د لاسرسۍ وړ لېنکونه

تازه خبر
پنجشنبه ۲۷ زمری ۱۴۰۱ کابل ۰۸:۵۴

افغانستان

له طالب چارواکو سره د کرام الدين کريم ليدنو غبرګونونه پارولي

د فوټبال فدراسیون مخکینی مشر کرام الدین کریم

د ځینو نجونو فوټبالرو په جنسي ځورونې تورن د افغانستان د فوټبال فدراسیون د مخکیني مشر کرام الدین کریم او طالب چارواکو لیدنو تُند غبرګونونه پارولي.

کرام الدین کریم په تېر جمهوري نظام کې د ځینو نجونو فوټبالرو په جنسي ځورونې تورن او تر تعقیب لاندې وو.

ده که څه هم په ځان لګېدلي تورونه بې بنسټه بلل خو د فوټبال نړیوال فدراسیون فیفا د یو میلیون ډالرو جریمې تر څنګ د تل لپاره له فوټبالي فعالیتونو محروم کړی وو.

همدا اوونۍ هغه د طالبانو د کابل له والي ندا محمد ندیم سره کتلي.

د دې لیدنې عکسونه په خواله رسنیو باندې ګڼو خلکو لاس په لاس کړي او په اړه یې تُند غبرګونونه ښودلي.

طالبان تر دې مخکې هم ګرم بلل شوي چې د سیاسي اشخاصو د تماس د کمېسیون له لارې یې د هغو افغان چارواکو د ورستنېدو زمینه برابره کړې چې په بېلابېلو جرمونو تورن دي او له هېواده تښتېدلي وو.

د طالبانو حکومت لا د کرام الدین کریم او د کابل د والي د لیدنې په اړه څه تبصره نه ده کړې.

د ورځې تازه خبرونه دلته ولولئ

کابل کې د یوه جومات دننه چاودنه شوې

د افغانستان په عمومي نقشه کې د کابل ولایت موقعیت

نن چهارشنبه ماښام د کابل ښار په شمال کې د یوه جومات دننه چاودنه شوې ده.

د طالبانو د حکومت د کابل امنیه قوماندانۍ ویاند خالد ځدراڼ ازادي راډیو ته په یوه لېږل شوي پیغام کې پېښه تایید کړې ده.

هغه لیکلي: "د ۱۷مې امنیتي حوزې اړوند سیمه کې د یوه جومات دننه د ماښام لمانځه پرمهال چاودنه رامنځته شوې چې متاسفانه تلفات لري."

هغه د چاودنې بڼې او اوښتو تلفاتو په اړه جزییات ورنه کړل، خو په خبره یې د طالبانو امنیتي ځواکونه سیمې ته رسېدلي او څېړنې پیل شوي دي.

د سیمه ییزو رسنیو د معلوماتو پر بنسټ د خیرخانې مېنې سرکوتل سیمه کې د ابوبکر صدیق جومات دننه چاودنه شوې ده.

دا چاودنه داسې مهال شوې چې دوه ورځې وړاندې د کابل په دارالامان پر سړک د یوې چاودنې له امله دوه کسان ټپیان شوي دي.

په دې وروستیو کې کابل ښار کې چاودنې زیاتې شوي چې تلفات هم لري.

د دغو پېښو د زیاتوالي له امله کابل ښاریان اندېښمن شوي دي.

د نن ورځې د چاودنې مسوولیت تر اوسه کومې ډلې نه دی منلی.

خو د محرم په ورځو کې د شویو چاودنو مسوولیت داعش ډلې منلی و.

ملګري ملتونه: لا هم افغانستان کې ډېرې میندې د زېږون پرمهال مري

ارشیف: هرات روغتون کې د نسايي او ولادي برخه

د افغانستان لپاره د ملګرو ملتونو د نفوسو صندوق وایي، په آسیا پاسفیک سیمه کې افغانستان هغه هېواد دی چې تر ټولو زیاتې میندې د زېږون په مهال په کې مري.

دغې ادارې نن په یوه ټوېټ کې ویلي چې په دې هېواد کې په هرو سل زره میندو کې چې ماشومان زېږوي، ۶۳۸ یې مري.

دغې اداري ویلي چې که د میندو روغتیا ته سمدستي او دوامداره پاملرنه ونه شي نو تر۲۰۲۵ کال پورې به دوی د ۵۱ زره نورو میندو د مړه کېدو شاهدان واوسي.

د تېرکال په اګسټ کې د طالبانو د بیا واک ته رسېدو وروسته چې له افغانستان سره نړیوالې مرستې کمې شوې او په دې هېواد کې بې وزلي زیاته شوې، په اولاد د میندو د مړینو د شمېر زیاتوالي ته هم اندېښنې زیاتې شوي دي.

اوچا: د اقلیم د بدلون اغېزې ویجاړونکې دي

په ننګرهار کې د وروستیو سېلابونو له امله د اوښتو زیانونو یو انځور

د ملګرو ملتونو د بشري مرستو همغږې کونکې اداره یا اوچا وایي، د اقلیم د بدلون اغېزې ویجاړونکې دي.

اوچا په یوه ټوېټ کې ویلي چې بشرپاله لوبغاړو په افغانستان کې د جون له میاشتې راهیسې د شدیدو ورښتونو او ناڅاپي سېلابونو له زیانمن شویو ۵۵ زره کسانو سره بېړنۍ مرستې کړي دي.

اوچا ویلي چې دغه زیانمن شوي له ژمي د مخه نور ملاتړ ته اړتیا لري.

په دې وروستیو کې د ننګرهار، پروان، کاپیسا، غزني او ارزګان په ګډون د افغانستان په ډېرو ولایتونو کې د شدیدو وروښتونو په نتیجه کې ناڅاپي سېلابونه راوتلي چې په لسګونو کسانو ته یې پرمرګ ژوبلې سربېره لسګونه کورونه ویجاړ یا زیانمن کړي او لسګونه زره جریبه کرنیزه ځمکه یې خرابه کړې ده.

لندسي ګراهام: پر امريکا له افغانستانه د تروريستي بريد امکان شته

امریکایی سناتور لندسي ګراهام

امریکایی سناتور لندسي ګراهام وایي، پر امریکا او متحدانو یې د داسې تروروستي برید امکانات شته چې ریښه یې په افغانستان کې وي.

ښاغلي ګراهام په ټویټر کې لیکلي دي چې په افغانستان کې د القاعده رونیز کمپونه د بیا را ژوندي کېدو په حال کې دي.

په افغانستان کې د القاعده شبکې هلو ځلو ته وروسته تر دې اندېښنې زیاتې شوې دي چې د تېرې جولای میاشتې په وروستیو کې د القاعده شبکې مشر ایمن الظواهري د کابل په شېرپور کې د امریکا د بې پیلوټه الوتکې په برید کې ووژل شو.

د طالبانو حکومت ويلي دي، تر اوسه يې داسې شواهد نه دي موندلي چې د القاعده شبکې مشر ايمن الظواهري دې په کابل کې وژل شوی وي.

استراليا يو شمېر افغان ورزشکارانو ته پناه ورکړې

د اسټراليا بيرغ

استرالیا نن وویل چې د توکیو په المپیک کې د افغانستان د بیرغ لېږدونکې کیمیا یوسفي او یو شمېر نور افغان لوبغاړو ته یې له خپلو کورنیو سره په استرالیا کې پناه ورکړې ده.

د استرالیا د المپیک کمېټې وویل چې د المپیک په ارتباط یې په وروستیو کې پنځه افغانې کورنۍ منلې دي.

د جون له میاشتې را وروسته تر اوسه یو دېرش افغان لوبغاړي استرالیا ته رسېدلي دي.

د تېر جمهوري نظام له سقوط وروسته يو شمېر ورزشکارانو د نړۍ په بېلابېلو هېوادونو کې پناه اخيستې ده.

د افغانستان په لیرې پرتو سیمو کې هره مياشت ۲۴زره ميندې نوي ماشومان زېږوي

د کابل په یوه روغتون کې نوی زېږېدلی ماشوم

د ملګرو ملتونو د وګړو صندوق وايي، د افغانستان په لیرو پرتو سیمو کې هره میاشت ۲۴زره میندې نوي ماشومان زېږوي.

د دې ادارې په خبره دغه میندې د زېږون پر مهال د روزل شویو قابله ګانو او دایه ګانو ملاتړ ته اړتیا لري، په ځانګړي ډول په اوسني وخت کې چې په افغانستان کې بشري بحران اوج ته رسېدلی دی.

تر دې مخکې هم شکایتونه کېدل چې د افغانستان په لیرو پرتو سیمو کې خلکو ته وړ روغتیايي خدمات نه وړاندې کېږي.

په لیرې پرتو سیمو کې د سم روغتيايي خدماتو نه وړاندې کول او د قابلو نشتون له امله ډېری وخت د مور او ماشوم مړینه رامتځته کېږي.

هلمند او کندهار کې ۲۵ زره کروندګرو سره مرستې شوي

د پنبې کرونده

ملګري ملتونه وايي، په هلمند او کندهار ولایتونو کې ۲۵زره کروندګرو د معیشت په برخه کې مرستې ترلاسه کړې.

په افغانستان کې د ملګرو ملتونو څانګې پرون په یوه خبرپاڼه کې ویلي، وروسته له هغې چې د کوکنارو پر کښت بندیز ولګېد، د افغانستان په لیرو پرتو سیمو کې د بېوزلۍ او د خوړو د نه خوندیتوب په وړاندې بل بدیل وړاندې نه شو.

ملګري ملتونه وايي د نشه یي توکو او جرمونو په وړاندې د دوی د مبارزې څانګې په هلمند او کندهار کې بزګرو ته دغه ملاتړ برابر کړی.

د ملګرو ملتونو په وینا، هلمند او کندهار د افغانستان په سطحه د تاریاکو ۷۲ فیصده برخه تولیدوي.

طالبانو د روان لمریز کال په لومړیو کې د کوکنارو پر کښت او د نشه یي موادو پر کار و بار بندیز اعلان کړ.

د افغانستان بانک نن ۱۱ ميليون امريکايي ډالر ليلاموي

ارشيف

د افغانستان بانک وايي، په پام کې لري نن چهارشنبه ۱۱ ميلیون امریکايي ډالره په ازاد بازار کې د داوطلبۍ په ډول لیلام کړي.

دغه بانک پرون په یوه لنډکۍ اعلامیه کې دغه خبر ورکړی دی.

د افغانستان بانک د بهرنیو اسعارو په وړاندې د افغانیو د ثبات لپاره هره اوونۍ ډالر لیلاموي.

خلک وايي، که څه هم د افغانیو ارزښت یو څه ثابت پاتې شوی، خو په بازارونو کې د خوراکي او نورو ضروري توکو بیې خورا لوړې شوې دي.

يونېسف: تېر يو کال کې مو د '۴۵۷' زره خوارځواکو ماشومانو درملنه کړې

يو خوارځواکی ماشوم - ارشيف

د ماشومانو د ملاتړ لپاره د ملګرو ملتونو مرستندوی صندوق یا یونېسف وايي، د ۲۰۲۱م کال د اګست له میاشتې راهیسې یې د ۴۵۷ زره هغو ماشومانو درملنه کړې، چې په شدیده خوارځواکۍ اخته وو.

د دې ادارې د پروني ټویټ له مخې دغه څلور لکه اووه پنځوس زره ماشومان وژغورل شول، خو دغومره شمېر نور د رغېدو لپاره دویم چانس لري.

په وروستیو کې ملګرو ملتونو خبرداری ورکړی و، چې په افغانستان کې شا و خوا یو ميلیون ماشومان د خوارځواکۍ له کبله د مرګ له ګواښ سره مخامخ دي.

افغانستان کې وروستۍ طبيعي پېښې او کمزوری اقتصاد هغه لاملونه دي چې ماشومانو او کورنيو ته کافي خواړه نه‌رسېږي چې له امله يې ماشومان په خوارځواکۍ اخته کېږي.

زابل: ۶۰۰۰ بې ځايه شويو کسانو سره مرسته وشوه

ارشيف

د کډوالو په چارو کې د ملګرو ملتونو لویه کمېشنري یا (UNHCR) وايي، روانه اوونۍ شا و خوا ۶۰۰۰ هغو کسانو چې د زابل ولایت مرکز کلات ښار ته په خپله خوښه ستانه شوي، د بیا ادغام ملاتړ او مرسته ترلاسه کړه.

دغې ادارې پرون په یوه خبرپاڼه کې ویلي، دا چې بې‌ځایه شوي کسان خپلو اصلي مېنو ته ستنېدل غوره ګڼي، د UNHCR له خوا یې ارزونه کېږي چې د سرپناه په برخه کې څه مرسته ورسره وشي.

د کډوالو په چارو کې د ملګرو ملتونو لویه کمېشنري وايي د بېلابېلو افتونو له کبله یو نیم ميلیون افغانان دا مهال له خپلو مېنو بې‌ځایه دي او درې نیم ميلیون نور د شخړو له کبله بې‌ځایه شوي دي.

د خوړو نړيوال پروګرام: د توکو د بيو لوړوالی به ګڼې کورنۍ د لوږې له ګواښ سره مخ کړي

کابل کې يو شمېر بې‌وزله مېرمنې

د افغانستان لپاره د خوړو نړیوال پروګرام یا ډبلیو اف پي وایي، په افغانستان کې د خوراکي موادو د بیو بېساری لوړوالی به په دې هېواد کې ډېرې نورې کورنۍ له لوږې سره مخامخې کړي.

ډبلیو اف پي په یوه ټویټ کې ویلي چې په افغانستان کې په اوس وخت کې نږدې نولس ميلیون وګړي د خوړو له شدید نه خوندیتوب سره مخامخ دي او شپږ ميلیونه یې هم قحطۍ ته ورنږدې دي.

ډبیلو اف پي ویلي، له دغو اړمنو کسانو سره د مرستو د دوام لپاره د روان کال تر پایه ۹۶۰ ميلیون ډالرو ته اړتیا لري.

د خوړو نړیوال پروګرام ډبیلو اف پي پرون په یوه بل ټویټ کې ویلي چې روان کال یې په افغانستان کې له ۲۱ ميلیون زیاتو زیانګالو خلکو سره مرستې کړي خو له دغو مرستو سره سره لوږه نه‌ده کمه شوې او اوس هم په ميلیونونو کسان هره شپه وږي بیدیږي.

اوچا له افغانستان سره د استراليا هېواد د يولس ميليون ډالرو مرستې له امله مننه کړې

ډالر - ارشيف

د افغانستان لپاره د ملګرو ملتونو د بشري مرستو همغږه کونکې ادارې یا اوچا د استرالیا د یولس ميلیون استرالیایي ډالرو نوې مرستې مننه کړې.

اوچا ويلي دي چې د استراليا د دغې دوامداره مرستې به په افغانستان کې د خلکو ژوند وژغوري.

اوچا په یوه ټویټ کې ویلي چې استرالیا په دغو نویو مرستو سره هغه بسپنه ورکونکی هېواد دی چې د افغانستان لپاره د بشري مرستو له صندوق سره یې د مرستو اندازه ۶۳ ملیون استرالیایي ډالرو ته رسیږي.

اخوا ملګري ملتونو ويلي دي، چې د مرستو سره سره تر نيمايي ډېر افغانان د لوږې له ګواښ سره مخ دي.

ميليسه فليمينګ: تېر يو کال کې افغان نجونې او مېرمنې ډېرې ځورېدلي

يو شمېر افغان مېرمنې

د یوې سوله‌ییزې، باثباته، عادلانه او انسانۍ نړۍ د رامنځته کولو لپاره د ملګرو ملتونو د نړیوالو اړیکو مشره میلیسه فلیمینګ وایي، په تېر یوه کال کې د افغانستان خلک په تېره ښځې او نجونې ډېرې ځوریدلې دي.

هغې داخبره په یوه ټویټ کې چې د افغانستان لپاره د ملګرو ملتونو مرستندویه دفتر یوناما په خپله ټویټرپاڼه کې خپور کړی، کړې ده.

مېرمن فلیمنیګ ویلي چې موږ باید افغان ښځې او نجونې هېرې نه‌کړو.

د هغې په خبره ملګري ملتونه به هیڅکله هم له دې ټینګار لاس وانه‌خلي چې نجونې په هره سویه ښوونځي ته لاړې شي او هغوی ته په مسلکي ژوند کې د ګډون لپاره وسایل ورکړي.

پر افغانستان د طالبانو له بیا واکمنېدو راهیسې چې نن یې دوهم کال پیل شوی، ډېرو ښځو په دولتي او نورو ادارو کې خپلې دندې له لاسه ورکړي او له شپږم ټولګي پورته نجوني ښوونځي ته له تلو محرومې شوي دي.

نيډ پرايس: د افغانستان د کنګل شوې شتمنۍ د ازادېدو او لګښت پر لارو چارو غور کوو

د امريکا د بهرنيو چارو وزارت وياند نیډ پرایس

د امریکا د بهرنیو چارو وزارت وایي، متحده ایالات په پام کې نه‌لري چې د افغانستان کنګل شوې درې نیم ملیارډ ډالره شتمني ازاده او د طالبانو تر کنټرول لاندې د افغانستان بانک ته وسپاري.

خو هغه لارې چارې لټوي چې له دغو پیسو د افغانستان خلک مستقیماً ګټه پورته کړي.

د بهرنیو چارو د وزارت ویاند نیډ پرایس په واشنګټن کې په یوه خبري کنفرانس کې وویل، په اوس وخت کې موږ فکر نه کوو چې په لنډ مهال کې د افغانستان بانک پانګه زیاته شي.

د تېر کال د اګست له میاشتې چې طالبان پر افغانستان بیا واکمن شوي، د افغانستان بانک شاوخوا اوه ملیارد ډالره شتمني د امریکا په بانکونو کې کنګل شوې ده.

د دغې شتمني نیمایي یعنې درې نیم ملیارد ډالره یې د امریکا د ولسمشر جو بایډن په امر، پر امریکا د ۲۰۰۱ کال د سپټمبر د یوولسمې د تروریستي بریدونو د قربانیانو د کورنیو حقوقي دعواوو ته ځانګړې شوې ده.

افغان کرېکټ لوبډلې له ايرلنډ دويمه شل اوريزه لوبه هم وګټله

افغان کرېکټ ملي لوبډله

د افغانستان د کرېکټ ټیم پرون (دوشنبه) د ایرلنډ لوبډلې ته په ۲۸ منډو ماتې ورکړه.

دا د دوو لوبډلو ترمنځ څلورمه شل اوره سیالي وه. تر دې وړاندې لومړۍ دوې شل اوره سیالۍ ایرلنډ او یوه افغانستان ګټلې وه.

پرونۍ مسابقه د باران د ورېدو له کبله یوولس اورونو ته کمه شوه، افغانستان په ټاکل شویو یوولس اورونو کې د ۶ لوبغاړو د سوځېدو په بدل کې ۱۳۲ منډې جوړې کړې.

د افغانستان لپاره تر ټولو ډېرې منډې نجیب ځدراڼ وکړې چې په ۲۴ توپونو ۵۰ منډې وکړې خو راشد خان نه یوازې دا چې په لسو توپونو ۳۱ ناسوځېدلې منډې وکړې، په باولینګ کې ۲ لوبغاړي وسوځول او د لوبې غوره لوبغاړی وګڼل شو.

اوس دواړه ټیمونه مساوي دي او پنځمه مسابقه به، چې سبا (چهارشنبه) کېږي، د دې لړۍ ګټونکی وټاکي.

دا مسابقې د ایرلنډ په کوربه‌توب په بلفاست ښار کې کېږي.

نور راوښيه

XS
SM
MD
LG