د لاسرسۍ وړ لېنکونه

تازه خبر
چهارشنبه ۱۳ تله ۱۴۰۱ کابل ۰۸:۳۸

افغانستان

د بشري مرستو دوام؛ د ۴۰ میلیونه ډالرو بله بسته کابل ته رسېدلې

ارشیف

د افغانستان بانک وايي، د نړیوالې ټولنې د بشري مرستو په دوام کې ۴۰ میلیون نور ډالره کابل ته ورسېدل.

دا پیسې هم د مخکینیو په شان یوه خصوصي بانک ته سپارل شوي دي.

خو د افغانستان بانک، چې د طالبانو د حکومت په کنټرول کې دی، د دې مرستې د هرکلي ترڅنګ له نړیوالې ټولنې غوښتنه کړې چې په بانکي برخه کې همکاري او تعامل زیات کړي.

د طالبانو له واک ته رسېدو وروسته د نړیوالې ټولنې له لوري افغانستان ته تراوسه پورې څه باندې یو میلیارد او ۱۵۳ میلیون ډالره مرسته شوې ده.

د ورځې تازه خبرونه دلته ولولئ

ایمرجنسي روغتون: کابل کې د چاودنې له امله ۲ تنه وژل شوي او ۱۸ ټپيان دي

ارشیف

د ایمرجنسي روغتون وايي، په کابل کې د چاودنې له امله ۲ تنه وژل شوي او ۱۸ نور ټپيان دي.

دا روغتون چې د ایټالیا د یوې غیردولتي موسسې په مرسته چلېږي، په خپل ټوېټر کې لیکلي دي چې تر چاودنې وروسته دوی ته ۲۰ تنه وروړل شوي دي چې دوو یې روغتون ته پر لاره ساه ورکړې ده.

د طالبانو د کورنیو چارو د وزارت ویاند عبدالنافع ټکور رسنیو ته په استولي پیغام کې هغه راپور رد کړی چې مخکې ویل شوي و چې دا چاودنه د کورنیو چارو د وزارت دننه په جومات کې شوې ده.

دی وایي چې د کورنیو چارو وزارت ته څېرمه په یوه جومات کې دا چاودنه شوې ده چې هلته د کورنیو چارو د وزارت ځیني کارکوونکي هم لمونځ کوي.

د تېرې نږدې یوې اونۍ په ترڅ کې دا څلورمه چاودنه ده چې په کابل کې کېږي.

نږدې دوه اونۍ مخکې د کابل په وزیر محمد اکبرخان جومات ته څېرمه د چاودنې له امله ګڼو کسانو ته مرګ ژوبله واوښته.

ننګرهار کې معترضې نجونې: موږ پښتانه هزاره ګان يو د خپلو خويندو غچ به اخلو

ارشيف

د ننگرهار په مرکز جلال‌اباد کې نن سهار یو شمېر نجونو او ښځو پر کاج ښوونیز مرکز‌ د برید په غبرگون‌ کې اعتراض‌ کړی‌.

دوی په هغو بېنرونو‌ کې چې له ځان سره یې لېږدول لیکلي و «موږ پښتانه هزاره‌گان‌ یوو او د خپلو خویندو او وروڼو غچ به اخلو.»

معترضینو نجونو او ښځو همدا ډول د افغانانو ترمنځ د یووالي شعارونه ورکول او د عدالت غوښتنه یې کوله‌.

دا له کابل، هرات، بامیان او مزار شریف وروسته، په جلال‌اباد کې د ښځو راټولېدنه ده چې د افغانانو د خونديتوب او د خپلو حقونو لپاره غږ پورته کوي‌.

د تېرې جمعې په ورځ پر کاج ښوونیز مرکز برید کې د یوناما د شمېرو له مخې، لږ تر لږه ۵۳ تنه ووژل شول او ۱۱۰ نور ټپیان شول.

د قربانيانو لوی اکثریت نجونې او ځوانې ښځې دي‌.

طالبان: د داعش ډلې د بهرنيو اړيکو مالي مسؤل مو نيولی

ارشيف

د طالبانو د حکومت استخبارات وايي، د پوځي عملیاتو په ترڅ کې یې د 'خوارجو' د ډلې د بهرنیو اړیکو او مالي چارو مسؤل نیولی دی.

طالبان د خوارجو اصطلاح د اسلامي دولت ډلې یا داعش د غړو لپاره کاروي.

په یوه بیان کې چې بېګا د استخباراتو پر رسمي ټویټر خپور شو ویل شوي چې د مالکي په مستعار نوم دې تورن کس د اوکرايین، جرمني او اسپانیا په ګډون له نورو هېوادونو څخه مالي مرستې د دوی په وینا د خوارجو ډلې ته راوړلې او د دې ډلې د جلب او جذب مسوول هم و.

طالبانو د دوحې په تړون کې له متحدو ایالتونو او نړیوالې ټولنې سره موافقه کړې وه چې د ترویستي ډلو فعالیت ته به اجازه نه ورکوي خو له تېر یوه کال راهیسې د دوی حکومت له دې تورونو سره مخامخ دی چې د القاعده شبکې په ګډون یې تروریستانو ته په افغانستان کې ځالې ورکړې دي.

افغان کرېکټ ملي لوبډله له پاکستان او بنګله دېش سره دوه تمريناتي لوبې کوي

ارشيف

په پام کې ده د افغانستان د کرېکټ ملي ټیم، د پاکستان او بنګله دېش په وړاندې د نړیوالو شل اووره مسابقو په لړ کې دوه تمریناتي لوبې وکړي.

د کرېکټ نړیوالې شورا د خپاره شوي مهالوېش له مخې د سږ کال تر شل اووره مسابقو مخکې به د افغانستان ټیم د اکتوبر پر ۱۷مه د بنګله دېش او د اکتوبر پر ۱۹مه د پاکستان په وړاندې مسابقه وکړي.

په اسټرالیا کې دغه شل اووره نړیوالې مسابقې د اکتوبر میاشتې پر ۱۶مه پیلېږي او د نوامبر میاشتې تر ۱۳مې دوام کوي.

افغانستان به خپله لومړۍ رسمي مسابقه د اکتوبر پر ۲۲مه د انګلستان په وړاندې وکړي.

پاکستان له افغانستان سره د تجارتي اړیکو پر پراختیا ټینګار کړی

ارشيف

د پاکستان دولتي راډیو خبر ورکړی، چې د پاکستان مالیې وزیر محمد اسحاق دار د کابل لپاره له خپل نوي سفیر عبید الرحمن نظاماني سره د طالبانو له حکومت سره د تجارتي اړیکو پر پراختیا ټلیفوني خبرې کړي.

په راپور کې ویل شوي، چې د دواړو هېوادونو ښو اړیکو ته په پام سره، اړتیا ده چې د دواړو لوریو ترمنځ سوداګریزې او اقتصادي اړیکې هم پیاوړې شي.

د یوه کال له تېرېدو وروسته هم د پاکستان په ګډون، چې د طالبانو په ملاتړ تورن دی، د نړۍ یوه هېواد هم د طالبانو حکومت په رسمیت نه دی پېژندلی.

اف او ای: د افغانستان په ۱۴ ولايتونو کې د غواګانو د پوستکي ناروغي ثبت شوې ده

ارشيف

د ملګرو ملتونو د خوړو او کرنې اداره یا (FAO) وايي، د افغانستان په ۱۴ ولایتونو کې د غواګانو د پوستکي د دانې یا لمپي سکین (Lumpy Skin Disease) ناروغي ثبت شوې ده.

دغې ادارې پرون په یوه ټویټ کې ویلي، ياده ناروغي د دې سبب شوې، چې د غواګانو د شیدو تولید او وزن کم شي.

د ملګرو ملتونو د خوړو او کرنې اداره وايي، دوی د افغانستان په ۱۰ ولایتونو کې د غواګانو د واکسین پروګرام پیل کړی او روانه میاشت شا و خوا لس زره غواګانې یوازې په بلخ ولایت کې واکسین شوي دي.

په لومړیو کې څو میاشتې مخکې په خوست، پکتیا او پکتیکا کې په غواوو کې د دې ناروغۍ د خپرېدو راپورونه ورکړل شول.

د خوړو نړيوال پروګرام: اړو کسانو سره د مرستې لپاره ۱،۱ ميليارد ډالرو ته اړتيا لرو

ارشيف

د خوړو نړیوال پروګرام وايي، یو اعشاریه یو ميلیارد ډالرو ته اړتیا لري، چې وکړای شي د ۲۰۲۳م کال تر مارچ میاشتې پورې اړو کسانو ته د خوراکي توکو مرسته ورسوي.

په افغانستان کې د دې ادارې ویاند، وحید اله اماني ازادې راډیو ته وویل، دوی غواړي له روانې اکتوبر میاشتې د خوراکي توکو د مرستې رسونې چارې ګړندۍ کړي.

نوموړي وويل: "يو اعشاریه یو ملیارد ډالرو ته اړتیا لرو، باور مو دا دی چې زموږ نړیوال شریکان او نړیواله ټولنه به دغه مرسته زموږ په واک کې راکړي، چې وکړای شو د خپل پلان مطابق ۱۵ ملیون کسانو ته د خوراکي توکو مرستې ورسوو."

ښاغلی اماني وايي، دوی غواړي چې له روانې اکتوبر میاشتې د ۲۰۲۳م کال تر مارچ میاشتې پورې په میاشت کې ۱۵ ملیون کسانو سره افغانستان کې د خوراکي توکو مرسته وکړي.

ملګرو ملتونو افغانستان ته څه باندې یو میلیارد ډالره لېږدولي

ارشیف

د افغانستان لپاره د ملګرو ملتونو مرستندویه ماموریت یا یوناما وایي، ملګرو ملتونو په تېر یوه کال کې څه باندې یو میلیارد ډالره افغانستان ته لېږدولي چې له میلیونونو هغو افغانانو سره چې سخت بشري مرستو ته اړ دي، د ژوند ژغورنې مرستې وشي.

یوناما نن په یوه ټوېټ کې د دغو مرستو وضاحت ورکړی او ویلي یې دي دغه نغدي مرستې یوه سوداګریز بانک ته ورکړل شوي نه د طالبانو چارواکو ته اوس پر افغانستان واکمن دي.

د دغو مرستو په دوام د افغانستان بانک پرون افغانستان ته د نورو ۴۰ میلیون ډالرو مرستې د رسېدو خبر ورکړ.

د افغانستان بانک په یوه ټوېټ کې د نړیوالې ټولنې له خوا د قانوني او منل شویو میتودونو له لارې هېواد ته د بهرنیو اسعارو د راتګ د هرکلي ترڅنګ غوښتنه کوي چې دا ډول مرستې دې د بانکي سکتور له لارې اداره شي.

مقاومت جبهې د بدخشان د شُکی ولسوالۍ د نیولو ادعا کوي خو طالبان یې نه مني

د ملي مقاومت جبهې غړي

د ملي مقاومت جبهې ادعا کړې چې د دوی جنګیالیو په بدخشان کې شُکی ولسوالۍ له طالبانو نیولې ده.

د طالبانو د حکومت دې وسله والې مخالفې جبهې دوشنبه ناوخته په یوه اعلامیه کې د شُکی د نیولو ادعا کړې.

په اعلامیه کې زیاته شوې چې د ملي مقاومت جبهې همدارنګه د شُکی ولسوالۍ لپاره د طالبانو د امنیه قومندان محمد اکرم په شمول لس تنه طالبان نیولي.

خو د طالبانو حکومت د بدخشان د شٌکې ولسوالۍ سقوط رد کړ.

د طالبانو د کورنیو چارو وزارت پر خپله ټویټرپاڼه لیکلي چې د ولسوالۍ د سقوط په اړه خپرې شوې ادعاوې بې اساسه دي.

باختر اژانس چې د طالبانو په کنټرول کې دی لیکلي چې د طالبانو د حکومت د دفاع سرپرست وزیر ملا یعقوب مجاهد بدخشان ته تللی دی.

د خبر له مخې ملا یعقوب بدخشان ته د وضعیت د لا ښه څېړلو په هدف په دوه ورځني سفر تللی او هلته یې پامیر او اشکاشم ولسوالیو ته هم سفرونه کړي.

د ملي مقاومت جبهې جنګیالي د پنجشېر په لوړو څوکو او ځینو نورو محدودو سیمو کې د طالبانو پر وړاندې وسله وال مقاومت ته دوام ورکړی.

د بشري حقونو د څار بېلابېلو سازمانونو په طالبانو نیوکه کړې چې د جنګ په سیمو کې یې ګڼې بشري سرغړونې کړي.

د هشت صبح ورځپاڼې د ویب پاڼې بندولو غبرګونونه پارولي

هشت صبح ورځپاڼه

د بخښنې نړیوال سازمان د هشت صبح ورځپاڼې د ویب پاڼې د بندولو په اړه غبرګون وښود.

دغه سازمان وايي، پر ازادو رسنیو، د بیان پر ازادۍ او د غونډې پر حق د طالبانو پرله پسې بریدونه هغه لاملونه دي، چې ښيي دوی خپل مخالف نظریات ځپي.

هشت صبح ورځپاڼه وايي، طالبانو د سیاسي دلایلو له مخې د دوی ویب پاڼه ور بنده کړې ده.

خو طالبانو د دوشنبې په ورځ وویل چې د ورځپاڼې ویب پاڼه یې د دوی په خبره د کاذبو راپورونو د خپرولو په خاطر تړلې ده.

نور راوښيه

XS
SM
MD
LG