د لاسرسۍ وړ لېنکونه

تازه خبر
پنجشنبه ۲۰ زمری ۱۴۰۱ کابل ۰۲:۱۴

افغانستان

ملي راډيو ټلوېزيون په نوې فېس بوک پاڼه نشرات پيل کړي

د ملي راډيو ټلوېزيون نښان، چې اوس يې طالبانو له لوګو تور، سور او زرغون رنګ پاک کړی دی.

د طالبانو تر ولکې لاندې ملي راډیو ټلوېزیون له نږدې یوې میاشت وروسته په خپله نوې جوړه شوې فېس بوک پاڼه نشرات پیل کړي دي.

د دغې رسنۍ رئیس احمد الله وثیق ازادي راډیو ته وویل، دا چې د دوی نشرات تر خلکو پورې ورسېږي، دوی د اړتیا پر بنسټ دا کار کړی دی.

نوموړی وايي، دوی د فېس بوک ادارې سره په اړیکه کې دي، څو راجستر شوې پاڼې یې ورته ازادې کړي.

ښاغلي وثیق د چنګاښ په ۲۹ نېټه په خپله ټوېټر پاڼه ولیکل، چې په دې ادارې پورې اړوند پښتو او درې فېسبوک پاڼې د فېسبوک ادارې له لوري تړل شوي دي.

نوموړي دا هم لیکلي وو، چې د دوی اداره دمګړی د نویو فېسبوک پاڼو د فعالولو اراده نه لري او د ملي ټلوېزیون په نوم جوړې شوې ټولې پاڼې جعلي دي.

د فېسبوک ادارې په دې اړه په رسمي ډول هیڅ هم خپاره نه کړل.

خو د یادونې ده، مخکې له دې چې طالبان پر افغانستان واکمن شي، فېسبوک طالبان د یوې ترهګرې ډلې په توګه پېژندل او په دوی پورې اړوند مسایل او ویډيو ګانې به یې سانسورولې.

د ورځې تازه خبرونه دلته ولولئ

اشرف غني: زما له وتلو مخکې د جمهوري نظام ستنې د ړنګېدو په حال کې وې

پخوانی ولسمشر

د افغانستان پخوانی ولسمشر اشرف غني وایي، مخکې له دې چې له کابله ووځي او طالبان کابل ته ننوځي، د جمهوري نظام ستنې د ده په وینا د یو شمېر لورو له خوا چې پردې نظام یې معامله کړې وه، د نړېدو په حال کې وې.

ښاغلي غني دغه څرګندونې له اې بي ان افغان خپروندې شبکې سره په یوه نوې مرکه کې کړي دي.

ښاغلي غني د افغانستان د سولې لپاره د امریکا د پخواني ځانګړي استازي زلمي خلیلزاد په ګډون د یو شمېر وتلو افغان څېرو نومونه اخیستي او هغوی یې تورن کړي چې د جمهوري نظام د کمزوري کولو لپاره یې کار کاوه.

اشرف غني په دې مرکه کې د وسله والو طالبانو په وړاندې جګړه کې د افغانستان د وسله والو ځواکونو د روحیې کمزورتیا د جمهوري نظام د ړنګېدو یو بل اساسي عامل بللی دی.

هغه په دې مرکه کې دا هم ویلي چې دی د افغانستان د اساسي قانون له مخې تر اوسه قانوني ولسمشر دی او واک به هغه چاته رسماً وسپاري چې ولس یې غوره کوي.

د افغانستان پخوانی ولسمشر دغه څرګندونې داسې مهال کوي چې د جمهوري نظام د ړنګېدو او واک ته بیا د طالبانو د رسېدو کال په پوره کېدو دی.

د تېر کال د اګست په پنځلسمه طالبانو کابل ونیوه او جمهوري نظام سقوط وکړ.

۳۰۰ افغانان له پاکستان اسپانيا ته ولېږدول شول

ارشيف

د هغو افغانانو الوتکه چې افغانستان کې یې له اسپانوي ځواکونو سره کار کړی و، پرون له اسلام اباده د مادرېد خواته روانه شوه.

فرانس پریس اژانس ویلي، دغې الوتکه کې درې سوه کسان سپاره و چې د اسپانیا د ماموریت کارکوونکي او د کورنۍ غړي یې په‌کې شامل دي.

دا خبر د اسپانیا بهرنیو چارو وزارت په یوه خبرپاڼه کې ورکړی دی.

دغو افغانانو په افغانستان کې د ناټو په چوکاټ کې د اسپانیا له ځواکونو او یا سفارت سره کار کړی چې اوس یې د فرانس پریس په وینا ژوند له خطر سره مخامخ و.

د يادونې ده چې په بېلابېلو هېوادونو کې زرګونه هغه افغانان لا هم بهر ته د تللو انتظار کوي چې له بهرنيانو سره کار کړی دی.

د افغانستان او ايرلنډ کرېکټ لوبډلې نن دويمه شل اوريزه لوبه کوي

افغان کرېکټ ملي لوبډله

ټاکل شوې د افغانستان او ایرلنډ د کرېکټ ټیمونه نن خپله دویمه شل اوریزه لوبه ترسره کړي.

د کرېکټ د انلاین معلوماتو د ویبپاڼې له مخې دا لوبه د کابل په وخت ۷ بجې د بلفاست په سټورمونت (Stormont) سټدیوم کې ترسره کېږي.

د دغې لوبلړۍ لومړنۍ لوبه وړمه ورځ په لږ توپیر ایرلند وګټله.

په دغې سیالۍ کې ټولټال ۵ شل اوریزې لوبې پلان شوي دي چې پر خپل وخت به ترسره شي.

د افغان کرېکټ بورډ مسؤلينو وړاندې ويلي وو، افغان لوبډله ايرلنډ سره لوبو ته پوره چمتووالی لري.

د طالبانو اقتصادي کمېسيون د بې کيفيته تېلو د واردولو د مخنيوي غوښتنه کړې

د تېلو ذخيرې

د طالبانو د حکومت اقتصادي کمېسیون افغانستان ته د بې کیفیته تېلو د وارداتو د مخنیوي غوښتنه کړې ده.

دغه کمېسیون په خپله پرونۍ غونډه کې چې د ملا عبدالغني برادر په مشرۍ جوړه شوې وه، نه دي ویلي چې د بې کیفیته تېلو شتون څومره لویه ستونزه ده.

تر دې وړاندې عامو افغانانو د تېلو د ټیټ کیفیت او بې سارې لوړې بیې په اړه ازادي راډیو ته شکایتونه کړي دي.

د طالبانو د حکومت د اقتصادي کمېسیون په دې غونډه کې له افغانستانه بهر ته د زړو اوسپنو د لېږد پر بندیز او ټاپي پروژې هم بحثونه شوي دي.

د طالبانو مشر تازه یو ۱۳ماده یي فرمان صادر کړ

د طالبانو مشر ملاهبت الله اخوندزاده

د طالبانو مشر ملاهبت الله اخوندزاده په افغانستان کې د تېرو شلو کلونو په جګړو کې د خپلو نادرکه شویو غړیو او نورو کسانو په اړه یو دیارلس ماده یې فرمان صادر کړی.

د دغه فرمان له مخې چې متن یې د طالبانو د حکومت ویاند ذبیح الله مجاهد په خپله ټوېټرپاڼه خپور کړی تر ډېره د د ورثه و ترمنځ د دغو نادرکه شویو کسانو تر شاه د پاتې شویو جایدادونو د ترکه کېدو پر څرنګوالي او د هغو د کونډو پر مدني وضعیت څرخي.

د فرمان له مخې حنیفي فقه حکم کوي، هغه کسان چې په جنګونو یا هغو ځایونو کې ورک شوي چې د مرګ احتمال یې ډېر زیات دی او ډېر وخت هم په تېر شوی وي نو هغه مړ حسابېږي.

د دغه فرمان په یوه برخه کې دغه راز ویل شوي چې د محمې ترحکم وروسته به د شهیدانو جایدادونه او ملکیتونو د شریعت د احکامو له مخې د دوی پر ورثو ویشل کېږي.

د طالبانو مشر د تېرو جګړو په ترڅ کې د ورکو شویو کسانو په اړه دغه فرمان داسې مهال صادروي چې تراوسه په دې هېواد کې د ورکو شویو کسانو دقیقه شمېره نه ده معلومه خو ویل کېږي په زرګونو کسان د تېرو جګړو په ترڅ کې تري تم شوی دي.

افغانستان ته ستنېدونکو کډوالو ته د کار زمینه برابرېږي

ارشیف

د مهاجرت نړیوال سازمان وایي، په افغانستان کې د محلي کوچنیو کاروبارونو د ملاتړ له لارې هغو افغانانو ته د کار زمینه برابروي چې بېرته دې هېواد ته ستنېږي.

دغه سازمان په خپله ټوېټرپاڼه کې د رضا په نوم د یوه افغان ځوان له تصویر سره یوځای کښلي چې نوموړي هېواد ته له بېرته ستنېدو وروسته خپل ژوند ته د سمون ورکولو په برخه کې ستونزه درلوده خو د نوي کسب په زده کولو سره یې د ځان لپاره کار پیدا کړ.

رضا ویلي چې په ۲۰۱۶ کال ایران ته تللی و او له دوو کالو کډوالۍ وروسته چې له ډېرو ستونزو سره مخ و، بېرته افغانستان ته راستون شوی دی.

د مهاجرت نړیوال سازمان او د ملګرو ملتونو د کډوالو عالي کمېشنرۍ په داسې حال کې افغانستان ته له بېرته ستنېدونکو سره په ټولنه کې د بېرته جذبېدو په برخه کې ځینې مرستې کوي چې له دې هېواده د افغانانو د وتلو لړۍ روانه ده او هره ورځ په زرګونو کسان ګاونډیو هېوادونو په تېره ایران او پاکستان ته د وتلو تکل کوي.

د افغانستان زلزله ځپلو سیمو ماشومانو لپاره د زده کړو امکانات برابر شوي

د زلزلې له امله پکتیکا کې د یوه نړېدلي کور انځور

د ملګرو ملتونو د ماشومانو ملاتړې اداره یونېسف وايي چې د افغانستان په هغو سیمو کې یې سلګونو ماشومانو ته د زده کړې امکانات برابر کړي چې وروستۍ زلزلې اغېزمن کړي دي.

یونېسف پرون په یوه ټوېټ کې ویلي چې په ځپل سیمو کې یې نوي ۱۴۰ ټولنیز درسي صنفونه جوړ کړي چې په کې ډېرو نجونو ته لومړنۍ زده کړې ورکول کېږي.

یونېسف دغه راز په زلزله ځپلو سیمو کې د کولرا یا نس ناستې ناروغۍ د زیاتېدو په وړاندې هم خبرداری ورکړی دی.

په پکتیکا او خوست کې د جون د ۲۲ مرګونې زلزلې په نتیجه کې چارواکو د له زرو زیاتو کسانو د مړه کېدو او زرګونو نورو د ټپي کېدو خبر ورکړی و.

مسوولین: د قوش تېپې کانال د جوړولو چارې له ټاکلي نېټې مخکې پشپړېږي

د قوش تېپې کانال د جوړولو چارې

په شمال کې د قوش تېپې کانال جوړولو د چارو مسوولین وایي، د دغې سترې پروژې کارونه په چټکۍ مخته ځي او هغه به تر ټاکلې نېټې مخکې بشپړ شي.

د قوش تېپې د اوبو لګولو دغه ستره پروژه چې د سروې چاروې یې په ۲۰۱۸ کال کې پیل شوې وې، د امو له سیند څخه په کال کې ۱۰ میلیارده متر مکعبه اوبه رااخلي، د ۲۸۰ کیلومتره په اوږدوالي، د ۱۰۰ متره په پلنوالي او ٨،٥ مترو په ژوروالي سره په بلخ، جوزجان او فاریاب ولایتونو کې د شاوخوا ۵۰۰ زره هکټاره ځمکې د خړوبولو وړتيا لري.

د دغې پروژې ولایتي مسوول انجنیر فرید عظیم پژواک خبري اژانس ته ویلي چې د قوش تېپې د اوبو لګولو د پروژې لګښت ۶۰ میلیارده افغانۍ اټکل شوی او هغه به د افغانستان د حکومت له ملي بودجې تمویلېږي.

د نوموړي په خبره دغه پروژه د افغانستان لپاره حیاتي ده په بشپړېدو سره به یې افغانستان د غلې له اړخه پر ځان بسیا شي.

افغان کرکټ لوبډلې لومړۍ شل اوره لوبه وبایلله

افغانستان په تېرو پنځو نړیوالو لوبو کې څلور له ایرلنډه ګټلي او یوه یې ورسره مساوي کړې ده.

افغانستان د کرکټ د شل اوره سیالیو په ترڅ کې پرون لومړۍ لوبه ایرلنډ ته د اوو ویکټو په توپیر وبایلله.

افغان لوبډلې لومړی لوبه وکړه او په ټولو شلو اوورونو کې یې ۱۶۸ منډې وکړې او ایرلنډ لوبډلې ته یې د ۱۶۹ منډو هدف وټاکه.

ایرلنډ لوبډلې د درېیو لوبغاړو له سوځېدو وروسته په داسې حال کې چې یوتوپ یې لاپاتې و، ۱۷۱ منډې وکړې.

د دواړو ټیمونو ترمنځ بله لوبه به د پنجشنبې په ورځ ترسره شي.

افغانستان په تېرو پنځو نړیوالو لوبو کې څلور له ایرلنډه ګټلي او یوه یې ورسره مساوي کړې ده.

ترکیه کې سیالۍ؛ افغان لوبغاړي په ځغاسته کې نیمه پای لوبې ته لار ومونده

شاه محمود نورزی

د افغانستان د ځغاستې ملي لوبډلې غړي د اسلامي هېوادونو د یووالي سیالیو نیمه پای لوبې ته لار پیدا کړه.

د اسلامي هېوادونو د یووالي ورزشي سیالۍ په لړ کې د افغانستان د ځغاستې ملي لوبډلې غړي شاه محمود نورزي وکړای شول د ۱۰۰ مترو واټن په لسو ثانیو او د یوې ثانیې په ۴۹ برخه کې ووهي او په دې توګه یې د دې سیالیو نیمه پای لوبې ته لار ومونده.

د افغانستان د بدنې روزنې ریاست د معلوماتو پر بنسټ، نورزي تر دې وړاندې دا واټن په ۱۰ ثانیو او د یوې ثانیې ۷۲ برخه کې وهلی و.

د اسلامي هېوادونو د یووالي سیالۍ د ترکیې په قونیې ښار کې روانی دي.

د دې لوبو د ځغاستې سیالیو نیمه پای لوبه نن شپه کېږي.

غور کې د فوټبال غوره لیګ سیالۍ پیل شوې

غور کې د فوټبال لیګ سیالیو څخه یو انځور

د غور ولایت په کچه د فوټبال غوره‌لیګ سیالۍ پیل شوې.

د افغانستان فوټبال ملي فدراسیون له لوري په خپره شوې خبرپاڼه کې لیکل شوي، د غور ولایت د فوټبال غوره‌لیګ سیالی د دې ولایت په مرکز فېروز کوه کې د لسو لوبډلو په ګډون پیل شوې.

په دې لیګ کې د ښاروالۍ ، اتفاق ارش، میوند، سیاه کوه، سفید کوه، امید فېروزکوه، پیروزي، شاهین، د خراسان د کمپنیو ګروپ او کوهستان لوبډلې سره سیالي کوي.

دا سیالۍ چې د مرکزي ولایتونو د غوره لیګ سیالیو لپاره د غوره لوبډلې د انتخاب لپاره پیل شوي، ۴۵ ورځې به دوام وکړي.

د افغانستان صنعت کاران د خپلو ستونزو د نه هواري له امله سر ټکوي

ارشیف

د افغانستان د صنعت کارانو ټولنه وایي، تر اوسه یې هم کارخونو ته کافي برښنا نه‌ده برابره شوې او د ځمکې او مالیې د ورکړې په برخه کې هم له ستونزو سره مخ دي.

د افغانستان د صنعت کارانو ټولنې رییس عبدالجبار صافي نن ازادۍ راډیو ته وویل، د دې ستونزو د حل لپاره د طالبانو حکومت له مسوولانو سره خبري دوام لري.

صافی وایي، د برښنا نشتوالی د کارخونو لپاره یوه جدي ستونزه ده، له همدې امله دوی له برښنا شرکت غوښتي چې د وارداتي برښنا تر څنګ دې له داخلي سرچینو هم یادو کارخونو ته برښنا ورکړي.

په ورته مهال د کابل برښنا ریاست نن یوه خبرپاڼه کې لیکلي، د یوه نوي پلان له مخي غواړي د برښنا مصرف کوونکو، په ځانګړي توګه صنعتي پارکونو ته د اړتیا وړ برښنا برابره کړي.

په کابل کې چین سفارت افغان سوداګرو ته د ویزې ورکولو بهیر پیل کړی

د چین بیرغ

د سوداګرۍ او پانګونې خونه وایي، افغان سوداګرو ته د چین د ویزو ورکړه پیل شوې او په نورمال ډول روانه ده.

د دې خونې سرپرست یونس مهمند نن ازادۍ راډیو ته وویل، افغان سوداګرو ته د لا ډېرو ویزو ترلاسه کولو لپاره د هغوی اسناد راټول شوي او د پروسس په حال کې دي.

خو مهمند دا ونه ویل چې تر اوسه څو تنو افغان سوداګرو ته د چین ویزې ورکړل شوي دي.

څو ورځې مخکی د چین د بهرنیو چارو وزارت یوه اعلامیه کې وویل، افغان سوداګرو ته د چین ویزو د وېش لړۍ به د روان میلادي کال د اګست میاشتې په لومړیو کې پیل شي.

وړاندې له دې افغان سوداګرو څو ځلې د چین د ویزو د اخستو په برخه کې له خنډونو او ستونزو شکایت کړی و.

د سوداګرۍ او پانګونې خونې د معلوماتو پر بنسټ، جلغوزي، وچه مېوه، قیمتي ډبرې او زعفران هغه توکي دي چې افغان سوداګر یې چین ته صادروي او هلته ښه بازار لري.

امریکا پر افغان شیعه ګانو وروستي بریدونه وغندل

ارشیف

د افغانستان لپاره د امریکا سفارت د عاشورا په ورځو کې هغه خونړي بریدونه چې د کابل په شیعه مېشتو سیمو کې شوي او مسوولیت یې د اسلامي دولت ډلې د خراسان څانګې اخیستی په کلکه غندلي دي.

سفارت په خپله ټوېټرپاڼه کې د دغو بریدونو د قربانیانو له کورنیو سره د خواخوږۍ څرګندولو ترڅنګ پر عبادت کوونکو برید د غندنې وړ عمل بللی او ویلی یې دي چې افغانان باید وکولای شي چې په سوله کې عبادت وکړي.

د کابل په لویدیځ کې چې اکثریت وګړي یې شیعه ګان دي د جمعې او شنبې د ورځې په بریدونو کې په لسګونو کسانو ته مرګ ژوبله واوښته.

په کابل کې مېشت شیعه وګړي وايي، د نورو کلونو په پرتله سږ کال د عاشورا مراسم متفاوت و او دا مراسم یوازې تر تکیه خانو پورې محدود شوي وو.

د کابل د دشت برچي یو اوسېدونکی چې نه غواړي نوم یې واخیستل شي وايي، طالبان د عاشورا له مراسمو سره اشنا نه و او د دوی لپاره یې د دې ورځې نمانځل سخت کړي وو.

طالبان: پکتیکا کې د درېیو پاکستاني طالبانو د وژنې په اړه څېړنه کوو

ارشیف: د تحریک طالبان پاکستان جنګیالي

پاکستاني طالبانو او د پاکستان یوه استخباراتي چارواکي پرون دوشنبې تایید کړه چې د تحریک طالبان پاکستان یا ټي ټي ټي جګپوړی مشر عبدالولي چې په عمر خالد خراساني مشهور و له خپلو درېیو همکارانو سره په افغانستان کې په یوه چاودنه کې ووژل شو.

د طالبانو د حکومت ویاند ویلي چې په دې اړه څېړنه کوي.

خراساني هغه قوماندان و چې متحدو ایالتونو یې پر سر درې میلیون ډالره انعام ټاکلی و.

نوموړی یوه اونۍ وروسته له هغې په افغانستان کې وژل کېږي چې امریکا په کابل کې د بې بیلوټه الوتکې په برید کې د القاعده د مشر ایمن الظواهري د وژلو خبر ورکړ.

د راپورونو له مخې خراساني او ملګري یې د یکشنبې په ورځ د افغانستان د پکتیا ولایت په برمل ولسوالۍ کې ظاهراً هغه مهال په یوه ماین چاودنه کې ووژل شول چې په یوه موټر کې یې سفر کاوه.

خو دغو سرچینو د خپل هویټ پټ ساتلو په شرط رویټرز ته ویلي، په اوس وخت کې نه شي ویلی چې د دغې حملې تر شا د چا لاس دی.

د طالبانو یوه بل قوماندان احسان الله احسان په یوه ټوېټ کې د خراساني مړینه تایید کړې او ویلي یې دي چې نور هغه د دوی په منځ کې نه شته.

د خراساني ډلې په پاکستان کې پر پولیسو، پوځیانو او اقلیت شیعه مسلمانانو او مسیحیانو د څو حملو مسوولیت اخیستی چې په نتیجه کې یې په سلګونو کسان وژل شوي دي.

نور راوښيه

XS
SM
MD
LG