د لاسرسۍ وړ لېنکونه

تازه خبر
جمعه ۲۹ چنګاښ ۱۴۰۳ کابل ۱۰:۰۶

افغانستان

اوچا: د اقلیم د بدلون اغېزې ویجاړونکې دي

په ننګرهار کې د وروستیو سېلابونو له امله د اوښتو زیانونو یو انځور
په ننګرهار کې د وروستیو سېلابونو له امله د اوښتو زیانونو یو انځور

د ملګرو ملتونو د بشري مرستو همغږې کونکې اداره یا اوچا وایي، د اقلیم د بدلون اغېزې ویجاړونکې دي.

اوچا په یوه ټوېټ کې ویلي چې بشرپاله لوبغاړو په افغانستان کې د جون له میاشتې راهیسې د شدیدو ورښتونو او ناڅاپي سېلابونو له زیانمن شویو ۵۵ زره کسانو سره بېړنۍ مرستې کړي دي.

اوچا ویلي چې دغه زیانمن شوي له ژمي د مخه نور ملاتړ ته اړتیا لري.

په دې وروستیو کې د ننګرهار، پروان، کاپیسا، غزني او ارزګان په ګډون د افغانستان په ډېرو ولایتونو کې د شدیدو وروښتونو په نتیجه کې ناڅاپي سېلابونه راوتلي چې په لسګونو کسانو ته یې پرمرګ ژوبلې سربېره لسګونه کورونه ویجاړ یا زیانمن کړي او لسګونه زره جریبه کرنیزه ځمکه یې خرابه کړې ده.

د ورځې تازه خبرونه دلته ولولئ

د "اې‌سي‌ایف" د ۱۵ میاشتو په مخه له ټولو سپورټي فعالیتونو منع شوی

عکس تزییني بڼه لري.
عکس تزییني بڼه لري.

د بایسکل ځغلونې نړیوالې ټولنې د افغانستان د بایسکل ځغلونې فدراسیون یا اې‌سي‌ایف (ACF) مشر فضل احمد فضلي د ۱۵ میاشتو په مخه له ټولو سپورتي فعالیتونو منع کړی دی.

د بایسکل ځغلونې نړیوالې ټولنې اخلاقي کمېسیون پرون د جولای ۱۸مه په یوه خبرپاڼه کې ویلي چې فضلي د ګواښونکو او سپکوونکو پیغامونو په استولو سره له خپلو صلاحیتونو ناوړه استفاده کړې ده.

دغه راز ویل شوي چې فضل احمد فضلي په ۲۰۲۱م کال کې د کابل له هوايي ډګر څخه د هغو افغانانو د لېږد په مهال چې ژوند یې په افغانستان کې له خطر سره مخامخ و، ځینو ورزشکارانو ته ګواښونکي پیغامونه لېږلي وو.

فضلي چې له ۲۰۱۹م کال راهیسې د افغانستان د بایسکل ځغلونې فدراسیون مشر دی، تر اوسه د دغو تورونو په اړه څه نه دي ویلي.

آی‌اوایم: له اپرېله تر جونه افغانستان ته تر ۸۵۸زره ډېر کسان داخل شوي او ۵۳۲ نور وتلي

ارشیف: له پاکستانه د چمن سرحدي دروازې ته رسېدلي افغان کډوال چې افغانستان ته روان دي.
ارشیف: له پاکستانه د چمن سرحدي دروازې ته رسېدلي افغان کډوال چې افغانستان ته روان دي.

د کډوالۍ یا "آی‌اوایم" نړيوال سازمان وايي، د روان کال له اپرېل څخه تر جون مياشتي پورې افغانستان ته تر ۸۵۸زره ډېر کسان داخل شوي او ۵۳۲ نور وتلي دي.

دغه سازمان پرون د جولای ۱۸مه خپل نوی درې میاشتنی راپور په ایکسپاڼه یا پخواني ټویټر کې خپور کړ او ویې ویل چې اوس په افغانستان کې دننه او بهر د افغانانو د تګ راتګ د څارنې په مرکزونو کې پنځه نور زیات شوي دي.

په راپور کې دا نه دي ویل شوي چې دغه سازمان د افغان اتباعو د تګ راتګ د څار څومره مرکزونه لري.

د کډوالۍ نړیوال سازمان د دغو مرکزونو په وسیله پاکستان او ایران ته د افغانانو تګ راتګ څاري.

له دغو دوو هېوادونو څخه د خلکو د راتګ یو لامل دا دی چې پاکستان او ایران په تېرو لسو میاشتو کې د افغان کډوالو جبري ایستلو ته زور ورکړی دی.

بدخشان کې ترافیکي پېښه؛ ۵ تنه مړه او ۱۳ نور ژوبل شول

ارشیف
ارشیف

په بدخشان کې طالب چارواکي وايي چې په یوه ترافیکي پېښه کې ۵ تنه مړه او ۱۳ نور ژوبل شول.

د طالبانو د بدخشان امنیه قومندانۍ پرون پنجشنبې وویل چې دا پېښه د چهارشنبې په ورځ د دغه ولایت په کوهستان ولسوالي کې هغه مهال وشوه چې یو لنډکروزر موټر له سړکه واوښت او چپه شو.

د بدخشان د امنیه قومندانۍ د ویندوی احسان الله کامګار په وینا، د ځینو ټپیانو حال نازک دی.

تر دې یوه ورځ وړاندې د بغلان ولایت په خنجان ولسوالي کې په یوه ترافیکي پېښه کې ۱۷ تنه مړه او ۳۰ نور ټپیان شول.

د بغلان ولایت د امنیه قوماندانۍ د خبرپاڼې له مخې، پېښه د خنجان په تخته سنګ سیمه کې هغه مهال وشوه چې له کابل څخه فاریاب ته روان بس چپه شو.

د یکشنبې په ورځ هم د بغلان د مرکز پلخمري او د ډنډې غوري ولسوالۍ په خواجه الوان سیمه کې په جلاجلا ترافیکي پېښو کې ١٢ کسانو ته مرګ ژوبله واوښته.

د افغانستان په ۱۷ ولایتونو کې د بارانونو د اورېدلو اټکل شوی

ارشیف: په پروان کې د باران اورېدلو یو انځور
ارشیف: په پروان کې د باران اورېدلو یو انځور

د طالبانو د ټرانسپورټ او هوايي چلند وزارت د هوا پېژندنې ادارې اټکل کړی چې نن جمعه به د افغانستان په ۱۷ ولایتونو او همداراز سالنګونو کې بارانونه واوري.

دې ادارې په خپله خبرپاڼه کې ویلي چې په سالنګونو او همداراز ننګرهار، کابل، لوګر، بدخشان، تخار، بغلان، پنجشېر، کونړ، نورستان، لغمان، کاپیسا، پروان، میدان وردګ، غزني، پکتیا، پکتیکا او خوست کې د باران ترڅنګ د بادونو، تالندې، دوړو او سېلابونو وړاندوینه کوي.

د دې ادارې پر اساس، په بېلابېلو سیمو کې د باران کچه له ۱۵تر ۴۰ ملي مترو پورې اټکل شوې ده.

په وروستیو ورځو کې د افغانستان په پنځو ولایتونو کې سېلابونو خلکو ته مرګ ژوبلې او تاوانونه واړول.

تر ټولو ډېره مرګ ژوبله یې په ننګرهار کې واړوله.

الکوزی: افغانستان کې دننه بايد د تازه مېوو د ساتنې لپاره سړې خونې جوړې شي

ارشیف: په کندهار کې د انګورو د پروسس او بسته‌بندۍ یو انځور
ارشیف: په کندهار کې د انګورو د پروسس او بسته‌بندۍ یو انځور

د افغانستان د سوداګرۍ او پانګونې خونه وایي چې پاکستان ته د افغانستان د تازه مېوو او سبزیجاتو د صادراتو د ستونزې یوه کورنۍ دایمي حل‌لاره دا ده چې په هېواد کې دننه د مېوو او سبزیجاتو د ساتلو لپاره زیاتې سړې خونې جوړې شي.

د دې خونې د مدیره هییت غړي خان جان الکوزي ازادي راډیو ته دغه څرګندونې پرون چهارشنبې ناوخته داسې مهال وکړې چې افغانستان د پاکستان له‌خوا د تعرفې د زیاتوالي له امله هغه هېواد ته د تازه مېوو او سبزیجاتو صادارت درولي دي.

الکوزي وويل: "فیصله مو وکړه چې صادرات بند کړو او د دې لپاره په داخل کې تدابیر ونیول شي، باید کوښښ وشي چې په داخل کې سړې خونې جوړې شي او ظرفیتونه ایجاد شي او همدارنګه افغانان، دولتي خلک او په هوټلونو کې د خارجي مېوو پرځای له کورنیو مېوو څخه استفاده وشي."

د الکوزي په خبره پاکستان په‌دې وروستیو کې د افغانستان پر دولس قلمه مېوو او سبزیجاتو تعرفې ان تر پنځلس چنده لوړې کړې چې افغان سوداګر یې د پرېکولو توان نه‌لري ځکه ورسره نرخونه پورته ځي چې په نتیجه کې یې څوک د اخیستو وس نه‌لري.

دا لومړی ځل نه‌دی چې پاکستان د اوړي په موسم کې چې په افغانستان کې د مېوو د حاصلاتو موسم دی، د سبزیجاتو ترڅنګ د تازه مېوو د صادراتو په وړاندې سخت اقدامات کوي، بلکې له دې مخکې یې هم په کراتو، کراتو د مختلفو دلایلو له امله هغه هېواد ته د افغانستان د تازه مېوو د صادراتو مخه نیولې چې افغان بزګرو او سوداګرو ته یې ډېردزیانونه اړولي دي.

د کابل هوايي ډګر کې د وژل شويو ۱۳ امريکايي سرتېرو کورنیو پر بايډن نيوکې کړي

۱۳ امریکایي سرتېري‌ او شاوخوا ۶۰ افغانان د ۲۰۲۱م کال د اګست په ۲۶مه د کابل هوایي ډګر دغه څنډه کې هغه مهال په یوه ځانمرګي برید کې ووژل شول چې هوایي ډګر کې ګڼه ګوڼه وه او د امریکایي ځواکونو له‌خوا د تخلیې عملیات روان وو.
۱۳ امریکایي سرتېري‌ او شاوخوا ۶۰ افغانان د ۲۰۲۱م کال د اګست په ۲۶مه د کابل هوایي ډګر دغه څنډه کې هغه مهال په یوه ځانمرګي برید کې ووژل شول چې هوایي ډګر کې ګڼه ګوڼه وه او د امریکایي ځواکونو له‌خوا د تخلیې عملیات روان وو.

د کابل په هوایي ډګر کې درې کاله مخکې د وژل شویو دیارلسو امریکایي سرتېرو د کورنۍ غړي بېګا د جمهوري غوښتونکو په ملي کنګره کې راڅرګند شول.

دغه ۱۳ امریکایي سرتېري‌ او شاوخوا ۱۷۰ افغانان د ۲۰۲۱م کال د اګست په ۲۶مه د کابل هوایي ډګر کې هغه مهال په یوه ځانمرګي برید کې ووژل شول چې هوایي ډګر کې ګڼه ګوڼه وه او د امریکایي ځواکونو له‌خوا د تخلیې عملیات روان وو.

د هغه برید مسوولیت داعش ومانه.

د دغو امریکایي پوځیانو د کورنۍ یو شمېر غړو پر ولسمشر جو بایډن نیوکه وکړه چې ګواکې یوځل یې هم د دوی د وژل شویو خواخوږ نومونه په عمومي دریځ کې نه‌دي اخیستي.

د وژل شویو امریکایي سرتېرو د کورنیو یوه غړي د کنګرې پر سټیج د ټولو دیارلس واړه سرتېرو نومونه یاد کړل چې تالار ورپسې تکرارول.

دوی دا شعار هم ورکاوه چې د سرتېرو قربانۍ به یې هیڅکله هېرې نه‌شي او له‌دې سره د ډونالډ ټرمپ په ګډون د کنګرې ټول ګډونوال په خپلو ځایونو ودرېدل.

د اسوشېټېډپرېس خبري اژانس د راپور له‌مخې د امریکا د ملي امنیت شورا یوه ویاند ادریان واتسن بیا ویلي، بایډن په ژوره توګه د ټولو وژل شویو سرتېرو او د هغوی د کورنیو او قربانیو په فکر کې دی.

په ننګرهار کې د نظراباد پل رغول کېږي او د بدیلې لارې د جوړېدو لارښوونه شوې

ارشیف
ارشیف

د طالبانود حکومت د ټولګټو وزارت د کابل-جلال‌اباد د لویې لارې اړوند د نظرآباد پله لپاره چې د وروستیو ورښتونو او سېلونو له امله یې یوه برخه ویجاړه شوې، د یوې بدیلې لارې د رغولو خبر ورکوي.

دې وزارت پرون چهارشنبې په خپله ایکس‌پاڼه یا پخواني ټویټر کې لیکلي، په سیمه کې د بدیلې لارې په پرانيستلو سره دغه لویه لاره بېرته د وسایطو د تګ راتګ پر مخ پرانیستل شوه.

د دې وزارت د رسنیز دفتر په وینا سرپرست وزیر ملا محمد عیسي ثاني د ننګرهار د ټولګټو ریاست تخنیکي ټیمونو ته لارښوونه کړې چې دغه پل ژر تر ژره په اساسي ډول ورغوي.

په ننګرهار کې وروستیو سېلونو پر ځاني زیانونو سربېره د خلکو شاوخوا څلور سوه کورونه هم وران کړي دي.

امریکا د افغانستان سېلاب ځپلو سره بېړنۍ مرسته کوي

کرین دیکرشارژدافیر سفارت امریکا برای افغانستان
کرین دیکرشارژدافیر سفارت امریکا برای افغانستان

د افغانستان لپاره د امریکا شارژدافېرې کرین ډیکر په ننګرهار، کونړ، لغمان او پنجشېر ولایتونو کې د ورږستیو سېلابونو له زیانمنو سره د بېړنیو مرستو خبر ورکړی دی.

نوموړې پرون چهارشنبې په خپله ایکسپاڼه یا پخواني ټویټر کې له سېلاب ځپلو سره د خواخوږۍ څرګندولو ترڅنګ ویلي چې له زیانمنو سره به د خوراکي موادو، اوبو او نورو اړینو توکو مرستې وشي.

د طالبانو د حکومت د چارواکو په وینا په ننګرهار کې د وروستیو سېلونو له امله لږترلږه ۵۲ کسان مړه او ۳۵۰ نور ټپیان شوي دي.

چارواکو همدارنګه ویلي چې په ختیځو ولایتونو کې له سېلاب ځپلو سره نغدي او د خوراکي موادو مرستې کوي.

تر دې مخکې اروپایي اتحادیې هم ویلي وو، د سېلاب ځپلو سیمو وضعیت له نژدې څاري او د زیانمن شویو به لاسنیوی وکړي.

الکوزی: د تعرفې د لوړېدو له امله مو پاکستان ته د تازه مېوو صادرات درولي

​د افغانستان د سوداګرۍ او پانګونې خونې د مدیره هیت غړی خانجان الکوزی
​د افغانستان د سوداګرۍ او پانګونې خونې د مدیره هیت غړی خانجان الکوزی

​د افغانستان د سوداګرۍ او پانګونې خونه وایي چې د پاکستان له‌خوا د تعرفې د زیاتوالي له امله مجبوره شوي چې هغه هېواد ته د تازه مېوو او سبزیجاتو صادارت ودروي.

د دې خونې د مدیره هیت غړي خانجان الکوزي بېګا ناوخته ازادي راډیو ته وویل، په‌دې وروستیو کې د پاکستان له‌خوا پر دولس قلمه مېوو او سبزیجاتو د پاکستان تعرفې ان ترپنځلس چنده لوړې شوې دي.

نوموړي وويل: "مجبوره شولو چې د اوس لپاره صادرات ودرو، ځکه هلته بازارونو کې نرخ پورته ځي. نه یوازې زموږ بزګرو او سوداګرو ته زیان رسېږي، بلکې د پاکستان خلک هم ترې زیانمن کېږي ځکه ورسره هلته هم نرخونه پورته ځي."

الکوزي زیاته کړه چې د ګمرکي تعرفو د زیاتوالي په اړه یې خپلې اندېښنې له پاکستان سره هم شریکې کړي، خو منفي ځواب یې ترلاسه کړی دی.

د نوموړي په خبره، پاکستان استدلال کوي چې دغه تعرفې یوازې پر افغانستان نه‌دي زیاتې شوي، بلکې پر ټولو هېوادونو چې پاکستان ته صادرات کوي، زیاتې شوې دي.

دا لومړی ځل نه‌دی چې پاکستان د اوړي په موسم کې چې په افغانستان کې د مېوو د حاصلاتو موسم دی، د سبزیجاتو ترڅنګ د تازه مېوو د صادراتو په وړاندې سخت اقدامات کوي، بلکې له‌دې مخکې یې هم په کراتوکراتو د مختلفو دلایلو له امله هغه هېواد ته د افغانستان د تازه مېوو د صادراتو مخه نیولې چې افغان بزګرو او سوداګرو ته‌یې ډېر زیانونه اړولي دي.

د پاکستان د بهرنيو چارو وزارت په اسلام‌اباد کې د طالبانو مرستیال سفیر احضار کړی

په اسلام اباد کې د افغانستان سفارت
په اسلام اباد کې د افغانستان سفارت

د پاکستان د بهرنیو چارو وزارت نن په اسلام‌اباد کې د طالبانو د سفارت مرستیال احضار کړی او له هغه یې غوښتې چې د دوی حکومت دې د هغو وسله‌والو ډلو پر ضد لاس په کار شي چې روانه اوونۍ یې په پاکستان کې پر یوه پوځي مرکز برید وکړ.

وسله‌والو د دوشنبې په ورځ په بنو کې د پوځ پر یوه مرکز حمله وکړه چې د پاکستاني سرچینو په وینا د دې برید له امله اته پاکستاني پوځيان ووژل شول.

د ياد برید مسوولیت د حافظ ګل بهادر ډلې منلی دی.

پاکستان ادعا کوي چې دا ډله له افغانستانه د پاکستان د خاورې دننه عملیات کوي.

طالبانو تر اوسه په‌دې اړه څه نه‌دي ویلي، خو تر دې مخکې یې د اسلام‌اباد دا ډول تورونه رد کړي چې وسله‌والې ډلې په افغانستان کې شته او یا د دوی حکومت چاته اجازه ورکوي چې د افغانستان خاوره د بل هېواد پر ضد وکاروي.

نور راوښيه

XS
SM
MD
LG