د لاسرسۍ وړ لېنکونه

تازه خبر
جمعه ۱۸ لیندۍ ۱۴۰۱ کابل ۰۲:۰۷

نړۍ

د اوکراین د لویې اټومۍ بټۍ د مشر خوشې کېدو غوښتنه وشوه

د زاپوریژیا اټومي بټۍ

د ملګرو ملتونو د اټومي انرژۍ د څار ادارې، له روسیې د اوکراین د تر ټولو لویې اټومۍ بټۍ د مشر د خوشې کېدو غوښتنه وکړه.

راپورونه وايي، ایهور موراشوف د روسیې د پوځ له خوا نیول شوی دی.

د ملګرو ملتونو د اټومي انرژۍ د څار ادارې مشر رافایل ګروسي پرون دا غوښتنه داسې مهال وکړه، چې موراشوف وړمه ورځ له زاپوریژیا اټومي بټۍ د اینرهودار ښارګوټي پر لوري د تګ په حال کې ونیول شو.

د اوکراین یوې دولتي ادارې چې پر اټومۍ بټۍ څار کوي، ویلي د اټومي بټۍ دغه مشر یوه نامعلوم لوري ته بېول شوی دی.

رافایل ګروسي هیله ښوولې چې ایهور موراشوف به ډېر ژر په خوندي ډول خپلې کورنۍ ته ستون او د زاپوریژیا اټومي بټۍ د فعالیت د دوام لپاره خپل مهم کار ته دوام ورکړي.

روسي چارواکو د دې پېښې په باب تبصره نه ده کړې.

د ورځې تازه خبرونه دلته ولولئ

ایران کې د 'محسن شکاري' اعدام نړیوال غبرګونونه راپارولي

محسن شکاري

د ایران د قضایه قوې له خوا د ۲۳ کلن محسن شکاري د اعدام په اړه نړیوال غبرګونونه دوام لري.

یوې دیپلوماتیکې سرچینې د پنجشنبې په ورځ اعلان وکړ چې د جرمني د بهرنیو چارو وزارت په ایران کې د وروستیو مظاهرو پر مهال د نیول شویو معترضانو له ډلې د یوه کس د اعدام په غبرګون په جرمني کې د ایران سفیر احضار کړی دی.

په همدې حال کې د جرمني د بهرنیو چارو وزیرې انالینا بیربوک د محسن شکاري پر اعدام نیوکه وکړه او ویې ویل، د ایران حکومت د انسانانو ژوند ته بې حده سپکاوی کوي.

د پنجشنبې په ورځ د ایران قضایه قوې د روانو مظاهرو یو تن مخکښ محسن شکاري چې د مظاهرو پر مهال د یوه سړک په تړلو او بلوا ته په لمن وهلو تورن وو، اعدام کړ.

د امریکا د بهرنیو چارو وزیر انتوني بلینکن هم د محسن شکاري د اعدام په غبرګون کې پر خپله ټوېټر پاڼه لیکلي: "موږ د محسن شکاري په اعدام خواشیني یو."

د اروپايي ټولنې د بهرنۍ تګلارې مشر جوزپ بوریل وویل چې هغه د محسن شکاري په اعدام سخت خواشینی دی.

هغه وویل دا موضوع به د اروپايي ټولنې د بهرنیو چارو د وزیرانو په غونډه کې مطرح شي.

په ایران کې دننه هم د محسن شکاري تر اعدام وروسته مظاهرو زور اخیستی دی.

پاکستان د امریکا د متحدو ایالتونو پر وروستي فهرست نیوکه وکړه

د اسلام اباد یوه څنډه

پاکستان د امریکا د متحدو ایالتونو پر وروستي فهرست نیوکه وکړه، چې تېره اوونۍ یې دغه هېواد، د مذهبي ازادیو په فهرست کې د ځانګړې اندېښنې وړ هېوادونو په کتار کې راوستلی دی.

امریکا تېره اوونۍ د پاکستان تر څنګ چین، روسیه، ایران، سعودي عربستان او شمالي کوریا د یوولسو هغو هېوادونو په کتار کې راوستلی، چې یا یې له مذهبي ازادیو سرغړونه کړې، یا یې سترګې ورباندې پټې کړي دي.

دغه اعلان د امریکا د بهرنیو چارو وزیر انټوني بلېنکن کړی و، چې په باب یې د پاکستان د بهرنیو چارو وزارت پرون عکس العمل وښود.

د پاکستان د بهرنیو چارو وزارت وايي، دغه راپور له عیني واقعیتونو سره سر نه خوري.

د دغه وزارت یوه ویاند د هند یادونه وکړه چې اسلام اباد یې خپل سرسخت رقیب بولي او زیاته یې کړه چې په هند کې د اقلیتونو له مذهبي ازادیو سختې سرغړونې روانې دي، خو بیا هم په دې فهرست کې نه دی راوستل شوی.

کرویشیا د اروپا په شېنګن حوزه کې شامل شو

د کرویشیا او هنګري ترمنځ سرحدي سیمه

کرویشیا د اروپا په شېنګن حوزه کې شامله شوه، او وګړي به یې له پاسپورټ پرته د دې حوزې غړو هېوادونو ته سفر وکړای شي.

چک جمهوریت جې دا مهال د اروپايي ټولنې دوره یي مشري کوي، پرون په ټویټر کې خبر ورکړی، چې دغه اقدام د ۲۰۲۳م کال له جنورې میاشتې د تطبیق وړ دی.

دا پرېکړه په بروکسل کې د اروپايي ټولنې د کورنیو او عدلیې وزیرانو تر کتنې وروسته وشوه.

دغه موقف ته د بلغاریا او رومانیا کاندیداتوري ونه منل شوه.

تر دې مخکې په راپورونو کې ویل شوي وو، چې د رومانیا له کاندیداتورۍ سره اتریش مخالفت لري او د بلغاریا په وړاندې بیا هالنډ خنډ جوړ کړی دی.

په شېنګن حوزه کې ۲۶ هېوادونه شامل دي، چې ۲۲ یې د اروپايي ټولنې غړي دي، تر څنګ یې ایسلنډ، لیختن¬شټاین، ناروې او سویس هم په کې راځي.

د فوټبال نړيوال جام؛ نن د اتو غوره لوبډلو پړاو پيلېږي

د برازیل او کوریا ترمنځ د یوې مخکېنۍ لوبې انځور

ټاکل شوې ده چې نن جمعه به د قطر په دوو لوبغالو کې د فوټبال نړیوال جام د کوارټر فاینل دوه لوبې ترسره شي.

د کابل پر وخت ماښام اوه نیمې بجې به په لومړۍ لوبه کې کرویشیا له برازیل سره ولوبېږي او د شپې یولس نیمې بجې به دویمه لوبه د هالنډ او ارجنټاین ترمنځ وي.

د ډسمبر میاشتې په لسمه نېټه به د کوارټرفاینل پړاو درېیمه سيالي د مراکش او پرتګال ترمنځ وي او په څلورمه لوبه کې به انګلستان له فرانسې سره ولوبېږي.

د فوټبال د څارونکو په وینا د دې پړاو تر ټولو په زړه پورې سيالي به هم د انګلستان او فرانسې ترمنځ وي.

د شپاړلس غوره لوبډلو په مرحله کې هالنډ له امریکا، ارجنټاین له اسټرالیا، فرانسې له پولنډ، انګلستان له سنګیال، کرویشیا له جاپان، برازیل له سویلي کوریا، مراکو له هسپانيې او پرتګال له سویس خپلې لوبې ګټلې وې.

د یادونې ده چې نیمه پايلوبې به د ډسمبر میاشتې په دیارلسمه او څوارلسمه نېټه پيل شي او د پایلوبې لپاره د همدې میاشتې اتلسمه نېټه ټاکل شوې ده.

ایران د لومړي ځل لپاره یو لاریون کوونکی اعدام کړ

پر شکاري تور پورې شوی وچې په قصدي توګه یې د وژلو، د ترهې د خپرولو او د خلکو د امنیت او ازادۍ د سلبولو او د سړک د بندولو لپاره له وسلې کار اخیستی او هم یې د امنیتي ځواکونو یو افسر ټپي کړی دی.

ایران د وروستیو لاریونونو پر یوه ګډونوال د لومړي ځل لپاره د اعدام سزا تطبیق کړه.

د ایران د قضایي ادارې اړوند د میزان خبري اژانس وویل چې محسن شکاري نن پنجشنبې وروسته له هغې په دار وځړول شو چې د ایران سترې محکمې یې د استېناف غوښتنه رد کړه.

نوموړی د هغو لاریونونو په ترڅ کې چې د امنیتي ځواکونو په توقیف کې د ۲۲ کلنې مهسا امیني د مړینې پرسر راپورته شوي، نیول شوی او په اعدام محکوم شوی و.

پر شکاري تور پورې شوی وچې په قصدي توګه یې د وژلو، د ترهې د خپرولو او د خلکو د امنیت او ازادۍ د سلبولو او د سړک د بندولو لپاره له وسلې کار اخیستی او هم یې د امنیتي ځواکونو یو افسر ټپي کړی دی.

د بخښنې نړیوال سازمان یا امنیستي انټرنېشنل وایي، په ایران کې د روانو لاریونونو په تړاو د درې ماشومانو په ګډون لږترلږه ۲۸ کسان د اعدام له سزا سره مخامخ دي.

د بشري حقونو مدافعې ډلې د ایران د امنیتي ځواکونو له خوا د دغو لاریونونو په تړاو د په زرګونو کسانو د نیول کېدو خبر ورکوي.

اتریش په شینګین زون کې د رومانیا او بلغاریا د غړیتوب مخه نیسي

د اتریش د کورنیو چارو وزیر ګرهارډ کارنر

د اتریش د کورنیو چارو وزیر ګرهارډ کارنر وایي، هېواد به یې په شینګین زون کې چې د غړیو هېوادونو اتباع یې له پاسپورټ پرته په کې سفر کولای شي، د رومانیا او بلغاریا د غړیتوب مخه ونیسي.

هغه دا خبره د اروپايي ټولنې د عدلیې او کورنیو چارو وزیرانو په غونډه کې د ګډون لپاره بروکسل ته له رسېدو سره سم خبریالانو ته وکړه.

هغه په دې اړه چې ولې د دې هېوادونو د غړیتوب مخه نیسي، نور جزییات ورنه کړل، خو رومانیا او بلغاریا له ترکیې څخه لوېدیځې اروپا ته د غیرقانوني کډوالو د تګ مهمې لارې بلل کېږي.

په شینګین زون کې پر سویس، ناروې، لیختینشټاین اوایسلنډ سربېره د اروپایي ټولنې د ۲۷ غړیو هېوادونو ۲۲ یې شامل دي.

د فوټبال نړیوال جام سياليو په لړ کې سبا د اتو غوره لوبډلو پړاو پيليږي

قطر کې د فوټبال نړيوال جام سيالۍ

په سبانۍ ورځ هم دوه لوبې ترسره کېږي چې لومړۍ لوبه د کابل پر وخت ماښام اوه نیمې بجې او دویمه به د شپې په یولس نیمو بجو پيل شي.

لومړۍ لوبه به د کروویشیا او برازیل ترمنځ او دویمه لوبه به د هالنډ او ارجنټاین ترمنځ وي.

تر دې دمه د نړیوال جام له سيالیو اتلس ورځې تېرې شوي دي او په ترڅ کې یې ټول ټال ۵۶ سیالۍ شوي دي.

د اتو غوره لوبډلو په دویمه ورځ به مراکش د پرتګال پر وړاندې او انګلستان د فرانسې پر وړاندې د لوبې ډګر ته ښکته شي.

د یادونې ده چې تر دې وروسته به څلور لوبډلې د نیمه پایلوبې مرحلې ته لار پيدا کوي.

هندوستان په بنګله‌دېش کې د کرېکټ لوبلړۍ وبایلله

د هند کرېکټ ملي لوبډلې لوبغاړي، انځور - ارشيف

د چهارشنبې په ورځ د بنګله‌دېش په مېرپور ښار کې د کوربه او هندوستان ترمنځ د درې یو ورځنیو سياليو دویمه لوبه ترسره شوه.

بنګله‌دېش چې لومړۍ توپ وهنه ترسره کړه په ټاکلو پنځوسو اورونو کې یې ۷ لوبغاړي له لاسه ورکړل او ۲۷۱ منډې یې وکړې.

د بنګال د پیل توپ وهونکو ښې منډې ونه کړې، خو محمد الله او مهدي حسن ترمنځ د اومې ويکټې ملګرتیا تر ۱۴۸ منډو پورې ورسېده چې د بنګله دېش په کرېکټ کې یې ریکارډ ثبت کړ.

مهدي حسن د یو ورځنیو سيالیو لومړنۍ سلیزه ترلاسه کړه او محمدالله په ۷۷ منډو وسوځېد.

د دې هدف د پوره کولو لپاره هندوستان ښه توپ وهنه وکړه، خو په وروستي اور کې یې ۲۰ منډې پوره نه کړې او د ۵ منډو په توپیر یې دا لوبه وبایلله.

د هند لپاره د شریاس ایر، اکشر پټيل او روحیت شرما نیمه سلیزې د یادونې دي.

په دې سره د درې یو ورځنیو لوبو لړۍ بنګله‌دېش وګټله.

د دوی ترمنځ درېيمه لوبه د ډسمبر میاشتې په لسمه نېټه ترسره کېږي.

بېلاروس د خيانت په بدل کې چارواکو ته د مرګ سزا ورکولو لايحه تصويب کړه

د بېلاروس پارلمان

په بېلاروس کې د پارلمان وکیلانو هغه لایحه تصویب کړه، چې د لوی خیانت په بدل کې چارواکو او پوځي پرسونل ته د مرګ سزا په پام کې نیول شوې ده.

دا لایحه داسې مهال تصویبېږي، چې اندېښنې شته روسیه ښايي د بېلاروس له پوځ سره یوځای د بېلاروس له قلمرو څخه پر اوکراین تازه حملې وکړي.

په دې لایحه چې لومړی د ډسمبر پر ۷مه په پارلمان کې لوستل شوې وه، د بېلاروس د پوځ د بدنامولو هدف د ناسمو اطلاعاتو په بدل کې د جنايي تعقیب موضوع هم شامله ده.

روسیې په فبروري میاشت کې پر اوکراین تر خپل غیرموجه یرغل وروسته دې ته ورته لانجمن قانون په مارچ میاشت کې تصویب کړ، چې د روسیې د وسله‌والو ځواکونو د بدنامۍ هڅې ته په‌کې سختې جزاګانې پېشنهاد شوې دي.

سږ کال هندوستان کې د تالندې او برښنا په پېېښو کې ۹۰۷ کسان مړه شوي

هند کې سېلابونه، چې اقليمي بدلون ښودل شوی دی.

په هندوستان کې روان میلادي کال ۹۰۷ کسان د تالندې او برښنا یا ټکې رالوېدو په پېښو کې مړه شوي دي.

د هند د ځمک‌پوهنې وزارت پرون چهارشنبه پارلمان ته په یوه راپور کې ویلي، چې په دغه هېواد کې د تالندې پېښې یوسل او یوولس برابره زیاتې شوي دي.

ځینو ساینسپوهانو یې یو علت په ټوله نړۍ کې اقلیمي بدلون بللی دی.

هند چې ۱ ملیارد او ۴۰۰ملیونه وګړي لري، په تېره مارچ میاشت په کې دومره ګرمي وه چې په تېره پېړۍ کې یې ساری نه و لیدل شوی.

د روغتیا نړیوال سازمان وايي اقلیمي بدلون ښايي له ۲۰۳۰ څخه تر ۲۰۵۰ م کاله پورې هر کال د نږدې دوه نیم سوه زره کسانو د مرګ سبب شي چې عمده علت به یې خوارځواکي، ملاریا، نس ناستې او د ګرمۍ له کبله رواني فشارونه وي.

نور راوښيه

XS
SM
MD
LG