د لاسرسۍ وړ لېنکونه

تازه خبر
سه شنبه ۵ تله ۱۴۰۱ کابل ۰۶:۵۴

ښځې

ملګري ملتونه: طالبان دې د 'الهې' قضیه وڅېړي

ارشیف

په افغانستان کې د ملګرو ملتونو مرستندویه ماموریت یا یوناما وايي، د یو ښځې هغو تورونو اندېښمن کړي چې د طالبانو یو پخوانی چارواکی یې په اجباري نکاح او ناوړه استفاده تورن کړی دی.

یوناما نن پر خپل ټوېټر په خپاره کړي پیغام کې له طالبانو څخه غوښتي د ښځو د حقونو څخه د سرغړاویو د ټولو ادعاوو په اړه دې شفافې څېړنې وکړي، عاملانو سره دې حساب وشي او د ښځو او نجونو خوندیتوب دې ډاډمن شي.

هغه مېرمن چې خپل نوم الهه ښيي تازه یې په یوه ویډیو کې ادعا کړې چې د طالبانو د حکومت د کورنیو چارو وزارت پخواني ویاند قاري سعید خوستي ورسره په زوره واده کړی او وهلې ډبولی یې ده.

قاري سعید خوستي له دې ښځې سره نکاح تایید کړې، خو له هغې سره یې د ناوړه چلند تورونه بې بنسټه بللي دي او ټینګار یې کړئ چې الهه کولی شي محاکمو ته مراجعه وکړي.

د الهې د ویډیوګانو له خپرېدو وروسته، د بشري حقونو مدافع بنسټونو او د ښځو د حقونو فعالانو پر هغه څه انتقاد کړی چې دوی په افغانستان کې د طالبانو تر واک لاندې د ښځو د حقونو تر پښو لاندې کول ګڼي.

د ورځې تازه خبرونه دلته ولولئ

طالبانو په پکتیا کې د نجونو ښوونځي بېرته وتړل

ارشیف: د افغانستان د نجونو یو ښوونځي

د پکتیا ولایت اوسېدونکي وايي چې طالبانو نن بېرته په دې ولایت کې د نجونو ښوونځي وتړل او نجونو ته یې اجازه ورنه کړه چې ښوونځيو ته دننه شي.

د پکتیا ولایت یوه اوسېدونکي چې نه غوښتل نوم یې یاد شي ازادي راډيو ته وویل، چې ښوونځيو ته راغلې نجونې په ژړا بېرته کورونو ته ستنې شوې.

د ښوونځیو له تړلو وروسته په پکتیا کې زده کوونکو نجونو د دې ولایت د پوهنې ریاست مخ ته لاریون وکړ او د خپلو ښوونځيو د پرانیستلو غوښتنه یې کوله.

دوی ویل، حق لري چې زده کړې وکړي او دا حق باید ترې وانخیستل شي.

په پکتیا کې د نجونو ښوونځي دوه اوونۍ مخکې پيل شوي و، خو یوه اوونۍ مخکې یې پرانیسته رسنیزه شوه.

د دې خبر له خپرېدو وروسته د طالبانو حکومت ویاند ذبیح الله مجاهد یوې خبري غونډې ته وویل چې په دې اړه څېړنه کوي چې دا ښوونځي د چا په امر فعال شوي دي.

له یو کال ډېره موده کېږي چې د طالبانو حکومت له شپږم ټولګي پورته د نجونو ښوونځي تړلي دي او له نړۍوالو او کورنیو فشارونو سره هم طالبان دې ته نه دي تیار شوي چې دا ښوونځي بېرته پرانېزي.

ملګري ملتونه: اوسمهال درې میلیونه افغان نجونې له زده کړو پاتې دي

بادغیس کې د یوه ښوونځي زده کوونکې

د ماشومانو لپاره د ملګروملتونو د مرستې صندوق وايي چې په افغانستان کې اوسمهال درې میلیونه نجونې له زده کړو پاتې دي.

یونېسف په یوه بیان کې چې پرون د وږي په اتلسمه نېټه پر ټویټر خپور شو له طالبانو وغوښتل چې پر خپلو پرېکړو بیا غور وکړي او د ټولو نجونو ښوونځي پرانېزي.

پر افغانستان د طالبانو د واکمنۍ څه باندې یوکال شو خو له شپږم د پورته ټولګیو د زده کوونکو نجونو پرمخ ښوونځي بند دي.

تېره اونۍ په پکتیا ولایت کې د نجونو ځینې ښوونځي پرانیستل شول، خو طالبان وايي نه پوهېږي چې دا ښوونځي د چا په امر فعال شوي دي.

د طالبانو حکومت د نجونو د ښوونځیو د پرانیستو په اړه د پرېکړې لپاره یوه کمېسیون ته دنده سپارلې وه خو د دې کمېسیون د کار نتیجه تراوسه لا نه ده معلومه شوې.

ملګري ملتونه: میلیونونه افغان مېرمنې رواني ملاتړ ته اړتیا لري

ارشیف: د معترضو افغان مېرمنو انځور

په افغانستان کې د ملګرو ملتونو د وګړو صندوق وايي، په دغه هېواد کې دوه ملیونه او ۲ لکه زیانګالې مېرمنې او نجونې چې عمرونه یې د ۱۵ او ۴۹ کلونو ترمنځ دي رواني ملاتړ ته اړتیا لري.

د ملګرو ملتونو دغې ادارې پرون په خپل رسمي ټویټر کې لیکلي، چې دغه ښځې او نجونې د خوندیتوب او ښې روغتیا لپاره هم لاسنیوي ته اړتیا لري.

وروسته له هغې چې طالبانو کال مخکې پر افغانستان ولکه ټینګه کړه، د نجونو پرمخ یې تر شپږم پورته ټولګي وتړل او ګڼې ښځې یې له کاره منع کړې.

په ځینو راپورونو کې ویل شوي، چې دې وضعیت د افغان نجونو او ښځو پر وضعیت په رواني لحاظ ډېر منفي تاثیرات کړي دي.

ملګري ملتونه: لا هم افغانستان کې ډېرې میندې د زېږون پرمهال مري

ارشیف: هرات روغتون کې د نسايي او ولادي برخه

د افغانستان لپاره د ملګرو ملتونو د نفوسو صندوق وایي، په آسیا پاسفیک سیمه کې افغانستان هغه هېواد دی چې تر ټولو زیاتې میندې د زېږون په مهال په کې مري.

دغې ادارې نن په یوه ټوېټ کې ویلي چې په دې هېواد کې په هرو سل زره میندو کې چې ماشومان زېږوي، ۶۳۸ یې مري.

دغې اداري ویلي چې که د میندو روغتیا ته سمدستي او دوامداره پاملرنه ونه شي نو تر۲۰۲۵ کال پورې به دوی د ۵۱ زره نورو میندو د مړه کېدو شاهدان واوسي.

د تېرکال په اګسټ کې د طالبانو د بیا واک ته رسېدو وروسته چې له افغانستان سره نړیوالې مرستې کمې شوې او په دې هېواد کې بې وزلي زیاته شوې، په اولاد د میندو د مړینو د شمېر زیاتوالي ته هم اندېښنې زیاتې شوي دي.

طالبانو یوې وژل شوې پولیسې ته اعزازي رتبه ورکړه

د طالبانو بیرغ

د طالبانو حکومت، هغې مېرمنې ته چې څو ورځې مخکې په کابل کې پر یوه کور د عملیاتو پرمهال وژل شوې وه، اعزازي رتبه ورکړه.

باختر خبري آژانس پرون راپور ورکړ چې د طالبانو حکومت د کورنیوچارو سرپرست وزیر سراج الدین حقاني د رووفې په نوم دې ښځې ته اعزازي رتبه ورکړې ده.

د راپور له مخې رووفه د کابل ښار د پولیسو په پنځمه حوزه کې سرتېرې وه او څو ورځې مخکې د کابل په جمال مېنې سیمه کې پر یوه کور د عملیاتو پرمهال ووژل شوه.

د باختر آژانس په راپور کې هغه کور چې عملیات پرې ترسره شوي، د خوارجو مهمه ځاله بلل شوې ده.

طالبان د خوارجو اصطلاح ډېر وخت د اسلامي دولت ډلې یا داعش د وسله والو لپاره کاروي.

ایران کې مېرمنې لوبغالو ته له ننوتو منع شوي

ارشیف

د ایران په مشهد ښار کې چارواکو پرون یو شمېر میندې، چې د خپلو ماشومانو د کاراتې د مسابقې د لیدلو لپاره تللې وې، لوبغالي ته پرې نه ښودلې.

امنیتي چارواکو د دې مېرمنو مخه د هغه وروستي فرمان په اساس ونیوله، چې ښځې په ایران کې لوبغالو ته له ننوتو څخه منع کوي.

په هغو ویډیوګانو کې چې پرون د جولای په ۲۲مه پر ټولنیز شبکو لاس په لاس کېدلې امنیتي مامورین په داسې حال کې لیدل کېږي، چې د لوبغالي په وره کې د دې میندو مخه نیسي او کله چې دا ښځې اعتراض کوي امنیتي چارواکي ورته وايي دوی هغه فرمان تطبیقوي چې د سپورټ وزارت معینیت د ټول هېواد په کچه سپورتي لوبغالو ته استولی دی.

امریکا له افغان ښځو سره په یووالي او ملاتړ ټینګار کړی

په کابل کې د کار، ډوډۍ او زده کړو لپاره د یو شمېر شځینه فعالانو د لاریون انځور - May 26 2022

د افغانستان د بشري حقونو او ښځو لپاره د امریکا ځانګړې استازې رینا امیري د اختر په مناسبت پیغام کې د افغانستان له خلکو په تېره بیا نجونو او ښځو سره په یووالي او ملاتړ ټینګار کړی.

اغلې امیري په خپل ټوېټر کې لیکلي، چې افغان ښځې او نجونې په نړۍ کې له تر ټولو سختو محدودیتونو سره مخامخې دي.

هغې ټینګار کړی، چې اسلامي نړۍ، مشران، فعالان او عالمان باید د افغانانو په تېره بیا نجونو او ښځو تر څنګ ودریږي.

که څه هم د جولای په شپږمه د طالبانو د مشر ملا هبت الله اخندزاده د اختر په پیغام کې ویل شوي، چې طالبان په شرعي چوکاټ کې د ښځو د حقونو د تامین لپاره کار کوي، خو د بشري حقونو سازمانونه وايي چې د ښځو او نجونو حقونو ته د درناوي لپاره د طالبانو د ارادې کومه نښه نه شته.

کابل کې لسګونه ښځو لاریون وکړ

آرشیف- کابل کې د ښځینه لاریون کوونکو انځور

لسګونو ښځو نن په کابل کې لاریون وکړ او د طالبانو له حکومت څخه یې د زده کړو او معاش په شمول د خپلو حقونو غوښتنه وکړه.

دوی همداراز د جبري حجاب د لغوه کېدو غوښتنه وکړه.

یوې لاریون کوونکې، چې په امنیتي دلایلو نه غوښتل نوم یې واخیستل شي، ازادي راډیو ته وویل چې د مظاهره چیانو شمېر څه باندې ۴۰ تنو ته رسېده.

دې ادعا وکړه، چې طالبانو یې د لاریون مخه ونیوله او هغوی یې په رېنجر موټرو تعقیب کړې.

پکتیکا کې دیني عالمانو له طالبانو د نجونو د ښوونځيو پرانیستل وغوښتل

ارشیف، پکتیا کې د نجونو یو ښوونځی

په پکتیکا کې دیني عالمانو له طالبانو غوښتي چې د نجونو ښوونځي پرانیزي.

دغو عالمانو پرون په ښرنه کې د یوې غونډې پر مهال وویل چې زده‌کړې پر نارینه او ښځو فرض دي، نو لکه څرنګه چې د هلکانو تعلیم ته پاملرنه کېږي د نجونو زده‌کړو ته دې هم توجه وشي.

تر دې مخکې په کابل، مزار شریف او هرات ښار کې دیني عالمانو له طالبانو څخه ورته غوښتنه کړې وه.

د ډنمارک یوه مرستندویه مؤسسه: افغان ښځینه کارکوونکې مو کارونو ته دوام ورکوي

د ډنمارک بیرغ

د ډنمارک یوه مرستندویه مؤسسه وایي چې پر افغانستان د طالبانو له بیا واکمنېدو راهیسې د دې مؤسسې افغان ښځینه کارکوونکې په دې هېواد کې خپلو کارونو ته دوام ورکوي.

د ډنمارک د کډوالو شورا رئیسې شارلوټ سلینټې اسوشیټډ پرس اژانس ته ویلي چې له دغو ښځینه افغان کارکوونکو پرته به د دې مؤسسې لپاره ګرانه وي چې په افغانستان کې اړو کسانو ته مرستې ورسوي.

سلینټې له کابل څخه د کتنې په ترڅ کې دې اژانس ته ویلي چې مرستندویه مؤسسه‌یې په افغانستان کې له یو ملیون ډېرو کسانو ته مرستې رسوي او زیاته‌یې کړه چې د اګسټ له میاشتې راهیسې له کله چې طالبانو کابل نیولی، دا مؤسسه په اصولي توګه فعالیت مخ ته وړي ترڅو دا مسئله یقیني کړي چې ښځینه کارکوونکې یې وکولای شي فعالیت ته دوام ورکړي او خپلو کارونو ته لاړې شي.

مېرمن سلینټې که څه هم ونه‌ویل چې په اوس وخت کې یې څومره افغان ښځینه کارکوونکې کارونه مخ ته وړي، خو زیاته‌یې کړه د دې لپاره چې وکولای شي په افغانستان کې اړو ښځو ته مرستې ورسوي، خپلو ښځینه کارکوونکو ته اړتیا لري او له هغو پرته به ونه‌شي کولای چې نیمایي وګړي یې له مرستو برخه‌من شي.

د ملالې یوسفزۍ پلار د ټولو افغان نجونو د ښوونځیو د پرانیستل کېدو غوښتنه وکړه

د نوبل سولې جایزې ګټونکې ملاله یوسفزۍ او پلار یې

د نوبل سولې جایزې د ګټونکې ملالې یوسفزۍ پلار په افغانستان کې د ټولو نجونو پر مخ د ښوونځیو د پرانیستل کېدو غوښتنه وکړه.

ضیاالدین یوسفزي نن په خپل ټویټر کې تېرې هغه ۲۰۰ ورځې چې طالبانو تر شپږم ټولګي پورته نجونو ته د نور تعلیم اجازه نه‌ده ورکړې، د تیارې له ورځو سره تشبیه کړې دي.

هغه غوښتنه کړې چې دغو تیارو ورځو ته دې د پای ټکی کېښودل شي، ځکه تعلیم د ټولو حق دی.

په افغانستان کې له شپږم ټولګي پورته د نجونو د ښوونځیو د تړل کېدو نن ۲۰۰ ورځې پوره شوې.

د طالبانو حکومت د پوهنې وزارت وايي دوی د خپل مشرتابه امر ته په تمه دي او هر کله چې ورته امر وشي د ټولو نجونو پر مخ به ښوونځي پرانیستل شي.

د بریتانیا منچستر پوهنتون یو شمېر افغان ښځو ته د ماسترۍ وړیا بورسونه ورکړل

د بریتانیا منچستر پوهنتون

د بریتانیا منچستر پوهنتون ۱۵ افغان ښځو ته د ماسترۍ وړیا بورسونه ورکړي.

دا هغه افغان ښځې دي چې د طالبانو په بیا واکمنېدو له هېواده وتلې دي.

د منچستر پوهنتون د پوهنې د ماسترۍ د پروګرام مشر الکساندر ګاردنر مکتاګرت ویلي د افغان ښځو د لېوالتیا، په ځان باور او د انګلیسي ژبې له زیات مهارته خوښ دی.

په منچستر پوهنتون کې د ماسترۍ اکثر پروګرامونه د کال شااوخوا ۳۰ زره ډالره لګښت لري، خو دا پوهنتون وايي چې ۱۵ افغان مېرمنو ته په وړیا توګه درس ورکوي.

بلخ کې دیني علماوو له طالبانو د نجونو د ښوونځيو پرانیستو غوښتنه وکړه

ارشیف، د افغان زده‌کوونکو نجونو یو ټولګی

په بلخ کې دیني علماوو له طالبانو غوښتنه وکړه چې نجونو ته په ټول هېواد کې د منځنۍ او لېسې دورې ښوونځي پرانیزي.

په دې اړه پرون د مزار شریف ابوذر غفاري دارالعلوم کې لویه غونډه جوړه شوې وه.

د دارالعلوم مشر محبوب‌الحق مخدوم‌زاده ازادي راډیو ته وویل، دوی ځکه له ممبره د نجونو د تعلیم غږ اوچتوي چې په خبره‌یې اسلام دا حق نجونو ته ورکړی دی.

ده وویل، غونډه کې له طالبانو غوښتل شوي چې ژر تر ژره د نجونو د جامو طرحه نهایي او د ښوونځیو د بیا پرانیستې اعلان دې وکړي.

یوناما یو ځل بیا له طالبانو د نجونو پر مخ د ښوونځیو د پرانیستو غوښتنه وکړه

ارشیف، د کابل په یوه ښوونځي کې یو شمېر نجونې زده‌کوونکې

د افغانستان لپاره د ملګرو ملتونو مرستندویه مأموریت یا یوناما مرستیال مشره میټي نودسن وایي، طالبانو ته په‌کار ده چې د نجونو پر مخ د لوړو زده‌کړې ښوونځي سمدستي پرانیزي.

یوناما پرون یکشنبې په یوه ټویټ کې ویلي چې مېرمن نودسن د پکتیا په مرکز ګردېز کې د طالبانو له والي مولوي محمد علي جان، د افغان ښځو، سوداګرو، د رسنیو، پوهنتونونو او د مدني ټولنې له استازو سره کتلي او ټینګار یې کړی چې د طالبانو چارواکي باید پر خپلو ژمنو عمل وکړي او د نجونو لېسې سمدستي بېرته پرانیزي.

د وري یا حمل په درېیمه چې په افغانستان کې نوی تعلیمي کال پیل شو، له شپږم ټولګي پورته نجونو ته بیا هم طالب چارواکو اجازه ورنه‌کړه چې بېرته ښوونځیو ته لاړې شي.

د طالبانو دغه اقدام د نړیوالو سخت غبرګون راپارولی او د طالبانو له سرپرست حکومت‌یې غوښتي چې سمدستي ټولې نجونې پرېږدي چې بېرته ښوونځیو ته لاړې شي.

طالبانو ویلي چې په دې اړه تر اوسه یوه طرح نه‌ده بشپړه شوې.

نور راوښيه

XS
SM
MD
LG