د لاسرسۍ وړ لېنکونه

تازه خبر
یکشنبه ۶ لیندۍ ۱۴۰۱ کابل ۰۲:۱۸

افغانستان

ملګري ملتونه: د افغانستان اقتصاد 'مصيبت زېږونکی' سقوط کړی

ملګرو ملتونو راپور کې راغلي، افغانستان ۹۷سلنه خلک د بې‌وزلۍ تر کرښې لاندې ژوند کوي.

ملګري ملتونه وایي، د افغانستان اقتصاد د طالبانو له بیا واکمنېدو راهیسې " مصیبت زیږونکی" سقوط کړی دی.

دغه سازمان په خپل تازه راپور کې ویلي چې، د افغانستان ۹۵ تر ۹۷ فیصدو پورې وګړي د بې‌وزلۍ تر کرښې لاندې ژوند کوي.

په راپور کې راغلي، د طالبانو له واک ته رسېدو مخکې، د تېر کال په اګست کې هم د افغانستان ناخالصه عواید ډېر کم وو.

فرانس پریس خبري اژانس د "یو.ان.ډي.پي" د اسیا پاسفیک څانګې د مشرې کانی ویګناراجا له قوله ویلي، د افغانستان ناخالصه عوایدو ته تېر یوه کال کې پنځه میلیارده ډالره زیان اوښتی.

نوموړې ویلي، د تېر کال له اګسته په افغانستان کې د توکو بیې هم ۳۵ سلنه لوړې شوي دي.

د ورځې تازه خبرونه دلته ولولئ

ریچارډ بینیټ: په افغانستان کې ښځې یوازې نه پرېښودل کېږي

د افغانستان د بشري حقونو لپاره د ملګرو ملتونو ځانګړی راپور ورکوونکی ریچارډ بینیټ

د افغانستان د بشري حقونو لپاره د ملګرو ملتونو ځانګړی راپور ورکوونکی ریچارډ بینیټ وايي، د نړیوال قانون له مخې، د جنسیت پر اساس مجازات د انسانیت پر وړاندې یو جرم دی.

بینیټ د ښځو پر وړاندې د تاوتریخوالي له منځه وړلو د ۱۶ ورځني کمپاین په مناسبت پرون ناوخته په یوه ټویټ کې ویلي، مجازاتوونکو سره به حساب کتاب کېږي.

د ملګرو ملتونو ځانګړي راپور ورکوونکي ویلي، چې په افغانستان کې به ښځې یوازې نه پرېښودل کېږي.

د نومبر میاشتې ۲۵مه د ښځو په وړاندې د تاوتریخوالي له منځه وړلو نړیواله ورځ ده، چې له دې نېټې وروسته د ۱۶ ورځو لپاره کمپاین پیل شوی دی، چې په دې برخه کې خلکو ته پوهاوی ورکړل شي.

د افغانستان او سریلانکا کرکټ لوبډلو ترمنځ دویمه یوه ورځنۍ لوبه پیل شوه

افغان لوبغاړی رحمان الله ګوربز د یوې مخکینۍ لوبې پرمهال

د افغانستان او سریلانکا د کرکټ د ملي لوبډلو ترمنځ دویمه یوه ورځنۍ لوبه پیل شوه.

افغانستان د لوبې پچه یا ټاس وګاټه او د بټنګ کولو پرېکړه یې وکړه.

دا د دواړو ټیمونو ترمنځ د سوپرلیګ لوبو په ترڅ کې چې سریلانکا یې کوربنه ده، د درېیو پنځوس اوره لوبو دویمه هغه ده.

د دې لړۍ لومړۍ لوبه د تېرې جمعې په ورځ افغان لوبډلې د شپېتو منډو په توپير له سریلانکا څخه وګټله.

که افغانستان له سریلانکا یوه بله لوبه هم وګټي دومره امتیازات تر اوسه لري چې مستقیم د راتلونکي کال نړیوال جام ته ووځي.

له سریلانکا سره درېیمه او ورستۍ لوبه به د سې شنبې په ورځ وشي.

په همدې حال کې د افغانستان کرکټ بورډ خبر ورکړ، چې د اماراتو له کرکټ بورډ سره یې د پنځه کلنو دوه اړخیزو همکاریو تړون لاسلیک کړ.

کرکټ بورډ په یوه اعلامیه کې ویلي د دې موافقې له مخې به د افغانستان کرکټ بورډ د دې مودې لپاره د اماراتو لوبډلې پر وړاندې هر کال درې شل اوریزې لوبې کوي، په بدل کې به یې افغان کرکټ بورډ په هغه هېواد کې د لوبو د اجازې له فیسونو پرته د نورو لوبډلو کوربه توب کوي او همدارنګه د ویزو اسانتیاوې ترلاسه کړي.

ټوماس نیکلاسن: طالبان د نړیوالو قوانینو د رعایت مسوولیت لري

د افغانستان لپاره د اروپایي ټولنې ځانګړې استازی ټوماس نیکلاسن

د افغانستان لپاره د اروپایي ټولنې ځانګړې استازی ټوماس نیکلاسن وایي، پر افغانستان واکمن طالبان مسوولیت لري هغه نړیوال قوانین رعایت کړي چې دې هېواد لاسلیک کړي دي.

نیکلاسن پرون په څو ټویټونو کې دغه څرګندونې د طالبانو له خوا په لوګر کې پر ۱۴ کسانو د شرعي حدودو د عملي کولو پر وړاندې په غبرګون کې کړي دي.

هغه ویلي، اروپایي ټولنې له هغو څو کمو هېوادونو چې د ده په وینا د سزا دغه بڼې په کې عملي کېږي هم ورته غوښتنه کړي چې د نړیوال قانون په رڼا کې خپل مسوولیتونه پرځای کړي.

نیکلاسن فزیکي مجازات ظالمانه، غیرانساني او د سپکاوي چلند بللی چې د ده په وینا د شکنجې د مخنیوي او د مدني او سیاسي حقونو د نړیوالو کنوانسیونو سره په تضاد کې دي.

خو د طالبانو د حکومت ویاند ذبیح الله مجاهد ویلي چې افغانستان یو اسلامي هېواد دی او نظام یې دنده لري چې اسلامي شریعت نافذ کړي.

نن د افغانستان او سریلانکا کرکټ لوبډلو ترمنځ دویمه یوه ورځنۍ لوبه ده

د افغانستان او سریلانکا کرکټ لوبډلو ترمنځ د یوې سیالۍ انځور

ټاکل شوې ده چې نن د افغانستان او سریلانکا د کرکټ د ملي لوبډلو ترمنځ دویمه یوه ورځنۍ لوبه وشي.

دا د دواړو ټیمونو ترمنځ د سوپرلیګ لوبو په ترڅ کې چې سریلانکا یې کوربنه ده، د درېیو پنځوس اوره لوبو دویمه ده.

د دې لړۍ لومړۍ لوبه د تېرې جمعې په ورځ افغان لوبډلې د شپېتو منډو په توپير له سریلانکا څخه وګټله.

دا لوبې د ۲۰۲۳م کال نړیوال جام ته د مستقیم تګ لپاره دي.

که افغانستان له سریلانکا نننۍ لوبه وګټي دومره امتیازات تر اوسه لري چې مستقیم د راتلونکي کال نړیوال جام ته ووځي.

له سریلانکا سره درېیمه او ورستۍ لوبه به د سې شنبې په ورځ ترسره شي.

د افغانستان او سریلانکا کرکټ لوبډلو ترمنځ دویمه لوبه د قوس په ۶مه ده

د افغانستان او سریلانکا لوبډلو ترمنځ د یوې سیالۍ انځور

ټاکل شوې ده چې سبا د افغانستان او سریلانکا د کرکټ د ملي لوبډلو ترمنځ دویمه یوه ورځنۍ لوبه وشي.

سریلانکا د سوپرلیګ لوبو په ترڅ کې له افغانستان سره د درېیو پنځوس اووره لوبو کوربنه ده.

دا لوبې د ۲۰۲۳م کال نړیوال جام ته د مستقیم تګ لپاره دي.

د دې لړۍ لومړۍ لوبه پرون افغان لوبډلې د شپېتو منډو په توپير له سریلانکا څخه وګټله.

د سوپرلیګ لوبې له یوه کال راهیسې پيل شوې دي.

افغان لوبډله دومره امتیازات تر اوسه لري که چېرته له سریلانکا څه دا لړۍ وګټي په مستقیم ډول به د راتلونکي کال نړیوال جام ته ووځي.

له سریلانکا سره درېیمه لوبه به د سې شنبې په ورځ وشي.

پوټزل د تاجکستان او ازبکستان چارواکو سره خپلې کتنې پای ته ورسولې

مارکوس پوټزل

په افغانستان کې د ملګرو ملتونو مرستندوی ماموریت یا یوناما وايي، چې د دغه دفتر مرستیال مارکوس پوټزل په تاجکستان او ازبکستان کې له دولتي چارواکو سره له افغان وګړو د لا زیات سیمه ییز ملاتړ په باب خپلې کتنې پای ته ورسولې.

یوناما نن شنبه په یوه ټویټ کې ویلي، چې دا کار به له ټولو سیمه ییزو لوبغاړو سره «په افغانستان کې د بامفهومه سولې د هڅو د ملاتړ لپاره» دوام ومومي.

تر دې مخکې د ازبکستان د بهرنیو چارو وزیر ولادمیر نوروف پرون په ټویټر کې لیکلي وو، چې له پوټزل سره یې په خبرو کې د افغانستان پر وضعیت او د طالبانو له سرپرست حکومت سره د مذاکرو لپاره د نړیوالې ډلې پر ایجاد بحث وکړ.

ریچارډ بینیټ: طالبانو د افغان ښځو حقوق تر پښو لاندې کړي

ریچارډ بینیټ

د افغانستان د بشري حقونو لپاره د ملګرو ملتونو ځانګړي راپور ورکوونکی له هغو افغان مېرمنو څخه ملاتړ څرګند کړی چې د ده په وینا طالبانو یې حقوق تر پښو لاندې کړي.

ریچارډ بینیټ پرون د ښځو پر وړاندې د تاوتریخوالي د مخنیوي د نړیوالې ورځې په مناست پر ټویټر په یوه بیان کې ویلي، دی د هغو افغان مېرمنو تر څنګ ولاړ دی چې په وروستیو څو میاشتو کې وهل شوي، نیول شوې دي او ډېری اساسي حقوق او د بیان، غونډو، تعلیم او ژوند لپاره آزادۍ یې ترپښو لاندې شوې دي.

پرون د نومبر په ۲۵ د ښځو پر وړاندې د تاوتریخوالي د مخنیوي په نړیواله ورځ په افغانستان کې د ملګرو ملتونو مرستندوی دفتر یوناما هم په یوه بیان کې د افغان ښځو پر وضعیت اندېښنه وښوده او افغانستان یې د نړۍ هغه هېواد وباله چې له ښځو سره په ډېره لوړه کچه تاوتریخوالی په کې کېږي.

یونېسف په دایکندي کې د څلورو ماشومانو پر مړینه خواشیني ښودلې

د افغانستان په عمومي نقشه کې د دایکندي ولایت موقعیت

د ملګرو ملتونو د ماشومانو صندوق یا یونېسف په دایکندي ولایت کې د څلورو ماشومانو پر مړینه ژوره خواشیني څرګنده کړې.

یونېسف په یوه بیان کې چې پرون یې پر خپل ټویټر خپور کړی ویلي چې د دایکندي ولایت د نیلي ولسوالۍ په سیواک شیبر کلي کې ۴ هلکان چې عمرونه یې د یوه او څوارلسو کلونو ترمنځ وو، په یوه حمله کې وژل شوي دي.

یونېسف د دې پېښې په اړه نور جزییات نه دي ورکړي، خو ځینو کورنیو رسنیو راپور ورکړی چې دا ماشومان په هغو عملیاتو کې وژل شوي چې طالبانو د دوو پخوانیو سیمه ییزو قوماندانانو د بې وسلې کولو په هدف له چارشنبې ورځې راهیسې هلته پیل کړي دي.

په دې راپورونو کې د سیمې د نهو اوسېدونکو د وژل کېدو خبر ورکړل شوی.

خپلواکو سرچینو تراوسه دا راپورونه نه دي تایید کړي او طالبانو هم تراوسه په دې اړه څه نه دي ویلي.

د یونېسف په بیان کې پر ټولو اړخونو غږ شوی چې په هر ډول شرایطو کې د نړیوالو قوانینو په اساس د ماشومانو خوندیتوب ته پاملرنه وکړي.

د ازبکستان د بهرنیو چارو وزیر په کابل کې د یوناما مرستیال سره خبرې کړي

د ازبکستان د بهرنیو چارو وزیر ولادیمیرنوروف

د ازبکستان د بهرنیو چارو وزیر وايي، د افغانستان پر اړوندو مسایلو یې په کابل کې د ملګرو ملتونو د مرستندوی دفتر له مرستیال سره خبرې کړي.

ولادیمیرنوروف پرون د نومبر ۲۵مه پر ټویټر ولیکل چې له مارک پوټزل سره په خبرو کې یې د افغانستان د روان وضعیت او له طالبانو سره د خبرو لپاره د نړیوالې ډلې د رامنځته کېدو د طرحې په اړه بحث وکړ.

ازبکستان له طالبانو سره وروسته له دې چې پر افغانستان بیا واکمن شول، د تعامل اړیکي لري او پخ پام کې لري چې د افغانستان له لارې تر پېښوره پورې د اورګاډي پټلۍ ورغوي، خو په تېرو څه باندې پنځلسو میاشتو کې د ازبکستان په ګډون د نړۍ هېڅ هېواد د طالبانو حکومت په رسمیت نه دی پېژندلی.

د افغانستان کرکټ ملي لوبډلې سریلانکا ته ماتې ورکړه

د افغانستان او سریلانکا د لوبې یو انځور

د افغانستان د کرکټ ملي لوبډلې پرون د سریلانکا ملي لوبډلې ته د شپېتو منډو په توپیر ماتې ورکړه.

پرونۍ لوبه له کوربه سریلانکا سره د درېیو یو ورځنیو لوبو د لړۍ لومړۍ سیالي وه.

افغان لوبډلې د پچې تر ګټلو وروسته د بېټینګ یا توپ وهلو پرېکړه وکړه او په ۵۰ اوورونو کې یې سیالې لوبډلې ته د ۲۹۵ منډو هدف ورکړ، خو د سریلانکا لوبغاړي ټول په اته دېرشم اوور کې وسوځېدل په داسې حال کې چې یوازې ۲۳۴ منډې یې جوړې کړې وې.

په افغان لوبغاړو کې د لوبې غوره لوبغاړي ابراهیم ځدراڼ په ۱۲۰ بالونو ۱۰۶ منډې وکړې او رحمت الله ګربز او رحمت شاه هم نیمې سلیزې وکړې او په بالېنګ کې فضل الحق فاروقي څلور ویکټې واخیستې او یوازې ۴۹ منډې یې ورکړې.

د افغانستان او سریلانکا ترمنځ دوهمه لوبه به د یکشنبې او درېیمه او وروستۍ د سه شنبې په ورځ په پام کې دي.

نور راوښيه

XS
SM
MD
LG