د لاسرسۍ وړ لېنکونه

تازه خبر
پنجشنبه ۱۰ کب ۱۴۰۲ کابل ۰۷:۲۹

افغانستان

یونیسف: ۱۳ میلیونه افغان ماشومان بشري مرستو ته اړتیا لري

په کابل کې وچې ډوډۍ ته منتظرې مېرمنې او ماشومان. January 24, 2022
په کابل کې وچې ډوډۍ ته منتظرې مېرمنې او ماشومان. January 24, 2022

د ماشومانو د ملاتړ لپاره د ملګرو ملتونو مرستندوی صندوق یا یونیسف وايي، پر افغانستان د طالبانو د ولکې له ټینګولو کال وروسته هم ۱۳ میلیونه ماشومان بشري مرستو ته اړتیا لري.

یونیسف پرون ناوخته په یوه ټوېټ کې ویلي، دوی به په افغانستان کې د هر ماشومام ملاتړ ته ژمن پاتې شي.

ملګرو ملتونو ویلي چې په افغانستان کې نږدې درې نیم میلیونه ماشومان له خوارځواکۍ کړېږي.

د ورځې تازه خبرونه دلته ولولئ

د مهاجرت نړیوال سازمان په پکتیا کې له ۲۵۰ کورنیو سره مرسته وکړه

تصویر له ارشیفه، د مهاجرت د نړیوال سازمان د مرستو لړۍ
تصویر له ارشیفه، د مهاجرت د نړیوال سازمان د مرستو لړۍ

د مهاجرت نړیوال سازمان، IOM په پکتیا ولایت کې له دوه نیم سوو کورنیو سره د ژمنیو مرستو خبر ورکوي.

د افغانستان لپاره د دې سازمان څانګې پرون چهارشنبې په خپله ایکس پاڼه یا پخواني ټویټر کې لیکلي چې له دغو کورنیو سره ژمنۍ مرستې وروسته له هغې وشوې چې په سیمه کې د اړو کسانو په اړه یوه ارزونه وشوه.

ویل شوي چې له اړو کورنیو سره د سون توکو لپاره د نغدې پیسو، شړیو او ژمنیو تودو جامو مرسته وشوه.

د مهاجرت نړیوال سازمان له دې مخکې د افغانستان لپاره د سخت ژمي اټکل کړی او له پاکستان او ایران څخه په زوره د افغان کډوالو له بیرته ستنولو سره یې دې په هېواد کې د بشري وضعیت لا خرابیدو ته اندېښنه ښکاره کړې وه.

د امریکا د بهرنیو چارو وزارت: اوس د دې وخت دی چې د افغان ښځو په اړه الهام په عمل بد کړو

یو شمېر معترضې افغانې مېرمنې
یو شمېر معترضې افغانې مېرمنې

د امریکا د بهرنیو چارو وزارت وایي، اوس یې وخت دی چې د افغان ښځو په اړه الهام په عمل بدل کړو.

د افغانستان لپاره د امریکا سفارت پرون چهارشنبې په خپله ایکس پاڼه یا پخواني ټویټرکې له ټولو غوښتنه کړې چې د امریکا له بهرنیو چارو وزارت سره دې په هغو هڅو کې ورګډ شي چې هدف یې په ټوله نړۍ کې د افغان ښځو د اقتصادي ښکېلتیا لپاره د ملاتړ رامنځته کول دي.

د افغانستان لپاره د امریکا سفارت دغه څرګندونې د امریکا د بهرنیو چارو په وزارت کې د سې شنبې د ورځ د هغې غونډې په تړاو کړې چې د افغان ښځو د اقتصادي مقاومت په نوم د یوه ایتلاف له خوا جوړه شوې وه.

سفارت د بهرنیو چارو د وزیر انتوني بلېنکېن په ګډون د دې غونډې د ټولو ګډونوالو د ویناوو ستاینه او مننه کړې او هغه یې الهام ورکونکې بللې دي.

ښاغلي بلېنکېن په خپلو خبرو کې دې ته اندېښنه ښکاره کړه چې طالبانو په افغانستان کې د ټولنې نیمه برخه له تعلیم او کارڅخه محرومه کړې.

د هغه په وینا، دغه محدودیتونه سبب شوي چې افغانستان د کال تریو ملیارډ ډالرو پورې زیان وویني.

طالبانو د ۲۰۲۱ کال له دوبي راهیسې، له کله چې پرافغانستان واکمن شوي، پر نجونو او ښځو د زده کړې او کار په ګډون پراخ بندیزونه لګولي دي.

د بشري حقونو عالي کمېشنرۍ په افغانستان کې د اعدامونو د ودرولو غوښتنه وکړه

د ملګرو ملتونو د بشري حقونو د شورا غړي
د ملګرو ملتونو د بشري حقونو د شورا غړي

د ملګرو ملتونو د بشري حقونو عالي کمېشنرۍ په افغانستان کې د طالبانو له خوا په عام محضر کې د اعدامونو د سمدستي درولو غوښتنه کړې ده.

د دې کمېشنرۍ ویاند جرمي لاورینس Jeremy Laurence پرون چهارشنبې په یوه بیان کې وویل چې تېره اونۍ په افغانستان کې په عام محضرکې د درېیو تنو اعدامیدو وېرولي دي.

د طالبانو د حکومت لخوا دوه تنه د تېرې جمعې په ورځ په غزني او یو تن د دوشنبې په ورځ په جوزجان کې اعدام شول.

د ملګرو ملتونو د بشري حقونو عالي کمېشنرۍ ویلي په عام محضرکې اعدامونه چې طالبان یې قصاص بولي، د بشري حقونو له اصولو سره په ټکر کې دي او سمدستي دې ودرول شي.

طالبانو پر افغانستان له واکمنیدو راهیسې پنځه تنه د خپل عدلي سیسټم د پرېکړو او د خپل مشر ملاهبت الله اخوندزاده له تایید وروسته په عام محضرکې اعدام کړي دي.

د افغانستان لپاره د ایران استازي یوځل بیا د اوبو د حقابې مسئله مطرح کړه

ارشیف: د هلمند سیند یوه څنډه
ارشیف: د هلمند سیند یوه څنډه

د افغانستان لپاره د ایران ځانګړي استازي حسن کاظمي قُمي هیله ښکاره کړې چې تر تلې میاشتې به د هلمند د سیند اوبه ایران ته داخلې شي.

قُمي دا خبره نن د ایران ایسنا اژانس ته وکړه او زیاته یې کړه چې هېواد یې د خپلو اوبو د برخې مسئله جدي تعقیبوي.

قُمي وایي چې د اوبو په تړاو د ایران د انرژي وزارت خبرو د طالبانو له چارواکو سره هغه نتیجه ورنه کړه چې دوی یې تمه لرله.

ده په دې برخه کې نور جزییات ورنه کړل.

طالبان وایي چې د ایران د اوبو د حق په تړاو د ۱۳۵۱هجري شمسي کال تړون ته ژمن دي، خو د پرله‌پسې وچکالیو له امله د هلمند په سیند کې اوبه کمې شوې دي.

ټېسټ سیالي؛ افغان لوبډلې په لومړۍ پاڼۍ کې ۱۵۵ منډې وکړې

په افغان توپ وهونکو کې ابراهیم ځدراڼ تر نورو مخکښ و او په ۵۳ منډو وسوځېد.
په افغان توپ وهونکو کې ابراهیم ځدراڼ تر نورو مخکښ و او په ۵۳ منډو وسوځېد.

د افغانستان او ایرلینډ ترمنځ د پيل شوې یوازینۍ ټېسټ سیالۍ په لومړۍ ورځ د افغان لوبډلې د توپوهنې پاڼۍ پای ته ورسېده او په ۱۵۵ منډو یې ټول لوبغاړي له لاسه ورکړل.

یاده سیالي چې نن سهار د کابل په وخت ۱۰:۳۰ نیمې بجې پیل شوې، پچه یې افغانستان ګټلې او توپ اچونه یې انتخاب کړې وه.

په افغان توپ وهونکو کې ابراهیم ځدراڼ تر نورو مخکښ و او په ۵۳ منډو وسوځېد.

دغه راز کریم جنت په ۴۱ منډو ناسوځېدلی پاتې شو.

په لومړۍ پاڼۍ کې ناصرجمال او رحمت شاه په صفر وسوځېدل.

لوبډلمشر حشمت الله شهیدي ۲۰ او نورعلي ځدراڼ ۷ منډې وکړې.

رحمن االله ګربز چې په لومړي ځل په ټېسټ سیالیو کې ولوبېد، په ۵ منډو یې وېکټ له لاسه ورکړه.

د ایرلینډ په توپ اچونکو مارک اډیر ۵، کمپر او ګرېګ یانګ دوه ـ دوه افغان لوبغاړي وسوځول.

لا هم د نن ورځې تر ۳۰ زیات اورونه پاتې چې ایرلینډ به پکې د خپلې توپوهنې پاڼۍ پيل کړي.

د افغانستان په یو شمېر ولایتونو کې د سېلابونو خبرداری ورکړل شوی

تصویر له ارشیفه
تصویر له ارشیفه

د افغانستان په یو شمېر ولایتونو کې نن د سېلونو د بهیدو خبرداری ورکړل شوی دی.

د طالبانو د اوبو او انرژي وزارت په کابل، کونړ، هلمند، پنجشېر، غزني، پکتیکا، پکتیا او فراه ولایتونو کې د سیندونو د اوبو د کچې د لوړیدو او د سېلونو د بهیدو خبرداری ورکړی دی.

په افغانستان کې د روانې اوونۍ د ورښتونو له امله په بامیان، غور او غزني کې یوشمیر لارې وتړل شوې.

د کابل-کندهار لویه لار هم پرون بنده وه چې بیا وروسته پرانیستل شوه.

په سالنګونو کې له یکشنبې راهیسې لار تړلې وه او نن سهار د طالبانو د فواید عامې وزارت د دې لارې د بیا پرانیستو خبر ورکړ، خو ویې ویل چې لاهم په سالنګونو کې واوره اوري چې د دې لارې د بیا بندیدو خطر شته.

د هوا پېژندنې د نړیوالو ادارو له اټکل سره سم به نن د افغانستان په پنځه ویشت ولایتونو کې واورې او بارانونه وي.

سالنګ لویه لاره بیرته خلاصه شوه

له ارشیفه د سالنګ یو تصویر
له ارشیفه د سالنګ یو تصویر

د سالنګ لویه لاره له دوه ورځني ځنډ وروسته نن سهار د ترافیکو پرمخ خلاصه شوه.

ملي راډیو ټلویزیون چې طالبان یې اداره کوي، د ټولګټو چارو وزارت له قوله د دې لارې د خلاصېدو خبر ورکړی.

د سالنګ لویه لاره د یکشنبې په ورځ د درنو واورو له ورېدو او سختو توپانونو وروسته د موټرو د تګ راتګ پرمخ وتړل شوه.

د ټولګټو چارو وزارت ویاند محمداشرف حقشناس ویلي دي چې د سالنګونو په ځینو برخو کې لاهم څه ناڅه واورې ورېږي او دا خطر شته چې دا لاره یوځل بیا په موقتي ډول بنده شي.

بلېنکن: په اقتصادي وده کې د ښځو نه ګډون افغانستان ته د کال یو میلیارد ډالر تاوان اړوي

د امریکا د بهرنیو چارو وزیر
د امریکا د بهرنیو چارو وزیر

د امریکا د بهرنیو چارو وزیر وايي چې افغانستان د طالبانو په واکمنۍ کې په کال کې تر یو میلیارد ډالرو پورې ځکه له لاسه ورکوي چې ښځې په اقتصادي وده کې له ونډې اخیستو بې برخې دي.

انتوني بلېنکین د افغان ښځو د اقتصادي استقامت د ایتلاف په غونډه کې چې پرون په واشنګټن ډي سي کې جوړه شوې وه، پر دې اندېښنه وښوده چې طالبانو د افغانستان نیمايي ټولنه له کار او زده کړو محرومه کړې ده او ویې ویل چې په کال کې یو میلیارد ډالر په اقتصادي وده کې د افغان مېرمنو له ونډې ترلاسه کېدای شي؛ خو د طالبانو د بندیزونو او محدودیتونه له کبله افغانستان ترې بې برخې دی.

د افغان ښځو د اقتصادي استقامت ایتلاف په ۲۰۲۲ کال کې د افغان ښځو او نجونو لپاره د امریکا د ځانګړې استازې ریناامیري په نوښت جوړ شو.

مېرمن امیري پرونۍ غونډې ته پردې خبرې خپګان وښود چې له ۸۹۸ ورځو راهیسې له شپږم د پورته ټولګیو زد کوونکې نجونې له تعلیمه بې برخې دي او د افغان مېرمنو پرمخ د کار او بهر ته د وتلو دروازې بندې شوې دي.

طالبان پر افغان نجونو او ښځو د لګېدلو محدودیتونو په خاطر له نړیوالو انتقادونو سره مخ دي او یو دلیل چې تر اوسه د طالبانو حکومت نړیوالو په رسمیت نه دی پېژندلی هم همدا دی.

د خوړو نړیوال پروګرام له افغانستان سره د سویلي کوریا د ۴ میلیونه ډالره مرستې هرکلی وکړ

په افغانستان کې د خوړو نړیوال سازمان د فعالیتونو یوه څنډه - ارشیف
په افغانستان کې د خوړو نړیوال سازمان د فعالیتونو یوه څنډه - ارشیف

د ملګرو ملتونو د خوړو نړیوال پروګرام (WFP)له افغانستان سره د سویلي کوریا د څلورو میلیونو ډالرو مرستې هرکلی کړی دی.

د ډبیلو اف پي د اسیا پاسفیک څانګې د سه شنبې په ورځ په ایکس پاڼه کې لیکلي چې دا پیسې به د افغانستان په هغو سیمو کې د قحطۍ په مخنیوي کې مرسته وکړي چې د خوړو له سخت بحران سره مخ دي.

د خوړو نړیوال پروګرام په دې وروستیو کې ویلي چې په افغانستان کې راتلونکو شپږو میاشتو کې د مرستو د دوام لپاره ۷۶۰ میلیونه ډالرو ته اړتیا لري.

په دې وروستیو کې په افغانستان کې بشري مرستو ته اړتیا ډېره شوې او دا مهال له ۲۳ میلیونو ډېر افغانان بشري مرستو ته سخته اړتیا لري.

د موسمي ستونزو له امله په ځینو ولایتونو کې د پولیو واکسین ځنډول شوی

تصویر له ارشیفه
تصویر له ارشیفه

د افغانستان په څو ولایتونو کې د پولیو واکسیناسیون ځنډول شوی.

له پولیو څخه د پاک افغانستان پروګرام د سه شنبې په ورځ (فبروري ۲۷) په ایکس ټولنیزه شبکه (پخواني ټویټر) کې لیکلي، که څه هم د افغانستان په ډیرو سیمو کې د پولیو واکسیناسیون روان دی، خو د واورو، باران او سړې هوا له امله په کاپیسا، پروان، رزګان، زابل، هلمند، کندهار، غزني، خوست، هرات او فراه ولایتونو کې د پولیو یا د ماشومانو د ګوزڼ ضد واکسین ځنډول شوی دی.

دې پروګرام د افغانستان له خلکو غوښتي چې خپل ټول نوزیږي او ناروغ ماشومان هم واکسین کړي.

که څه هم د نړۍ په نورو هېوادونو کې د ګوزڼ ناروغي له منځه تللې، خو پاکستان او افغانستان یواځیني دوه هېوادونه دي چې لا هم د دغې ناروغۍ پېښې پکې لیدل کېږي.

نور راوښيه

XS
SM
MD
LG