د لاسرسۍ وړ لېنکونه

تازه خبر
جمعه ۸ تله ۱۴۰۱ کابل ۰۷:۳۲

افغانستان

د طالبانو حکومت: له چين افغانستان ته د سوداګرۍ مالونو لومړنۍ جوپه را روانه شوه

چين ته د افغانستان د سوداګريزو مالونو راتلل

د طالبانو د حکومت د ریل‌لارو اداره وايي، له چین څخه افغانستان ته د سوداګري مالونو لومړنۍ جوپه د نوي تاسیس شوي دهلیز (کوریدور) له لارې افغانستان ته را روانه شوه.

په وروستیو ورځو کې د چین، افغانستان، قرغیزستان او ازبکستان ترمنځ د مځکني دهلیز د جوړولو په اړه موافقه وشوه.

د افغانستان د رېل‌لارو اداره هیله لري چې، دا دهلیز به له چین څخه افغانستان ته د ریل‌ګاډي په وسیله د تجارتي مالونو د رسېدو موده له یوې میاشتې ۱۵ ورځو ته رالنډه کړي.

د افغانستان د جمهوري حکومت په مهال هم د منځنۍ اسیا د هېوادونو له لارې د چین او افغانستان ترمنځ د سوداګري راکړو ورکړو هڅه وشوه خو ډېر دوام یې ونه کړ.

د ورځې تازه خبرونه دلته ولولئ

افغاني سرې مياشتې ټولنې د خوست له ۴۰۰ زلزله‌ځپلو کورنيو سره مرستې کړي

د زلزله‌ځپليو سيمو انځور - ارشيف

د افغاني سرې میاشتې ټولنه وایي، د خوست په سپېرې ولسوالۍ کې یې له ۴۰۰ زلزله‌ځپلو کورنیو سره مرستې کړي دي.

دغې ادارې پرون په څو ټیونو کې ویلي چې، په دغو مرستو کې چې ترکیې ورسره کړي، وریجې، لوبیا، بوره، مکروني، چای، غوړي، او بیسکوټ شامل دي.

د افغاني سرې میاشتې ټولنې ویلي چې زلزله‌ځپلي د را روان ژمي په درشل کې نورو مرستو ته اړتیا لري.

په خوست او پکتیا ولایتونو کې په تېر دوبي کې سختې زلزلې له زرو زیات کسان مړه او په لسګونه زره نور بې کوره کړل.

د طالبانو حکومت: تر اوسه مو د کابل له ښار ۹۵۰۰سوالګر راټول کړي

ارشيف

د طالبانو حکومت وایي، د کابل ښار لپاره ګومارل شوې د سوالګرو د را ټولولو کمېټې تر اوسه له دې ښاره نژدې نهه نیم زره سوالګر راټول کړي دي.

په هغه خبرپاڼه کې چې پرون د طالبانو د رئیس الوزرا د اقتصادي مرستیال ملا عبدالغني برادر له دفتره خپره شوې ویل شوي چې، د دغو سوالګرو په منځ کې ۶۴۹۵ یې ښځې، ۲۱۷۶ ماشومان او ۷۷۶ نارینه دي.

طالبانو ویلي، له مستحقو سوالګرو سره به په دوامداره توګه مرستې کېږي خو تر اوسه نه‌ده څرګنده چې د مرستو مستحق سوالګر به په څه ډول په نښه کېږي.

د طالبانو حکومت له کابل ښاره د سوالګرو د را ټولو بهیر درې اوونۍ مخکې پیل کړ.

د کابل ښار یو شمېر اوسیدونکي د طالبانو دغه اقدام ستایي خو وایي چې باید دغو کسانو ته د کار زمینې برابرې شي.

پر افغانستان د طالبانو له بیا واکمنېدو راهیسې په دې هېواد کې د بې‌وزلۍ او بې‌کارۍ کچه خورا زیاته شوي او ورسره داسې شکایتونه هم راپورته شوي چې د نړیوالو مرستې په سمه توګه مستحقو کسانو ته نه رسیږي.

د سره صليب کمېټې په ۷ مياشتو کې له سل زره د ډېرو معلولينو درملنه کړې

ارشيف

د سره صلیب نړیواله کمیټه وایي چې، په افغانستان کې یې د روان کال د جنوري له میاشتې تر جولای پورې له سل زرو زیاتو معلولینو درملنه کړې ده.

د افغانستان لپاره د دې ادارې دفتر پرون په یوه ټویټ کې ویلي چې، دغه کسان په افغانستان کې د دې ادارې په اوو مرکزونو کې تداوي شوي دي.

د سره صلیب نړیوالې کمېټې ویلي چې، په افغانستان کې د معلولینو شمېر لسګونو زره کسانو ته رسیږي چې ډېرو یې د جګړو او چاودنو په نتیجه کې د خپل بدن غړي له لاسه ورکړي دي.

د کډوالو عالي کمېشنرۍ کندهار کې پر ۱۳۷ کورنيو سولري کيټونه ويشلي دي

ارشيف

د ملګروملتونو د کډوالو اداره یو ان ایچ سي آر وایي، د افغانستان په جنوب د کندهار په پنجوایي ولسوالۍ کې یې پر۱۳۷ کورنیو سولري کیټونه ویشلي دي.

دغې ادارې په یوه ټویټ کې ویلي، دا هغه کورنۍ دي چې په افغانستان کې دننه له بې ځایه کېدو، یا له بهره بېرته خپلو سیمو ته راستنې شوي یا هم په سیمه کې مېشتې زیانګالې کورنۍ دي.

دغې ادارې په یوه بل ټویټ کې د زابل په مرکز قلات کې له راستنه شویو سره د روغتیا په برخه کې د لومړنیو روغتیایي خدمتونو د یوه مرکز د پرانيستلو خبر هم ورکړی.

د کډوالو عالي کمېشنرۍ ويلي، دغه مرکز به په سیمه کې ۱۳۷۰۰ په کور دننه بې ځایه شویو او له بهره راستنو شویو زیانګالو خلکو ته روغتیایي خدمتونه رسوي.

چين د افغانانو د اساسي حقونو پر رعايت ټينګار کړی

ارشيف

د چین د بهرنیو چارو وزارت د ټولو افغانانو په تېره بیا د افغانستان د ټولو قومونو، ښځو او ماشومانو د اساسي حقونو پر رعایت کېدو ټینګار وکړ.

د چیني رسنیو د راپور له مخې، د دغه هېواد د باندنیو چارو وزارت ویاند (وانګ وین ین) دا خبره پرون (چهارشنبې) په یوه خبري غونډه کې وکړه.

د چین د باندنیو چارو وزارت ویاند په داسې حال کې په افغانستان کې د بشري حقونو موضوع یادوي چې د بشري حقونو ملاتړې موسسې چین په شینجن کې د ایغورانو او نورو مسلمانو لږکیو د حقونو په سرغړونې تورنوي.

که څه هم د طالبانو حکومت ویلي چې د ټولو وګړو حقونو ته درناوی کوي، خو د بشري حقونو موسسې وايي چې په افغانستان کې د طالبانو له بیا واک ته رسېدو وروسته د ښځو او نجونو په شمول د یو شمېر افغانانو حقونه تر پښو لاندې شوي دي.

د پاکستان د اسلامي ايډيالوژۍ شورا مشر د ښوونځيو په اړه د عباس ستانکزي د نظر تأييد کړی

ارشيف

د پاکستان د اسلامي نظریاتي کونسل یا د اسلامي ایډیالوژۍ شورا مشر قبله ایازي وايي، د تعلیم په اړه د طالبانو د حکومت د بهرنیو چارو د مرستیال وزیر شیر محمدعباس ستانکزي نظر د تأیید وړ دی.

ده پرون په کراچۍ کې وویل، ګټور تعلیم فرض دی، علما وايي مفید تعلیم عبادت دی.

د سې شنبې په ورځ د طالبانو د بهرنیو چارو مرستیال وزیر عباس ستانکزي په یوه غونډه کې وویل چې، تعلیم پر نر او ښځه فرض دی خو د طالبانو د امربالمعروف وزیر خالد حنفي یې په مخالفت کې وویل، هر ځای ته چې لاړ شي د تعلیم خبره کېږي، تعلیم مباح عمل دی.

د طالب چارواکو د نظرونو دغه اختلاف د خلکو پراخ غبرګونونه هم پارولي دي.

ټام ويسټ: له تېر کال راهيسې امريکا له افغانستان سره يو ميليارد او سل ميليون ډالره مرسته کړې

ارشيف

د افغانستان لپاره د امریکا ځانګړی استازی ټام ویسټ وايي، د امریکا متحدو ایالتونو د ۲۰۲۱ د اګست له میاشتې تر اوسه پورې له افغانستان سره یو میلیارد او سل میلیون ډالره بشري مرسته کړې ده.

ده په عین حال کې وویل چې، دا بشري مرستې دوامداره نه‌دي نو باید د افغانستان د اقتصادي ثبات لپاره یو سیستم جوړ شي.

ښاغلي ویسټ چې پرون (چهارشنبه) د واشنګټن ډي سي د نړیوالو ستراتېژیکو مطالعاتو په بنسټ کې خبرې کولې، د قطر د سولې د خبرو د ناکامېدو، د طالبانو په منځ کې د اختلافاتو او نورو موضوعاتو په اړه نظر څرګند کړ.

ده وویل، د طالبانو هغه ډله، چې په قطر کې یې خبرې کولې، د سوله‌ییزې حللارې پلوۍ وه خو هغه چې په کوټه کې وه، په زور د واک ته رسېدو غوښتونکې وه.

منزه کاکړ: د کراچۍ له زندانه ټول خوشې شوي بنديان به افغانستان ته ولېږدول شي

کراچۍ کې يو زندان - ارشيف

د پښتون ژغورنې د غورځنګ یا پي ټي ایم مدافعه وکیله منزه کاکړ وایي چې، هغه ټول بندیان به چې د کراچۍ له زندانه یې د خوشې کېدو امر صادر شوی، افغانستان ته ولېږدول شي.

مېرمن کاکړ نن ازادي راډیو ته وویل، د ۱۹۲ بندیانو له ډلې چې د خوشې کېدو امر یې صادرشوی، د افغانستان د سفارت په مرسته اتیا تنه یې په موټرو کې پولې ته لېږدول شوي چې افغانستان ته واوړي او نور به وروسته ولېږدول شي.

هغې وویل چې دغو بندیانو له شاوخوا درې میاشتو راهیسې د کراچۍ په زندانونو کې تېر کړي دي.

ویل کېږي چې شاوخوا درې سوه افغانان د کراچۍ پولیسو په هغه هېواد کې د اقامت د لازمو اسنادو د نه لرلو په خاطر نیولي او توقیف کړي و.

پنټاګون: امريکايي ځواکونو په تېر کال کې ۱۲ ملکي افغانان وژلي

د امريکا ياد بريدونه د بې پيلوټه الوتکو په وسيله ترسره شوي

پنټاګون ویلي چې امریکايي ځواکونو په ۲۰۲۱ کال کې ۱۲ تنه ملکي وګړي په افغانستان کې وژلي دي.

د امریکا دفاع وزارت په یوه تازه راپور کې ویلي دي، د دوی د ارزونو له مخې تېر کال امریکايي سرتېرو د پوځي عملیاتو پرمهال په تقریبي ډول ۱۲ ملکي افغانان وژلي او پنځه نور یې ټپیان کړي دي.

د امریکا کانګرس له ۲۰۱۸ کال راهیسې له پنټاګون څخه کلني راپورونه غواړي چې ځینې برخې یې محرمې دي.

د امریکا دفاع وزارت لا له مخکې د ۲۰۲۱ کال د اګست په پای کې له افغانستانه د امریکايي ځواکونو د وتلو په ګډوډۍ کې د اوو ماشومانو په ګډون د یوې کورنۍ د لسو ملکي غړو د وژنې مسوولیت منلی دی.

د دې اسنادو د علني برخې د معلوماتو له مخې یو بل ملکي افغان د ۲۰۲۱ کال د جنوري په اتمه په هرات کې او یو بل د اګست په ۱۱ مه په کندهار کې د امریکايي ځواکونو په حملو کې وژل شوي دي.

بلاول بوټو: نړيواله ټولنه دې د طالبانو پر وړاندې زغم ولري

د پاکستان د بهرنیوچارو وزیر بلاول بوټو

د پاکستان د بهرنیو چارو وزیر بلاول بوټو زرداري له نړیوالې ټولنې غوښتي دي چې د طالبانو پر وړاندې زغم ولري او ګډ کار ورسره وکړي.

ښاغلي زرداري، له اسوشیتیدپریس خبري آژانس سره په مرکه کې غوښتنه کړې چې متحده ایالات دې له طالبانو سره په مستقیم ډول ګډ کار وکړي.

زرداري د افغانستان د هغو شتمنیو د آزادېدو غوښتنه هم وکړه چې امریکا کنګل کړې دي او ويلي دي چې، دا پیسې د طالبانو نه بلکې د افغانستان د خلکو دي.

دا په داسې حال کې ده چې پرون د امریکا د بهرنیو چارو وزیر انټوني بلېنکن د پاکستان د بهرنیو چارو وزیر بلاول بوټو سره د پاکستان او د متحده ایالاتو د اړیکو د ۷۵مې کلیزې د نمانځلو پرمهال ټینګار وکړ، چې دواړه هېوادونه به په افغانستان کې د ثبات لپاره کار کولو ته دوام ورکوي.

د طالبانو حکومت روسيې سره د نفتي او خوراکي موادو د تامين قرارداد لاسليک کړی

د طالبانو بيرغ

په افغانستان کې د طالبانو د حکومت د سوداګرۍ سرپرست وزیر حاجي نورالدین عزیزي وایي چې له روسیې سره یې د پترولو، ډیزلو، ګازو او غنمو د تامین په برخه کې یو موقت قرارداد لاسلیک کړی دی.

ښاغلي عزیزي رویترز خبري آژانس ته ویلي چې وزارت یې هڅه کوي چې په سوداګریزو شریکانو کې تنوع رامنځته کړي او روسیې طالبانو ته په متوسط ډول په نړیواله کچه په توکو کې د تخفیف وړاندیز کړی دی.

د عزیزي په خبره روسیه به شاوخوا یوملیون ټنه پترول، یو ملیون ټنه ډیزل، پنځه سوه زره ټنه مایع ګاز او دوه ملیون ټنه غنم په کال کې افغانستان ته ورکوي.

هغه د نرخونو او داچې پیسې به یې په څه ډول روسیې ته ورکول کېږي، نورجزیات نه‌دي ورکړي.

پوتزل: که طالبان د خلکو غوښتنې ونه مني ټولنه به له بدبختۍ سره مخ کړي

مارکوس پوتزل

د افغانستان لپاره د ملګروملتونو د مرستندویه ماموریت، یوناما مرستیال مارکوس پوتزل وایي که طالبان عملي اقدامات ونه‌کړي د افغانستان خلک به لا له بدبختۍ سره مخامخ کړي.

ښاغلي پوتزل دغه څرګندونې تېره ورځ ناوخته د ملګروملتونو د امنیت شورا غونډې ته چې د افغانستان په اړه جوړه شوې وه، په وینا کې وکړې.

په څو ټویټونو کې چې یوناما پر خپله پاڼه خپاره کړي، ښاغلي پوتزل ویلي، که د ټولنې د ټولو قشرونو غږ وا نه‌ورېدل شي او ټولنې خپل استازیتوب ونه‌کړي نو به طالبان افغانان لا له بدبختۍ سره مخامخ کړي.

د هغه په خبره طالبان په دې کې پاتې راغلي چې د ټولو افغانانو حقونه خوندي کړي او له نړیوالې ټولنې سره رغنده تعامل ولري.

د ملګروملتونو د امنیت شورا دې غونډې ته د امریکا، روسیې، چین او هند په ګډون د دې شورا د یو شمېر غړیو پر استازیو سربېره د افغانستان په استازیتوب د پخواني حکومت استازي وینا وکړه.

دې ځانګړې غونډې ته همدارنګه د افغانستان د پخوانۍ ولسي جرګې غړې فوزیه کوفي هم بلل شوې وه.

د ملګرو ملتونو عمومي غونډه د افغانستان د استازي له وینا پرته پای ته ورسېده

د ملګرو ملتونو د عمومي غونډې انځور

د ملګرو ملتونو د غړو هېوادونو سرمشریزه د افغانستان د استازي له وینا پرته پای ته ورسېده.

دا پرله پسې دویم کال دی چې هیڅوک د افغانستان په استازیتوب د ملګرو ملتونو عمومي غونډې ته وینا نه کوي.

بل لورته نن ماښام د ملګرو ملتونو امنیت شورا د افغانستان په اړه یوه غونډه رابللې.

په افغانستان کې د ملګرو ملتونو د مرستندوی ماموریت "یوناما" مشر مارکوس پوټزل دغې غونډې ته د افغانستان په اړه معلومات ورکوي.

د افغانستان د پخواني جمهوري نظام له خوا دغه سازمان ته معرفي شوي استازي نصیر احمد فایق ویلي، د افغانستان د ملت غږ او غوښتنې به راپورته کړي.

طالبانو تېر کال خپل یو مطرح غړی سهېل شاهین ملګرو ملتونو ته د استازي په توګه معرفي کړ، خو ملګرو ملتونو ونه مانه.

د یوناما سرپرست د افغانستان د وضعیت په تړاو امنیت شورا ته راپور ورکوي

په افغانستان کې د یوناما سرپرست مارکوس پوټزل

د یوناما سرپرست مارکوس پوټزل نن د افغانستان د وضعیت په تړاو د ملګرو ملتونو امنیت شورا ته راپور ورکوي.

د امنیت شورا غونډه به د افغانستان په وخت د مازیګر شپږ نیمې بجې پیلېږي، چې په ژوندۍ بڼه به خپرېږي.

ملګرو ملتونو په وار وار د افغانستان په اوسني وضعیت جدي اندېښنه ښودلې او د ښځو په وړاندې یې د طالبانو په پالیسیو کلکې نیوکې کړي.

په ملګرو ملتونو کې د افغانستان د جمهوري نظام له وخته پاتې شوي استازي نصیراحمدفایق په خپل ټوېټر باندې لیکلي د امنیت شورا په دې ناسته کې به د خپل ملت غوښتنې او غږ پورته کړي.

د پنجشېر لپاره د طالبانو نوی والي معرفي او خپله دنده یې پیل کړه

د افغانستان په عمومي نقشه کې د پنجشېر ولایت موقعیت

د پنجشېر لپاره د طالبانو د حکومت نوي والي پرون رسماً معرفي او خپله دنده یې پیل کړه.

د طالبانو تر کنټرول لاندې باختر دولتي اژانس راپور ورکړی چې مولانا محمد محسن هاشمي تر دې مخکې د کورنیو چارو وزارت مرستیال و.

د راپور له مخې هاشمي ویلي، خلکو ته خدمت کول او د امنیت تامین یې له لومړیتوبونو څخه دي.

په دې وروستیو کې پنجشېر د ملي مقاومت د جبهې او د طالبانو د خونړیو نښتو شاهد دی.

د دغو جګړو په پایله کې لسګونه کورنیو خپل کورونه پرېښي او ګاونډیو ولایتونو ته یې پناه وړې ده.

نور راوښيه

XS
SM
MD
LG