د شمالي وزیرستان پولیس وايي، وسله والو پرون په میرلي کې د جمعیت علمای اسلام (ف) دوه سیاستوالان او دیني عالمان وژلي دي.

د میرلي تاڼې پولیسو بېګاه په يو بیان کې ویلي چې قاري سمیع الدین او د هغه ملګری قاري نعمان له موسکي څخه عیدک ته روان ول چې وسله والو وویشتل.

تر اوسه معلومه نه ده چې دواړه کسان چا او ولې وژلي دي؛ خو د شمالي وزیرستان د پولیسو مشر فرحان خان پرون په بیان کې ویلي دي چې پلټنې یې پیل کړې دي.

د قاري سمیع الدین او قاري نعمان له وژنو سره په شمالي وزیرستان کې سږ کال د هدفي بریدونو شمېر ۳۱ ته ورسېد.

د سعودي عربستان په مشرۍ ائتلاف وايي، د چهارشنبې په ورځ یې هغه پنځه بې پیلوټه الوتکې راوغورځولې چې پردې هیواد د بریدونو لپاره کارول شوې وې.

د ائتلاف ویاند ترکي المالکي ویلي چې دغه الوتکې د سعودي عربستان په ختیځه سیمه او مدینه منوره کې شنډې شوې دي. نوموړي نه دي ویلي چې دا الوتکې چا توغولې وې.

دا په داسې حال کې ده چې په وروستیو اوونیو کې د ایران له ملاتړه برخمنو حوثیانو پر سعودي عربستان بریدونه زیات کړي دي. په دغو بریدونو کې د ریاض پر نړیوال هوايي ډګر برید هم شامل دی چې ګڼو کسانو ته یې مرګ ‌ژوبله اړولې ده.

حوثیانو تر دې مخکې ژمنه کړې وه چې پر مکې مکرمې او مدینې منورې به بریدونه نه کوي.

د ایران د پارلمان ریس وایي، ترڅو چې د تهران غوښتنې نه وي منل شوي، له واشنګټن سره به خبرې ونکړي.

د ایراني رسنیو د راپورونو له مخې محمد باقر قالیباف په تهران کې د پاکستان د پوځ له لوی درستیزعاصم منیرسره په کتنه کې ویلي چې امریکا باید د هرمزتنګي د بیا پرانستلو لپاره د ایران اوه شرطونه پوره کړي که نه د تهران باورنشي ترلاسه کولای.

د ایران په غوښتنو کې چې واشنګټن ته یې وړاندې کړي، د دغه هېواد پر بندرونو د امریکا د سمندري محاصرې پای ته رسول، د تېلو پر صادراتو د بندیزونو لرې کول او په ټوله سیمه کې د جګړو درول شامل دي.

د راپورونو له مخې د ایران ولسمشر مسعود پزشکیان هم د سې شنبې په ورځ په تهران کې له عاصم منیر سره د پاکستان د منځګړیتوب د هڅو او د سیمې د وروستیو تحولاتو په اړه خبرې وکړې.

پاکستان د امریکا او ایران ترمنځ د منځګړي رول لوبوي. د پاکستان په منځګړیتوب د جون په میاشت کې یوه لنډمهاله هوکړه هم شوې وه خو څو اوونۍ وروسته د دواړو هېوادونو ترمنځ شخړې بیا پیل شوې. دا د جون له میاشتې راهیسې ایران ته د پاکستان د پوځ د لوی درستیز پنځم سفردی چې ترسره کوي یې.

د قطر بهرنیو چارو وزارت له ایران وغوښتل چې د انټرنټ کېبلونو د پرې کولو په شمول له هغو بریدونو او ګواښونو چې د سیمې امنیت ګواښي، لاس واخلي.

د قطر بهرنیو چارو وزارت د سې شنبې په ورځ وویل چې فارس خلیج او هرمز تنګي کې د انټرنټ کېبلونو په نښه کول به د سیمې هېوادونه زیانمن کړي.

قطر دغه غبرګون وروسته له دې څرګند کړ چې د ایران سپاه پاسداران ځواکونو ویاند په فارس خلیج او هرمز تنګي کې د انټرنټ په اوه لویو کېبلونو د احتمالي برید خبره وکړه.

قطر غوښتنه وکړه چې نړیوالو قوانینو ته دې پاملرنه وشي، د بېړیو ازاد تګ راتګ دې ډاډمن او هرمز تنګی دې پرانیستی پرېښودل شي.

د قطر بهرنیو چارو وزارت ټینګار کوي چې د امریکا او ایران ترمنځ اوسنۍ شخړه دې د خبرو له لارې حل شي.

قطر وايي د تهران او واشنګټن ترمنځ تماسونه او د پیغامونو تبادله دوام لري.

د امریکا ولسمشر ډونالډ ټرمپ اعلان وکړ چې چمتو دی د چین له ولسمشر شي جین پینګ او د روسیې له ولسمشر ولادیمیر پوتین سره د اټومي وسلو په اړه درې اړخیزه ناسته وکړي.

ټرمپ د سپینې ماڼۍ بهر خبریالانو ته وویل چې د داسې یوې ناستې هدف به د اټومي وسلو او اټومي بې وسلې کولو په اړه بحث وي.

هغه زیاته کړه، که شي جین پینګ وغواړي داسې یوه ناسته جوړه کړي، نو دی به هم پکې ګډون وکړي.

روسیې تر دې مخکې اعلان کړی و چې ښايي د ټرمپ، پوتین او شي ترمنځ یوه درې اړخیزه ناسته په چین کې راتلونکې میاشتې د "اسیا-پسیفیک اقتصادي همکارۍ" (APEC) د سرمشریزې په څنډه کې ترسره شي.

خو د اوکراین د بهرنیو چارو وزیر اندري سیبیها د دې وړاندیز مخالفت کړی او ویلي یې دي چې د روسیې، چین او متحده ایالاتو د مشرانو ترمنځ ناسته به یوازې پوتین وهڅوي چې جګړې ته دوام ورکړي.

د فرانسې د پلازمینې پاریس په شمول په څو ښارونو کې د شپې ګرځبندیز لګېدلی دی.
دا وروسته تر هغه چې د اوونۍ په سر کې تاوتریخجنې مظاهرې د مغازو او دوکانونو په چور او تالان واوښتې.

د فرانسې صدراعظم سباستین لوکارنو ویلي ګرځبندیز به د اړتیا سره سم لګول کېږي او تر دې دمه یې ښه نتیجه ورکړې ده.

پولیسو له شنبې راهیسې لږ تر لږه ۲۵۰۰ کسان نیولي دي.

په مظاهرو کې د یوې نجلۍ سترګه ړنده شوې او د یوه هلک لاس پرې شوی.

خلک په اول کې د ګرانۍ په غبرګون راوتلي و او حکومت یې تورناوه چې د قیمتونو د ټيټولو لپاره ډېر څه نه کوي.

اخوا په ایټالیې په تېره میلان ښار کې هم مظاهرې روانې دي او حکومت به لږ تر لږه ۵۰۰ اضافي پوځیان هلته ځای پر ځای کړي.

د پولنډ د صدراعظم مرستیال او بهرنیو چارو وزیر رادوسواف سیکورسکي په افغانستان کې د ناټو د متحدینو د پوځي رول په اړه د امریکا د دفاع وزیر پیټ هګسېټ څرګندونې په کلکه رد کړې.

هګسېټ د امریکا په ټېنېسي پوهنتون کې د وینا پر مهال ویلي و چې په افغانستان کې د ناټو د شاوخوا ۵۰ غړو او متحدو هېوادونو له ډلې یوازې یو یا دوه هېوادونه په رښتیني توګه په جګړه کې ښکېل و او د جګړې ډېره برخه امریکایي ځواکونو پر مخ وړله.

خو د پولنډ د بهرنیو چارو وزیر د یکشنبې په ورځ پر اېکس ټولنیزه شبکه د دغو څرګندونو په غبرګون کې لیکلي: "ښاغلی وزیره، دا خبره د هغو ۴۴ پولنډي سرتېرو کورنیو ته وکړه چې د افغانستان په غزني ولایت کې د امنیت د ټینګښت پر مهال ووژل شول."

پولنډ له ۲۰۰۲ تر ۲۰۲۱ کال پورې په افغانستان کې پوځي حضور درلود او زرګونو پولنډي سرتېرو په دغه هېواد کې خدمت کړی دی.

تر دې وړاندې د امریکا ولسمشر ډونالد ټرمپ هم ویلي و چې په افغانستان کې د ناټو د متحدینو ځواکونه تر ډېره د جګړې له لومړۍ کرښې شاته پاتې شوي و.

دغو څرګندونو هم د اروپایي متحدینو سخت غبرګونونه پارولي و.

د جرمني د بهرنیو چارو وزارت د دوشنبې په ورځ د ایران سفیر احضار کړ.

دا اقدام وروسته له هغه شوی چې یوې جرمنۍ محکمې تېره اوونۍ یو افغان او یو ډنمارکی وګړی د ایران لپاره د اسرائیل د ملاتړو شخصیتونو د وژلو د دسیسې په تور په بند محکوم کړل.

د هامبورګ محکمې ډنمارکی وګړی په اته‌نیم کاله او افغان وګړی په څلور نیم کاله بند محکوم کړي دي.

د فرانس‌پرس د راپور له مخې، د جرمني د څارنوالانو په وینا، ډنمارکي وګړي د ایران له استخباراتو سره مستقیمه همکاري لرله او افغان وګړی یې چې نوم‌یې نه‌دی په ډاګه شوی، د بریدونو د ترسره کولو لپاره ګومارلی و.

محکمې ویلي چې دواړه کسان د ایران په لارښوونه په ترهګریزو فعالیتونو کې ښکېل و.

د جرمني د بهرنیو چارو وزارت ویلي، ایران ته به اجازه ورنه‌کړي چې د دغه هېواد ازاده ټولنه وګواښي.

خو په برلین کې د ایران سفارت تر دې وړاندې دا تورونه بې‌بنسټه بللي و.

کرملېن وايي، امکان لري چې د روسیې، امریکا او چین ولسمشران راتلونکې میاشت په چین کې د اسیاـ پاسفیک د اقتصادي همکاریو سازمان، اپېک د سرمشریزې په څنډه کې درې اړخیزه غونډه وکړي.

د کرملېن ویاند دیمیتري پسکوف د دوشنبې په ورځ وویل، د دغې احتمالي غونډې موضوع مطرح شوې، خو تر اوسه‌یې د ترسره کېدو او اجنډا په اړه کومه هوکړه نه‌ده شوې.

د راپورونو له مخې، د روسیې ولسمشر ولادیمیر پوتین د اوکراین د جګړې د پای ته رسولو په اړه د خبرو لپاره د دې غونډې وړاندیز کړی دی.

خو د اوکراین د بهرنیو چارو وزیر اندري سیبیها له دې نظر سره مخالفت کړی او ویلي یې دي چې د روسیې، چین او امریکا د مشرانو غونډه به پوتین د جګړې دوام ته وهڅوي.

کرملېن ټینګار کړی چې د اوکراین له ګډون پرته د جګړې د پای ته رسولو وروستۍ هوکړه ناشونې ده.

د امریکا ولسمشر ډونالډ ټرمپ وايي، روسیه اوس مهال له ایران سره ډېره مرسته نه کوي او دی غواړي چې دا وضعیت همداسې دوام وکړي.

ټرمپ د یکشنبې په ورځ، د تلې په ۲۶مه، په خپله ټولنیزه شبکه «ټروت سوشیل» کې دا څرګندونې کړې دي.

هغه زیاتوي: «روسیه د هغه څه په پرتله چې له ایران سره یې د مرستې لپاره کولی شي، ډېر لږ کار کوي، که په اصل کې کوم کار کوي هم.»

ټرمپ دا څرګندونې په داسې حال کې کوي چې امریکايي رسنیو په وار وار له ایران سره د روسیې د مرستو په اړه راپورونه خپاره کړي دي. خو ټرمپ، چې تمرکز یې ایران سره پر جګړې دی، تورن شوی چې د اوکراین پر وړاندې د روسیې جګړې ته کافي پاملرنه نه کوي.

د ټرمپ په مشرۍ دامریکا حکومت هڅه کړې چې د مسکو او کیف ترمنځ د منځګړي رول ولوبوي؛ خو تر اوسه د جګړې د پای ته رسولو لپاره کومې پرېکنده پایلې ته نه دی رسېدلی.

ولسمشرټرمپ یو ځل بیا د اوکراین پر ولسمشر ولودیمیر زلنسکي انتقاد کړی او ویلي یې دي چې هغه «نه غواړي دا جګړه پای ته ورسوي او ښايي هېڅکله یې هم د پای ته رسولو اراده نه لرله.»

د فرانسې ولسشمر ایمانویل مکرون په داسې حال کې چې د یکشنبې په ورځ، د تلې په ۲۶مه، په پاریس کې لاریونونو دوام وکړ ، په یوه ټلوېزیوني وینا کې په واټونو کې د «بې‌حده تاوتریخوالي» سخته غندنه وکړه.

د فرانسې خبري اژانس د راپور له مخې، یوازې د شنبې په ورځ نږدې دوه زره او ۴۰۰ کسان نیول شوي او په مقابل کې یې نږدې زر پولیس او د ژاندارم ځواکونو غړي په تاوتریخوالي کې ټپیان شوي دي. د ځینو امنیتي ځواکونو ټپونه «جدي» بلل شوي دي.

د ولسمشر له ټلوېزیوني وینا څو ساعته وروسته، د فرانسې د کورنیو چارو وزیر لوران نونز د دوشنبې په ورځ، د تلې په ۲۷مه، ومنله چې پولیسو په ځینو ښارونو کې د وضعیت کنټرول له لاسه ورکړی دی.

نونز وویل پولیس د ورانکارو ډلو پر وړاندې د مقابلې لپاره ځکه چمتو نه وو چې دداسې وضعیت اټکل نه و شوی. هغه همداراز اعلان وکړ چې له همدې امله یې خپله استعفا وړاندې کړې ده.

تر دې وړاندې د اپوزیسیون ګوندونو او د کیڼ او ښي اړخ سیاستوالو د لوران نونز د استعفاء غوښتنه ځکه کړې وه چې دغو لاریونونو حکومت غافلګیر کړی .

خو د فرانسې ولسمشر امانوېل مکرون د هغه استعفا ونه منله. مکرون له نونز څخه وغوښتل چې د لوټمارانو د مخنیوي لپاره «په چټکۍ سره نوې لارې چارې» په کار واچوي.

لاریونونه د شنبې په ورځ د ژوند د لګښتونو د لوړوالي پر وړاندې د اعتراض په توګه پیل شول، خو وروسته د پاریس، لیون او لیموژ په ګډون په څو ښارونو کې په تاوتریخوالي، چور او تالان، او اور اچونې واوښتل.

په لیموژ ښار کې د ښاروالۍ تاریخي ودانۍ هم په اور کې له منځه تللې ده.

د دغو پېښو له امله رامنځته شوي مالي زیانونه سلګونو میلیونو یورو اټکل شوي.