د لاسرسۍ وړ لېنکونه

تازه خبر
سه شنبه ۵ تله ۱۴۰۱ کابل ۰۶:۵۰

افغانستان

طالبان: د اوسپڼۍ پټلۍله لارې تر ۶۷ زره ټنه ډېر انتقالات شوي

دغه انتقالات د اقینې، حیرتان او تور غونډۍ بندرونو له لارې شوي.

د طالبانو حکومت تر کنټرول لاندې د اوسپڼۍ پټلۍ اداره وايي، په تېره یوه اونۍ کې ۶۷ زره او ۶۷۷ ټنه انتقالات شوي.

دغې ادارې په یوې خبرپانې لیکلي، چې یاد انتقالات د اقینې، حیرتان او تور غونډۍ بندرونو له لارې شوي.

د خبرپاڼې په حواله، د دغو انتقالاتو ډېره برخه د حیرتان بندر له لارې ده چې ۴۳ زره ۸۲۵ مټریکه ټنه کېږي.

د اوسپنۍ پټلۍ ادارې د معلوماتو له مخې، په یادو انتقالاتو کې نفتي، غیرنفتي او نور مواد افغانستان ته وارد شوي دي.

د یادې ادارې په وینا، په دغه اونۍ کې له دې لارې له افغانستان نه ۹۸۴۰ مټریکه ټنه صادارت هم شوي چې لویه برخه یې ممیز دي.

دغه صادارات او واردات ازبکستان، تاجکستان او ترکمنستان ته شوي.

د ورځې تازه خبرونه دلته ولولئ

ملګري ملتونه: د ژمي له رارسېدو مخکې افغان زیانګالو سره مرسته کوو

کابل کې بېځایه شوي کورنۍ

د کډوالو لپاره د ملګروملتونو لویه کمېشنري وايي چې د ژمي له رارسېدو مخکې به په افغانستان کې له زیانګالو خلکو سره مرسته وکړي.

د کډوالو لپاره د ملګروملتونو لویه کمېشنرۍ په یوه بیان کې چې نن پر ټویټر خپور شو ویلي چې د جګړو له کبله له بېځایه شویو کورنیو او له بهره له راستنو شویو کډوالو سره به د هېواد په بېلابېلو سیمو کې مرسته وکړي، خو دې ادارې د مرستو د څرنګوالي په اړه څه نه دي ویلي، مګر په یوه بل ټویټ کې یې د کونړ ولایت په نورګل ولسوالۍ کې له زلزله ځپلو کورنیو سره د خېمو او نورو ضروري شیانو د مرستې خبر ورکړی.

د د کډوالو لپاره د ملګروملتونو لویه کمېشنرۍ د راپور له مخې اوسمهال د جګړو له کبله له درې میلیون زیات افغانان بېځایه شوي دي.

ټاکل شوې سبا د ملګرو ملتونو امنيت شورا د افغانستان پر وضعيت بحث وکړي

د ملګرو ملتونو امنيت شورا

کابل کې د ملګرو ملتونو مرستندوی ماموریت یا یوناما وايي، دغه بحث به سبا سې شنبه د کابل پر وخت د مازیګر شپږ نیمې بجې پیلېږي، چې په ژوندۍ بڼه به خپرېږي.

یوناما وايي، د دې غونډې په یوه برخه کې به د یوناما سرپرست مارکوس پوتزل هم د افغانستان په اړه معلومات ورکړي.

په ملګرو ملتونو کې د افغانستان سرپرست دایمي استازی نصیر احمد فایق وایي چې سږ کال به هم د دغه سازمان په عمومي اسمبلۍ کې د افغانستان په استازیتوب څوک خبرې ونه‌کړي.

د ده په وینا د تېر کال د موافقې له مخې د افغانستان تر څنګ میانمار هم تېر کال او سږ کال په دې اسمبلۍ کې له خبرو کولو بې برخې شول.

تېر کال پر افغانستان د طالبانو په واکمنېدو د افغانستان جمهوري نظام ړنګ او په میانمار کې بیا کودتاه شوې وه.

يو شمېر نړيوال سازمانونه په افغانستان کې د نري رنځ د کنټرول ملي پروګرام ارزوي

کندوز کې د نري رنځ يو روغتون

د روغتیا د نړیوال سازمان او د ملګرو ملتونو د پراختیایي ادارې او همدارنګه د نړیوال وجهي صندوق استازي په همدې هدف افغانستان ته سفر کړی دی.

د طالبانو د عامې روغتیا وزارت پرون په یوه خبرپاڼه کې ویلي، چې په دې تړاو لومړی غونډه د روغتیاپالې سهیلا صدیق په نوم جوړ شوي تالار کې دایره شوه.

دغه استازي د نړیوال مالي صندوق د دفتر په مالي مرسته افغانستان ته راغلي دي او تمه ده په مرکز سربېره او ولایتونو کې د نري رنځ ناروغۍ د کنټرول ملي پروګرام له نږدې و ارزوي.

د نري رنځ یا توبرکلوز د کلني راپور په اساس افغانستان کې هر کال تر ۱۳ زره کسان د نري رنځ ناروغۍ له امله مري.

افغانستان په سیمه کې د توبرکلوز د ډېرو پېښو لرونکی هېواد دی.

يونېسف بغلان کې ماشومانو ته د زده‌کړې ۷۲۰ محلي ټولګي جوړ کړي دي

د افغان ماشومانو محلي ټولګي - ارشيف

د ملګرو ملتونو د ماشومانو وجهي صندوق (یونېسف) د اکټیډ موسسې په مرسته د بغلان په پنځو ولسوالیو کې له زده‌کړو د محرومو ماشومانو لپاره ۷۲۰ محلي ښوونیز ټولګي جوړ کړي دي.

له دې جملې څخه ۶۲۰ ټولګي د یونېسف له‌خوا او ۱۰۰ نور ټولګي د اکټیډ مؤسسې له‌خوا جوړ شوي دي.

پژواک اژانس راپور ورکړی چې دغه دوه بنسټونه د ښوونکو د معاشونو د ورکړې ترڅنګ د يادو ټولګيو لپاره نور اړين وسايل هم برابروي.

دغه ټولګي د نهرين، بغلان-مرکزي، دهنه غوري، دوشي او بورکې ولسواليو په مرکزونو کې فعاله شوي.

پوتزل د افغان نجونو او ښځو څخه د ملګرو ملتونو د ملاتړ ډاډ ورکړی

مارکوس پوتزل

په کابل کې د ملګرو ملتونو د مرستندویه ماموریت مرستیال او سرپرست مارکوس پوتزل له یوه ډله افغان فعالو او سوداګرو ښځو سره لیدلي.

یوناما په خپله ټوېټر پاڼه د دې لیدنې جزیات ورکړي.

د بیان له مخې ښاغلي پوتزل د افغان نجونو او ښځو څخه د ملګرو ملتونو د دوامداره ملاتړ ډاډ ورکړی دی.

په ټولنه کې د افغان سوداګرو ښځو د رول او هم هغوی سره د لازمو مرستو د برابرولو په سر خبرې شوې دي.

پوتزل داسې مهال د افغان ښځو او نجونو سره د يوناما د ملاتړ ډاډ ورکوي چې د طالبانو له‌خوا پر افغان نجونو او مېرمنو بېلابېلو برخو کې سخت بنديزونه لګېدلي دي چې کورني او نړيوال غبرګونه يې هم پارولي دي.

بدخشان کې چاودنې یو کس وژلی او درې ټپیان دي

د افغانستان په عمومي نقشه کې د بدخشان موقعیت

د بدخشان په مرکز فیض اباد کې چاودنې یو کس وژلی او ۳ یې ټپيان کړي.

په بدخشان ولایت کې د طالبانو حکومت د اطلاعاتو او فرهنګ رئیس معزالدین احمدي وايي، دا چاودنه نن ۴ بجې او ۲۳ دقیقې د فیض اباد د ښاروالۍ څنګ ته وشوه.

احمدي زیاتوي چې یو وژل شوی او درې ټپیان ملکي کسان دي او طالبانو ته په دې چاودنه کې تلفات نه دي اوښتي.

په فیض اباد کې دا چاودنه داسې مهال کېږي چې له څو ورځو راهیسې د بدخشان په څو ولسوالیو کې د طالبانو او مقاومت ملي جبهې ترمنځ وسله والې نښتې هم شوې دي.

ملګري ملتونه: ګڼو افغان کورنیو خپلې وړې لوڼې واده کولو ته مجبوره کړي

ارشیف: د افغانستان کارګرې نجونې

ملګري ملتونه وايي، په افغانستان کې د بېوزلۍ او نهیلۍ له کبله ګڼو کورنیو خپلې لوڼې په وړوکوالي کې واده کولو ته مجبوره کړي او اوس د دغو نجونو د څارنې او خوندیتوب مسوولیت ور تر غاړې دی.

ملګرو ملتونو نن په یوه اعلامیه کې ویلي، له کله چې طالبانو پر افغانستان ولکه ټینګه کړې د نجونو پرمخ د منځنیو ښوونځیو او لېسو دروازې تړلي دي.

تر یوه کال زیاته موده کېږي چې طالبانو په ملي او نړیواله سطحه د غوښتنو برخلاف نجونو ته تر شپږم ټولګي پورته د نور تعلیم اجازه نه ده ورکړې.

طالبانو په ټول افغانستان کې د ژورو څاه ګانو مالکانو ته نوې سپارښتنه کړې

هلمند کې ژوره څاه چې وړمه ورځ ترې یوه ښځه ژوندې راایستل شوې.

د طالبانو د کورنیو چارو وزارت سرپرست سراج‌الدین حقاني چې لا هم د امریکا او د ملګرو ملتونو په تور نوملړ کې دی له والیانو، امنیه قوماندانانو او ولسوالانو غوښتي چې د ژورو څاه‌ګانو مالکانو ته، د څاه‌ګانو د سرونو د پوښلو سپارښتنه وکړي.

د طالبانو د کورنیو چارو وزارت ویاند عبدالنافع ټکور رسنیو ته یو استول شوي پیغام کې ویلي: "ټولو اړونده چارواکو ته هدایت ورکول کېږي چې په خپلو اړوندو ولایتونو کې د څاه‌ګانو مالکینو ته خبر ورکړي، څو د خپلو څاګانو سرونه پټ کړي. د نه پټولو په صورت کې به اړوند کسان عدلیي او قضايي ادارو ته سپارل کېږي."

د طالبانو د کورنیو چارو وزارت وايي، هغه کسان چې د خپلو ژورو څاه‌ګانو د سرونو د پوښلو توان نه‌لري، وضعیت یې څېړل کېږي او بیا یې په اړه پرېکړه کېږي.

دا په داسې حال کې ده چې وروستیو کې د افغانستان په یو شمېر ولایتونو کې ژورو څاه‌ګانو ته یو شمېر ماشومان او مېرمنې لوېدلي چې ډېر شمېر یې مړې شوې دي.

ملګرو ملتونو له افغانستان سره د امریکا د تازه بشري مرستې هرکلی وکړ

رامز الاکبروف

د افغانستان لپاره د ملګرو ملتونو د سیاسي ماموریت یا یوناما مرستیال د امریکا د متحدو ایالتونو د تازه بشري مرستې هرکلی وکړ.

رامز الاکبروف پرون په ټویټر کې لیکلي، د ملګرو ملتونو د افغانستان څانګه او اوچا د امریکا د بهرنیو چارو وزارت د سخاوتمندانه مرستې منندوی دي.

د ده په وینا دغه مرستې به په افغانستان کې د خلکو د اساسي اړتیاوو پوره کولو او د ژوند ژغورنې پر چارو ولګول شي.

د امریکا د بهرنیو چارو وزارت ویلي دوی په افغانستان کې د خلکو د بشري اړتیاوو پوره کولو لپاره د نږدې ۳۲۷ ملیون ډالرو په ارزښت اضافي بشري مرسته برابروي.

په افغانستان کې د ګوزڼ په وړاندې د مبارزې پر هڅو خوښي څرګنده شوې

ارشیف

د ملګرو ملتونو د روغتیا نړیوال سازمان یوه چارواکي په وروستیو دوو کلونو کې په افغانستان او پاکستان کې د ګوزڼ یا پولیو په وړاندې د مبارزې پر هڅو خوښي وښوده.

په دغه سازمان کې ماشومانو د ګوزڼ یا فلج د اپیډمي لوژي مخکښ کارپوه، ډاکټر زبیر ودود پرون په هغه ویډیويي پیغام کې چې د روغتیا نړیوال سازمان خپور کړی ویلي: "کله چې د افغانستان او پاکستان خبره راځي، دا ډېره هڅوونکې ده چې لیدل کېږي په تېرو دوو کلونو کې ډېر پرمختګونه شوي. په افغانستان کې تر درېیو ملیونو ډېر ماشومان چې مخکې یې امکانات نه درلودل په دوامدار ډول دا واکسین ولګوي، اوس د ګوزڼ ضد واکسین ترلاسه کوي. تېر کال هم د واکسین کمپاین په منظم ډول عملي شوی دی."

په نړۍ کې افغانستان او پاکستان هغه دوه هېوادونه دي، چې لا هم د ماشومانو ګوزڼ یا پولیو په کې ختمه شوې نه ده.

افغانستان سره د امریکا د مرستې کچه له یو میلیارد ډالرو واوښته

د امریکا کانګرس

د افغانستان لپاره د امریکا د متحدو ایالتونو نوې شارژدافیره وايي، د ۲۰۲۱م کال له اګست میاشتې راهیسې له افغانستان سره د واشنګټن مرستې څه باندې یو اعشاریه یو میلیارد ډالرو ته ورسېده.

کرن ډیکر پرون په ټویټر کې لیکلي، د امریکا متحد ایالتونه «له افغانستان سره د بشرپاله مرستو یوازېنی ستر تمویلوونکی هېواد دی.»

د امریکا نوې شارژدافیره وايي، په اوسنیو ستونزمنو شرایطو کې د افغانستان له خلکو سره د قطر دوامداره مرستې ورته د ستایلو وړ دي او د کرن ډیکر په وینا دا په خپله په سیمه کې د سولې او تیکاو لپاره د قطر د ژمنتیا يوه پیاوړې نښه ګڼل کېږي.

له کله چې طالبانو پر افغانستان ولکه ټینګه کړې، د افغانستان لپاره د امریکا سفیر له قطر څخه فعالیت کوي.

قانوني د ژغورنې لپاره د مقاومت شورا له غړیتوبه د استعفا خبر جعلي وباله

محمدیونس قانوني

محمدیونس قانوني د افغانستان د ژغورنې لپاره د ملي مقاومت د شورا له غړیتوب څخه د ده د استعفا خبر جعلي وباله.

قانوني په یوه ویډیو کې چې نن پر ټولنیزو رسنیو خپره شوه وویل چې دا خبر ردوي.

د قانوني د استعفا خبر نن ده ته په یوه منسوب لیک کې ورکړل شو.

یاده شوې شورا په غبرګولي میاشت کې د ترکیې په پلازمېنه انقره کې د ځینو افغان سیاستوالو او پخوانیو چارواکو په ګډون جوړه شوې وه.

قانوني مخکې د ولسمشر د لومړي مرستیال او د ولسي جرګې د رییس پر دندو کار کړی.

قانوني د افغانستان ژغورنې لپاره د مقاومت جبهې شورا څخه استعفا وکړه

محمد یونس قانوني

محمد یونس قانوني د افغانستان ژغورنې د مقاومت له ملي جبهې څخه استعفا وکړه.

د قانوني لخوا په خپره شوې اعلامیه کې راغلي دي چې د هغو اختلافونو له امله چې مخکې يې د دې جبهې له رهبري سره شریک کړي وو، له دې جبهې خپله لار بېلوي.

هغه ویلي چې د جبهې له غړو سره یې د ملي وحدت، سولې او امنیت، سیمه ییزو او نړیوالو اړیکو په برخه کې شته اختلافونه حل نه شول، ځکه استعفا ته اړ شو.

محمد یونس قانوني په تېر جمهوري حکومت کې د ولسمشر د لومړي مرستیال او د ولسي جرګې د رئیس په توګه دندې کړې وې او په وروستیو کې د افغانستان د ژغورنې د مقاومت له جبهې سره يو ځای شوی و چې تر ډېره د مخکيني دولت چارواکي او د طالبانو مخالف سیاستوال په کې راټول دي.

رینا امیري د اسلامي همکاریو د سازمان له استازي سره خبرې کړي

د افغانستان د ښځو، نجونو او بشري حقونو لپاره د امریکا ځانګړې استازې رینا امیري

د افغانستان د ښځو، نجونو او بشري حقونو لپاره د امریکا ځانګړې استازې رینا امیري وايي چې د افغانستان لپاره د اسلامي همکاریو د سازمان له استازي طارق علي بخیت سره یې د افغان ښځو او ځوانانو د ملاتړ په اړه خبرې کړي.

مېرمن امیري پرون پر ټویټر په یوه بیان کې ولیکل چې د ملګرو ملتونو د عمومي اسمبلې د ۷۷ غونډې په څنډه کې یې له ښاغلي بخیت سره په داس حال کې چې د افغانستان لپاره د امریکا ځانګړی استازی ټوماس ویسټ هم حاضر و، وکتل.

مېرمن امیري ویلي دوی په دې کتنه کې موافقه وکړه چې د افغان نجونو د تعلیم لپاره د حق لپاره باید په افغانستان کې د ښځو د حقونو د یوې برخې په توګه مبارزه وشي.

د نجونو تعلیم هغه مسئله ده چې مېرمن امیري او نورو امریکايي چارواکو یې په وار وار ملاتړ کړی او د طالبانو پر حکومت یې فشار راوستی چې له شپږم د پورته ټولګیو د زده کوونکو نجونو پرمخ د ښوونځیو دروازې بیا پرانېزي.

د پاکستان صدراعظم: طالبان دې د دوحې تړون عملي کړي

د پاکستان صدراعظم شهباز شریف

د پاکستان صدراعظم شهباز شریف پر طالبانو غږ کړی چې د نجونو ته د زده کړو او ښځو ته د کاري فرصتونو د برابرولو او بشري حقونو ته د درناوي په ګډون ټولو افغان وګړو ته انډول فرصتونه برابر کړي.

شریف له اسوشیتیدپریس خبري آژانس سره په یوه مرکه کې چې پرون خپره شوه همداراز له طالبانو وغوښتل چې د دوحې پر تړون عمل وکړي.

د دې تړون له مخې امریکا خپل پوځي ځواکونه له افغانستانه واېستل او طالبانو په بدل کې د نورو ژمنو ترڅنګ ومنله چې بشري حقونو ته به درناوی کوي او په افغانستان کې به تروریستانو ته اجازه نه ورکوي.

شریف وویل طالبانو چې د دوحې تړون لاسلیک کړی نو باید درناوی هم ورته وکړي.

طالبانو د شریف د دې څرګندونو په اړه تراوسه څه نه دي ویلي.

نور راوښيه

XS
SM
MD
LG