د لاسرسۍ وړ لېنکونه

تازه خبر
دوشنبه ۴ تله ۱۴۰۱ کابل ۰۳:۳۵

نړۍ

برېتانيا کې د کډوالو د وضعيت پر خرابېدو د کډوالو وزير 'ريچارډ هرنګټن' استعفا کړې

کډوال - ارشيف

په برېتانیا کې د افغان او اوکرایني کډوالو د ناوړه وضعیت تر راپورونه وروسته د کډوالو لپاره د دولت وزیر ریچارډ هرنګټن استعفا ورکړه.

هرنګټن برېتانوي رسنیو سره په خبرو کې د خپلې استعفا تأیید کړی.

هغه منلې چې په لومړي سر کې حکومتي چارواکو سره فکر نه و چې، په لویه کچه افغان او اوکرایني کډوال به راولي او دلته به ډېر وخت په هوټلونو کې پاتې کېږي.

برېتانیا څه باندې ۱۱ زره افغانان له تېر اګست راهیسې دغه هېواد ته انتقال کړي چې له دې ډلې د راپورونو له مخې لا هم سلګونه کسان په موقتو کمپونو او هوټلونو کې اوسېږي او له ستونزو سره مخ دي.

مخکې داسې راپورونه هم خپاره شوي وو چې، د اوکرايني کډوالو په ور ماتېدو هلته د افغان کډوال له بد وضعيت سره مخ شوي دي.

د ورځې تازه خبرونه دلته ولولئ

روسیه کې د پوځي انسجام ضد اعتراضونه؛ امنیتي ځواکونو نږدې۸۰۰ کسان نیولي

ځینې کسان چې تر پوځي رابلنې وروسته د مخالفانو د ځپلو پر مهال نیول شوي، کشران دي.

په روسیه کې نږدې ۸۰۰ کسان داسې مهال نیول شوي چې په هغه هېواد کې د قسمي پوځي انسجام پر خلاف اعتراضونه روان دي.

د OVD-Info په نوم د بشري حقونو دلې د اطلاعاتو له مخې، تر نن یکشنبې پورې په ۳۳ ښارونو تر ډېره مسکو کې لږ تر لږه ۷۹۶ تنه نیول شوي دي.

دغه ډله چې په روسیه کې سیاسي توقیفونه او نیول کېدل څاري وايي، ځینې کسان چې تر پوځي رابلنې وروسته د مخالفانو د ځپلو پر مهال نیول شوي، کشران دي.

اعتراضونه څو ساعته وروسته له هغې پیل شول چې د روسیې ولسمشر ولادمیر پوتین تېره چهارشنبه د پوځي انسجام اعلان وکړ چې هدف یې په اوکراین کې د روسي ځواکونو ملاتړ دی.

تاجکستان او قرغزستان بیا د وروستیو نښتو ملامتي پر یوه او بل واچوله

د تاجکستان د بهرنیو چارو وزیر سراج الدین مهرالدین

تاجکستان او قرغزستان یو وار بیا د پولې په اوږدو کې د وروستیو خونړیو نښتو ملامتي پر یوه او بل واچوله.

د تاجکستان د بهرنیو چارو وزیر سراج الدین مهرالدین پرون شنبه د ملګرو ملتونو عمومي غونډې ته په وینا کې د قرغزستان د ولسمشر صدر جباروف د څرګندونو په باب خبرې وکړې.

مهرالدین د تاجکستان پخوانۍ ادعا بیا تکرار کړه، هغه دا چې قرغزستان د اوربند له موافقې سرغړونه کړې ده.

خو قرغزستان ویلي چې له دې موافقې سره سم یې عمل کړی دی.

د قرغزستان ولسمشر تېره سې شنبه د ملګرو ملتونو عمومي غونډې ته په خبرو کې پر تاجکستان تور ولګاوه، چې د یوه او بل ځمکنۍ بشپړتیا ته د درناوي له تړونونو سرغړونه کړې ده.

د دواړو هېوادونو ترمنځ د پولې په اوږدو کې د وروستیو نښتو له کبله لږ تر لږه ۱۰۰ کسان وژل شوي دي.

ایران کې د اعتراضونو دوام؛ حکومت پر انټرنېټ محدودیتونه لګولي

ایران کې د روانو لاریونونو انځور

په داسې حال کې چې په ایران کې اعتراضونه روان دي، حکومت پر انټرنېټ محدودیتونه لګولي دي.

د نېټ بلاکز په نوم د ویبسایټونو یوه څارونکي بنسټ پرون راپور ورکړ، چې په ایران کې د سکایپ فعالیت بند شوی او دا پر مخابراتي خدماتو د لګېدلو محدودیتونو لړۍ ده.

تر دې مخکې پر نورو شبکو لکه انسټاګرام، واټس اپ او لینکډاین هم محدودیتونه لګول شوي دي.

په ایران کې د ۲۲ کلنې مهسا امیني تر مړینې وروسته اعتراضونه روان دي.

مهسا امیني د سپټمبر میاشتې پر ۱۳مه په بشپړ ډول د حجاب نه رعایت په تور د ایران د «ګشت ارشاد» پولیسو له لوري ونیول شوه، خو درې ورځې وروسته په کوما حالت کې روغتون ته ولېږدول شوه او بالاخره یې هلته ساه ورکړه.

دا پېښه په ټول ایران کې د پراخو مظاهرو سبب شوه.

اعتراض کوونکي وايي، هغه د توقیف پر مهال ډبول شوې ده.

د هند په شمال کې د توفاني هوا له کبله لږ تر لږه ۳۶ کسان مړه شوي

ارشیف

د هند په شمال کې چارواکو پرون وویل چې د ۲۴ ساعتونو په موده کې د توفاني هوا له کبله لږ تر لږه ۳۶ کسان مړه شوي.

په دې ډله کې ۱۲ کسان د تالندې له کبله مړه شوي او چارواکو خبرداری ورکړی، چې په راروانو ورځو کې به د اورښتونو شدت لا پسې زیات شي.

په شمالي ایالت اترا پردېش کې ۲۴ کسان هغه وخت مړه شول، چې کورونه یې تر سختو اورښتونو وروسته ونړېدل.

په دغه ایالت کې د یوې اوونۍ په موده کې د تالندې له کبله د مړو شمېر ۳۹ ته رسېدلی دی.

زرګونو فلسطینیانو د لسګونو مړو شویو کډوالو د دعا مراسمو کې ګډون وکړ

ارشیف

په زرګونو فلسطینیانو پرون د لبنان د شمال د کډوالو د یوه کمپ د فوټبال په یوه کوچني میدان کې په لسګونو هغو کډوالو ته دعا وکړه، چې تېره اوونۍ د سوریې سواحلو ته څېرمه د یوې کښتۍ د ډوبېدو په پېښه کې مړه شول.

د اسوشېټیډ پریس اژانس په حواله، د سوریې د طرطوس ساحلي ښار د یوه روغتون مشر ویلي، د دې پېښې د مړو شمېر ۸۹ ته رسېدلی.

د ده په وینا ۲۰ کسان بستر دي او ۶ کسان له روغتونه رخصت شوي دي.

د لبنان پوځ پرون اعلان وکړ، هغه کس یې نیولی چې ویل کېږي په کښتۍ کې دغه خطرناک سفر یې تنظیم کړی و.

دا تر ټولو خونړۍ پېښه ده، چې په نتیجه کې یې زیات شمېر لبنانیان، سوریایان او فلسطینیان چې هڅه یې کوله له لبنان ځانونه اروپا ته ورسوي پر یوه ځای مري.

رییسي د ناامنیو او بې ثباتیو عاملانو پر وړاندې د پرېکنده چلند غوښتنه وکړه

ایران کې د مهسا امیني د مړینې په غبرګون کې د قهرجنو لاریون کوونکو انځور

د ایران ولسمشر وايي چې د ده حکومت باید له هغو کسانو سره چې بې امنیتي او بې ثباتي راولي پرېکنده چلند وکړي.

د دولتي‌رسنیو د راپورونو له مخې ابراهیم رییسي دا څرګندونې د هغه امنیتي سرتېري له کورنۍ سره په ټېلېفوني خبرو کې وکړې چې تېره اونۍ د رژیم ضد معترضانو له خوا د چړې په وسیله ووژل شو.

په همدې حال کې د بخښنې نړیوال سازمان په یو بیان کې چې پرون خپور شو ویلي دي چې د ایران د امنیتي ځواکونو له خوا په عمدي ډول پر مظاهره چیانو د ډزو په اړه یې مستند شواهد ترلاسه کړي دي.

ایراني چارواکو د تېرې یوې اونۍ په مظاهرو کې د ۳۵ کسان مړینه تایید کړې، خو خپلواکې سرچینې وايي د قربانیانو شمېر تردې خورا زیات دی.

روسیې د اوکراین په شمال ختیځ کې یو بند په توغندي ویشتلی

د سیویرسکي دونیتس پر سیند جوړ شوی بند

روسیې د اوکراین په شمال ختیځ کې د سیویرسکي دونیتس پر سیند جوړ شوی بند په توغندي ویشتلی.

د انګلستان دفاع وزارت نن په خپل ورځني استخباراتي بولټن کې خبر ورکړ چې روسیې په روانه اونۍ کې د دې بند د ویشتلو لپاره له لنډ واټن ویشتونکو بالستیک توغندیو یا ورته نورو وسلو کار اخیستی دی.

له دې مخکې د سپټمبر په ۱۵مه هم روسیې په مرکزي اوکراین کې کریوي ریه ښار ته نږدې پر یو بند برید کړی و.

د برتانیا دفاع وزارت په عین حال کې ویلي دي چې اوکرایني ځواکونه په دې دواړو سیمو کې د پرمختګ په حال کې دي.

د روسیې له لوري د اوکراین په څلورو سیمو کې د ټولپوښتنې دوهمه ورځ ده

ارشیف

د روسیې له فدراسیون سره د یوځای کېدو لپاره د اوکراین په څلورو سیمو کې نن د تش په نامه ټولپوښتنې دوهمه ورځ ده.

اوکراین، لویدیځ او ملګروملتونو دا ټولپوښتنه شرموونکې بللې ده ځکه د دوی په وینا د نړیوالو قوانینو په اساس غیرقانوني ده.

دا ټولپوښتنه په لوهانسک، دونېڅک، خرسون او زاپوریژیا کې چې ځینې سیمې یې د روسیې تر ولکې لاندي دي ترسره کېږي.

پردې انتخاباتو هېڅ خپلواک څارونکي څار نه کوي او هغه خلک چې له جګړې مخکې په دې سیمو کې ډېره وو، ترې کډه شوي دي.

دا څلور سیمې د اوکراین د ټول قلمرو نږدې ۱۵ سلنه جوړوي.

د اوکراین ولسمشر ولودیمیر زیلینسکي له نړیوالو وغوښتل څو دا تقلبي ټولپوښتنه چې هدف یې د روسیې له قلمرو سره د اوکراین د ځمکو ضمیمه کول دي وغندي.

د امریکا ولسمشر جوبایډن د دې اقدام غندنه وکړه او خبرداری یې ورکړ چې پر مسکو به نور بندیزونه هم ولګول شي.

امریکا د ایران خلکو لپاره د انټرنېټ په خدماتو کې اسانتیا راولي

ایران کې د لاریونونو یو انځور

په ایران کې د روانو مظاهرو په اوج کې متحدوایالتونو پرون اعلان وکړ چې د دې هېواد د خلکو لپاره د انټرنېټ په خدماتو کې اسانتیا راولي.

انټرنېټي خدمات د ایران د حکومت د اقداماتو په نتیجه کې سخت زیانمن شوي دي.

په ایران کې روانې مظاهرې وروسته له هغه پیل شوې چې د مهسا امیني په نوم یوه ځوانه نجلۍ د ایران د ګشت ارشاد پولیسو د پوره حجاب د نه مراعتولو په تور د سپټمبر په ۱۳مه ونیوه او درې ورځې وروسته په کوما حالت کې روغتون ته ورسول شوه چې هلته یې ساه ورکړه.

د امریکا د خزانې وزارت پرون د سپټمبر ۲۳مه په یوه بیان کې وویل چې امریکا هڅه کوي د انټرنېټې خدماتو د جواز د اپډېټ کولو له لارې په ایران کې له انټرنېټي آزادیو څخه ملاتړ پراخ کړي.

بیان زیاتوي په داسې حال کې چې د ایران حکومت له نړیوال انټرنېټ څخه د خلکو ارتباط پرې کوي، متحدایالات داسې اقدامات کوي چې له مخې یې د ایران خلکو ته د حقایقو په اساس د معلوماتو جریان چمتو کوي.

روسیې د اوکراین په اشغال کړیو سیمو کې د ټولپوښتنې بهیر پیل کړی

ارشیف

روسیې د اوکراین په څلور سیمو کې چې ځینې برخې یې روسانو اشغال کړي د ټولپوښتنې په نوم بهیر پیل کړې دی.

په دې ټولپوښتنه کې چې پرون د سپټمبر په ۲۳مه پیل شوه، په له خلکو پوښتنه کېږي چې د اوکراین دا برخې د روسیې د فدراسیون د قلمرو برخه شي که نه.

دا ټولپوښتنې د لوهانسک، دونېڅک، خرسون او زاپوریژیا په هغو سیمو کې چې د مسکو تر اداره لاندې دي ترسره کېږي.

ځینو خلکو دا یو شرموونکی عمل بللی ځکه د دوی په وینا د نړیوالو قوانینو په اساس دا کار غیرقانوني دی.

په عین حال کې په ځینو راپورونو کې راغلي دي چې چارواکو رای ورکوونکي ګواښلي او وېرولي دي.

اوکراین په کییف کې د ایران ډيپلوماتیک حضور محدودوي

په کییف کې د ایران سفارت

اوکراین غواړي په پلازمېنه کییف کې د ایران ډيپلوماتیک حضور روسیې ته د دې هېواد له خوا د ډرونونو د سپارلو په غبرګون کې محدود کړي.

د اوکراین د بهرنیوچارو وزارت بېګا په یوه بیان کې وویل چې د اوکراین پرضد د جګړې د پرمخ بیولو لپاره روسیې ته د وسلو ورکول یو غیردوستانه عمل دی چې د اوکراین او ایران اړیکو ته جدي زیان پېښوي.

بیان زیاتوي چې د داسې یوه غیردوستانه اقدام په غبرګون کې اوکراین پرېکړه کړې چې په کییف کې د ایران د سفیر د کار جواز ختم کړي او په سفارت کې د ایراني ډپیلوماتانو په شمېر کې د پام وړ کموالی راولي.

ایران تراوسه د دې پرېکړې پر وړاندې غبرګون نه دی ښودلی، خو مخکې یې د امریکا او ایران هغه تورونه رد کړي وو، چې ویل یې د اوکراین پرضد جګړه کې یې روسیې ته ډرونونه ورکړي دي.

نن اوکرايين کې د روسيې تر واک لاندې سيمو کې ټولپوښتنه ترسره کېږي

اوکرايين

د اوکرايین څلور سیمې چې د مسکو تر کنټرول لاندې دي، نن له روسیې سره د یو ځای کېدو لپاره ټولپوښتنه ترسره کوي.

دا ټولپوښتنه له نړیوالو قوانینو او د ملګرو ملتونو له منشور څخه سرغړونه بلل شوې ده.

ټولپوښتنه به د سپتمبر له ۲۳ څخه تر ۲۷ پورې په لوهانسک، دونیتسک، خرسون او زاپوریژیا سیمو کې ترسره شي.

د دې رای ګیري د ترسره کولو پرېکړه په داسې حال کې شوې چې د اوکرایین پوځ د دغه هېواد د خاورې ډېرې برخې ازادې کړي.

لوېدیځ چارواکي او کارپوهان وايي چې پوتین غواړي له دې جعلي رایو څخه په استفادې د روسیې پر خاوره د اوکرایین د برید ادعا وکړي او ګواښ وکړي چې د خپل ځان د دفاع لپاره به له اټومي وسلو کار واخلي.

په همدې حال کې د امریکا د بهرنیو چارو وزیر انتوني بلېنکن پرون د سپتمبر په ۲۲مه د ملګرو ملتونو د امنیت شورا له غړو وغوښتل چې یو څرګند پیغام واستوي چې دا "غیر مسؤلانه" اټومي ګواښونه باید سمدستي ودرول شي.

بلېنکن د نړۍ پر هېوادونو غږ وکړ چې د روسیې د ولسمشر ولادیمیر پوتین پر وړاندې ودرېږي او خبرداری یې ورکړ چې پر اوکرايین د کریملین د مشر برید او د اوکرايین د خاورې د زیاتې برخې له روسیې سره د یو ځای کېدو هڅې نړیوال ثبات له ګواښ سره مخ کوي.

د مهسا اميني د وژنې غبرګونو کې اعتراضونو له امله ۲۲ کسان وژل شوي

ايران کې اعتراضونه

په ایران کې د یوې نیول شوې نجلۍ، مهسا امیني له وژل کېدو وروسته په ولسي اعتراضونو کې د وژل شویو کسانو شمېر ۲۲ تنو ته ورسېد.

پرون (پنجشنبې) د اعتراضونو لمن د ایران ګڼو ښارونو ته وغخېده.

اعتراض کوونکو د ایران د مذهبي مشر آیت الله علي خامنه يي پر ضد شعارونه ورکړل او په ډېرو ځایونو کې پر مظاهره چیانو د ډزو راپورونه ورکړل شوي دي.

د پېغلې مهسا اميني تر وژنې وروسته د ايران په بېلابېلو ښارونو کې پراخ اعتراضونه پيل شوي دي.

جو بايډن په ټوله نړۍ کې د بشري حقونو د وضعيت په اړه اندېښنه څرګنده کړې

د امریکا ولسمشر جوبایدن

د امریکا ولسمشر جو بایډن پرون چهارشنبه د سپټمبر په ۲۱مه د ملګرو ملتونو د عمومي اسمبلۍ په اووه اویایمه غونډه کې په نیویارک کې د افغانستان په ګډون په ټوله نړۍ کې د لومړنیو بشري حقونو د وضعیت په اړه انديښنه څرګنده کړه.

جو بایډن وویل؛ بشري حقونه د هغه هر څه بنسټ دی چې غواړو لاسته یې راوړو.

نوموړي ويلي:: "نن په ۲۰۲۲ کال کې د نړۍ په بېلابېلو برخو کې بنسټیزي ازادۍ له تهدید سره مخامخ دي؛ د ملګرو ملتونو د عالي کمشنرۍ له تفصیلي راپورنو نیولې د دیموکراسۍ د پلویانو په وحشیانه توګه ځپلو او د برما د پوځي نظام له لورې د قومي اقلیتونو ځپل کېدو او په افغانستان کې د طالبانو له لورې د نجونو او ښځو د ځپل کېدو راپورونه ورکړل شوي دي."

ښاغلي بایډن په نړۍ کې د خوړو د خوندیتوب پر پياوړي کولو، د ایډز او نورو ساري ناروغیو د مخنیوي او اقلیمي بدلون پر وړاندې پر مبارزه ټينګار وکړ.

زلنسکي ملګرو ملتونو ته: پر روسيې 'د عدالت پر بنا سزاوې' وضع کړئ

د اوکرايین ولسمشر ولودمیر زلنسکي ملګرو ملتونو ته د ويډيويي وينا پر مهال

د اوکرايین ولسمشر ولودمیر زلنسکي د ملګرو ملتونو له ځانګړې محکمې وغوښتل چې پر روسیې " د عدالت پر بنا سزاوې" وضع کړي.

زلنسکي دغه غوښتنه پرون د ملګرو ملتونو عمومي اسامبلې ته د ویډیویي وینا پر مهال وکړه.

تر زلنسکي څو ساعته مخکې د امریکا ولسمشر جوبایډن د ملګرو ملتونو دغې غونډې ته وویل، مسکو " په بې شرمانه ډول اصلي اصول نقض کړي دي."

پر روسیې نیوکې وروسته تر هغه توندې شوې چې له خپلې خاورې سره د اوکرايین د څلورو سیمو د یو ځای کېدو په اړه یې د ټولپوښتنې پلان اعلان کړ.

دا پلان په پراخه کچه وغندل شو او لویدیځو چارواکو وویل، په رسمیت به یې ونه پېژني.

نور راوښيه

XS
SM
MD
LG