له دروازې د تورغنډۍ تر سرحده تش ټانکرونه لېږدوي او بېرته به د ګاز ټانکرونه چمن ته رسوي.

پاکستاني رسنیو راپور ورکړی چې دې هېواد ته د ګاز واردات به ډېر ژر پیل شي، خو په راپورونو کې ویل شوي چې په لنډ مهال او اوږدمهال کې د دې ستونزې د حل لپاره یوکال وخت ته اړتیا شته.

پاکستان د زیات نفوس د لرلو له کبله ډېری وخت په دوبي کې د برښنا او په ژمي کې د ګاز له کمښت سره مخامخ کېږي.

امریکا د اوکرایني ځواکونو پیاوړتیا لپاره نوې مرسته اعلان کړه

اوکرایني ځواکونه د جګړې په لومړۍ کرښه کې

سپینې ماڼۍ د اوکراین د هوايي ځواکونو د پیاوړتیا لپاره د ۲۷۵ میلیون ډالرو نوې مرسته اعلان کړه.

د سپینې ماڼۍ د ملي امنیت ویاند جان کربي پرون تېره شپه خبریالانو ته وویل چې دا مرسته به ډېر ژر اوکراین ته ورسېږي څو خپل هوايي ځواک پیاوړي کړي او د روسیې د بې پیلوټه الوتکو د حملو مخه ونیسي.

روسیه هره ورځ د اوکراین د انرژۍ پر تاسیساتو راکټي حملې کوي څو په دې توګه د خلکو د زیانمنولو له لارې په دې هېواد کې د مقاومت روحیه وځپي.

اوکراین د دې حملو د شنډولو لپاره له څو میاشتو راهیسې د هوايي مدافعې په برخه کې له خپلو متحدانو څخه د مرستې غوښتنه کوي.

ولکر ټرک: مسلمانانو سره د چین چلند د بشریت ضد جرمونه بلل کېدای شي

په چین کې اویغور مسلمانان

د ملګرو ملتونو د بشري حقونو عالي کمېشنر ولکر ټرک وایي، کلک عزم لري چې له پیکینګ سره د هغو راپور د موندنو په اړه کار وکړي چې مخکېني کمېشنر خپور کړی او ویلي یې دي چې په شینجین سیمه کې له اویغوریانو او نورو مسلمانانو سره د چین چلند د بشریت ضد جرمونه بلل کېدای شي.

د چین د بشري حقونو له سابقې سره چلند د ټرک لپاره چې د اکټوبر له میاشتې راهیسې یې دغه دنده پیل کړې، یوه ستونزمنه مسئله ده.

د رویټرز د راپور له مخې پیکینګ د ملګرو ملتونو د بشري حقونو پخوانۍ مشرې مېشل بچلي تر فشار لاندې راوستې وه چې دغه راپور خپور نه کړي، خو نوموړې دغه راپور څو دقیقې مخکې له دې چې دنده یې پای ته ورسېږي، خپور کړ.

اردوغان د روسیې او اوکراین ولسمشرانو سره خبرې کوي

د عکس ښي لور ته د روسیې ولسمشر پوتین، په منځ کې د ترکیې ولسمشر اردوغان او چپ لور ته د اوکراین ولسمشر زیلینسکي

د ترکیې ولسمشر رجب طیب اردوغان وایي، د روسیې له ولسمشر ولادمیر پوتین سره به بل سبا د یکشنبې په ورځ خبرې وکړي او د اوکراین له ولسمشر ولادمیر زیلینسکي سره به هم وغږېږي څو د تور سمندرګي له لارې د ملګرو ملتونو ملاتړې د غلو د صادراتو هوکړه پیاوړي شي.

اردوغان دغه څرګندونې نن په استانبول کې په یوه خبري غونډه کې وکړې.

دې غونډې ته د اوکراین ولسمشر هم د ویډیو کنفرانس له لارې خبرې وکړې.

ملګرو ملتونو درې اونۍ مخکې اعلان وکړ چې د تور سمندرګي له بندرونو څخه د اوکراین د غلو د صادراتو پروګرام څلور میاشتې نور هم وغځول شو.

ملګري ملتونه د ایرلنډ او امریکا وړاندیز شوې مسودې په اړه پرېکړه کوي

د ملګرو ملتونو د امنیت شورا د یوې غوندې انځور

د ملګرو ملتونو امنیت شورا به نن د هغه پرېکړه لیک مسودې ته رایه ورکړي چې بشري هڅو ته د ملګرو ملتونو له بندیزونو څخه بشپړ معافیت ورکوي.

د دغه پرېکړه لیک مسوده چې د ایرلنډ او د امریکا د متحدو ایالتونو له خوا وړاندیز شوې، هغو اندېښنو ته ځواب وايي چې د بشري حقونو ډلو د دوی پر کارونو د دغو بندیزونو د اغېزو په اړه راپورته کړي دي.

که دغه پرېکړه لیک تصویب شي، د ملګرو ملتونو ادارې، نړیوال سازمانونه، د ملګرو ملتونو د عمومي اسامبلې تر څارنې لاندې د بشرپالنې ډلې لکه نړیوال سور صلیب او نورې مرستندویه ډلې چې له ملګرو ملتونو سره کار کوي، ورڅخه ګټه پورته کړي.

د سره صلیب د نړیوالې کمېټې مرستیاله امانډا کاټنزانو وایي، په نړیواله سطحه د ریکارډ تر کچې اړتیاوو ته پام دا ډېره مهمه ده چې ټولنو ته د مرستو رسولو د هڅو پر وړاندې ټول خنډونه لرې شي.

نوموړې د افغانستان وضعیت ته په اشاره وویل چې تېرکال په افغانستان کې د قدرت بدلون دا فوري اړتیا په ډاګه کوي چې په دې برخه کې باید شفافیت رامنځته شي.

هغې زیاته کړه: "موږ نه شو کولای چې د سبا د بحرانونو وړاندوینه وکړو، خو کولای شو چې نن په دې برخه کې یو نړیوال وضاحت رامنځته کړو."

د ملګرو ملتونو د مرستندویه ادارو په وینا د افغانستان نږدې نیمایي وګړي د خوړو په برخه کې عاجلو مرستو ته اړتیا لري.

ایران کې د 'محسن شکاري' اعدام نړیوال غبرګونونه راپارولي

محسن شکاري

د ایران د قضایه قوې له خوا د ۲۳ کلن محسن شکاري د اعدام په اړه نړیوال غبرګونونه دوام لري.

یوې دیپلوماتیکې سرچینې د پنجشنبې په ورځ اعلان وکړ چې د جرمني د بهرنیو چارو وزارت په ایران کې د وروستیو مظاهرو پر مهال د نیول شویو معترضانو له ډلې د یوه کس د اعدام په غبرګون په جرمني کې د ایران سفیر احضار کړی دی.

په همدې حال کې د جرمني د بهرنیو چارو وزیرې انالینا بیربوک د محسن شکاري پر اعدام نیوکه وکړه او ویې ویل، د ایران حکومت د انسانانو ژوند ته بې حده سپکاوی کوي.

د پنجشنبې په ورځ د ایران قضایه قوې د روانو مظاهرو یو تن مخکښ محسن شکاري چې د مظاهرو پر مهال د یوه سړک په تړلو او بلوا ته په لمن وهلو تورن وو، اعدام کړ.

د امریکا د بهرنیو چارو وزیر انتوني بلینکن هم د محسن شکاري د اعدام په غبرګون کې پر خپله ټوېټر پاڼه لیکلي: "موږ د محسن شکاري په اعدام خواشیني یو."

د اروپايي ټولنې د بهرنۍ تګلارې مشر جوزپ بوریل وویل چې هغه د محسن شکاري په اعدام سخت خواشینی دی.

هغه وویل دا موضوع به د اروپايي ټولنې د بهرنیو چارو د وزیرانو په غونډه کې مطرح شي.

په ایران کې دننه هم د محسن شکاري تر اعدام وروسته مظاهرو زور اخیستی دی.

پاکستان د امریکا د متحدو ایالتونو پر وروستي فهرست نیوکه وکړه

د اسلام اباد یوه څنډه

پاکستان د امریکا د متحدو ایالتونو پر وروستي فهرست نیوکه وکړه، چې تېره اوونۍ یې دغه هېواد، د مذهبي ازادیو په فهرست کې د ځانګړې اندېښنې وړ هېوادونو په کتار کې راوستلی دی.

امریکا تېره اوونۍ د پاکستان تر څنګ چین، روسیه، ایران، سعودي عربستان او شمالي کوریا د یوولسو هغو هېوادونو په کتار کې راوستلی، چې یا یې له مذهبي ازادیو سرغړونه کړې، یا یې سترګې ورباندې پټې کړي دي.

دغه اعلان د امریکا د بهرنیو چارو وزیر انټوني بلېنکن کړی و، چې په باب یې د پاکستان د بهرنیو چارو وزارت پرون عکس العمل وښود.

د پاکستان د بهرنیو چارو وزارت وايي، دغه راپور له عیني واقعیتونو سره سر نه خوري.

د دغه وزارت یوه ویاند د هند یادونه وکړه چې اسلام اباد یې خپل سرسخت رقیب بولي او زیاته یې کړه چې په هند کې د اقلیتونو له مذهبي ازادیو سختې سرغړونې روانې دي، خو بیا هم په دې فهرست کې نه دی راوستل شوی.

کرویشیا د اروپا په شېنګن حوزه کې شامل شو

د کرویشیا او هنګري ترمنځ سرحدي سیمه

کرویشیا د اروپا په شېنګن حوزه کې شامله شوه، او وګړي به یې له پاسپورټ پرته د دې حوزې غړو هېوادونو ته سفر وکړای شي.

چک جمهوریت جې دا مهال د اروپايي ټولنې دوره یي مشري کوي، پرون په ټویټر کې خبر ورکړی، چې دغه اقدام د ۲۰۲۳م کال له جنورې میاشتې د تطبیق وړ دی.

دا پرېکړه په بروکسل کې د اروپايي ټولنې د کورنیو او عدلیې وزیرانو تر کتنې وروسته وشوه.

دغه موقف ته د بلغاریا او رومانیا کاندیداتوري ونه منل شوه.

تر دې مخکې په راپورونو کې ویل شوي وو، چې د رومانیا له کاندیداتورۍ سره اتریش مخالفت لري او د بلغاریا په وړاندې بیا هالنډ خنډ جوړ کړی دی.

په شېنګن حوزه کې ۲۶ هېوادونه شامل دي، چې ۲۲ یې د اروپايي ټولنې غړي دي، تر څنګ یې ایسلنډ، لیختن¬شټاین، ناروې او سویس هم په کې راځي.

نور راوښيه

XS
SM
MD
LG