د لاسرسۍ وړ لېنکونه

تازه خبر
شنبه ۲۲ زمری ۱۴۰۱ کابل ۱۰:۴۵

افغانستان

طالبانو د تاجکستان او ازبکستان پر خاوره د بريدونو په تور د داعش غړي نيولي

ارشیف

طالبان ادعا کوي، چې د داعش هغه غړي یې نیولي، کومو چې په وروستیو کې د افغانستان له خاورې په تاجکستان او ازبکستان توغندي ویشتلي وو.

طالب ویاندویانو رسنیو ته استول شوې خبرپاڼه کې چې یوه کاپي یې ازادي راډیو ته هم رسېدلې لیکلي، دا کسان یې وړمه شپه د کندز د امام صاحب ولسوالۍ په قنجغه سیمه کې نیولي دي.

اعلامیه د نیول شویو داعش وسله‌والو شمېر ۵ تنه ښودل شوی او زیاتوي، ۳ تنه نور له دوی سره د جګړې پر مهال وژل شوي دي.

طالبانو د نیول شویو کسانو د اعتراف ویډیو هم خپره کړې ده او وايي، له دوی سره یې وسلې او مهمات هم نیولي دي، خو داعش ډلې په دې اړه څه نه‌دي ویلي.

تر اوسه دوه ځله ادعا شوې، چې د افغانستان له خاورې د ازبکستان لور ته توغندي ویشتل شوي چې یو پېښه یې د ازبکستان د حکومت له‌خوا رسماً تایید شوې ده.

د ورځې تازه خبرونه دلته ولولئ

غزني کې سېلابونو مالي زيانونه اړولي

سېلابونه - ارشيف

د طالبانو حکومت سیمه‌ییز چارواکي وايي، سېلابونو په غزني کې مالي زیانونه اړولي دي.

د شنبې په ورځ د دغه ولایت له امنیه قومندانۍ څخه رسنیو ته په رالیږل شوې خبرپاڼه کې ویل شوي دي چې د جمعې په ورځ د غزني ولایت یو شمیر ولسوالۍ سېلابونو ځپلې دي.

دغه سېلابونه په اندړ، واغظ، ګیرو، قرباغ او ده یک ولسوالیو کې د سختو وروښتونو له امله راوتلي دي.

د خبرپاڼې په حواله د يادو سېلابونو له امله لسګونه د اوسېدو کورونه، باغونه، کاریزونه او ترڅنګ یې په زرګونه جریبه کرنیزې مځکې خرابې کړې دي.

په غزني کې د سېلابونو راوتلو سلسله له شاوخوا دوو میاشو څخه روانه ده.

برېتانيا: يو کال کې مو ۲۱ زره افغانان برېتانيا ته لېږدولي دي

ارشيف

د برېتانیا حکومت وايي په تېر یوه کال کې شاوخوا ۲۱ زره کسان له افغانستانه دې هېواد ته لېږدول شوي دي.

په یوه بیان کې چې پرون د برېتانیا حکومت خپور کړ راغلي دي چې په تېر یو کال کې د دې هېواد یو شمېر وګړي له خپلو کورنیو سره او زرګونه نور افغانان برېتانیا ته راويستل شوي دي.

بیان زیاتوي چې د تېر کال له دوبي راهیسې د بشري حقونو فعالان، خبریالان او هغه کسان چې په افغانستان کې یې له برېتانوي ځواکونو سره کار کړی و، دې هېواد ته لېږدول شوي دي.

له دې مخکې د متحده عربي اماراتو چاپ نېشنل ورځپاڼې راپور ورکړی و، چې برېتانیا د دې افغانانو د استوګنې لپاره په ورځ کې تر یو میلیون پونډو پورې د هوټلونو کرایه پرې کوي.

افغان کرېکټ لوبډلې له ايرلنډ درېيمه شل اوريزه لوبه وګټله

افغان کرېکټ ملي لوبډله

د افغانستان د کرېکټ ملي لوبډلې له کوربه ایرلنډ سره پرونۍ لوبه د ۲۲ منډو په توپیر وګټله.

دا په بلفاست ښار کې له ایرلنډ سره د پنځو شل اووریزو لوبو د لړۍ دریمه لوبه وه.

له دې دوه مخکینۍ لوبې پرله پسې ایرلنډ ګټلې وې.

د افغانستان او ایرلنډ د لوبډلو ترمنځ دوه نورې لوبې هم پاتې دي، چې یوه د را روانې دوشنبې په ورځ د اګست په ۱۵مه او وروستۍ به د چارشنبې په ورځ د اګست په ۱۷مه نېټه وي.

افغان لوبډلې ته پکاره ده چې دوه نورې لوبې وګټې ترڅو دا لړۍ په خپل نوم کړي.

چين: د افغانستان شتمنۍ کنګل کېدو د دغه هېواد اقتصادي بحران زيات کړی

د امريکايي ډالرو بستې - ارشيف

د چین د بهرنیو چارو وزارت وايي د افغانستان بانک د اوه میلیارد ډالره شتمنۍ کنګل کېدل د دې هېواد د اقتصادي بحران په پراخولو کې منفي رول لري.

د دې وزارت ویاند وانګ وین بین پرون (د زمري ۲۱مه) په یوه خبري غونډه کې وویل چې متحده ایالات د افغانستان بانک دا شتمني له توجیه پرته وېشلې دي.

نږدې یو کال مخکې چې طالبانو پر افغانستان ولکه ټینګه کړه متحدو ایالتونو د افغانستان څه باندې اوه میلیارد ډالره شتمني کنګل کړه.

د امریکا ولسمشر جو بایډن پروسږ کال د سلواغې په ۲۲مه په یوه فرمان کې امر وکړ چې د افغانستان د دې شتمنۍ نیمايي دې د ۲۰۰۱ کال د سپټمبر د یوولسمې د قربانیانو د کورنیو او پاتې دې د افغانستان له خلکو سره د بشري مرستو لپاره ځانګړې شي.

د تېرې اونۍ په اوږدو کې د نړۍ له اویا زیاتو اقتصادي متخصصانو په یو لیک کې د امریکا له ولسمشر او د خزانې له وزیر څخه وغوښتل چې دا شتمني دې افغانستان ته وسپاري.

د بې پولې خبريالانو ټولنه: طالب واکمنۍ کې شپېته په سلو کې خبريالانو دندې له لاسه ورکړي

يو شمېر افغان ژورنالېستان

د بې سرحده خبریالانو ټولنه وايي چې پر افغانستان د طالبانو له واکمنېدو په را وروسته یوه کال کې په سلو کې شپېته افغان ژورنالېستانو یا خپلې دندې له لاسه ورکړي یا له هېواده وتلي دي.

د بې سرحده خبریالانو ټولنې چې مرکز یې په فرانسه کې دی په یوه نوې سروې کې چې جزیات یې پرون خپاره شول ویلي چې په تېر یوه کال کې د افغانستان له ۵۴۷ رسنیو څخه د ۲۱۹ فعالیت بند شوی او په دې موده کې ښځينه خبریالانې تر ټولو زیاتې زیانمنې شوي چې په سلو کې ۷۶ خپلې دندې له لاسه ورکړې دي.

د دې راپور له مخې له ټولو ۲۷۵۶ ښځینه خبریالانو له ډلې چې تر یو کال مخکې پورې یې کار کاوه اوس یوازې ۶۵۷ ښځې په رسنیو کې کار کوي هغه هم تر ډېره په پلازمېنه کابل کې.

د بې سرحده خبریالانو د ټولنې سکرتر جنرال کریستوف دیلویر په یوه بیان کې ویلي چې په تېر یوه کال کې له لسو یوه افغان ژورنالېست خپله دنده له لاسه ورکړې.

نوموړي پر طالبانو غږ کړی چې د خبریالانو او د رسنیو د کار کوونکو پر وړاندې تاوتریخوالی او د هغو ځورول پای ته ورسوي او اجازه ورکړي چې خپل کار ته دوام ورکړي.

د افغانستان فوټبال تر ۱۹ کلونو کشره لوبډله نن له ازبکستان سره سيالۍ کوي

د افغانستان له ۱۹ کلونو کم عمره فوټبال لوبډله - ارشيف

د افغانستان د فوټبال تر نولسو کلونو کشره لوبډله نن (جمعه) په خپله څلورمه سیالۍ کې د ازبکستان له لوبډلې سره مخامخ کېږي.

د افغانستان د فوټبال فدراسیون ویلي چې دا لوبه به د کابل په وخت د مازدیګر په پنځه نیمې بجې پیل شي.

په تاجکستان کې د منځنۍ اسیا د فوټبال تر نولسو کلونو د کشرو لوبډلو په روانو سیالیو کې افغانستان تر اوسه ۳ مسابقې کړي او ټولې یې بایللي دي.

د افغانستان فوټبال فدراسيون که څه هم ويلي وو چې د تر ۱۹ کلونو کم عمره فوټبال لوبډله يادو سياليو ته پوره چمتووالی لري خو بيا يې هم ټولې لوبې پرله‌پسې وبايللې.

د جنوبي افريقا شل اوريزه ليګ لپاره 'ايم آی کيپ ټاون' لوبډلې راشد خان سره قرارداد لاسليک کړ

راشد خان

ایم آی کیپ ټاون (MI Cape Town) لوبډلې اعلان وکړ چې د جنوبي افریقا د کرېکټ د شل اوره غوره لیګ سیالیو لپاره یې د افغانستان له نامتو لوبغاړي راشد خان سره قرارداد لاسلیک کړ.

د اي ایس پي این کریک انفو وېبپاڼې د راپور له مخې، له راشد خان او ۴ نورو لوبغاړو سره یې مخکې تر دې قراردادونه لاسلیک کړل چې د لوبغاړو په اړه بولۍ پیل شي.

د جنوبي افریقا د غوره لیګ د مقرراتو له مخې، هره لوبډله د لوبغاړو په اړه د بولیو تر پیلېدو وړاندې له درو بهرنیو او دوو کورنیو لوبغاړو سره قرارداد کولی شي.

ایم آی کیپ ټاون لومړنی ټیم دی چې د خپلو پنځو لوبغاړو نومونه اعلانوي.

د جنوبي افریقا د کرېکټ غوره لیګ د ۲۰۲۳ کال په جنورۍ کې پیلېږي.

افغان کرېکټ لوبډلې ايرلنډ ته دويمه شل اوريزه لوبه هم وبايلله

ارشيف

ایرلنډ د افغانستان کرېکټ ملي لوبډلې ته په دوهمه شل اوره سیالۍ کې هم ماتې ورکړه.

پرون (پنجشنبه) د افغانستان ملي لوبډلې پچه وګټله خو تکړه توپ ویشتونکي یې یو په بل پسې ژر وسوځېدل.

دوی په شلو اورونو کې ټولټال ۱۲۲ منډې وکړې چې ټیټ هدف و.

خو ایرلنډي لوبغاړو په داسې حال کې چې شپږ توپونه یې لرل، ورکړل شوی هدف پوره کړ.

پرون د کرېکټ بورډ مسؤلينو ويلي وو، افغان کرېکټ لوبډله ايرلنډ سره لوبو ته پوره چمتووالی لري.

دا دويمه پرله‌پسې شل اوريزه لوبه ده چې افغان کرېکټ لوبډله يې ايرلنډ ته بايلي.

د هوا پېژندنې ادارې په ۱۹ ولايتونو کې د ورښتونو او سېلابونو وړاندوينه کړې

سېلابونه - ارشيف

د افغانستان د هوا پېژندنې ادارې د هېواد په ۱۹ ولایتونو کې د شدیدو ورښتونو، سېلونو او تالندې وړاندوینه کړې ده.

دې ادارې پرون (پنجشنبه) وویل چې په راتلونکو ۲۴ ساعتونو کې په بدخشان، کونړ، ننګرهار، لغمان، نورستان، پنجشېر، پروان، کابل، وردک، لوګر، پکتیکا، خوست، پکتیا، بامیان، دایکنډي، غزني، زابل او کندهار ولایتونو کې د شدیدو ورښتونو اټکل کېږي.

د افغانستان د هوا پېژندنې ادارې له اټکل سره سم، د ورښت اندازه به د ۱۰ او ۴۰ میلي مترو ترمنځ وي.

په وروستیو څو میاشتو کې د سختو ورښتونو له کبله سلګونه افغانانو ته د سر و مال تاوانونه اوښتي دي.

څو ورځې مخکې د طالبانو حکومت له نړيوالو غوښتي وو چې د طبيعي پېښو له امله له زيانمنو شويو افغانانو سره مرستې وکړي.

ملګري ملتونه: افغانان بېړنيو مرستيو ته اړتيا لري

يو شمېر مرستې

ملګري ملتونه وايي، د بې سارو بشري مرستو له دوام سره سره افغانان د نړیوالو مرستو ته شدیده اړتیا لري.

په افغانستان کې د ملګروملتو مرستندوی ماموریت یا یوناما پرون په یوه خبرپاڼه کې وویل، په تېر یو کال کې د ملګروملتو موسسو او شریکو غیرحکومتي موسسو په پراخه پیمانه بشري مرستې کړي او د جون تر پای پورې یې شاوخوا ۲۳ میلیون اړو کسانو ته مرسته رسولې ده.

دا غوښتنه داسې مهال کېږي چې يو شمېر نړيوالو مؤسسو ویلي، د تېر کال په اګست کې د طالبانو له واک ته رسېدو سره غبرګ په افغانستان کې وچکالي او نور بحرانونه راغلل چې که نوره بشري مرسته ونه شي، راتلونکی کال به په دغه هېواد کې لوږه او بېوزلي اوج ته ورسېږي.

داعش ډلې د شيخ رحيم الله حقاني د وژنې مسؤليت ومانه

شيخ رحيم الله حقاني د پنجشنبې په ورځ کابل کې ووژل شو

داعش یا د اسلامي دولت ډلې په کابل کې د طالبانو د یوه دیني عالم شیخ رحیم الله حقاني د وژلو مسؤلیت په غاړه واخیست.

حقاني پرون د کابل په شش درک سيمه کې په یوه مدرسه کې په انتحاري برید کې ووژل شو.

د طالبانو د کابل د امنیه قوماندانۍ ویاند خالد ځدراڼ په یوه ټویټ کې ویلي چې په دې انتحاري برید کې د رحیم الله حقاني ترڅنګ د نوموړي ورور او درې طالب زده کوونکي وژل شوي دي.

څلور طالب چارواکو رویټرز خبري اژانس ته ویلي چې انتحاري حمله کوونکی په پښه ګوډ و او چاودېدونکي مواد یې په مصنوعي پلاستیکي پښه کې ځای پر ځای کړي وو.

رحیم الله حقاني، چې د سلفي او پنج پیریانو له عقایدو سره د ژور اختلاف په لرلو مشهور و، دوه ځلې پخوا له حملو روغ وتلی و.

په ۲۰۲۰ کال د پېښور په یوه مدرسه کې د بريد پر مهال، چې د ده د وژلو په هدف وشو، لږ تر لږه ۷ تنه ووژل شول.

د ناروې کډوالو شورا: د طالبانو په واکمنۍ کې تر ټولو ډېر عام افغانان زيانمن شوي

يو شمېر افغانان

د ناروې د کډوالو شورا وایي، د طالبانو د واکمنۍ په یوه کال کې عامو افغانانو د سولې لپاره لویه بیه پرې کړې ده.

دغې شورا نن د طالبانو د یو کلنۍ په مناسبت راپور کې ویلي، افغانستان کې د لوږې کچه ټکان ورکونکې ده او په خبره یې د طالبانو د حکومت او نړیوالو د نه همکارۍ له کبله میلیونونه افغانان ناهیلي شوي دي.

په راپور کې د دغې شورا د افغانستان د مشر نیل ټرنر په حواله راغلي، د طالبانو د حکومت دا دي کال پوره شوه، خو لا هم د افغانستان بهرنۍ شتمني کنګل ده، مرکزي بانک بشپړ فعاله نه دی او د پراختیا ښکاره څرک نه ښکاري.

طالبانو بیا له دې وړاندې ادعا کړې چې دوی د افغانستان اقتصاد له سقوطه ژغورلی او ویلي یي دي چې بانکي چارې هم نژدې عادي حالت ته ګرځېدلي دي.

ملا برادر: افغانستان نږدې راتلونکي کې له اقتصادي پلوه پر ځان بسيا کېدلی شي

د طالبانو د حکومت د رئیس الوزرا لومړی مرستیال ملا عبدالغني برادر

د طالبانو د حکومت د رئیس الوزرا لومړی مرستیال وایي، افغانستان نږدې راتلونکې کې له اقتصادي پلوه په ځان بسیا کېدلی شي.

ملا عبدالغني برادر دغه څرګندونې نن په کابل کې د اوبو او انرژۍ په سکټور کې د پانګونې د جذب په نوم کنفرانس ته وکړې.

برادر ویلي، هره ورځ د کانونو د کېندنې او بندونو جوړولو په برخه کې کارونه زیاتیږي.

طالبان دغه ډاډ داسې مهال ورکوي چې په افغانستان کې اوسنی اقتصادي ناورین بې ساری بلل شوی او ویل کېږي چې پنځه لکه کسان بې دندې شوي دي.

پر طالبانو دا نیوکه هم کېږي چې د کانونو په کېندنه کې بېړه کوي او له پوره تخنیکي دقته کار نه اخلي.

اشرف غني: زما له وتلو مخکې د جمهوري نظام ستنې د ړنګېدو په حال کې وې

پخوانی ولسمشر

د افغانستان پخوانی ولسمشر اشرف غني وایي، مخکې له دې چې له کابله ووځي او طالبان کابل ته ننوځي، د جمهوري نظام ستنې د ده په وینا د یو شمېر لورو له خوا چې پردې نظام یې معامله کړې وه، د نړېدو په حال کې وې.

ښاغلي غني دغه څرګندونې له اې بي ان افغان خپروندې شبکې سره په یوه نوې مرکه کې کړي دي.

ښاغلي غني د افغانستان د سولې لپاره د امریکا د پخواني ځانګړي استازي زلمي خلیلزاد په ګډون د یو شمېر وتلو افغان څېرو نومونه اخیستي او هغوی یې تورن کړي چې د جمهوري نظام د کمزوري کولو لپاره یې کار کاوه.

اشرف غني په دې مرکه کې د وسله والو طالبانو په وړاندې جګړه کې د افغانستان د وسله والو ځواکونو د روحیې کمزورتیا د جمهوري نظام د ړنګېدو یو بل اساسي عامل بللی دی.

هغه په دې مرکه کې دا هم ویلي چې دی د افغانستان د اساسي قانون له مخې تر اوسه قانوني ولسمشر دی او واک به هغه چاته رسماً وسپاري چې ولس یې غوره کوي.

د افغانستان پخوانی ولسمشر دغه څرګندونې داسې مهال کوي چې د جمهوري نظام د ړنګېدو او واک ته بیا د طالبانو د رسېدو کال په پوره کېدو دی.

د تېر کال د اګست په پنځلسمه طالبانو کابل ونیوه او جمهوري نظام سقوط وکړ.

۳۰۰ افغانان له پاکستان اسپانيا ته ولېږدول شول

ارشيف

د هغو افغانانو الوتکه چې افغانستان کې یې له اسپانوي ځواکونو سره کار کړی و، پرون له اسلام اباده د مادرېد خواته روانه شوه.

فرانس پریس اژانس ویلي، دغې الوتکه کې درې سوه کسان سپاره و چې د اسپانیا د ماموریت کارکوونکي او د کورنۍ غړي یې په‌کې شامل دي.

دا خبر د اسپانیا بهرنیو چارو وزارت په یوه خبرپاڼه کې ورکړی دی.

دغو افغانانو په افغانستان کې د ناټو په چوکاټ کې د اسپانیا له ځواکونو او یا سفارت سره کار کړی چې اوس یې د فرانس پریس په وینا ژوند له خطر سره مخامخ و.

د يادونې ده چې په بېلابېلو هېوادونو کې زرګونه هغه افغانان لا هم بهر ته د تللو انتظار کوي چې له بهرنيانو سره کار کړی دی.

نور راوښيه

XS
SM
MD
LG