د لاسرسۍ وړ لېنکونه

تازه خبر
چهارشنبه ۱۳ تله ۱۴۰۱ کابل ۰۱:۳۴

افغانستان

'نن او سبا' په ۲۱ ولايتونو کې د سختو ورښتونو وړاندوينه شوې

ارشيف

د افغانستان د هوا پېژندنې ادارې وړاندوینه کړې چې نن او سبا سې شنبې به هم په ۲۱ ولایتونو کې شدید ورښتونه وشي.

د دې ادارې له اټکل سره سم، په ګڼو ځایونو کې د نورو سېلونو د راوتلو احتمال شته.

له پېښو سره د مبارزې وزارت د معلوماتو له مخې، د وروستۍ یوې میاشتې په سېلونو کې لږ تر لږه ۱۷۰ تنه مړه شوي او ۲۵۰ نور ژوبل شوي دي.

تر ټولو وروستۍ مرګونې پېښې د شنبې په ورځ د لوګر ولایت په خوښۍ ولسوالي کې وه چې لږ تر لږه ۲۰ تنه په‌کې مړه او ۳۰ نور ټپیان شول.

د ورځې تازه خبرونه دلته ولولئ

طالبان: د داعش ډلې د بهرنيو اړيکو مالي مسؤل مو نيولی

ارشيف

د طالبانو د حکومت استخبارات وايي، د پوځي عملیاتو په ترڅ کې یې د 'خوارجو' د ډلې د بهرنیو اړیکو او مالي چارو مسؤل نیولی دی.

طالبان د خوارجو اصطلاح د اسلامي دولت ډلې یا داعش د غړو لپاره کاروي.

په یوه بیان کې چې بېګا د استخباراتو پر رسمي ټویټر خپور شو ویل شوي چې د مالکي په مستعار نوم دې تورن کس د اوکرايین، جرمني او اسپانیا په ګډون له نورو هېوادونو څخه مالي مرستې د دوی په وینا د خوارجو ډلې ته راوړلې او د دې ډلې د جلب او جذب مسوول هم و.

طالبانو د دوحې په تړون کې له متحدو ایالتونو او نړیوالې ټولنې سره موافقه کړې وه چې د ترویستي ډلو فعالیت ته به اجازه نه ورکوي خو له تېر یوه کال راهیسې د دوی حکومت له دې تورونو سره مخامخ دی چې د القاعده شبکې په ګډون یې تروریستانو ته په افغانستان کې ځالې ورکړې دي.

افغان کرېکټ ملي لوبډله له پاکستان او بنګله دېش سره دوه تمريناتي لوبې کوي

ارشيف

په پام کې ده د افغانستان د کرېکټ ملي ټیم، د پاکستان او بنګله دېش په وړاندې د نړیوالو شل اووره مسابقو په لړ کې دوه تمریناتي لوبې وکړي.

د کرېکټ نړیوالې شورا د خپاره شوي مهالوېش له مخې د سږ کال تر شل اووره مسابقو مخکې به د افغانستان ټیم د اکتوبر پر ۱۷مه د بنګله دېش او د اکتوبر پر ۱۹مه د پاکستان په وړاندې مسابقه وکړي.

په اسټرالیا کې دغه شل اووره نړیوالې مسابقې د اکتوبر میاشتې پر ۱۶مه پیلېږي او د نوامبر میاشتې تر ۱۳مې دوام کوي.

افغانستان به خپله لومړۍ رسمي مسابقه د اکتوبر پر ۲۲مه د انګلستان په وړاندې وکړي.

پاکستان له افغانستان سره د تجارتي اړیکو پر پراختیا ټینګار کړی

ارشيف

د پاکستان دولتي راډیو خبر ورکړی، چې د پاکستان مالیې وزیر محمد اسحاق دار د کابل لپاره له خپل نوي سفیر عبید الرحمن نظاماني سره د طالبانو له حکومت سره د تجارتي اړیکو پر پراختیا ټلیفوني خبرې کړي.

په راپور کې ویل شوي، چې د دواړو هېوادونو ښو اړیکو ته په پام سره، اړتیا ده چې د دواړو لوریو ترمنځ سوداګریزې او اقتصادي اړیکې هم پیاوړې شي.

د یوه کال له تېرېدو وروسته هم د پاکستان په ګډون، چې د طالبانو په ملاتړ تورن دی، د نړۍ یوه هېواد هم د طالبانو حکومت په رسمیت نه دی پېژندلی.

اف او ای: د افغانستان په ۱۴ ولايتونو کې د غواګانو د پوستکي ناروغي ثبت شوې ده

ارشيف

د ملګرو ملتونو د خوړو او کرنې اداره یا (FAO) وايي، د افغانستان په ۱۴ ولایتونو کې د غواګانو د پوستکي د دانې یا لمپي سکین (Lumpy Skin Disease) ناروغي ثبت شوې ده.

دغې ادارې پرون په یوه ټویټ کې ویلي، ياده ناروغي د دې سبب شوې، چې د غواګانو د شیدو تولید او وزن کم شي.

د ملګرو ملتونو د خوړو او کرنې اداره وايي، دوی د افغانستان په ۱۰ ولایتونو کې د غواګانو د واکسین پروګرام پیل کړی او روانه میاشت شا و خوا لس زره غواګانې یوازې په بلخ ولایت کې واکسین شوي دي.

په لومړیو کې څو میاشتې مخکې په خوست، پکتیا او پکتیکا کې په غواوو کې د دې ناروغۍ د خپرېدو راپورونه ورکړل شول.

د خوړو نړيوال پروګرام: اړو کسانو سره د مرستې لپاره ۱،۱ ميليارد ډالرو ته اړتيا لرو

ارشيف

د خوړو نړیوال پروګرام وايي، یو اعشاریه یو ميلیارد ډالرو ته اړتیا لري، چې وکړای شي د ۲۰۲۳م کال تر مارچ میاشتې پورې اړو کسانو ته د خوراکي توکو مرسته ورسوي.

په افغانستان کې د دې ادارې ویاند، وحید اله اماني ازادې راډیو ته وویل، دوی غواړي له روانې اکتوبر میاشتې د خوراکي توکو د مرستې رسونې چارې ګړندۍ کړي.

نوموړي وويل: "يو اعشاریه یو ملیارد ډالرو ته اړتیا لرو، باور مو دا دی چې زموږ نړیوال شریکان او نړیواله ټولنه به دغه مرسته زموږ په واک کې راکړي، چې وکړای شو د خپل پلان مطابق ۱۵ ملیون کسانو ته د خوراکي توکو مرستې ورسوو."

ښاغلی اماني وايي، دوی غواړي چې له روانې اکتوبر میاشتې د ۲۰۲۳م کال تر مارچ میاشتې پورې په میاشت کې ۱۵ ملیون کسانو سره افغانستان کې د خوراکي توکو مرسته وکړي.

ملګرو ملتونو افغانستان ته څه باندې یو میلیارد ډالره لېږدولي

ارشیف

د افغانستان لپاره د ملګرو ملتونو مرستندویه ماموریت یا یوناما وایي، ملګرو ملتونو په تېر یوه کال کې څه باندې یو میلیارد ډالره افغانستان ته لېږدولي چې له میلیونونو هغو افغانانو سره چې سخت بشري مرستو ته اړ دي، د ژوند ژغورنې مرستې وشي.

یوناما نن په یوه ټوېټ کې د دغو مرستو وضاحت ورکړی او ویلي یې دي دغه نغدي مرستې یوه سوداګریز بانک ته ورکړل شوي نه د طالبانو چارواکو ته اوس پر افغانستان واکمن دي.

د دغو مرستو په دوام د افغانستان بانک پرون افغانستان ته د نورو ۴۰ میلیون ډالرو مرستې د رسېدو خبر ورکړ.

د افغانستان بانک په یوه ټوېټ کې د نړیوالې ټولنې له خوا د قانوني او منل شویو میتودونو له لارې هېواد ته د بهرنیو اسعارو د راتګ د هرکلي ترڅنګ غوښتنه کوي چې دا ډول مرستې دې د بانکي سکتور له لارې اداره شي.

مقاومت جبهې د بدخشان د شُکی ولسوالۍ د نیولو ادعا کوي خو طالبان یې نه مني

د ملي مقاومت جبهې غړي

د ملي مقاومت جبهې ادعا کړې چې د دوی جنګیالیو په بدخشان کې شُکی ولسوالۍ له طالبانو نیولې ده.

د طالبانو د حکومت دې وسله والې مخالفې جبهې دوشنبه ناوخته په یوه اعلامیه کې د شُکی د نیولو ادعا کړې.

په اعلامیه کې زیاته شوې چې د ملي مقاومت جبهې همدارنګه د شُکی ولسوالۍ لپاره د طالبانو د امنیه قومندان محمد اکرم په شمول لس تنه طالبان نیولي.

خو د طالبانو حکومت د بدخشان د شٌکې ولسوالۍ سقوط رد کړ.

د طالبانو د کورنیو چارو وزارت پر خپله ټویټرپاڼه لیکلي چې د ولسوالۍ د سقوط په اړه خپرې شوې ادعاوې بې اساسه دي.

باختر اژانس چې د طالبانو په کنټرول کې دی لیکلي چې د طالبانو د حکومت د دفاع سرپرست وزیر ملا یعقوب مجاهد بدخشان ته تللی دی.

د خبر له مخې ملا یعقوب بدخشان ته د وضعیت د لا ښه څېړلو په هدف په دوه ورځني سفر تللی او هلته یې پامیر او اشکاشم ولسوالیو ته هم سفرونه کړي.

د ملي مقاومت جبهې جنګیالي د پنجشېر په لوړو څوکو او ځینو نورو محدودو سیمو کې د طالبانو پر وړاندې وسله وال مقاومت ته دوام ورکړی.

د بشري حقونو د څار بېلابېلو سازمانونو په طالبانو نیوکه کړې چې د جنګ په سیمو کې یې ګڼې بشري سرغړونې کړي.

د هشت صبح ورځپاڼې د ویب پاڼې بندولو غبرګونونه پارولي

هشت صبح ورځپاڼه

د بخښنې نړیوال سازمان د هشت صبح ورځپاڼې د ویب پاڼې د بندولو په اړه غبرګون وښود.

دغه سازمان وايي، پر ازادو رسنیو، د بیان پر ازادۍ او د غونډې پر حق د طالبانو پرله پسې بریدونه هغه لاملونه دي، چې ښيي دوی خپل مخالف نظریات ځپي.

هشت صبح ورځپاڼه وايي، طالبانو د سیاسي دلایلو له مخې د دوی ویب پاڼه ور بنده کړې ده.

خو طالبانو د دوشنبې په ورځ وویل چې د ورځپاڼې ویب پاڼه یې د دوی په خبره د کاذبو راپورونو د خپرولو په خاطر تړلې ده.

طالبانو 'ډاکتره سیمین مشکین مهمند' د رابعه بلخي روغتون مشره ټاکلې

ارشیف

د طالبانو حکومت ډاکتره سیمین مشکین مهمند د رابعه بلخي روغتون د مشرې په توګه وټاکله.

د روغتیا وزارت د خبرپاڼې له مخې اغلې مهمند د هغې د وړتیا په اساس دې دندې ته معرفي شوې ده او خلکو ته د ښو صحي خدماتو د وړاندې کولو تمه ترې کېږي.

یمین مشکین مهمند د طالبانو په حکومت کې دویمه ښځه ده چې د یوه روغتون د مشرې په توګه ټاکل کېږي.

تر دې مخکې ډاکتر ملالۍ فیضي د ملالۍ زیژنتون د مشرې په توګه ټاکل شوې وه.

د طالبانو د واکمنۍ څه باندې یو کال تېر شو خو لا هم ګڼې ښځینه کارمندانې بې برخلیکه دي او یواځې په محدودو برخو کې ښځې کارونو ته ورځي.

د دوی په حکومت یوه لویه نیوکه دا ده چې په لوړ پوړو څوکیو له هغې ډلې وزارتونو، عمومي ریاستونو او معینیتونو کې هېڅ ښځه نه ده ګمارلې.

استرالیا کې د کرکټ نړیوال جام سیالۍ؛ افغان لوبډلې تمرینات پیل کړي

افغان کرکټ ملي لوبډله

د افغانستان د کرکټ ملي لوبډله په استرالیا کې نړیوال جام ته د چمتووالي په هدف تمرینونه کوي.

تمه ده دا لوبډله د جمعې په ورځ یوه تمریني لوبه هم وکړي.

د کرکټ بورډ ویاند فریدهوتک ازادي راډیو ته وویل: "د افغانستان د کرکټ ملي لوبډله نړیوال جام ته د ښه چمتووالي په هدف په استرالیا کې خپل تمریناتي کمپ په لاره اچولې. د یادولو وړ ده چې د کرکټ ملي لوبډله به د اکتوبر په اوومه نېټه خپله تمریناتي لوبه ترسره کړي."

د افغانستان د کرکټ ملي لوبډله د نړیوال جام سیالیو په لړ کې تر خپلې لومړۍ رسمي لوبې مخکې د پاکستان او بنګله دېش پر وړاندې دوه تمریناتي لوبې کوي.

په نړیوال جام کې بیا لومړنۍ لوبه افغانستان د اکتوبر په ۲۲ له انګلستان سره لري.

پر طالبانو د هشت صبح ورځپاڼې د انټرنېټي پاڼې د ډومین بندېدو ادعا شوې

د مخابراتو وزارت

د هشت صبح ورځپاڼه ادعا کوي چې د انټرنېټ پاڼې ډومین یې د طالبانو له خوا بند شوی دی.

هشت صبح ورځپاڼې نن په خپله فېسبوک پاڼه کې په یوه بیان کې ویلي چې د طالبانو د مخابراتو وزارت خلکو ته د دغې شبکې له لارې د معلوماتو رسېدو انټرنېټي صفحه بنده کړې ده.

په بیان کې د دې ورځپاڼې د یوه کارکونکي له خوا ویل شوي چې د طالبانو حکومت دا کار د سیاسي انګېزې له مخې کړی دی.

طالبانو تراوسه په دې اړه څه نه دي ویلي.

کابل ته د ۴۰ میلیونه ډالرو نغدي مرستو نوې بسته رسېدلې

ارشیف

د افغانستان بانک وایي، د نړیوالې ټولنې د بشري نغدو مرستو په ترڅ کې یې نن ۴۰ میلیونه امریکایي ډالره ترلاسه کړل او هغه د افغانستان نړیوال بانک ته ولېږدول شول.

د افغانستان بانک په یوه ټویټ کې د نړیوالې ټولنې له خوا د قانوني او منل شویو میتودونو له لارې هېواد ته د بهرنیو اسعارو د راتګ د هرکلي ترڅنګ غوښتنه کوي چې دا ډول مرستې دې د بانکي سکتور له لارې اداره شي.

د افغانانو د ژوندي پاتې کېدو په موخه۳۰۰ میلیونه ډالره مرسته شوې

ارشیف

د افغانستان لپاره د ملګروملتونو د بشري مرستو د همغږۍ اداره یا اوچا وایي چې د افغانستان د بشري مرستو وجهي صندوق روان کال بشري مرستندویه شریکانو ته نږدې درې سوه میلیونه ډالره ورکړي چې هغو میلیونونو افغانانو ته چې د ژوند ژغورلو لپاره پر بشري مرستو متکي دي، د ژوندي پاتې کېدو لومړنۍ مرستې ورسوي.

اوچا په یوه بل ټویټ کې ویلي چې د افغانستان د بشري مرستو صندوق د امریکا د بسپنې ۱۰۷ میلیون ډالره د ژمنیو مرستو لپاره ازادې کړي دي.

اوچا ویلي چې دغه مرستې به مخکې له دې چې سخت ژمۍ پیل شي، د خلکو د کورونو د ترمیم، کمپلو، ګرمو جامو او د سوند موادو په برخو کې له خلکو سره پر مرستو ولګول شي.

زابل کې لسګونه کسان په نس ناستې ناروغۍ اخته شوي

ارشیف

د زابل ولایت په شینکۍ ولسوالۍ کې لسګونه کسان په نس ناستې ناروغۍ اخته شوي چې له کبله یې لږترلږه یو تن مړ شوی دی.

د زابل د عامې روغتیا ريیس ډاکتر عبدالحکیم حکیمي په دې اړه ازادي راډیو ته وویل چې د زابل ولایت مرکز کلات ته په نږدې سیمو او سیوري ولسوالۍ کې هم د نس ناستې پېښې ډېرې شوي دي.

د حکیمي په خبره ټولو سیمو ته روغتیایي ځانګړې ټیمونه استول شوي چې د درملنې، څېړنو او د حفظ الصحې لارښوونو په ګډون خلکو ته له ناروغیو د مخنیوي په هدف پوهاوی ورکړي.

هلمند کې يوې ژورې څاه ته لويدلې نجلۍ ژغورل شوې ده

د افغانستان په عمومي نقشه کې د هلمند ولايت موقعيت

په هلمند کې چارواکي وایي، یوه نجلۍ چې یوې ژورې څا ته لویدلې وه، ژغورل شوې ده.

دغه پېښه تېره ورځ د دې ولایت په واشېر ولسوالۍ کې رامنځته شوې.

د هلمند د اطلاعاتو او کلتور ریاست مرستيال مولوي محمد قاسم ریاض وايي، دغه لس کلنه نجلۍ د واشېر ولسوالۍ د لر په حوزه کې یوې نوې وهل شوې ۶۰ متره ژورې برمې ته لویدلې وه چې تر ډېرو هڅو وروسته وژغورل شوه.

په هلمند کې څاته لویدلې دغه نجلۍ داسې مهال ژغورل کېږي چې له دې مخکې په ډېرو دا ډول پېښو کې ماشومانو خپل ژوند له لاسه ورکړی دی.

سره له دې چې طالب امنیتي چارواکو خلکو ته خبرداری ورکړی چې د خپلو سر لوڅو څاګانو سرونه پټ کړي خو لیدل کېږي چې دغه ستونزه تر اوسه نه‌ده هواره شوې.

نور راوښيه

XS
SM
MD
LG