د لاسرسۍ وړ لېنکونه

تازه خبر
چهارشنبه ۸ کب ۱۴۰۳ کابل ۰۷:۳۳

افغانستان

طالبانو د دریو ګمرکونو له لارې د وارداتي تېلو ټانکرونو ته د ننوتو اجازه ورکړه

د افغانستان په عمومي نقشه کې د هرات ولایت موقعیت
د افغانستان په عمومي نقشه کې د هرات ولایت موقعیت

د هرات ولایت د سوداګرۍ او پانګونې خونه وایي، د طالبانو له حکومت سره د توافق په نتیجه کې به په درېیو ګمرکونو کې د تېلو بند پاتې ټانکرونه ازاد او بازار ته دننه شي.

د هرات د سوداګرۍ او پانګونې خونې ویاند الیاس نیازي نن ازادي راډیو ته وویل، چې د طالبانو حکومت د ګمرکونو ادارې، نورم او سټنډرډ ادارې او سوداګرۍ وزارت د یادې خونې له مسوولانو سره په لیدنه کې توافق کړی چې د تورغڼډۍ، اقینې او اسلام قلعه په بندرونو کې پر تېلو بار ۸۰۰ ولاړو ټانکرونو ته به اجازه ورکړي چې ښار ته دننه شي.

د هرات ولایت د سوداګرۍ خونې د معلوماتو پر بنسټ، یاد اته سوه ټانکرونه له تېرو دوو میاشتو راهیسې د اسنادو د طی مراحل او د تېلو د کیفیت ټاکلو په هدف درول شوي وو.

د یادو ټانکرونو په ازادېدو سره به ۴۵ زره ټنه ګاز او تېل د افغانستان بازارونو ته وړاندې شي.

د ورځې تازه خبرونه دلته ولولئ

اتلانو جام، افغانستان انګلستان ته ۳۲۶ منډې هدف ورکړ

د انګلستان او افغانستان لوبه، ابراهیم ځدراڼ ۱۷۷ منډې وکړې
د انګلستان او افغانستان لوبه، ابراهیم ځدراڼ ۱۷۷ منډې وکړې

د چمپینز ترافۍ یا اتلانو جام د لوبو په دوام، افغانستان انګلستان ته د ۳۲۶ منډو هدف ورکړ.

افغان لوبډلۍ د نننۍ لوبې پچه وګټله او د بیټینګ یا توپ وهلو پریکړه یې وکړه.

که څه هم افغان لوبډله په لومړي سر کې یو څه تر فشار لاندې وه او درې ویکټې یې ژر ژر ولوېدې، خو وروسته بیا دوی لوبه کنټرول کړه او نسبتا ښه هدف یې سیالې لوبډلې ته ورکړ.

ابراهیم ځدراڼ ۱۷۷ منډې وکړې او د لوبې فشار یې تر ډيره پر خپله اوږه واخیسته.

لږه شیبه وروسته به انګلستان توپ وهنه پيلوي.
نننۍ لوبه د دواړو دغو لوبډلو لپاره مهمه ده او بریا یې په دغه جام کې د پاته کېدو لامل کیږي.

ډبلیو.ایف.پي: د مرستو کمښت تر ډيره افغان ښځې او ماشومان اغیزمن کړي

د افغانانو د ناچارۍ یوه څنډه، ارشیف
د افغانانو د ناچارۍ یوه څنډه، ارشیف

د خوړو نړیوال پروګرام یا (WFP) وايي، چې افغانستان ته د بشري مرستو کمښت تر ټولو زیاتې ښځې زیانمنوي.

د ملګرو ملتونو دې ادارې د سې شنبې په ورځ، د فبروري په ۲۵مه، ټینګار وکړ چې نړیواله ټولنه باید افغانستان هېر نه کړي.

د آسیا پاسفیک حوزې لپاره د خوړو نړیوال پروګرام مرستیال سمیر وانملي په یوه ویډیویي پيغام کې ویلي، دوی باید ډاډ ترلاسه کړي چې نړۍ افغانان نه دي هیر کړي او خپلو مرستو ته دوام ورکوي.

دا په داسې حال کې ده، چې د ملګرو ملتونو د بشري چارو د همغږۍ دفتر یا (OCHA) په خپل وروستي راپور کې ویلي ، چې د دوی ځینې بشري پروګرامونه د زده کړې، خوراکي مرستو، روغتیا، خوارځواکۍ او په افغانستان کې د اړمنو خلکو لپاره د سرپناه په برخو کې د ۲۰۲۵ کال د جنوري او مارچ ترمنځ د تمویل کمښت له خطر سره مخ دي.

یونسف: د روغتیایي‌سیستم د فعال ساتلو لپاره یې د ملاتړ یوه پروژه پيل کړې

د کندهار میرویس روغتون کې د یوه خوارځواکه ماشوم بستر ته ناسته مور، ارشیف
د کندهار میرویس روغتون کې د یوه خوارځواکه ماشوم بستر ته ناسته مور، ارشیف

د ملګرو ملتونو د ماشومانو وجهي صندوق (یونیسف) وايي چې دوی او شریکان یې په افغانستان کې داسې یوه پروژه پر مخ بیایي چې د روغتیایي خدمتونو ۷۵ سلنه ملاتړ په کې کیږي.

دوی وایي چې د دغې پروژې ډير تمرکز پر ښځو او ماشومانو دی.

دې سازمان په یوه راپور کې چې د سې شنبې په ورځ، د فبروري په ۲۵مه خپور شو، ویلي چې دا اقدام یې له بدلونونو په ډکو حالاتو کې یې د روغتیایي سیستم د ساتنې په هدف ترسره کړی دی.

د راپور له مخې، دا پروژه به په ټول افغانستان کې ۲۴۰۰ روغتیايي مرکزونه پرانیستي وساتي، چې په هغو کې ۹۶ هغه بشپړ مجهز روغتونونه شامل دي چې د ولایتونو په مرکزونو کې دي.

تر دې مخکې، د " هیلټ کلسټر" په نوم د روغتیایي خدمتونو وړاندې کوونکي سازمان تېره اونۍ په یوه راپور کې وویل چې د امریکا د مرستو د ځنډېدو له امله ۲۰۴ میلیونه افغانان له روغتیايي خدماتو بې برخې شوي دي.

په اتلانو جام کې د افغانستان او انګلستان لوبه پیل شوه، افغان لوبډله بیټنګ کوي

د افغانستان-انګلستان د نننۍ لوبې نندارچیان
د افغانستان-انګلستان د نننۍ لوبې نندارچیان

د چمپینز ټرافي یا اتلانو جام د سیالیو په دوام، د افغانستان او انګلستان د کرکټ ملي لوبډلو ترمنځ لوبه نن پیل شوه.

د افغانستان د کرکټ ملي لوبډلې پچه وګټله او لومړی یې د توپ وهنې پریکړه وکړه.

دا لوبه د پاکستان د لاهور ښار په قذافي لوبغالي کې ترسره کیږي.

د نن ورځې لوبه د افغانستان او انګلستان لوبډلو لپاره مهمه ګڼل کېږي ځکه چې بایلونکې لوبډله به د چمپینز ټرافي څخه بهر شي.

تر دې وړاندې د افغانستان د کرکټ ملي لوبډلې خپله لومړۍ لوبه د سویلي افریقا پر وړاندې د ۱۰۷ منډو په توپیر وبایلله.

د انګلستان لوبډلې هم په دې جام کې په خپله لومړۍ لوبه کې د اسټرالیا په وړاندې ماتې وخوړه.

۲۵۵ افغانان د جرمني پلازمېنې برلین ته ورسېدل

افغانان په یوه چارټر الوتکه کې بهر ته ځي. (آرشیف)
افغانان په یوه چارټر الوتکه کې بهر ته ځي. (آرشیف)

۱۵۵ تنه افغانان پرون (د کب ۷مه) په یوه چارتر الوتنه کې له اسلام آباد څخه د جرمني پلازمېنې برلین ته ولاړل.

د جرمني د کورنیوچارو وزارت پرون وویل چې د دې افغانانو له نیمايي ډېرو ته د زیانګالو خلکو د منلو د یوه ځانګړي پروګرام په ترڅ کې د جرمني ویزې ورکړل شوې دي.

د راپورونو له مخې د جرمني حکومت د یکشنبې ورځې له پارلماني انتخاباتو مخکې دې هېواد ته د افغان کډوالو د لېږد بهیر په موقتي ډول ځنډولی و، چې په نتیجه کې یې له اسلام آباد څخه دوه الوتنې کنسل شوې.

د جرمني د بهرنیوچارو وزارت د معلوماتو له مخې پر افغانستان د طالبانو له بیاواکمنېدو وروسته په تېرو څه باندې دریو کلونو کې له ۳۵ زرو ډېر افغانان د جلا پروګرامونو په ترڅ کې دې هېواد ته تللي دي. د دې پروګرام په اساس ۳ زره افغانانو ته چې ژوند یې په افغانستان کې په خطر کې دی ډاډ ورکړل شوی چې جرمنې ته به انتقالېږي.

په عین حال کې له جرمني څخه د افغان کډوالو د ایستلو غوښتنې په تېرو څو اونیو کې وروسته له هغه زیاتې شوې چې د افغانانو په ګډون بهرنیو کډوالو په خونړیو حملو لاس پورې کړ. په وروستي مورد کې یوه ۲۴ کلن افغان کډوال د سلواغې یا دلوې په ۲۵مه لسګونه کسان تر موټر لاندې او ټپیان کړل چې دوو تنو یې وروسته په روغتون کې سا ورکړه.

په فراه کې د یوه ماین چاودنې دوه کسان وژلي دي

په فراه ولایت کې نن (د کب ۷مه) د یوه ماین په چاودنه کې د یوې کورنۍ دوو غړو خپل ژوند له لاسه ورکړ.

د کورنیو رسنیو د راپورونو له مخې د فراه د سرې میاشتې ادارې چې طالبان یې اداره کوي، ویلي دي چې دا چاودنه د ګلستان ولسوالۍ په دهک کلي کې د بهرنیو ځواکونو په یوه پخواني مرکز کې دننه شوې ده.

راپور زیاتوي چې په پېښه کې همداراز د استوګنې درې کورونه هم ویجاړه شوي دي. د چاودنې د څرنګوالي په اړه نور جزییات نه دي ورکړل شوي.

په فراه ولایت کې تېره میاشت هم په یوه چاودنه کې درې کسان مړه او دوه نور ټپیان شوي وو. دا چاودنه د سلواغې په ۲۲مه هغه مهال وشوه چې د ابونصر فارابي بندر ته نژدې یو موټر د سړک د غاړې پر یوه ماین برابر شو.

د ماینونو او د جګړې له مهاله د پاتې چاودیدونکو موادو چاودنې د افغانستان په بېلابېلو سیمو کې تل د خلکو د مرګ ژوبلې سبب کېږي.

د تورخم لاره لاهم بنده ده

د تورخم دروازه
د تورخم دروازه

د تورخم لاره نن د څلورمې پرله پسې ورځې لپاره بیاهم بنده ده.

د طالبانو یوه سیمه ایز چارواکي ویلي دي چې د دې لارې د خلاصولو په اړه د خبرو لپاره له پاکستاني چارواکو سره د دوی خبرې پرون (د کب ۶مه۹ بې نتیجې پای ته ورسېدې.

په تورخم کې د طالبانو کمیسار عبدالجبار حکمت پرون وویل چې د پاکستان لوری له دوی څخه غواړي چې د ډیورنډ د کرښې په اوږدو کې دې تاسیسات نه جوړوي او د پاکستان له لوري د تاسیساتو د جوړولو مخه دې نه نیسي.

د هغه په وینا د ننګرهار د مرستیال والي عزیزالله مصطفی په مشرۍ د طالبانو پلاوي د پاکستان دا غوښتنه رد کړه. پاکستاني چارواکو تراوسه په دې اړه څه نه دي ویلي.

د تورخم لاره تېره جمعه د کب په دریمه نېټه بنده شوه. ښاغلي حکمت مخکې ویلي و، چې دا لاره پر ډیورنډ کرښه د طالبانو د ځواکونو له خوا د تاسیساتو د جوړولو له کبله د پاکستان له لوري بنده شوې ده.

د افغانستان د سوداګرۍ او صنایعو خونه وايي چې د دې لارې له بندېدو سره د تورخم دروازې دواړو خواوو ته شاوخوا دوه زره موټر ولاړ پاتې دي.

په عین حال کې د راپورونو له مخې سلګونه کسان چې ناروغان او د هغو پایوازان پکې دي، هم د تورخم په دروازه کې بند پاتې دي.

د اسټرالیا او جنوبي افریقا د کرکټ لوبه ونه شوه

د فبروري ۲۵مه، د راولپنډۍ لوبغالی
د فبروري ۲۵مه، د راولپنډۍ لوبغالی

د اتلانو د جام یا چمپینز ټرافي د سیالیو په لړۍ کې د جنوبي افریقا او اسټرالیا د کرکټ د لوبډلو ترمنځ لوبه د باران له کبله ونه شوه.

دا لوبه نن د ماسپښین په یوه نیمه بجه پلان شوې وه خو د راولپنډۍ د کرکټ د لوبغالي پېچ د پرله پسې باران د ورېدو له کبله پوښلی و، نو د لوبې امپایرانو په سیمه ایز وخت د مازیګر په پنځو بجو اعلان وکړ چې لوبه نه کېږي.

اسټرالیا او جنوبي افریقا چې له افغانستان او انګلینډ سره په بي ګروپ کې دي دواړو خپلې دوه مخکینۍ لوبې ګټلې دي. ټاکل شوې چې د اسټرالیا بله لوبه به د جمعې په ورځ په لاهور کې له افغانستان سره وي او جنوبي افریقا به د شنبې په ورځ د کراچۍ په لوبغالي کې له انګلینډ سره مخامخ شي.

طالبانو او د برتانیا حکومت په افغانستان کې د دوو برتانوي وګړو نیول تایید کړي دي

د کابل پلچرخي زندان (آرشیف)
د کابل پلچرخي زندان (آرشیف)

د طالبانو چارواکو او برتانیا تایید کړې ده چې یو برتانوی وګړی او د هغه مېرمن په افغانستان کې نیول شوي دي. د برتانیا د بهرنیوچارو وزارت پرون دوشنبې په یوه بیان کې ویلي دي چې د نیول شویو کسانو له کورنیو سره همکاري کوي.

اسوشیتیدپریس خبري آژانس پرون د طالبانو د حکومت د کورنیوچارو وزارت د ویاند عبدالمتین قانع له قوله راپور ورکړ چې ۴ کسان چې دوه یې د افغانستان د پاسپورت او تذکرو لرونکي برتانویان دي، دریم یو چینایي الاصله امریکایی او څلورم د هغه ترجمان چې د دې قضیې د حل هڅه یې کوله نیول شوي دي.

قانع د دې کسانو په اړه نور جزییات نه دي ورکړي او ویلي یې دي چې د برتانوي وګړو د خلاصون په اړه غور روان دی.

سنډې ټایمز ورځپاڼې مخکې راپور ورکړی و، چې ۷۹ کلن برتانوی پیټر رینولډس او ۷۵ کلنه مېرمن یې باربي په بامیان ولایت کې نیول شوي دي. د اسوشیتیدپریس د راپور له مخې پیټر او مېرمنې یې په افغانستان کې د ریبیلډ په نوم ټولنه لرله چې سوداګرو، دولتي او نادولتي موسسو او د پوهنې ادارو ته یې تعلیمي او روزنیز پروګرامونه برابرول.

د دې برتانوي وګړو کورنۍ د خپل پلار او مور د خوشې کېدو غوښتنه کړې او ویلي یې دي چې دوی د طالبانو د لومړۍ واکمنې له نسکورېدو راهیسې د ۱۸کلونو لپاره په افغانستان کې اوسېدل او په تېرو دریو کلونو کې چې طالبان واکمن شوي هم هلته اوسېدل.

د طالبانو د حکومت د زندانونو د چارو ادارې د روان کال په لړم میاشت کې ویلي و، چې د افغانستان په زندانونو کې دا مهال د ګاونډیو هېوادونو د وګړو په ګډون ۱۵۰ بهرني زندانیان شته.

د سالنګ لویه لاره موقتا د ټولو مسافر وړونکو او بار وړونکو موټرو پرمخ بنده شوه

د سالنګ لویه لاره (آرشیف)
د سالنګ لویه لاره (آرشیف)

د طالبانو د حکومت د ټولګټو چارو وزارت وايي چې د سالنګ لویه لاره د واورو د ورېدو او د لید د ساحې د لنډېدو له کبله د ټولو مسافروړونکو او باروړونکو موټر پرمخ موقتا بنده شوې ده.

د دې وزارت ویاند محمداشرف حقشناس پر خپله ایکس پاڼه لیکلي چې دا لویه لاره نن سه شنبې (د کب ۷مه) د نیمې شپې په دوو بجو بنده شوه. نوموړی وايي چې د هوا له له ښه کېدو او د توفان له ختمېدو وروسته به په واورو پوښلې سیمې وتوږل شي او لاره به خلاصه شي.

ښاغلی حقشناس له موټرچلوونکو او مسافرو غواړي چې تر بلې خبرتیا پورې پردې لاره له تګ راتګ څخه ډډه وکړي.

د سالنګ لویه لاره چې د هېواد د شمال ۹ ولایتونه له پلازمېنې سره نښلوي د ژمي په موسم کې د درنو واورو د ورېدو له کبله څوځلې بندېږي خو بېرته پرانیستل کېږي.

نور راوښيه

XS
SM
MD
LG