د لاسرسۍ وړ لېنکونه

تازه خبر
یکشنبه ۱۰ تله ۱۴۰۱ کابل ۰۶:۰۷

افغانستان

د طبيعي پېښو له امله زيانمنو شويو ته طالبان له نړيوالو مرستې غواړي

د افغانستان ننګرهار ولايت کې راوتلي سېلابونه

د طالبانو د حکومت پېښو ته د رسېدو وزارت وايي سېلابونو په وروستیو کې ګڼ تاوانونه اړولي او دوی د نړیوالې ټولنې ملاتړ او مرستو ته سترګې په لار دي.

د دې وزارت مرستیال شرف الدین مسلم ازادي راډیو ته وویل چې دمګړۍ پېښو ته د رسېدو وزارت کارکوونکي په سېلاب ځپلو سیمو کې د بیا وارې سېلابونو د زیانونو د مخنیوي په لارو چارو بوخت دي.

د دغه وزارت د معلوماتو په اساس تېره یوه میاشت کې د سېلابونو له امله ۱۲۰ کسان مړه او ۱۵۸ نور ټپيان شوي دي.

خو له سيمې د راپورونو پر اساس داسې اندېښنې هم شته چې د مرګ‌ژوبلې کچه تر دې ډېره لوړه وي.

د ورځې تازه خبرونه دلته ولولئ

په پرتګال کې د افغانستان د موسیقۍ ملي انسټېټیوټ کنسرټ ورکړی

د موسیقۍ ملي انسټېټیوټ زده کوونکي او شاګران د طالبانو له ډاره د ۲۰۲۱م کال په اکټوبر میاشت کې قطر او په ډسمبر میاشت کې پرتګال ته ورسېدل او هلته دېره شول.

پر افغانستان د طالبانو د ولکې له بیا ټینګولو وروسته د لومړي وار لپاره د افغانستان د موسیقۍ ملي انسټېټیوټ پرون په پرتګال کې کنسرټ ورکړ.

د دغه بنسټ مشر احمد ناصر سرمست نن په خپل فېسبوک کې لیکلي، چې د پرتګال د کنسرټونو تر ټولو ستر تالار کې دغه کنسرټ په بریا ترسره شو او تود هرکلی یې وشو.

د سرمست په خبره په دې کنسرټ اتو هنري ډلو او ارکسټر خپل هنر نندارې ته وړاندې کړ.

طالبانو په افغانستان کې پر موسیقۍ محدودیت لګولی دی.

د موسیقۍ ملي انسټېټیوټ زده کوونکي او شاګران د طالبانو له ډاره د ۲۰۲۱م کال په اکټوبر میاشت کې قطر او په ډسمبر میاشت کې پرتګال ته ورسېدل او هلته دېره شول.

ملګري ملتونه: بېوزلۍ سره د ۹۷ سلنه افغانانو د مخامخ کېدو اټکل مو کړی و

ارشیف: کابل کې وچې ډوډۍ ته منتظرې مېرمنې او ماشومان

د ملګرو ملتونو پراختیايي اداره وايي، دوی اټکل کړی و چې د ۲۰۲۲م کال تر نیمايي پورې به ۹۷ سلنه افغانان له بېوزلۍ سره مخامخ شي.

د دې ادارې د ننني ټویټ له مخې دوی هڅه کوي د کډوالو په چارو کې د ملګرو ملتونو له لویې کمېشنرۍ سره یوځای د هغو کسانو ملاتړ وکړي چې د ښه او پایدار معیشت په نیت خپلو مېنو ته ستنېږي.

بېلابېلو سازمانونو ویلي چې په افغانستان کې تر نیمايي زیات وګړي عاجلو بشري مرستو ته اړتیا لري.

طالبان: له دې وروسته هېڅ ډاکتر د شفري نسخو د لیکلو اجازه نه‌لري

ارشیف: ننګرهار کې د ډاکترانو او درملتونونو یوه پلازه

د طالبانو د عامې روغتیا وزارت پرېکړه کړې له دې وروسته هېڅ ډاکتر له درملتونونو سره د اړیکو پر بنسټ، د شفري نسخو د لیکلو اجازه نه‌لري.

د دې وزارت د ویاند شرافت زما له‌خوا رسنیو ته استول خبرپاڼه کې د ډاکترانو له‌خوا درملتونونو ته د شفري نسخو لیکل، غیرقانوني بلل شوي.

دې خبرپاڼه کې زیاته شوې، ډېر ژر به اړونده ادارو ته په رسمي او مکتوبي شکل دا خبر ورکړل شي.

د طالبانو د روغتیا وزارت دا پرېکړه داسې مهال کېږي چې افغانان شکایت کوي، ډاکتران له درملتونو سره د خپلو اړیکو له مخې، شفري نسخې لیکي چې دا درمل بیا په نورو درملتونونو کې نه پیدا کېږي.

ملګري ملتونه: طالبان په خپلو کې یو واحد دریځ نه لري

د افغانستان لپاره د ملګروملتونو د بشري حقونو ځانګړی راپور ورکوونکی ریچارد بینیت

د افغانستان لپاره د ملګروملتونو د بشري حقونو ځانګړي راپور ورکوونکي ریچارد بینیت یوځل بیا د افغان ښځو او نجونو د بشري حقونو د وضعیت په اړه اندېښنه وښوده.

ښاغلي بینیت پرون د ډنمارک په پلازمېنه کوپنهاګن کې د افغانانو د سیاسي، ټولنیزو او فرهنګي ټولنو له مسوولانو سره په کتنه کې وویل چې د نړۍ په هېڅ ځای کې له ښځو سره د افغانستان په څېر چلند نه کېږي.

هغه هیله څرګنده کړه چې په دې حالت کې بدلون راشي.

بینیت همداراز د افغان مېرمنو د هڅو ستاینه وکړه، ویې ویل دوی نه یوازې د خپلو حقونو بلکې د افغانستان د ټولو وګړو د بشري حقونو د خوندیتوب لپاره هڅې کوي.

د ملګرو ملتونو ځانګړي راپور ورکوونکي په پکتیا ولایت کې د لنډې مودې لپاره د نجونو د منځنیو ښوونځیو او لېسو د پرانیستو او د هغو د بېرته بندېدو راپورونو ته د اشارې په ترڅ کې وویل چې طالبان په خپلو کې یو واحد دریځ نه لري.

په خوست کې د زلزلې د زیانمنو کورنیو لپاره کورونه رغول کېږي

د افغانستان په جنوب ختیځ کې د وروستۍ زلزلې له امله سلګونه کسان مړه او زیات شمېر کورونه ونړېدل.

یوه مرستندویه ټولنه د خوست ولایت په سپېرې ولسوالۍ کې د وروستۍ زلزلې د زیانمنو کورنیو لپاره د استوګنې کورونه رغوي.

باختر دولتي خبري آژانس طبیعي پېښو ته د رسېدنې وزارت د سرچینو له قوله خبر ورکوي چې د دې وزارت معین پرون د ابرار په نوم موسسې ته په سپېرې ولسوالۍ کې د متضررو کورنیو لپاره د دایمي استوګنځایونو د رغونې د چارو د پیل اجازه ورکړه.

د سرچینې په وینا ابرار ټولنه د ملګروملتونو د بشري مرستو د سمون د ادارې یا اوچا د ۶۵۰ زره امریکايي ډالرو په لګښت د ۲۶۳ زیانمنو کورنیو لپاره د استوګنې د دایمي کورونو دا پروژه رغوي.

د افغانستان بانک ۱۰ میلیونه امریکايي ډالر لیلاموي

تصویر آرشیف

د افغانستان بانک په پام کې لري چې نن یکشنبې لس میلیون امریکايي ډالر په آزاد بازار کې د لیلام لپاره وړاندې کړي.

د افغانستان بانک چې طالبان یې اداره کوي پر خپله ټویټر پاڼه د دې مزایدې خبر خپور کړی دی.

د هېواد مرکزي بانک په بازارونو کې د افغانۍ د ارزښت د ثابت ساتلو په هدف په تېر څه باندې یوه کال کې تقریبا هره اونۍ څو میلیون ډالر په آزاد بازار کې لیلاموي.

دا چې دا پیسې له کومې سرچینې راځي معلومه نه ده او طالبانو هم تراوسه په دې اړه رسماً څه نه دي ویلي.

خو امریکايي چارواکو څه موده مخکې وویل چې د ۲۰۲۱ اګسټ راهیسې یې له افغانستان سره څه باندې یو میلیارد ډالره مرسته کړې ده.

د ژورنالېستانو نړیوال فدراسیون: په خوست کې د رڼا غږ راډیو فعالیت ودراوه

ارشیف

د ژورنالېستانو نړیوال فدراسیون وايي، په افغانستان کې د رسنیو د بندېدو په دوام کې په خوست ولایت کې د رڼا غږ راډیو فعالیت ودراوه.

د دغه فدراسیون له خبرپاڼې سره سم، چې پرون شنبه یې خپره کړې ده، رڼا غږ د مالي ستونزو له کبله د سپټمبر په دېرشمه خپرونې ودرولې.

د ژورنالېستانو نړیوال فدراسیون زیاته کړې چې په افغانستان کې د رسنیو د بندېدو د دوام له کبله اندېښنه لري.

د ملګروملتونو سرمنشي د کابل پرونۍ حمله په کلکه وغندله

کابل کې چاودنه؛ لږ تر لږه ۱۹ تنه وژل شوي، د مرګ‌ژوبلې د زیاتېدو امکان شته
هيله ده انتظار وکړئ

No media source currently available

0:00 0:00:37 0:00

د ملګرو ملتونو سرمنشي انتوني ګوټرش د کابل په یوه ښوونیز مرکز کې پرونۍ حمله په کلکه وغندله.

سرمنشي د وژل شویو کسانو د کورنیو له غړیو سره خواخوږي څرګنده کړې او د ټپیانو د ژر تر ژره رغېدو هیله کړې ده.

ګوټرش ټینګار کړی چې تعلیم یو اساسي حق دی او د تلپاتې سولې او پرمختګ لپاره ضروري دی.

له بلې خوا د ملګروملتونو امنیت شورل هم دا برید په کلکه غندلی دی.

د افغانستان د کرکټ ملي لوبډله په اسټرالیا کې د قرنطین ۱۵ ورځنۍ موده تېروي

د افغانستان د کرکټ ملي لوبډلې یو شمېر لوبغاړي

د افغانستان د کرکټ ملي لوبډله په اسټرالیا کې د قرنطین پنځلس ورځنۍ موده تېروي، خو په ترڅ کې یې د نړیوال جام لپاره تمرینات پیل کړي دي.

افغان لوبډله د پنجشنبې په ورځ له متحد عربي اماراتو څخه اسټرالیا ته روانه شوه چې په نړیوال جام کې برخه واخلي.

نړیوال جام درې اونۍ وروسته پیلېږي.

د کرکټ بورډ د رسنیو د برخې مسوول فرید هوتک اسټرالیا ته د ملي لوبډلې وار له مخه تګ ګټور وباله.

هغه وویل: "لوبغاړي د اسټرالیا له هوا، پیچونو او وخت سره بلدتیا ترلاسه کړي، د لوبغاړو مورال اوچت دی که خدای کول په ښه چمتوالي به په نړیوال جام کې برخه واخلي."

فرید هوتک زیاته کړه چې د ملي لوبډلې یو شمېر غړي په بهرنیو لیګونو کې لوبېږي چې هغوی به هم ژر اسټرالیا ته ولاړ شي.

خو هوتک په دقیق ډول څرګنده نه کړه چې دا لوبغاړي به کله اسټرالیا ته رسېږي.

ملګري ملتونه: د کابل د پروني خونړي برید عاملان دې عدالت ته راکاږل شي

د طالبانو د رسمي شمېرو له مخې د کابل په دشت برچي سیمه کې په پروني برید کې لږ تر لږه ۱۹ تنه وژل شوي او نږدې ۳۰ تنه نور ټپيان شوي دي.

په افغانستان کې د ملګرو ملتو مرستندویه پلاوی یا یوناما وایي، د کابل د پروني خونړي برید عاملان دې عدالت ته راکاږل شي.

یوناما په یوه ټویټ کې چې تیره شپه ناوخته یې خپور کړ، وویل چې طالبان باید خپلې ژمنې د ټولو افغانانو د خوندیتوب په برخه کې عملي کړي.

د یوناما په وینا، معارف باید په افغانستان کې د شخړو او تبعیض ځای نه وي.

د طالبانو د رسمي شمېرو له مخې د کابل په دشت برچي سیمه کې په پروني برید کې لږ تر لږه ۱۹ تنه وژل شوي او نږدې ۳۰ تنه نور ټپيان شوي دي.

د دې برید پړه تر اوسه چا په غاړه نه ده اخیستې، خو تر دې مخکې د ورته حملو مسوولیت داعش خراسان څانګې منلی دی.

د خوړو نړیوال پروګرام: روان کال کې ۲۱ میلیونه افغانانو سره مرسته شوې

ارزګان کې اړمنو سره د مرستې رسونې یو انځور

د خوړو نړیوال پروګرام یا ډبلیو ایف پي وایي، سږکال یې په هرو پنځو افغانانو کې له دوو تنو سره مرسته کړې ده.

ډبلیو ایف پي په خپل ټویټر کې لیکلي دي چې په ۲۰۲۲م کال کې یې ۲۱ میلیونه افغانانو ته مرستې رسولي دي.

د خوړو د نړیوال پروګرام په وینا د دوی بنسټ پر افغانانو د وچکالۍ د منفي اغېزو مخنیوی تر یوه بریده کړی دی، خو وایي چې راروان ژمی به اسانه نه وي، نو له افغانانو سره باید مرستې وشي.

افغاني سرې مياشتې ټولنې د خوست له ۴۰۰ زلزله‌ځپلو کورنيو سره مرستې کړي

د زلزله‌ځپليو سيمو انځور - ارشيف

د افغاني سرې میاشتې ټولنه وایي، د خوست په سپېرې ولسوالۍ کې یې له ۴۰۰ زلزله‌ځپلو کورنیو سره مرستې کړي دي.

دغې ادارې پرون په څو ټیونو کې ویلي چې، په دغو مرستو کې چې ترکیې ورسره کړي، وریجې، لوبیا، بوره، مکروني، چای، غوړي، او بیسکوټ شامل دي.

د افغاني سرې میاشتې ټولنې ویلي چې زلزله‌ځپلي د را روان ژمي په درشل کې نورو مرستو ته اړتیا لري.

په خوست او پکتیا ولایتونو کې په تېر دوبي کې سختې زلزلې له زرو زیات کسان مړه او په لسګونه زره نور بې کوره کړل.

د طالبانو حکومت: تر اوسه مو د کابل له ښار ۹۵۰۰سوالګر راټول کړي

ارشيف

د طالبانو حکومت وایي، د کابل ښار لپاره ګومارل شوې د سوالګرو د را ټولولو کمېټې تر اوسه له دې ښاره نژدې نهه نیم زره سوالګر راټول کړي دي.

په هغه خبرپاڼه کې چې پرون د طالبانو د رئیس الوزرا د اقتصادي مرستیال ملا عبدالغني برادر له دفتره خپره شوې ویل شوي چې، د دغو سوالګرو په منځ کې ۶۴۹۵ یې ښځې، ۲۱۷۶ ماشومان او ۷۷۶ نارینه دي.

طالبانو ویلي، له مستحقو سوالګرو سره به په دوامداره توګه مرستې کېږي خو تر اوسه نه‌ده څرګنده چې د مرستو مستحق سوالګر به په څه ډول په نښه کېږي.

د طالبانو حکومت له کابل ښاره د سوالګرو د را ټولو بهیر درې اوونۍ مخکې پیل کړ.

د کابل ښار یو شمېر اوسیدونکي د طالبانو دغه اقدام ستایي خو وایي چې باید دغو کسانو ته د کار زمینې برابرې شي.

پر افغانستان د طالبانو له بیا واکمنېدو راهیسې په دې هېواد کې د بې‌وزلۍ او بې‌کارۍ کچه خورا زیاته شوي او ورسره داسې شکایتونه هم راپورته شوي چې د نړیوالو مرستې په سمه توګه مستحقو کسانو ته نه رسیږي.

د سره صليب کمېټې په ۷ مياشتو کې له سل زره د ډېرو معلولينو درملنه کړې

ارشيف

د سره صلیب نړیواله کمیټه وایي چې، په افغانستان کې یې د روان کال د جنوري له میاشتې تر جولای پورې له سل زرو زیاتو معلولینو درملنه کړې ده.

د افغانستان لپاره د دې ادارې دفتر پرون په یوه ټویټ کې ویلي چې، دغه کسان په افغانستان کې د دې ادارې په اوو مرکزونو کې تداوي شوي دي.

د سره صلیب نړیوالې کمېټې ویلي چې، په افغانستان کې د معلولینو شمېر لسګونو زره کسانو ته رسیږي چې ډېرو یې د جګړو او چاودنو په نتیجه کې د خپل بدن غړي له لاسه ورکړي دي.

د کډوالو عالي کمېشنرۍ کندهار کې پر ۱۳۷ کورنيو سولري کيټونه ويشلي دي

ارشيف

د ملګروملتونو د کډوالو اداره یو ان ایچ سي آر وایي، د افغانستان په جنوب د کندهار په پنجوایي ولسوالۍ کې یې پر۱۳۷ کورنیو سولري کیټونه ویشلي دي.

دغې ادارې په یوه ټویټ کې ویلي، دا هغه کورنۍ دي چې په افغانستان کې دننه له بې ځایه کېدو، یا له بهره بېرته خپلو سیمو ته راستنې شوي یا هم په سیمه کې مېشتې زیانګالې کورنۍ دي.

دغې ادارې په یوه بل ټویټ کې د زابل په مرکز قلات کې له راستنه شویو سره د روغتیا په برخه کې د لومړنیو روغتیایي خدمتونو د یوه مرکز د پرانيستلو خبر هم ورکړی.

د کډوالو عالي کمېشنرۍ ويلي، دغه مرکز به په سیمه کې ۱۳۷۰۰ په کور دننه بې ځایه شویو او له بهره راستنو شویو زیانګالو خلکو ته روغتیایي خدمتونه رسوي.

نور راوښيه

XS
SM
MD
LG