د لاسرسۍ وړ لېنکونه

تازه خبر
سه شنبه ۱۲ تله ۱۴۰۱ کابل ۰۸:۵۲

افغانستان

یوناما د افغان نجونو پر مخ د ښوونځیو تړل غمجن او د شرم وړ عمل وباله

ارشیف: ارزګان کې د نجونو یو ښوونځی

په افغانستان د ملګرو ملتونو د سیاسي استازولۍ یا یوناما سرپرست مارک پوټزل د افغان نجونو پر مخ د ښوونځیو تړل، غمجن او د شرم وړ عمل بللی.

یوناما په یوه خبرپاڼه کې د ښاغلي پوټزل له قوله چې په ګرم‌سیرو کې سیمو کې د نوي ښوونیز کال د پیلېدو په مناسبت یې خپره کړې لیکلي: "له شپږم ټولګې پورته ښوونځیو څخه د نجونو روان محرومیت هیڅ ډول معتبره توجیه نه‌لري او په نړۍ کې هېڅ بل ځای دا ډول څه نه‌شته."

د پوټزل په خبره، دا د نجونو یو نسل او په‌خپله د افغانستان راتلونکي ته سخت زیان رسوي.

د یوناما په خبرپاڼه کې دا د اوسنیو واکمنو له‌خوا د پراخې تبعیضې پالیسې او کړنو برخه بلل شوې او زیاته شوې: "دا چاره د نجونو څنډې ته کېدو، له هغوی سره د تاوتریخوالي او ناوړه ګټې اخیستنې ګواښ ډېروي."

یوناما خبرداری ورکړی که د نجونو او ښځو سره دا ډول چلند دوام وکړي، د لویو ناامنیو، بې‌وزلۍ او انزوا په ګډون به، د افغانستان پر وړاندې کړکېچونه لا ژور کړي.

د ملګرو ملتونو سیاسي استازولۍ د سولې، ټول‌ګډونه حکومت جوړېدو، امنیت، بشري حقونو او اقتصادي بیا رغونې لپاره د مناسبو شرایطو برابرول د طالبانو مسوولیت بللی او ترې یې غوښتي چې هر څه ژر د نجونو ښوونځي پرانېزي او د ښځو د ازادیو او د حقونو د خوندیتوب مخه ونه نیسي.

د ورځې تازه خبرونه دلته ولولئ

ملګرو ملتونو افغانستان ته څه باندې یو میلیارد ډالره لېږدولي

ارشیف

د افغانستان لپاره د ملګرو ملتونو مرستندویه ماموریت یا یوناما وایي، ملګرو ملتونو په تېر یوه کال کې څه باندې یو میلیارد ډالره افغانستان ته لېږدولي چې له میلیونونو هغو افغانانو سره چې سخت بشري مرستو ته اړ دي، د ژوند ژغورنې مرستې وشي.

یوناما نن په یوه ټوېټ کې د دغو مرستو وضاحت ورکړی او ویلي یې دي دغه نغدي مرستې یوه سوداګریز بانک ته ورکړل شوي نه د طالبانو چارواکو ته اوس پر افغانستان واکمن دي.

د دغو مرستو په دوام د افغانستان بانک پرون افغانستان ته د نورو ۴۰ میلیون ډالرو مرستې د رسېدو خبر ورکړ.

د افغانستان بانک په یوه ټوېټ کې د نړیوالې ټولنې له خوا د قانوني او منل شویو میتودونو له لارې هېواد ته د بهرنیو اسعارو د راتګ د هرکلي ترڅنګ غوښتنه کوي چې دا ډول مرستې دې د بانکي سکتور له لارې اداره شي.

مقاومت جبهې د بدخشان د شُکی ولسوالۍ د نیولو ادعا کوي خو طالبان یې نه مني

د ملي مقاومت جبهې غړي

د ملي مقاومت جبهې ادعا کړې چې د دوی جنګیالیو په بدخشان کې شُکی ولسوالۍ له طالبانو نیولې ده.

د طالبانو د حکومت دې وسله والې مخالفې جبهې دوشنبه ناوخته په یوه اعلامیه کې د شُکی د نیولو ادعا کړې.

په اعلامیه کې زیاته شوې چې د ملي مقاومت جبهې همدارنګه د شُکی ولسوالۍ لپاره د طالبانو د امنیه قومندان محمد اکرم په شمول لس تنه طالبان نیولي.

خو د طالبانو حکومت د بدخشان د شٌکې ولسوالۍ سقوط رد کړ.

د طالبانو د کورنیو چارو وزارت پر خپله ټویټرپاڼه لیکلي چې د ولسوالۍ د سقوط په اړه خپرې شوې ادعاوې بې اساسه دي.

باختر اژانس چې د طالبانو په کنټرول کې دی لیکلي چې د طالبانو د حکومت د دفاع سرپرست وزیر ملا یعقوب مجاهد بدخشان ته تللی دی.

د خبر له مخې ملا یعقوب بدخشان ته د وضعیت د لا ښه څېړلو په هدف په دوه ورځني سفر تللی او هلته یې پامیر او اشکاشم ولسوالیو ته هم سفرونه کړي.

د ملي مقاومت جبهې جنګیالي د پنجشېر په لوړو څوکو او ځینو نورو محدودو سیمو کې د طالبانو پر وړاندې وسله وال مقاومت ته دوام ورکړی.

د بشري حقونو د څار بېلابېلو سازمانونو په طالبانو نیوکه کړې چې د جنګ په سیمو کې یې ګڼې بشري سرغړونې کړي.

د هشت صبح ورځپاڼې د ویب پاڼې بندولو غبرګونونه پارولي

هشت صبح ورځپاڼه

د بخښنې نړیوال سازمان د هشت صبح ورځپاڼې د ویب پاڼې د بندولو په اړه غبرګون وښود.

دغه سازمان وايي، پر ازادو رسنیو، د بیان پر ازادۍ او د غونډې پر حق د طالبانو پرله پسې بریدونه هغه لاملونه دي، چې ښيي دوی خپل مخالف نظریات ځپي.

هشت صبح ورځپاڼه وايي، طالبانو د سیاسي دلایلو له مخې د دوی ویب پاڼه ور بنده کړې ده.

خو طالبانو د دوشنبې په ورځ وویل چې د ورځپاڼې ویب پاڼه یې د دوی په خبره د کاذبو راپورونو د خپرولو په خاطر تړلې ده.

طالبانو 'ډاکتره سیمین مشکین مهمند' د رابعه بلخي روغتون مشره ټاکلې

ارشیف

د طالبانو حکومت ډاکتره سیمین مشکین مهمند د رابعه بلخي روغتون د مشرې په توګه وټاکله.

د روغتیا وزارت د خبرپاڼې له مخې اغلې مهمند د هغې د وړتیا په اساس دې دندې ته معرفي شوې ده او خلکو ته د ښو صحي خدماتو د وړاندې کولو تمه ترې کېږي.

یمین مشکین مهمند د طالبانو په حکومت کې دویمه ښځه ده چې د یوه روغتون د مشرې په توګه ټاکل کېږي.

تر دې مخکې ډاکتر ملالۍ فیضي د ملالۍ زیژنتون د مشرې په توګه ټاکل شوې وه.

د طالبانو د واکمنۍ څه باندې یو کال تېر شو خو لا هم ګڼې ښځینه کارمندانې بې برخلیکه دي او یواځې په محدودو برخو کې ښځې کارونو ته ورځي.

د دوی په حکومت یوه لویه نیوکه دا ده چې په لوړ پوړو څوکیو له هغې ډلې وزارتونو، عمومي ریاستونو او معینیتونو کې هېڅ ښځه نه ده ګمارلې.

استرالیا کې د کرکټ نړیوال جام سیالۍ؛ افغان لوبډلې تمرینات پیل کړي

افغان کرکټ ملي لوبډله

د افغانستان د کرکټ ملي لوبډله په استرالیا کې نړیوال جام ته د چمتووالي په هدف تمرینونه کوي.

تمه ده دا لوبډله د جمعې په ورځ یوه تمریني لوبه هم وکړي.

د کرکټ بورډ ویاند فریدهوتک ازادي راډیو ته وویل: "د افغانستان د کرکټ ملي لوبډله نړیوال جام ته د ښه چمتووالي په هدف په استرالیا کې خپل تمریناتي کمپ په لاره اچولې. د یادولو وړ ده چې د کرکټ ملي لوبډله به د اکتوبر په اوومه نېټه خپله تمریناتي لوبه ترسره کړي."

د افغانستان د کرکټ ملي لوبډله د نړیوال جام سیالیو په لړ کې تر خپلې لومړۍ رسمي لوبې مخکې د پاکستان او بنګله دېش پر وړاندې دوه تمریناتي لوبې کوي.

په نړیوال جام کې بیا لومړنۍ لوبه افغانستان د اکتوبر په ۲۲ له انګلستان سره لري.

پر طالبانو د هشت صبح ورځپاڼې د انټرنېټي پاڼې د ډومین بندېدو ادعا شوې

د مخابراتو وزارت

د هشت صبح ورځپاڼه ادعا کوي چې د انټرنېټ پاڼې ډومین یې د طالبانو له خوا بند شوی دی.

هشت صبح ورځپاڼې نن په خپله فېسبوک پاڼه کې په یوه بیان کې ویلي چې د طالبانو د مخابراتو وزارت خلکو ته د دغې شبکې له لارې د معلوماتو رسېدو انټرنېټي صفحه بنده کړې ده.

په بیان کې د دې ورځپاڼې د یوه کارکونکي له خوا ویل شوي چې د طالبانو حکومت دا کار د سیاسي انګېزې له مخې کړی دی.

طالبانو تراوسه په دې اړه څه نه دي ویلي.

کابل ته د ۴۰ میلیونه ډالرو نغدي مرستو نوې بسته رسېدلې

ارشیف

د افغانستان بانک وایي، د نړیوالې ټولنې د بشري نغدو مرستو په ترڅ کې یې نن ۴۰ میلیونه امریکایي ډالره ترلاسه کړل او هغه د افغانستان نړیوال بانک ته ولېږدول شول.

د افغانستان بانک په یوه ټویټ کې د نړیوالې ټولنې له خوا د قانوني او منل شویو میتودونو له لارې هېواد ته د بهرنیو اسعارو د راتګ د هرکلي ترڅنګ غوښتنه کوي چې دا ډول مرستې دې د بانکي سکتور له لارې اداره شي.

د افغانانو د ژوندي پاتې کېدو په موخه۳۰۰ میلیونه ډالره مرسته شوې

ارشیف

د افغانستان لپاره د ملګروملتونو د بشري مرستو د همغږۍ اداره یا اوچا وایي چې د افغانستان د بشري مرستو وجهي صندوق روان کال بشري مرستندویه شریکانو ته نږدې درې سوه میلیونه ډالره ورکړي چې هغو میلیونونو افغانانو ته چې د ژوند ژغورلو لپاره پر بشري مرستو متکي دي، د ژوندي پاتې کېدو لومړنۍ مرستې ورسوي.

اوچا په یوه بل ټویټ کې ویلي چې د افغانستان د بشري مرستو صندوق د امریکا د بسپنې ۱۰۷ میلیون ډالره د ژمنیو مرستو لپاره ازادې کړي دي.

اوچا ویلي چې دغه مرستې به مخکې له دې چې سخت ژمۍ پیل شي، د خلکو د کورونو د ترمیم، کمپلو، ګرمو جامو او د سوند موادو په برخو کې له خلکو سره پر مرستو ولګول شي.

زابل کې لسګونه کسان په نس ناستې ناروغۍ اخته شوي

ارشیف

د زابل ولایت په شینکۍ ولسوالۍ کې لسګونه کسان په نس ناستې ناروغۍ اخته شوي چې له کبله یې لږترلږه یو تن مړ شوی دی.

د زابل د عامې روغتیا ريیس ډاکتر عبدالحکیم حکیمي په دې اړه ازادي راډیو ته وویل چې د زابل ولایت مرکز کلات ته په نږدې سیمو او سیوري ولسوالۍ کې هم د نس ناستې پېښې ډېرې شوي دي.

د حکیمي په خبره ټولو سیمو ته روغتیایي ځانګړې ټیمونه استول شوي چې د درملنې، څېړنو او د حفظ الصحې لارښوونو په ګډون خلکو ته له ناروغیو د مخنیوي په هدف پوهاوی ورکړي.

هلمند کې يوې ژورې څاه ته لويدلې نجلۍ ژغورل شوې ده

د افغانستان په عمومي نقشه کې د هلمند ولايت موقعيت

په هلمند کې چارواکي وایي، یوه نجلۍ چې یوې ژورې څا ته لویدلې وه، ژغورل شوې ده.

دغه پېښه تېره ورځ د دې ولایت په واشېر ولسوالۍ کې رامنځته شوې.

د هلمند د اطلاعاتو او کلتور ریاست مرستيال مولوي محمد قاسم ریاض وايي، دغه لس کلنه نجلۍ د واشېر ولسوالۍ د لر په حوزه کې یوې نوې وهل شوې ۶۰ متره ژورې برمې ته لویدلې وه چې تر ډېرو هڅو وروسته وژغورل شوه.

په هلمند کې څاته لویدلې دغه نجلۍ داسې مهال ژغورل کېږي چې له دې مخکې په ډېرو دا ډول پېښو کې ماشومانو خپل ژوند له لاسه ورکړی دی.

سره له دې چې طالب امنیتي چارواکو خلکو ته خبرداری ورکړی چې د خپلو سر لوڅو څاګانو سرونه پټ کړي خو لیدل کېږي چې دغه ستونزه تر اوسه نه‌ده هواره شوې.

پر کاج ښوونيز مرکز د بريد په غبرګون کې نجونو محصلانو مزار شريف کې لاريون وکړ

کابل کې د تېرې ورځې په غبرګون د ښځو لاریون

د کابل په لویدیځ کې د وروستۍ خونړۍ حملې په وړاندې د اعتراضونو په دوام نن په مزارشریف کې په لسګونو محصلو نجونو مظاهره وکړه.

په هغو ویډیو ګانو چې په ټولنیزو رسنیو کې خپرې شوې، ښکاري چې معترضانې د عدالت غوښتنې شعارونه ورکوي.

د افغانستان لپاره د ملګروملتونو مرستندویه ماموریت یا یوناما نن د دغه برید د قربانیانو شمېر۴۳ او د ټپیانو ۸۳ تنه وښود.

مخکې یوناما د مړو شمېر لږ تر لږه ۳۵ تنه ښودلی و.

پر کاج ښوونیز مرکز د دغه برید چې مسؤلیت یې تر اوسه چا یا کومې ډلې نه‌دی اخیستی، د قربانیانو ډېری یې نجونې او ښځې دي.

تر دې مخکې په بامیان او هرات کې پرون د دغه برید په وړاندې مظاهرې شوې او د شنبې په ورځ هم کابل د یو شمېر نجونو او ښځو د مظاهرو شاهد و چې د طالبانو د وسله‌والو په هوایي ډزو تیت و پرکې شوې.

له هېواده بهر د کاناډا په تورنتو کې هم د یوه اعتراض ګډونوال د دا ډول حملو د مخنیوي غوښتونکي شول.

يوناما: کابل کې پر کاج ښوونيز مرکز بريد کې د وژل شويو شمېر ۴۳ ته ورسېد

کاج ښوونيز مرکز تر بريد وروسته

د ملګرو ملتونو سیاسي ماموریت یا یوناما وايي، چې د کابل په لویدیځ کې پر کاج ښوونیز مرکز د جمعې ورځې په حمله کې د وژل شويو شمېر ۴۳ ته ورسېد.

دغه دفتر نن سهار په یوه ټویټ کې لیکلي، چې په دې پېښه کې د ټپیانو شمېر ۸۳ دی، چې ډېری یې نجونې او ځوانې ښځې وې.

ملګرو ملتونو تر دې مخکې د مړو شمېر لږ تر لږه ۳۵ یاد کړی و.

یوناما نن زیاته کړې، چې ممکن د مړو شمېر نور هم زیات شي.

د جمعې ورځې د حملې مسؤلیت چا نه دی منلی، خو تر دې مخکې د کابل په لویدیځ کې د دغسې حملو مسؤلیت د داعش ډلې خراسان څانګې منلی دی.

افغان کرېکټ ملي لوبډلې نړيوال جام ته د چمتووالي په موخه استراليا کې تمرينات پيل کړل

ارشيف

د افغانستان د کرېکټ ملي لوبډلې د ۲۰۲۲ کال نړیوال جام ته د ښه چمتوالي په هدف استرالیا کې تمرینونه پيل کړل.

کرېکټ بورډ پرون په یوه خبرپاڼه کې ویلي چې، د دې تمرینونو پر مهال به لوبغاړي له پیچونو او موسم سره بلدتیا پيدا کړي.

د ۲۰۲۲ کال د شل اوریزو لوبو نړیوال جام د اکتوبر په شپاړسمه په استرالیا کې پيلیږي او د نومبر تر ۱۳مې نېټې دوام کوي.

افغانستان د اکتوبر په ۲۲مه خپله لومړنۍ لوبه له انګلستان سره کوي.

'ترکيش ايرلاينز' شرکت افغانستان ته الوتنې پيلوي

ترکي الوتکه

د ترکیې هوایي شرکت ( ترکیش ایرلاینز) د راتلونکې مارچ میاشتې له ۲۷مې افغانستان ته د ټکټونو پلور پيل کړی دی.

له مهالوېش سره سم ټاکل شوې چې د دغه شرکت الوتکې به هره ورځ یو پرواز له استانبوله کابل او دغه راز په اوونۍ کې درې ورځې له استانبوله مزار ته الوتنې ولري.

له کله چې تېر کال اوړي کې طالبان بیا واک ته ورسېدل، نړیوالو هوایي شرکتونو لکه ترکیش، امارات او فلای دوبۍ افغانستان ته الوتنې وځنډولې.

اوس مهال د کیش ایر په نوم د ایران یو هوایي شرکت او اریانا او کام ایر هوایي شرکتونه له کابل او څو نورو ښارونو بهر ته الوتنې کوي.

يو ان ډي پي: د ژمي په درشل کې د اړمنو افغانان لاسنيوي ته دوام ورکوو

ارشيف

د ملګرو ملتونو د وګړو صندوق (UNFPA) وایي، په افغانستان کې د ژمي په درشل کې د اړمنو کسانو لاسنیوي ته دوام ورکوي.

دغه بنسټ پرون (د تلې په لسمه) په یوه ټویټ کې ویلي، د ژمي پر مهال یې د روغتیایي خدمتونو د لومړیتوبونو او د خلکو پر ساتنې يې کار پيل کړی دی.

دغه صندوق همدا راز په یوه راپور کې اندېښنه ښودلې چې د افغانستان ۹۵ فیصده وګړي لا هم له لوږې سره مخامخ دي.

د خوړو نړیوال پروګرام (ډبلیو.ایف.پي) را روان ژمی په افغانستان کې سخت بللی، خو د خپلو مرستو د دوام ډاډ یې ورکړی دی.

نور راوښيه

XS
SM
MD
LG