د لاسرسۍ وړ لېنکونه

تازه خبر
دوشنبه ۴ تله ۱۴۰۱ کابل ۰۴:۴۸

افغانستان

توماس ويسټ کابل کې د روسيې سفارت د بريد له قربانيانو سره خواخوږي ښودلې

کابل کې د روسيې سفارت

د افغانستان لپاره د امریکا ځانګړي استازي توماس ویسټ په کابل کې د روسیې پر سفارت تروریستي برید غندلی اود دې پېښې د قربانیانو له کورنیو سره یې خواخوږي څرګنده کړې ده.

ښاغلي ویسټ پرون سې شنبې په یوه ټویټ کې ویلي چې، دا تاوتریخوالی هیڅ هدف نه‌شي ترلاسه کولای.

چین هم دا برید غندلی.

د دې هیواد د بهرنیو چارو وزارت ویاندې ماو نینګ وویل، چین پر ډیپلوماتیکو نمایندګو او پر کار کونکو یې تروریستي بریدونه په کلکه غندي.

د روسیې د تاس خبري اژانس د راپور له مخې هغې ویلي چې، دوی هیله من دي چې د افغانستان لوری د دا ډول بریدونو د مخنیوي لپاره اغېزمن اقدامات وکړي او د ډیپلوماتیکو استازولیو ډاډمن امنیت یقیني کړي.

د اسلامي دولت ډلې یا داعش پر دغه سفارت د دوشنبې د ورځې د ځانمرګي برید چې د سفارت دوه کارکونکي او څلور نور افغانان په‌کې ووژل شول اخیستی.

د ورځې تازه خبرونه دلته ولولئ

بدخشان کې چاودنې یو کس وژلی او درې ټپیان دي

د افغانستان په عمومي نقشه کې د بدخشان موقعیت

د بدخشان په مرکز فیض اباد کې چاودنې یو کس وژلی او ۳ یې ټپيان کړي.

په بدخشان ولایت کې د طالبانو حکومت د اطلاعاتو او فرهنګ رئیس معزالدین احمدي وايي، دا چاودنه نن ۴ بجې او ۲۳ دقیقې د فیض اباد د ښاروالۍ څنګ ته وشوه.

احمدي زیاتوي چې یو وژل شوی او درې ټپیان ملکي کسان دي او طالبانو ته په دې چاودنه کې تلفات نه دي اوښتي.

په فیض اباد کې دا چاودنه داسې مهال کېږي چې له څو ورځو راهیسې د بدخشان په څو ولسوالیو کې د طالبانو او مقاومت ملي جبهې ترمنځ وسله والې نښتې هم شوې دي.

ملګري ملتونه: ګڼو افغان کورنیو خپلې وړې لوڼې واده کولو ته مجبوره کړي

ارشیف: د افغانستان کارګرې نجونې

ملګري ملتونه وايي، په افغانستان کې د بېوزلۍ او نهیلۍ له کبله ګڼو کورنیو خپلې لوڼې په وړوکوالي کې واده کولو ته مجبوره کړي او اوس د دغو نجونو د څارنې او خوندیتوب مسوولیت ور تر غاړې دی.

ملګرو ملتونو نن په یوه اعلامیه کې ویلي، له کله چې طالبانو پر افغانستان ولکه ټینګه کړې د نجونو پرمخ د منځنیو ښوونځیو او لېسو دروازې تړلي دي.

تر یوه کال زیاته موده کېږي چې طالبانو په ملي او نړیواله سطحه د غوښتنو برخلاف نجونو ته تر شپږم ټولګي پورته د نور تعلیم اجازه نه ده ورکړې.

طالبانو په ټول افغانستان کې د ژورو څاه ګانو مالکانو ته نوې سپارښتنه کړې

هلمند کې ژوره څاه چې وړمه ورځ ترې یوه ښځه ژوندې راایستل شوې.

د طالبانو د کورنیو چارو وزارت سرپرست سراج‌الدین حقاني چې لا هم د امریکا او د ملګرو ملتونو په تور نوملړ کې دی له والیانو، امنیه قوماندانانو او ولسوالانو غوښتي چې د ژورو څاه‌ګانو مالکانو ته، د څاه‌ګانو د سرونو د پوښلو سپارښتنه وکړي.

د طالبانو د کورنیو چارو وزارت ویاند عبدالنافع ټکور رسنیو ته یو استول شوي پیغام کې ویلي: "ټولو اړونده چارواکو ته هدایت ورکول کېږي چې په خپلو اړوندو ولایتونو کې د څاه‌ګانو مالکینو ته خبر ورکړي، څو د خپلو څاګانو سرونه پټ کړي. د نه پټولو په صورت کې به اړوند کسان عدلیي او قضايي ادارو ته سپارل کېږي."

د طالبانو د کورنیو چارو وزارت وايي، هغه کسان چې د خپلو ژورو څاه‌ګانو د سرونو د پوښلو توان نه‌لري، وضعیت یې څېړل کېږي او بیا یې په اړه پرېکړه کېږي.

دا په داسې حال کې ده چې وروستیو کې د افغانستان په یو شمېر ولایتونو کې ژورو څاه‌ګانو ته یو شمېر ماشومان او مېرمنې لوېدلي چې ډېر شمېر یې مړې شوې دي.

ملګرو ملتونو له افغانستان سره د امریکا د تازه بشري مرستې هرکلی وکړ

رامز الاکبروف

د افغانستان لپاره د ملګرو ملتونو د سیاسي ماموریت یا یوناما مرستیال د امریکا د متحدو ایالتونو د تازه بشري مرستې هرکلی وکړ.

رامز الاکبروف پرون په ټویټر کې لیکلي، د ملګرو ملتونو د افغانستان څانګه او اوچا د امریکا د بهرنیو چارو وزارت د سخاوتمندانه مرستې منندوی دي.

د ده په وینا دغه مرستې به په افغانستان کې د خلکو د اساسي اړتیاوو پوره کولو او د ژوند ژغورنې پر چارو ولګول شي.

د امریکا د بهرنیو چارو وزارت ویلي دوی په افغانستان کې د خلکو د بشري اړتیاوو پوره کولو لپاره د نږدې ۳۲۷ ملیون ډالرو په ارزښت اضافي بشري مرسته برابروي.

په افغانستان کې د ګوزڼ په وړاندې د مبارزې پر هڅو خوښي څرګنده شوې

ارشیف

د ملګرو ملتونو د روغتیا نړیوال سازمان یوه چارواکي په وروستیو دوو کلونو کې په افغانستان او پاکستان کې د ګوزڼ یا پولیو په وړاندې د مبارزې پر هڅو خوښي وښوده.

په دغه سازمان کې ماشومانو د ګوزڼ یا فلج د اپیډمي لوژي مخکښ کارپوه، ډاکټر زبیر ودود پرون په هغه ویډیويي پیغام کې چې د روغتیا نړیوال سازمان خپور کړی ویلي: "کله چې د افغانستان او پاکستان خبره راځي، دا ډېره هڅوونکې ده چې لیدل کېږي په تېرو دوو کلونو کې ډېر پرمختګونه شوي. په افغانستان کې تر درېیو ملیونو ډېر ماشومان چې مخکې یې امکانات نه درلودل په دوامدار ډول دا واکسین ولګوي، اوس د ګوزڼ ضد واکسین ترلاسه کوي. تېر کال هم د واکسین کمپاین په منظم ډول عملي شوی دی."

په نړۍ کې افغانستان او پاکستان هغه دوه هېوادونه دي، چې لا هم د ماشومانو ګوزڼ یا پولیو په کې ختمه شوې نه ده.

افغانستان سره د امریکا د مرستې کچه له یو میلیارد ډالرو واوښته

د امریکا کانګرس

د افغانستان لپاره د امریکا د متحدو ایالتونو نوې شارژدافیره وايي، د ۲۰۲۱م کال له اګست میاشتې راهیسې له افغانستان سره د واشنګټن مرستې څه باندې یو اعشاریه یو میلیارد ډالرو ته ورسېده.

کرن ډیکر پرون په ټویټر کې لیکلي، د امریکا متحد ایالتونه «له افغانستان سره د بشرپاله مرستو یوازېنی ستر تمویلوونکی هېواد دی.»

د امریکا نوې شارژدافیره وايي، په اوسنیو ستونزمنو شرایطو کې د افغانستان له خلکو سره د قطر دوامداره مرستې ورته د ستایلو وړ دي او د کرن ډیکر په وینا دا په خپله په سیمه کې د سولې او تیکاو لپاره د قطر د ژمنتیا يوه پیاوړې نښه ګڼل کېږي.

له کله چې طالبانو پر افغانستان ولکه ټینګه کړې، د افغانستان لپاره د امریکا سفیر له قطر څخه فعالیت کوي.

قانوني د ژغورنې لپاره د مقاومت شورا له غړیتوبه د استعفا خبر جعلي وباله

محمدیونس قانوني

محمدیونس قانوني د افغانستان د ژغورنې لپاره د ملي مقاومت د شورا له غړیتوب څخه د ده د استعفا خبر جعلي وباله.

قانوني په یوه ویډیو کې چې نن پر ټولنیزو رسنیو خپره شوه وویل چې دا خبر ردوي.

د قانوني د استعفا خبر نن ده ته په یوه منسوب لیک کې ورکړل شو.

یاده شوې شورا په غبرګولي میاشت کې د ترکیې په پلازمېنه انقره کې د ځینو افغان سیاستوالو او پخوانیو چارواکو په ګډون جوړه شوې وه.

قانوني مخکې د ولسمشر د لومړي مرستیال او د ولسي جرګې د رییس پر دندو کار کړی.

قانوني د افغانستان ژغورنې لپاره د مقاومت جبهې شورا څخه استعفا وکړه

محمد یونس قانوني

محمد یونس قانوني د افغانستان ژغورنې د مقاومت له ملي جبهې څخه استعفا وکړه.

د قانوني لخوا په خپره شوې اعلامیه کې راغلي دي چې د هغو اختلافونو له امله چې مخکې يې د دې جبهې له رهبري سره شریک کړي وو، له دې جبهې خپله لار بېلوي.

هغه ویلي چې د جبهې له غړو سره یې د ملي وحدت، سولې او امنیت، سیمه ییزو او نړیوالو اړیکو په برخه کې شته اختلافونه حل نه شول، ځکه استعفا ته اړ شو.

محمد یونس قانوني په تېر جمهوري حکومت کې د ولسمشر د لومړي مرستیال او د ولسي جرګې د رئیس په توګه دندې کړې وې او په وروستیو کې د افغانستان د ژغورنې د مقاومت له جبهې سره يو ځای شوی و چې تر ډېره د مخکيني دولت چارواکي او د طالبانو مخالف سیاستوال په کې راټول دي.

رینا امیري د اسلامي همکاریو د سازمان له استازي سره خبرې کړي

د افغانستان د ښځو، نجونو او بشري حقونو لپاره د امریکا ځانګړې استازې رینا امیري

د افغانستان د ښځو، نجونو او بشري حقونو لپاره د امریکا ځانګړې استازې رینا امیري وايي چې د افغانستان لپاره د اسلامي همکاریو د سازمان له استازي طارق علي بخیت سره یې د افغان ښځو او ځوانانو د ملاتړ په اړه خبرې کړي.

مېرمن امیري پرون پر ټویټر په یوه بیان کې ولیکل چې د ملګرو ملتونو د عمومي اسمبلې د ۷۷ غونډې په څنډه کې یې له ښاغلي بخیت سره په داس حال کې چې د افغانستان لپاره د امریکا ځانګړی استازی ټوماس ویسټ هم حاضر و، وکتل.

مېرمن امیري ویلي دوی په دې کتنه کې موافقه وکړه چې د افغان نجونو د تعلیم لپاره د حق لپاره باید په افغانستان کې د ښځو د حقونو د یوې برخې په توګه مبارزه وشي.

د نجونو تعلیم هغه مسئله ده چې مېرمن امیري او نورو امریکايي چارواکو یې په وار وار ملاتړ کړی او د طالبانو پر حکومت یې فشار راوستی چې له شپږم د پورته ټولګیو د زده کوونکو نجونو پرمخ د ښوونځیو دروازې بیا پرانېزي.

د پاکستان صدراعظم: طالبان دې د دوحې تړون عملي کړي

د پاکستان صدراعظم شهباز شریف

د پاکستان صدراعظم شهباز شریف پر طالبانو غږ کړی چې د نجونو ته د زده کړو او ښځو ته د کاري فرصتونو د برابرولو او بشري حقونو ته د درناوي په ګډون ټولو افغان وګړو ته انډول فرصتونه برابر کړي.

شریف له اسوشیتیدپریس خبري آژانس سره په یوه مرکه کې چې پرون خپره شوه همداراز له طالبانو وغوښتل چې د دوحې پر تړون عمل وکړي.

د دې تړون له مخې امریکا خپل پوځي ځواکونه له افغانستانه واېستل او طالبانو په بدل کې د نورو ژمنو ترڅنګ ومنله چې بشري حقونو ته به درناوی کوي او په افغانستان کې به تروریستانو ته اجازه نه ورکوي.

شریف وویل طالبانو چې د دوحې تړون لاسلیک کړی نو باید درناوی هم ورته وکړي.

طالبانو د شریف د دې څرګندونو په اړه تراوسه څه نه دي ویلي.

افغان کرېکټ ملي لوبډله پرون متحده عربي اماراتو ته ولاړه

د افغان کرېکټ ملي لوبډلې لوبغاړي - ارشيف

متحده عربي اماراتو ته د افغانستان د کرېکټ د ملي لوبډلې د سفر هدف د ۲۰ اوریزه نړیوال جام سیالیو ته چمتووالی ښودل شوی دی.

د افغانستان د کرېکټ بورډ ویاند فرید هوتک د افغان کرېکټ لوبغاړو د سفر د هدف په اړه ازادي راډيو ته وویل: "له دې وروسته به افغان لوبډله له ښه چمتووالي سره اسټرالیا ته سفر وکړي او هلته به شاوخوا دوه اونۍ تمریناتي کمپ ولري."

په پام کې ده چې د کرېکټ د ۲۰ اورونو نړیوال جام د اکټوبر په ۱۶مه په استرالیا کې پیل شي او د نومبر تر ۱۳مې به دوام وکړي.

افغانستان په الف ګروپ کې له انګلستان، نیوزیلنډ او اسټرالیا سره لوبېږي او خپله لومړۍ لوبه به د اکټوبر په ۲۲مه د انګلستان له لوبډلې سره کوي.

تېره اوونۍ کې له ۷ زره ډېر افغانان له ايرانه ايستل شوي

له ايرانه راستانه شوي افغانان - ارشيف

د افغانستان د کډوالو او راستنېدونکو چارو وزارت وايي، په تېره یوه اوونۍ کې له اوو زرو ډېر افغانان له ایرانه ایستل شوي دي.

له بلې خوا ایران ویلي چې، اوسمهال په هغه هېواد کې د افغان کډوالو شمېر ۴،۵ میلیونو ته رسېږي او نړیواله ټولنه باید له دوی سره مرسته وکړي.

تر دې وړاندې ویل شوي وو چې ایران په تېره یوه میاشت کې شاوخوا پنځه زره افغان کډوال بېرته افغانستان ته استولي دي.

زابل کې د پوستکي ناروغۍ له امله سلګونه څاروي مړه شوي

ارشيف

راپورونه کاږي چې په زابل کې د پوستکي د ناروغۍ له امله سلګونه څاروي مړه شوي دي.

دغې ناروغۍ د پکتيا، خوست، غزني او ننګرهار په ګډون په يو شمېر نورو ولايتونو کې سلګونه غواګانې وژلي دي.

د زابل ولایت د کرنې او مالدارۍ ریاست چارواکي دې نتیجې ته رسېدلي چې، په دغه ولایت کې څه باندې درې زره غواګانې د پوستکي په ناروغۍ اخته شوي او تر اوسه شاوخوا پنځه سوه غواګانې له منځه تللي دي.

د جرمني پارلمان له افغانستانه د تخليې د عملياتو په اړه څېرنه پيل کړې

ارشيف

د جرمني پارلمان له افغانستان څخه په ۲۰۲۱ کال کې د وتلو د عملیاتو په اړه څېړنه پیل کړې ده.

د جرمني رسنیو په وینا، د دغه هېواد یوه پارلماني کمېټه په دې اړه څېړنه کوي چې، ولې ډېری هغه افغانان چې له جرمني سره یې کار کړی، له افغانستانه نه دي ایستل شوي او د طالبانو له خوا له خطر سره مخامخ دي.

د جون په میاشت کې راپور ورکړل شوی و چې، شاوخوا ۱۲۰۰۰ افغانان چې له جرمني څخه یې د کډوالۍ د غوښتنلیکونو د منلو ژمنه ترلاسه کړې، هغه هېواد ته د تللو په تمه دي.

دغه راز يو شمېر افغان پناه غوښتونکي چې د جرمني د حکومت له‌خوا ورسره همکاري نه کېده، بېرته افغانستان ته ستانه شوي دي.

بلاول بوټو: نړيوالو سره د ژمنو د نه عملي کېدو له امله طالبان په رسميت نه پېژندل کېږي

بلاول بوټو د طالبانو د حکومت د بهرنيو چارو له سرپرست اميرخان متقي سره

د پاکستان د بهرنیو چارو وزیر بلاول بوټو زرداري وايي، د طالبانو حکومت د نړیوالې ټولنې له‌خوا ځکه په رسمیت نه‌دی پېژندل شوی چې خپلې ژمنې یې نه‌دي پوره کړي.

نوموړي دا خبره د فرانسې له تلوېزیون سره په مرکه کې کړې ده.

د پاکستان د بهرنیو چارو وزیر د طالبانو د هغه اقدام په اړه خواشیني څرګنده کړې چې په افغانستان کې یې په ښوونځیو کې تر شپږم ټولګي پورته د نجونو د زده کړو مخه نیولې ده.

د ښځو او نجونو د حقونو په ګډون د بشري حقونو درناوی له طالبانو څخه د نړیوالې ټولنې له اساسي غوښتنو څخه دي.

نور راوښيه

XS
SM
MD
LG