د لاسرسۍ وړ لېنکونه

تازه خبر
چهارشنبه ۹ لیندۍ ۱۴۰۱ کابل ۰۲:۲۰

افغانستان

د يوناما مرستيال کابل کې د ابن سينا د نشه‌يي توکو د درملنې له مرکز ليدنه وکړه

ارشيف

د افغانستان لپاره د ملګروملتونو د مرستندویه ماموریت یا یوناما مرستیال مارکوس پوتزل په کابل کې د ملګرو ملتونو په ملاتړ د ابن سینا د مخدره توکو د درملنې له مرکز څخه لیدنه وکړه.

نوموړي د ياد مرکز د هغو کارکوونکو د کار ستاینه وکړه چې د ډېرو هغو کسانو لاسنیوی کوي چې زیانګالي دي او په ذلت کې ژوند کوي.

هغه يه یوه ټویټ کې پر افغانستان د طالبانو پر واکمنو چارواکو هم غږ وکړ چې د دې مرکز د کارکونکو د تنخواو، خوړو، درملو او جامو لپاره دې سرچینې برابرې کړي.

له يوه کال راهيسې چې طالبان واک ته رسېدلي په افغانستان کې د معتادینو د درملنې د څه باندې اتیاو مرکزونو شاوخوا نيمايي یې د درملو، کافي خوړو او معاشونو نه ورکولو له امله تړل شوي دي.

د ورځې تازه خبرونه دلته ولولئ

نن د افغانستان او سرېلانکا کرېکټ لوبډلې درېيمه يو ورځنۍ لوبه کوي

د افغانستان او سرېلانکا کرېکټ سیالۍ

ټاکل شوې د افغانستان او سرېلانکا د کرېکټ ملي ټیمونه نن په خپلو کې درېیمه یو ورځنۍ یا ۵۰ اووره مسابقه وکړي.

نننۍ مسابقه د کابل پر وخت د ماسپښین یوه نیمه بجه د سرېلانکا په پالیکیلي (Pallekele) لوبغالي کې ترسره کېږي.

افغانستان خپله لومړۍ لوبه تېره جمعه د ۶۰ منډو په توپیر ګټلې وه او دویمه لوبه تېره یکشنبه مسابقه د باران له کبله بشپړه نه‌شوه.

د کرېکټ نړیوالې شورا ویلي، د دویمې لوبې له کبله افغان لوبډلې ته ۵ امتیازونه ورکړل شول، چې ورسره دغه ټیم وتوانېد په هند کې د راروان میلادي کال نړیوال جام ته لار پیدا کړي.

د کډوالو عالي کمېشنرۍ د مرستو رسولو لپاره د اړمنو خلکو وضعيت ارزولی

ارشيف

د کډوالو په چارو کې د ملګرو ملتونو لویه کمېشنري وايي، د روان میلادي کال له پیله یې له یو لک او پنځه اتیا زره کورنیو سره چې یو ملیون او درې لکه کسان کېږي د بشري مرستو رسولو لپاره کتلي دي.

د دې ادارې د افغانستان څانګې پرون په یوه ټویټ کې ویلي، له دغو کسانو سره یې د افغانستان په لیرو پرتو سیمو کې هم کتلي او د دوی وضعیت یې ارزولی دی.

د کډوالو په چارو کې د ملګرو ملتونو لویه کمېشنري وايي په افغانستان کې یې ماموریت له راستنېدونکو، داخلي بې‌ځایه شویو او نورو هغو ټولنو سره مرسته ده، چې د دغسې کسانو کوربه‌توب کوي.

ګڼو ادارو خبرداری ورکړی، چې ممکن را روان ژمی سخت وي، ځکه د بې‌وزلۍ اندازه هم زیاته ده او هوا د ژمي تر راتګ مخکې لا سړه شوې ده.

رينا اميري د افغان ښځو زړورتيا وستايله

رينا اميري

د افغان نجونو، ښځو او بشري حقونو لپاره د امریکا د متحدو ایالتونو ځانګړې استازې رینا امیري د افغان نجونو او ښځو زړورتیا وستایله.

هغې تېره شپه په ټویټر کې لیکلي، د ښځو د بشري حقونو د مدافعانو په نړیواله کچه تر افغان ښځو او نجونو نور الهام بخښونکې نمونې نه‌شي موندل کېدای.

د هغې په خبره افغان ښځې او نجونې د تعلیم، کار او خپلو کورنیو ته د ازادیو لپاره مبارزه کوي.

د مېرمن امیري په خبره افغان مېرمنې او نجونې واقعي اتلانې دي، چې له ګواښونو، تاوتریخوالي او زنداني کېدو سره- سره د مبارزې لپاره ولاړېږي.

پرون د نوامبر ۲۹مه د ښځو د بشري حقونو د مدافعانو نړیواله ورځ وه او د ملګرو ملتونو د ښځو برخې په یوه اعلامیه کې د افغان او ایرانۍ مېرمنو زړورتیا ستایلې ده.

د طالبانو سرپرست حکومت لا هم نجونو ته اجازه نه‌ده ورکړې چې تر شپږم ټولګي پورته نور تعلیم وکړي او ښځې هم په اکثرو ادارو کې له کارونو منع شوي دي.

په ایران کې هم په وروستیو اعتراضونو کې تر ډېره ښځې مهم نقش لري.

جرمني په درو د افغانانو وهل له انساني کرامت سرغړونه وبلله

د طالبانو بیرغ

د نړیوالو له تندو غبرګونونو سره سره د طالبانو د حکومت بهرنیو چارو وزارت په لوګر کې د څو تنو مجرمانو د درو وهلو د حکم ننګه کړې ده.

په تازه غبرګون کې پرون د افغانستان لپاره د جرمني سفارت، چې دا مهال په برلین او دوحه کې فعالیت کوي ،د درو وهل د انساني کرامت سرغړونه بللې او له طالبانو یې غوښتي چې د ملګرو ملتونو د شکنجې د منعې کنوانسیون مراعات کړي.

د طالبانو د بهرنیو چارو وزارت ویاند عبدالقهار بلخي بیا د جرمني دغې اندېښنې ته په ځواب کې لیکلي، اسلامي شریعت پر عدالت ولاړ دی.

طالبانو تېره اونۍ د درېیو ښځو په ګډون ۱۴ کسان په لوګر ولایت کې د اخلاقي جرمونو او غلا په تړاو عام محضر کې په درو ووهل.

د افغانستان له هوايي قلمرو څخه د ترلاسه شویو عوایدو نوې کچه اعلان شوه

د کابل هوايي ډګر یوه څنډه

د طالبانو حکومت وایي، افغانستان له خپل هوايي قلمرو څخه د الوتنو د تېرېدو له درکه هره میاشت لسګونه میلیونونه افغانۍ عواید ترلاسه کوي.

د طالبانو په حکومت کې د اطلاعاتو او رسنیو د څانګې سرپرست مشر انعام الله سمنګاني پرون پر ټویټر لیکلي دي چې د متحده عربي اماراتو له ګاګ نومي شرکت سره د یوه تړون تر لاسلیکېدو وروسته د هېواد له هوايي حریم څخه اوس تقریباً سلګونه الوتنې تېرېږي او حکومت له هرې الوتنې ۶۰ زره افغانۍ ترلاسه کوي چې د میاشتې نږدې ۱۸۰ میلیون افغانیو ته رسېږي.

که څه هم د افغانستان د هوايي حریم له درکه د تېرکال د عوایدو دقیق ارقام نه شته، خو د ملکي هوایي چلند ادارې د وړم کال عواید څه باندې ۵ میلیارده افغانۍ یاد کړي و.

د طالبانو حکومت داسې مهال له بېلابېلو مالي سرچینو د عایداتو د لوړېدو خبره کوي چې په افغانستان کې تر نیمایي زیات وګړي له اقتصادي ستونزو سره مخامخ دي.

د سږ کال په اپرېل کې نړیوال بانک وویل چې د افغانانو د سړي سر عواید د پام وړ کم شوي دي.

ملګري ملتونه: ۲۴،۳ میلیون افغانانو ته مو مرستې رسولي

ارشیف

ملګري ملتونه وايي چې د سږني کال په تېرو نهو میاشتو کې یې، په افغانستان کې په ټوله کې ۲۴،۳ میلیون خلکو ته مرستې رسولې دي.

د ملګرو ملتونو د بشري مرستو د سمون ادارې یا اوچا پرون پر خپل ټویټر په یوه بیان کې ویلي چې له ۲۱،۷ میلیون خلکو سره د غذايي موادو، له ۹،۸ میلیون خلکو سره د اوبو او حفظ الصحې په برخو او له ۵،۲ میلیون خلکو سره د غذايي تقویې په برخو کې مرستې شوې دي.

اوچا وايي، د اړو خلکو د اړتیاوو د برابرولو لپاره نورې بسپنې او بېړنیو مرستو ته اړتیا لیدل کېږي.

دې ادارې په دې وروستیو کې ویلي و چې په افغانستان کې په تېرو درېیو کلونو کې د بېوزلو خلکو شمېر ۹۷ سلنه زیات شوی دی.

طالبانو له هر راز مخدره موادو کار اخیستل منع کړل

ارشیف: د افغانستان په جنوب کې د کوکنارو یوه کرونده کې د تریاکو راټولولو بهیر

د طالبانو د حکومت د کورنیو چارو وزارت اعلان کړی چې له هر راز مخدره موادو کار اخیستل د اسلام له نظره حرام دي او د دې موادو هرراز کاروبار هم جرم ګڼل کېږي.

په یوه بیان کې چې پرون د دې وزارت پر ټویټر خپور شو، ویل شوي دي چې له سرغړوونکو سره به شرعي چلند وشي.

همداراز په یوه ویډیو کې د کورنیو چارو وزارت د مخدره موادو پر ضد د مبارزې معین ملاعبدالحق همکار ویلي چې په تېر یوه کال کې تر ۴۵ ټنه پورې د مخدرو موادو بېلابېل ډولونه کشف او ضبط شوي دي.

نوموړی زیاتوي چې هېچا ته اجازه نه ورکول کېږي چې حتی د هېواد په یوه لوېشت خاوره کې هم کوکنار یا چرس وکري.

که څه هم د طالبانو حکومت د مخدرو موادو پر کښت او کاروبار مخکې له دې هم بندیز اعلان کړی و، خو د مخدرموادو د کنټرول نړیوال بورډ تېره اونۍ په یوه بیان کې وویل چې په افغانستان کې د مخدره موادو د کښت او تولید په اړه راپورونه د اندېښنې وړ دي او باید مخنیوی یې وشي.

دې ادارې همداراز وویل چې له افغان کروندګرو سره باید د بدیل کښت په برخه کې مرستې وشي.

طالبانو دا بیان رد کړ او ویې ویل چې په افغانستان کې د کوکنارو کښت بند شوی دی.

له دې مخکې ملګرو ملتونو په تېره لړم میاشت کې په یوه راپور کې وویل چې په روان کال کې په افغانستان کې د تریاک له تولید څخه د ترلاسه شویو عوایدو کچه څه باندې یو میلیارد ډالرو ته لوړه شوې ده.

د افغانستان او سریلانکا کرکټ لوبډلو ترمنځ وروستۍ سیالي د لیندۍ ۹مه ده

په سریلانکا کې د افغانستان او د دې هېواد د کرکټ لوبډلې ترمنځ د یوې مخکینۍ لوبې انځور

د افغانستان او سریلانکا ترمنځ د کرکټ یو ورځنۍ لوبه سبا د لیندۍ ۹مه په پام کې ده.

دا د دواړو هېوادونو ترمنځ د لوبو د هغې لړۍ وروستۍ ده چې د تېرې جمعې په ورځ پیل شوې.

د دې لوبو د لړۍ لومړۍ لوبه افغانستان د شپېتو منډو په توپیر وګټله، خو د یکشنبې په ورځ د دوی دوهمه لوبه د باران له کبله وځنډېده او که څه هم په دې لوبه کې دواړو لوبډلو مساوي پاینټونه وګټل، خو ملي لوبډله د ۲۰۲۳ کال د یوورځنیو سیالیو نړیوال جام ته غوره شوه.

د افغانستان کرکټ بورډ پر خپله رسمي فېسبوکپاڼه ویلي دي چې ملي لوبډلې، د سریلانکا په ګډون له ۱۴ د ۱۱ لوبو او د ۱۱۵ پاینټونو تر ګټلو وروسته د کرکټ د نړیوالې شورا د یو ورځنیو سیالیو جام ته لاره وموندله.

جوزیپ بورېل: د افغانستان حالات مخ په خرابېدو دي

جوزیپ بورېل

د اروپايي اتحادیې د بهرنۍ پالیسۍ ريیس وايي، د افغانستان حالات مخ په خرابېدو دي.

جوزیپ بورېل نن په بروکسل کې د اروپايي اتحادیې د پراختیايي وزیرانو د غونډې په درشل کې وویل: "د افغانستان د وضعیت په اړه به خبرې وکړو، هلته چې ډېر موارد سمې خوا ته نه درومي. د بدترېدو لور ته روان دي په تېره بیا د ښځو او نجونو لپاره. یو کال وروسته به د افغانستان حالات لا خراب شي."

تر دې وړاندې د اروپايي اتحادیې چارواکو پر ښځو د بندیزونو په خاطر اندېښنې ښکاره کړې وې.

طالبان افغان نجونو ته اجازه نه ورکوي چې له شپږم ټولکي پورته زده کړې وکړي او اکثره ښځې یې په دولتي ادارو کې له کار کولو منع کړي دي.

د طالبانو دفاع وزارت د دوو الوتکو د ترميم خبر ورکړی

انځور - ارشيف

د طالبانو د حکومت د دفاع وزارت وايي چې د دوی د هوايي ځواک تخنیکي متخصصانو دوې نورې الوتکې هم ترمیم کړي دي.

د طالبانو د دفاع وزارت وياند عنایت الله خوارزمي رسنیو ته په استولې خبرپاڼه کې ویلي چې، د دوی تکنېشنانو دوې اې این ۳۲ او اې این ۲۶ الوتکې ترمیم او الوت ته چمتو کړي دي.

تر دې وړاندې هم خوارزمي د ترکیې انادولو خبري اژانس ته ویلي و چې، دوی شاوخوا ۷۰ الوتکې او هليکوپتر ترمیم کړي دي.

نور راوښيه

XS
SM
MD
LG